ماگۈيفېن، ئايال، 1942- يىل 3- ئايدا قەشقەردە بىر دېھقان ئائىلىسدە تۇغۇلغان، ئۇيغۇر، ئۇيغۇرچە ئىسمى ئالتۇنخان. چىنچياڭ ئەلنەغمە ئارتىسى. دادىسى مايۈنتىڭ خېبى چېڭدېلىق خۇيزۇ. 1931- يىل "18-سىنتەبىر ئۆزگىرىشى" دىن كېيىن مايۈنتىڭ شەرقىي شىمال ياپۇنغا قارشى تۇرۇش پىدائىيىلار قوشۇنىغا قاتناشقان، كېيىن قوشۇنغا ئەگىشىپ شىنجاڭغا كېلىپ قالغان. ئۇ قوشۇندا ئارقا سەپ خىزمىتىنى ئىشلىگەن بولۇپ، دائىم قەشقەر شەھىرى ئەتراپىدىكى كۆكتاتلىققا كۆكتات سېتىۋالغىلى بېرىپ تۇرغان. بۇ جەرياندا بىر ئۇيغۇر قىزى بىلەن تونۇشۇپ قالغان ھەم ۋاقتىنىڭ ئۆتۈشى بىلەن ئىككىسى مۇھەببەتلەشكەن. ئۇيغۇرلاردا باشقا مىللەتكە قىز چىقىرىش ئادىتى بولمىغانلىقتىن قىزنىڭ بۇ ئىشىنى ئاڭلاپ ئاتا-ئانىسى، بوۋا-مومىسى قاتتىق خاپا بولۇپ قىزىنى نەزەر بەند قىلغان. لېكىن ئۇ مايۈنتىڭ بىلەن قاتمۇ-قات توسالغۇلارنى يېڭىپ توي قىلغان. كېيىن ئۇلار قەشقەر شەھىرىدىن ئايرىلىپ، تۈمەن دەرياسى بويىدا يەر تېرىپ تىرىكچىلىك قىلغان. ئۇزاق ئۆتمەي يەنە ئۈرۈمچىگە كۆچۈپ بېرىپ دۆڭكۈۋرۈكتە ئولتۇراقلاشقان. 1947- يىلى مايۈنتىڭ ئائىلىسىنى ئېلىپ ئەسلى يۇرتى خېبى چېڭدېغا قايتىش يولىدا بېيجىڭغا كىرىشىگىلا ئويلىمىغان يەردىن ھۆكۈمەت ئۇلارنى شىنجاڭغا قايتىپ كېتىشكە مەجبۇرلىغان. شىنجاڭغا قايتىش يولىدا ئۇلار 1948- يىلى قىشتا ۋۇجوڭ شەھىرىگە يېتىپ كەلگەن ھەم شۇ يەردە تۇرۇپ قېلىپ مايۈنتىڭ ئۆي ئاقارتىش بىلەن ئايالى كىشىلەرنىڭ كىر-قاتلىرىنى يۇيۇپ بېرىش بىلەن تۇرمۇش كەچۈرگەن. ئۇلار تۇرۇۋاتقان جايدا بىر نامى چىققان ئاشخانا بار بولۇپ ئاشخانا خوجايىنى خۇيزۇ بولغاچقا ئۇلارغا ھېسداشلىق قىلغان ۋە دائىم ئۇلارنى سېتىپ بولالمىغان تاماق ۋە مانتا بىلەن ئۇلارغا ياردەم قىلىپ تۇرغان.
1949- يىلى 9- ئايدا نىڭشيا ئازات بولغاندىن كېيىن ئۇلارنىڭ چوڭ ئوغلى ۋۇجوڭ شەھەرلىق ھۆكۈمەتكە قوبۇل قىلىنىپ، ئالاقىچىلىق خىزمىتىنى ئىشلىگەن. مايۈنتىڭنىڭ ئايالى شەھەرلىك ھۆكۈمەت ئورگىنىدا تازىلىق ئىشچىسى بولغان، مايۈنتىڭ لەنجۇغا بېرىپ تۆمۈر زاۋاتىدا ئىشچى بولغان. ماگۈيفېن (ئالتۇنخان) دەل مۇشۇنداق ئائىلىدە تۇغۇلۇپ چوڭ بولغان. ماگۈيفېن (ئالتۇنخان) كىچىكىدىن باشلاپ چىنچياڭ ئەلنەغمىسىگە قىزىقىپ قالغان بولۇپ، 9 ياشقا كىرگەندە ۋۇجۇڭ شەھەرلىك چىنچياڭ ئەلنەغمە ئۆمىكىگە كىرىپ ئايال چامباشچىلىق رولىنى ئېلىشنى ئۆگەنگەن. 1952- يىلى 10 ياشقا كىرگەن ماگۈيفېن (ئالتۇنخان) ئاچىلىرى بىلەن بىرلىكتە ۋۇجوڭدىكى بىر زاۋۇتقا كىرىپ رەخت توقۇشنى ئۆگەنگەن، شۇنىڭ بىلەن بىر ئائىلە كىشىلىرىنىڭ تۇرمۇشى كاپالەتكە ئىگە بولغان. 