ئانا
ئانا، ئانا
چاقىرسام مەن ھەرئاندا شۇنداق
خۇددى خاقان قىلغاندەك يارلىق،
پۇتى تۇرۇپ بېشىدا كەلگەن.
مەن ئۇۋىتىپ يىگەن نانلارنىڭ
ئۇۋىقىنى پەم بىلەن تەرگەن.
ئوخشاپ كەتسە ئەتكەن تامىقى،
ئۆزى يىمەي يىگۈزۈپ بىزگە
چىقىپ كەتكەن ھاردۇقى.
* * *
جاينامازدا تۈن بويى
بەختىم ئۈچۈن قىلىدۇ دۇئا ؛
ئىككى ھەرەم زىيارىتىگە،
ئىككى ئالەم سائادىتىگە
باغى جەننەت زىياپىتىگە
پەرزەنتىمنى نىسىپ قىل خۇدا
دەپ تىلەيدۇ، تىلەيدۇ ئۇدا .
ھەر نەپلىدە، بامداتتىمۇ مەن
ئىشراقتىمۇ، زۇھادىمۇ ھەم ،
دۇئاسىدا كۆكلىگەن ھەردەم.
* * *
يىرتىلغاندا بالىنىڭ ئەڭلى،
سۇنۇپ قالار ئانىنىڭ كۆڭلى.
بالام يىسە تويغىنىم دەيدۇ،
بالىنىڭلا غېمىنى يەيدۇ.
ئانا جېنىم تاتلىقىم ئانا،
ئۆينىڭ ھۇلى شاتلىقىم ئانا.
قىشتا ئىسسىق باغرى باھارىم،
يازدا مەجنۇن تاللىقىم ئانا.
قاقاسلىقتا چىمەنزار بېغىم،
ھەسەللىقىم- باللىقىم ئانا.
مىڭ ئالتۇننىڭ ۋەزنىدىن ئېغىر،
ئانا دېگەن ھەرىپمۇ ماڭا .
* * *
ئىگەم پەرۋىش قىلغان ئۇرۇقمەن،
ۋۇجۇدۇڭدا بىخلانغان .
غەملىرىڭنى ئەكچىتمەك ئۈچۈن،
دەرۋازاڭغا مەھكەم مىخلانغان.
ئېچىپ قويغىن شادلىق ئۆيىنىڭ ،
ئىشىكىنى، دەرىزىسىنى.
مەن بار ئازاب توزانلىرىنىڭ
سۈرتكىلى ھەر زەررىسىنى.
ئانىسىزلار قېلىپ كوچىدا
مېھىر تىلەپ بولسا سازايى
سەن تىلەيسەن شۇ بىچارىنىڭ
ئارامبەخىش بولسا دەپ جايى.
ئۆيى يوققا ئۆي بەرگۈڭ كېلەر،
ئۆمرى يوققا يەنە بىر ئۆمۈر.
* * *
مەرد، باھادىر بولسا ئوغلۇڭ ھەم
دىيانەتلىك چوڭ بولسا قىزىڭ،
سانا ئېيتىپ قىلىسەن شۈكۈر
نۇرلانغاندەك قەدىمىي ئىزىڭ.
خان ئانىسى بولساڭمۇ ئەگەر،
كىبىرلەنمەك ساڭا يوچۇن، يات.
قىزىڭ تىكىپ بەرگەن چىت كۆينەك
شاھتاۋاردىن ئەزىز قاتمۇ- قات.
مودا بولسا ياۋرۇپا ئەڭلى
ئەنئەنىگە بولۇپ تەرەپدار،
دەيسەن خەقنى دورىماق ئۇيات.
يۈرىكىڭدە ئالەمچە سۆيگۈ،
يوقلۇق ئارا بار مەۋجۇداتنى
مېھرى بىلەن تۇرىدۇ ئوراپ.
* * *
دۇنياۋى ئالىم ھاجىپنى تۇغقان،
زەمران كەبى مۆھتىرەم ئانا.
ئىپارخان،رىزۋانگۈل، نوزۇگۇم ھەمدە
مايمىخان ۋە مايسىخانلاردەك
مىللەتنىڭ سەردار، سەرۋازى بولىمىش
ئىپپەتلىك ھەم باتۇر قىزلارنى
تۇغقانمۇ شۇ يەنىلا ئانا.
ئانا تەبىئەت- سېنىڭ گۈزەل جەزبىدار ھۆسنۈڭ.
ئانا يەر- سېنىڭ مېھرى- مۇھەببىتىڭنىڭ چەكسىزلىك ئەندىزىسى.
ئانا، سەن بولمىساڭ قالار ئىدى ئادەملەرنىڭ لېيى خام،
سەن بولمىساڭ نەدە ئويغۇرغا ئون ئىككى مۇقام.
