ئەسسالامۇ ئەلەيكۇم ئوقۇرمەن مەن بۇ يەردە مال - دۇنيا ھەققىدە سۆزلىمەكچى ئەمەس ، ئەگەر ۋاقتىڭىز بولسا بىر ئوقۇپ بېقىڭ ، ئاللاھ خالىسا سىزگە زىيىنى تەگمەس .
تېمىسىنى << باي بولغىڭىز بارمۇ ؟ >> دەپ قويىشىمدىكى مەخسەت ماقالەمنى كۆپرەك ئادەم كۆرسە بىر ئادەم بولسىمۇ بۇ ھەقتە ئويلىنىپ باقسا دەپ ئويلىدىم .
مەن ئىلگىرى يېرىم ئەركەك نامىدا بىر ماقالە يازغان ئىدىم ، كۆرىلىشى يامان ئەمەس بولغان ، ئەمما مىللەتنىڭ ئەيىپ - نۇخسانلىرىنى كۆرسىتىدىغان مۇنداق تېمىلارنىڭ كۆرىلىش نىسبىتى مال - دۇنيا توغرىلىق يېزىلغان تېمىلارغا ھەرگىزمۇ يېتىشەلمەيدىكەن . تېخى بەزى بىر مۇنبەرلەر باشقا مۇنبەرلەرگە يوللىغان تېمىلارنى تەستىقلىمايدىكەن . بەلكىم ئۇلار مەزمۇنى بىلەن ھېسابلاشمايدىغان ئوخشايدۇ . ئۇلارغا پەقەتلا مۇنبەرنىڭ ئىناۋىتى بولسىلا بولىدىغاندەك ، مىللەت ، خەلق بىلەن كارى يوق . بەزى ئوقۇرمەنلەرمۇ ئۇلارنى سۆككىنىمگە نارازىلىقىنى ئىپادىلەپتۇ . مەن قايتا ئويلىنىپ باقسام ھەرقايسى ئۇيغۇر مۇنبەرلىرىدە دىنىي - ئېتقاد ، مىللىي ئۆرۈپ - ئادەتتىن چەتنىگەنلەرنى چەتكە قېقىپ سۆكىدىغانلار جىق ، ئۇلارغا توغرا يولنى ئۇلار قۇبۇل قىلالىغۇدەك دەرىجىدىن باشلاپ چۈشەندۈرۈپ يېتەكلەيدىغانلار يوقنىڭ ھېسابىدا ئىكەن . بىزلەر ئۇلارغا توغرا يولنى كۆرسىتىمىز ، خاتالىقنى تونۇتىمىز دەپ ئۇلارنى بىزدىن قاچىدىغان ، بىزنى يامان كۆرىدىغان قىلىپ قويۇشقا باشلاپتىمىز ۋە ھاكازالار.................
مەن بۇ ھەقتە كۆپ ئويلاندىم ، پىكىر يۈرگۈزۈپ تەپەككۈر قىلىپ باقتىم ( بەك چوڭقۇر قىلىپ كېتەلمىسەممۇ ئۆزەمگە چۇشلۇق قىلدىم ) بىر ھەقىقەتنى ھېس قىلدىم . بىز ئىسلامنى ، شەرمىي - ھايا ، ئەدەپ - ئەخلاقنى تەشەببۇس قىلىمىز يۇ ، نېمە ئۈچۈن بۇ دىننى بىزگە ئېلىپ كەلگەن ئەخلاقىنىڭ گۈزەللىكىدە ھەمتەڭ تېپىلمايدىغان زات << رەسۇلىمىز مۇھەممەد سەللەللاھۇ ئەلەيھى ۋە سەللەم >> نى ئۈلگە قىلمايمىز ؟ ئول زات دەۋەتنى باشلىغاندا ساھابىلەرنى ئىلگىرى قىلغانلىرىنىڭ ھەممىنى تاشلاشقا ، ھەممىدىن بىراقلا ۋاز كېچىشكە بۇيرىمىغان ئىدى ، بىراق بىزچۇ ؟ كۈنىمىز سۆكۈش بىلەن ، ئۈنىمىز تىللاش بىلەن مەشغۇل .
