تۈركىيە ئاۋازى رادىئوسى خەۋىرى: ئەزەربەيجاننىڭ پايتەختى باكۇدا، «تۈرك دۇنياسى مەدەنىيىتىنىڭ بىر گەۋدىگە ئايلىنىشى، ئورتاق تۈرك ئېلىپبەسى ۋە تۈرك ئەدەبىي تىلى» تېمىسى ئاستىدا ئىلمىي مۇھاكىمە يىغىنى ئۆتكۈزۈلدى.
زامانىۋىي تەرەققىيات ئىتتىپاقى، ئەزەربەيجان ئايال مۇخبىرلار جەمئىيىتى ۋە خەلقئارا تارقىتىش مەركىزى بىرلىشىپ ئۆتكۈزگەن يىغىننى ئاتاتۈرك مەركىزى ۋە تۈرك ئوجاقلىرى باكۇ شۆبىسىمۇ قوللاپ –قۇۋۋەتلىدى.
بۈيۈك لىدەر ئاتاتۈركنىڭ ۋاپات بولغان كۈنىنى خاتىرىلەش مۇناسىۋىتى بىلەن ھۆرمەت بىلدۈرۈپ سۈكۈتتە تۇرۇلغاندىن كېيىن باشلانغان يىغىنغا ئالىملار، پارلامېنت ئەزالىرى، ئىجتىمائىي تەشكىلاتلارنىڭ ۋەكىللىرى بىلەن تۈركىيەنىڭ باكۇدا تۇرۇشلۇق باش ئەلچىسى ھۇلۇسى قىلىچ قاتارلىق كىشىلەرمۇ قاتناشتى.
يىغىندا، تۈرك دۇنياسىنىڭ مەدەنىيەت جەھەتتىن بىر گەۋدىگە ئايلىنىشى ئۈچۈن تۈركىي جۇمھۇرىيەتلەر مۇستەقىللىققە ئېرىشكەندىن كېيىنلا ئورتاق ئېلىپبە ئىشلىتىش توغرىسىدا قارار چىقىرىلغانلىقى خاتىرىلىتىپ ئۆتۈلدى.
لېكىن ئوخشاش بولمىغان سەۋەبلەر تۈپەيلى ئورتاق ئېلىپبە قارارىنىڭ ئىجرا قىلىنالمىغانلىقى تەكىتلەنگەن يىغىندا، تۈرك دۆلەتلىرى ئۈچۈن ئورتاق تىلنىڭ تۈركىيە تۈركچىسى بولۇشى كېرەكلىكى ئالاھىدە ئەسكەرتىلدى.  

مەنبە:http://uyghuracademy.com/?p=20665