ئىگىلىپ قىلسا سالام مەككار ئىكەن بىلمەپتىمەن،
قاش ئېتىپ ،ئويناتسا كۆز ھەييار ئىكەن بىلمەپتىمەن.
قەدىردانىم ،ئۈلپىتىم سەن جان - جىگەر دوستۇم دىسە،
يەڭ ئىچىدە خەنجىرى تەييار ئىكەن بىلمەپتىمەن.
گاھىدا بازغانمۇ ئۇردۇم ،گاھىدا باستىم كۆيەك،
ئوتتا تاۋلاپ كۆرمىگەچ تۇچمۇ - تۆمۈر بىلمەپتىمەن.
ئايلىنىپ تاغلار ئارا قازدىم باھاسىز تاشنى مەن،
ئۇستا زەگەر بولمىغاچ ئالتۇنمۇ - مىس بىلمەپتىمەن.
ئاخىرى تاپتىم بۈگۈن چىن ۋاپادار دوستنى مەن ،
ئاغرىنىپ ئېيتقان سۆزىنىڭ مەنىسىنى بىلمەپتىمەن.
كۆزلىرىمگە ماي تولۇپ ،ئەكسچە كۆرگەن چاغلىرىم،
ئېچىنىپ تىككەن كۆزىنىڭ زەردىسىنى بىلىمەپتىمەن.
سەيپىدىن ئەزىزى