ئاددىي بىر مىسال ئالايلى : بىر ئېلىكتىرون ئالىمى بېرىپلا ئاددىي بىر دېھقانغا ئۆزى ياسىغان بىرەر ئۈسكىنىنىڭ ئەۋزەللىكنى ، دېھقانغا قانداق قولايلىق ئەپكېلىدىغانلىقىنى سۆزلىمەي ، بۇنى چوقۇم ئال دېسە دېھقان ئالارمۇ ؟ ئالغان تەقدىردىمۇ ئۇنىڭ قەدرىنى بىلەرمۇ ؟ ئەڭ مۇھىمى دېھقان بۇ نەرسىنى چۈشەنمەيدۇ ، شۇڭا قۇبۇل قىلمايدۇ .
بىز ئالدى بىلەن چۈشەندۈرۈشنى ئاساسىي ئورۇنغا قويۇشىمىز شەرت ، ھەربىر ئادەمگە ئۇنىڭغا لايىق ، چۈشىنەلەيدىغان رەۋىشتە تەشۋىقات ئەپبېرىشىمىز لازىم .
ئەمدى ئاساسىي مەزمۇنغا كەلسەك بىز ئۇيغۇرلار ئەسلىدىنلا ناچار مىللەت ئەمەس . ئەسلى بىز بىر تارىخىي ئارقا كۆرىنىشى بولغان ، ئەينى دەۋىرلەردە ئەجدادلىرىمىز شانلىق تارىخلارنى يېزىپ قالدۇرغان ، ئىنسانىي ھاياتلىقىدىكى ئەڭ توغرا يول بولغان يامانلىقتىن توسۇپ ، ياخشىلىققا بۇيرىيدىغان ئىسلامدىن ئىبارەت ساماۋىي دىنىي پىروگىرامما قېنىمىزغا سىڭىپ كەتكەن بىر مىللەت .
لېكىن يېقىنقى بىر قانچە ئەسىرلەردىن بۇيان ھەرخىل سەۋەبلەر تۈپەيلى ئىسلامنىڭ ھەقىقىتى خەلقىمىز قەلبىدە غۇۋالىشىشقا قاراپ يۈزلەندى . ھەتتا تاس - تاس قالدى بۇ مەشئەلنىڭ نۇرى خەلقىمىزدىن توسۇلۇپ قالغىلى . ئاللاھقا شۈكرى ھەر ھالدا بىر تۈركۈم يېڭى مەشئەلچىلەر باش كۆتۈرۈپ چىقىپ خەلقىمىزنىڭ قاراڭغۇ دىللىرىنى يورۇتۇشقا تىرىشتى . لېكىن مەشئەلمۇ يورۇقلۇققا تەلمۈرۈپ ، يورۇقلۇق ئىزدىگۈچىلەرگە يورۇقلۇق بېرىدىكەن ، باشقىلار يەنىلا ماددىي جەھەتتىن دۆلتىمىزدەك سوتسىيال دىمكىراتىك دۆلەتتە ئازاد تۇرمۇش كەچۈرۋاتقان بولسىمۇ مەنىۋى جەھەتتىن روھىي مەھكۇملۇقتا ياشاپ كەلدى ھەم كەلمەكتە . بولمىسا ۋەز - تەبلىغلەر كەڭرى ( قانداقلا بولمىسۇن يوق ئەمەس ) ، ھەر جۈمە كۈنى مەسجىد كە باردىغان بولسا ھەممە مەسجىدتە بىرلا تېمىنى چۆرىدەپ خەلىققە تەپسىلىي يەتكۈزۈشكە تىرىشۋاتقان ئىماملىرىمىزنىڭ ئاۋازى .......
يەنە تېخى مىللىي تەربىيچىلىرىمىزمۇ بار ، ئۇلارمۇ قاراپ تۇرمايدۇ ، ئىشقىلىپ مېدىراپ تۇرىدۇ ، قىردىن ئاشالمىسىمۇ ئۇلاردا سائەت سىتىرىلكىسىنىڭ روھى بار ، تىرىشىپ تۇرىدۇ .
مانا مەندەك چالا ساۋادلارمۇ قاراپ تۇرمايمىز تېخى ، ھېس قىلغاننى يېزىپ تۇرىمىز ، يەنە . . . . . يەنە نېمىشقا بىزنىڭ خەلقىمىزدە يۈكسىلىش يوق ؟
مەن مۇشۇ كالتە ئەقلىم بىلەن شۇنداق قارايمەنكى بىز دىن بىلەن تەرەقىياتنى ماسلاشتۇرالماپتۇق . ئەخلاق بولسا دىننىڭ مۇھىم بىر تەركىبى ، بۇ ھەقتە سۆزلىمىسەممۇ بولار .