1953- يىلى ۋۇجۇڭ شەھەرلىك چىنچياڭ ئەلنەغمە ئۆمىكى 20 نەپەر كورسانت قوبۇل قىلىدىغانلىقى توغرىلىق ئېلان چىقارغان. زاۋۇتتا رەخت توقۇشنى ئۆگىنىۋاتقان ماگۈيفېن (ئالتۇنخان) ئانىسىنىڭ ھەمراھلىقىغا ئۆمەككە بېرىپ تىزىمغا ئالدۇرغان. ئۇنىڭ سەنئەت ھاياتى شۇنىڭ بىلەن رەسمىي باشلانغان. 13 يېشىدا تۇنجى قېتىم "ئۈچ قېتىم توۋا قىلىش" دېگەن دېگەن ئەلنەغمە تىياتىرىدا رول ئالغان. 1964- يىلى نىڭشىيا خۇيزۇ ئاپتونوم رايونى بويىچە ئۆتكۈزۈلگەن سەنئەت كۆرىكىدە ئوينالغان ئەلنەغمە تىياتىرىدا باش رول ئېلىپ جامائەتچىلىككە تونۇلغان ھەمدە مەركىزىي ئەلنەغمە تىياتىر شۆيۈنىدە بىلىم ئاشۇرغان. ئوقۇش پۈتتۈرۈپ قايتىپ كەلگەندىن كېيىن 1964-، 1965- يىللىرى نىڭشيا ئوپىرا ئۆمىكىگە ئىككى قېتىم تەكلىپ قىلىنغان ۋە تىياتىرلاردا باش رول ئالغان ھەمدە يىنچۈەنگە كېلىپ ئىشلىگەن.
ئالدىنقى ئەسىرنىڭ 80- ۋە 90- يىللىرىدا كۆپ قېتىم گەنسۇ، شىنجاڭ ۋە شەنشى قاتارلىق جايلارنىڭ تەكلىپى بىلەن سەنئەت ئالماشتۇرۇش ۋە ھال سوراش ئويۇنى قويۇش پائالىيەتلىرىگە قاتناشقان ھەم تاماشىبىنلارنىڭ، سەنئەت ساھەسىدىكى داڭلىق شەخسلەرنىڭ ياخشى باھاسىغا ئېرىشكەن.
1985- يىلى شىنجاڭ ئۇيغۇر ئاپتونوم رايونى قۇرۇلغانلىقىنىڭ 30 يىللىقىنى تەبرىكلەش ھارپىسىدا تەكلىپ بىلەن شىنجاڭغا كېلىپ تەڭرىتېغىنىڭ جەنۇب، شىمالىدا ئويۇن قويۇشقا قاتناشقان. "شىنجاڭ گېزىتى"، "ئۈرۈمچى كەچلىك گېزىتى" قاتارلىق ئاخبارات ۋاستىلىرى "نۇر چېچىپ تۇرغان ئالتۇنگۈل- ئالتۇنخان"، "چېگرادىكى ئالتۇنگۈل ماگۈيفېن" قاتارلىق تېمىلاردا خەۋەر بەرگەن. شىنجاڭ ئۇيغۇر ئاپتونوم رايونىنىڭ شۇ ۋاقتتىكى رەئىسى ئىسمايىل ئەھمەت ئۇنى قوبۇل قىلىپ؛" ئۇيغۇرلار ھەم ناخشا ئوقۇيالايدۇ، ھەم ئۇسۇل ئوينىيالايدۇ، لېكىن چىنچياڭ ئەلنەغمىسى ئوينايدىغان بىردىنبىر ئۇيغۇر سىزكەنسىز، سىز بىز كۈپچىلىكنىڭ پەخرى" دېگەن.
1989- يىلى دۆلەت ئۇنىڭغا "دۆلەتلىك 1- دەرىجىلىك ئارتىس" ئۇنۋانى بەرگەن. جۇڭگو ئەلنەغمىچىلەر جەمئىيىتىنىڭ ئەزالىقىغا قوبۇل قىلىنغان. نىڭشيا خۇيزۇ ئاپتونوم رايونلۇق ئەدەبىيات-سەنئەتچىلەر بىرلەشمىسىنىڭ مۇئاۋىن رەئىسى، نىڭشيا خۇيزۇ ئاپتونوم رايونلۇق چىنچياڭ ئەلنەغمە تىياتىرىنىڭ مۇئاۋىن باشلىقى بولغان.
1995- يىلى 9- ئايدا بېيجىڭدا ئېچىلغان ب د ت نىڭ 4- قېتىملىق ئاياللار قۇرۇلتىيىغا قاتناشقان، ئۇ باش رول ئالغان "گاچا قىزنىڭ شىكايىتى" دېگەن تىياتىر دۇنيا ئاياللار قۇرۇلتىيىدا مۇكاپاتلانغان ھەم دۇنيا ئاياللار قۇرۇلتىيى زىيارەت ئۆمىكى بىلەن ياپونىيىدە ئويۇن قويغان.
مەنبە: نىڭشيا ئاخبارات تورى قاتارلىق مۇناسىۋەتلىك تور بەتلەر
[ بۇ يازمىنىelqiya 2012-01-19 22:21قايتا تەھرىرلىدى ]