توۋا ماۋۇ گېپىمنى لېكىن مانا مۇشۇ تور بەت ئېچىۋاتقان پىروگىراممىرلارنىڭ خېلى كۆپى نامازلىرى جايىدا ، ئىسلامنى قۇبۇل قىلغان بالىلار ئىكەنغۇ ؟ تور دېگەن ھازىر ئىنسانىيەت تەرەقىياتىنىڭ مەھسۇلى بولغان تۇرمۇشتا كەم بولسا بولمايدىغان مۇھىم ئاخبارات ۋاستىسىگە ئايلىنىشقا باشلىغان نەرسە تۇرسا ؟...................
ياق . خاتالاشماپتىمەن ، چۈنكى ئۇنداقلار ئازلا بىر قىسىمنى ئىگەللەيدۇ .
دىن بىلەن تەرەقىيات ماسلىشالامدۇ ؟
ئەلۋەتتە ماسلىشىدۇ ، ماسلىشىدۇ لا ئەمەس تېخى ئۇ ئىككىسى بىر - بىرىنى تولۇقلايدۇ . قانداق دەمسىز ؟ بۇنىڭغا مىساللار كۆپ ، سۆزلىگىلى تۇرسام ماقالە بەك ئۇزۇن بولۇپ كەتكۈدەك ، ئېغىر كۆرمىسىڭىز 56 فىلىم تورىغا كىرىپ ئاللاھنىڭ مۆجىزىلىرى دەپلا باسسىڭىز مۇنداق مەزمۇنلار كۆپ .
باياتىدىن بېرى دىن توغرىسىدا سۆزلىدۇق ، ئەمدى مىللەتكە قاراپ باقايلى ، يا ئاللاھ نېمىنى كۆردۈم ھەي مەن ، بۇ بۇلار ئۇيغۇرمۇ يا ؟ ھېچ بىر ئوخشىمايدۇ يا ؟ توۋا ............ تېخى گەپ - سۆزلەرمۇ تەرەققىي قىلىپتۇ . ئىشقىلىپ بىرلا ۋاقىتتا ئىككى - ئۈچ تىلنى بىرىكتۈرۈپ ئىشلىتىدىغانلار كۆپ ئىكەن . ئۇلار ھەقىقەتەنمۇ قالتىسكەن جۇمۇ !
كىيىملىرىمۇ ئوخشىمايدىكەن تېخى ، نېمىشقا ئوخشىمايدۇ ؟ ئۇلار ئۇيغۇردۇ ھە ؟ ئۇلار ئۇيغۇر ھەقىقەتەنمۇ ئۇيغۇر .
ئۇلارنىڭ مۇنداق بولۇپكېتىشىدە كۆپلىگەن سەۋەپلەر بار . ئەگەر ناماز ئوقۇسا خۇراپات ، كىيمنى ئۇزۇن كىيسە سەھرالىق ، ھاراق - تاماكىدىن يىراق تۇرسا زاماندىن كېيىن قالغانلار قاتارىغا تىزىمىز ئەمەسمۇ ؟
بولدى بەس . ئەمدى ئاز تولا پايدىلىق گەپلەرنى قىلاي ، باشقىلارنى قاچۇرماي .
سۇئال : كىشىلەر نېمە ئۈچۈن دىندىن قاچىدۇ ؟ بولۇپمۇ ئاياللار ، نېمە ئۈچۈن كىيىنىش ، يۈرۈش - تۇرۇشتا بۆشىكىدىلا بۇزۇلۇپ كېتىدۇ ؟
جاۋاب : كىشىلەرنىڭ دىندىن قېچىشى ئۇلارنىڭ دىننىڭ ھەقىقى مەنىسى بىلەن چۈشەنمىگەنلىكىدە ، بولۇپمۇ ئاياللاردا چۈشىنىش كەمچىل ، چۈنكى ئەرلەر ھېچ بولمىغاندا جۈمە كۈنى ، ھېيت نامازلىرىغا بېرىپ ۋەز - تەبلىغ ئاڭلايدۇ ، ئاياللارچۇ ؟ توي - تۆكۈنگە ، بارىدۇ ، نەزىر - چىراققا بارىدۇ ، ھەرخىل سورۇنلارغا بارىدۇ ، ساياھەتلەرگە بارىدۇ ، لېكىن ئۇلارنىڭ ھېچ قايسىسىدا دىنىي تەلىماتلار يوق .
ھەم دىنىي تەشۋىقاتلار بولغان ھېچ قانداق بىر مۇھىت بىلەن ئۇچراشمايدۇ . شۇڭا دىن دېگەننى پەقەت ئۆرۈپ - ئادەت دەپ چۈشىنىدۇ .
مەسجىدلەردە تەبلىغ ئاڭلىغان ئەرلەر يەتكۈزسۇن دەمسىز ؟ ئۇلار ئۆزلىرىمۇ چۈشەنمىسە نېمىنى يەتكۈزىدۇ ؟ بەلكىم مەسجىدتە ئوڭ ئاڭلىغىنىنى سول قىلىپ بارار . بالا بولسا دىنغا مۇناسىۋەتلىك ئىشلارنى دادىسىدىنمۇ ، ئانىسىدىنمۇ ئاڭلىمايدۇ ، پەقەت تېلۋۇزۇردىن پەلەستىن ، ئىراق ، ئافغانىستان قاتارلىق دۆلەتلەردىكى مۇسۇلمانلارنىڭ پاجىئەلىك قىسمىتىنى كۆرىدۇ ، مۇسۇلمانلارنى ئاجىز ، بىچارە دەپ ھېس قىلىدۇ ، شۇنىڭ بىلەن باشقا دىنلارغا قىززىقىپ قېلىشى ياكى دىنسىزلىشىپ كېتىشى مۇمكىن . كېيىنكى كۈنلەردىمۇ ئاياللار داۋاملىق دىينىمىزدىن خەۋەرسىز قالىدۇ .
يۈرۈش - تۇرۇشتىكى بۇزۇلۇشقا كەلسەك : مۇنداق بىر ھېكايە بار ، بىر ئوقۇتقۇچى ئوقۇغۇچىلىرىغا قەدىمقى ئۇيغۇرلار توغرىسىدا سۆزلەپ بېرىپتۇ ، ئۇيغۇرلارنىڭ ئۆرۈپ - ئادەتلىرى توغرىسىدا توختۇلۇپ ، ئىلگىركى ئۇيغۇرلارنىڭ كىيم - كېچەكلىرىنىڭ نەقەدەر گۈزەللىكىنى سۆزلەپ بېرىپتۇ . ئارىدىن بىر ئوقۇغۇچى << مۇئەللىم سىزمۇ ئۇيغۇرغۇ ؟ سىز نېمە ئۈچۈن ئاشۇنداق گۈزەل بولغان مىللىيچە كىيىملەرنى كىيمەيسىز ؟ >> دەپ سوراپتۇ . ئوقۇتقۇچى نېمە دېيىشنى بىلەلمەپتۇ . دېمەك بەزى ئوقۇتقۇچىلار بالىلارغا كىچىك ۋاقتىدىن باشلاپلا يېرىم يالىڭاچ يۈرۈشنى ئۆگىتىدۇ ( ئۆزى شۇنداق يۈرىيدۇ ) . بەزى ئانىلارمۇ بالىلىرىنىڭ ئالدىدىلا توغرا بولمىغان بەزى ئىشلارنى قىلىدۇ . شۇ سەۋەب << چاقنى بۇزغان تانىسى ، قىزنى بۇزغان ئانىسى >> ، <<كىندىكى ئوچۇق قىزنىڭ ، مەيدىسى ئوچۇق ئانىسى بار >> دېگەندەك ئىشلار تەبىيلا يۈز بېرىدۇ .
مۇنداق يامان ئادەتلەرنى ئۆزگەرتىشنىڭ بىردىن بىر ئامالى : خەلىقنى ئىسلاملاشتۇرۇش ، دىننىڭ ھەققىي ماھيىتىنى خەلىققە تونۇتۇش ، ئەجدادلارنىڭ تارىخنى تەشۋىق قىلىش قاتارلىق بىر قاتار خىزمەتلەرنى ئىشلىشىمىز كېرەك .
اللە ئىشلىرىمىزغا ئاسانلىق بەرسۇن ، ھەممىزگە ھىدايەت ، تەۋپىق ئاتا قىلسۇن !
بۇ پەقەت ئۆزۈمنىڭ قارشى ، ئەگەر خاتا بولسا توغرىسىنى قۇبۇل قىلىشقا مەن ھەر ۋاقىت تەييار ، تەلىم بېرەرسىلەر .
ئاپتۇر : ئۆزۈم
ئەسلى يوللانغان مەنبە :
http://www.alhux.com/bbs/read.php?tid=279
