تۇركىيە دىپلوماتىيە مىنىستىرى ئەھمەت داۋۇتئوغلۇ، ۋاندا يۈز بەرگەن يەر تەۋرەش ئاپىتىدىن كېيىن، تۈركىيەنىڭ باشقا دۆلەتلەرنىڭ ياردەم تەكلىپلىرىنى رەت قىلغانلىقىغا قارىتا خەۋەرلەرنىڭ يالغان ئىكەنلىكىنى ئېيتتى. ئەھمەت داۋۇتئوغلۇ بۇ ھەقتە بەرگەن باياناتىدا، «ھازىرغا قەدەر ھېچكىمگە ياردەم تەكلىپىڭلارنى رەت قىلىمىز دەپ باقمىدۇق، ھېچكىمگىمۇ ئىشىكىمىزنى تاقىۋالمىدۇق» دېدى.
تۈركىيەنىڭ ھەر قايسى جايلىرىدا ۋاندىكى ئاپەتكە ئۇچرىغۇچىلارغا ياردەم قىلىش سەپەرۋەرلىك پائالىيەتلىرى ئېلىپ بېرىلماقتا.
مەملىكەت مىقياسىدا پۈتكۈل پوچتا ئىدارىسى شۆبىلىرى، ۋان ۋالىي مەھكىمىسىگە ئەۋەتىلىدىغان ياردەملەرنى ھەقسىز توشۇشنى ئۈستىگە ئالدى.
دوست ۋە قېرىنداش ئەزەربەيجاندىمۇ ئاپەتكە ئۇچرىغۇچىلار ئۈچۈن ياردەم سەپەرۋەرلىك پائالىيىتى باشلاندى.
ئىسرائىلىيە باش مىنىستىرى بۇنيامىن نېتانياھۇ، باش مىنىستىر رەجەپ تاييىپ ئەردوغانغا تېلېفون قىلىپ، يەر تەۋرەشتىن قاتتىق قايغۇرغانلىقىنى بىلدۈردى.
ئۆتكەن يىلى ئىسرائىلىيەدە مەيدانغا كەلگەن دالا ئوت ئاپىتىنى تىزگىنلەش خىزمىتىگە تۈركىيەنىڭ يېقىندىن ياردەم قىلغانلىقىنى تىلغا ئالغان نېتانياھۇ، «بۇنداق قايغۇلۇق كۈنلەردە، تۈركىيەگە ياردەم قىلىشقا تەييارمىز» دېدى.
مىسىر باش مىنىستىرى ئەسسام شەرەفمۇ، ئەردوغانغا تېلېفون قىلىپ، ئاپەتتىن قاتتىق قايغۇرغانلىقىنى بىلدۈرۈپ، تۈركىيەگە ياردەم قىلىشقا ھەر زامان تەييار ئىكەنلىكلىرىنى قەيت قىلدى.
تۈركمەنىستان پىرېزىدېنتى گۇربانگۇلى بەردىمۇھەممەدوۋمۇ، جۇمھۇر رەئىس ئابدۇللاھ گۈلگە، ئاپەت مۇناسىۋىتى بىلەن تەزىيەسىنى بىلدۈرۈپ، ياردەم تەكلىپ قىلدى.
ئىسرائىلىيە، ئىسلامىي قارشىلىق كۆرسىتىش ھەرىكىتى (ھاماس) دىن كىيىن مىسىر بىلەنمۇ مەھبۇس ئالماشتۇرۇش كېلىشىمى ھاسىل قىلدى.
مەلۇماتلارغا ئاساسلانغاندا، مىسىردا جاسۇسلۇق جىنايىتى بىلەن ئەيىبلىنىپ قاھىرىدە قاماقتا يېتىۋاتقان ئىسرائىلىيە ۋە ئامېرىكا پۇقراسى بولغان ئىلان گىرەيپېلنى قويۇپ بېرىدىكەن.
ئىسرائىلىمۇ بۇنىڭ بەدىلىگە، 3 كىچىك بالا بولۇپ جەمئىي 25 مىسرلىق مەھبۇسنى قويۇپ بېرىشنى قوبۇل قىلدى. مەھبۇس ئالماشتۇرۇش ئىشلىرىنىڭ پەيشەنبە كۈنى ئېلىپ بېرىلىشى تەخمىن قىلىنماقتا.
ئەرەب باھارى تۇنجى باشلانغان دۆلەت تۇنىستا، زەينەل ئابىدىن بىن ئەلى ئاغدۇرۋېتىلگەندىن كىيىن تۇنجى سايلاملار ئۆتكۈزۈلدى.
تۇنىستا يېڭى ئاساسىي قانۇن تەييارلاپ چىقىدىغان مەملىكەتلىك قۇرغۇچى مەجلىس ئەزالىرىنى بېكىتىپ چىقىش مەقسىتىدە ئۆتكۈزۈلگەن سايلاملاردا ئەنناھدا ھەرىكىتى ھازىرچە ئۈستۈنلۈكتە تۇرماقتا.
ئەنگلىيەنىڭ ياۋروپا ئىتتىپاقى ئەزالىقى مەسىلىسى پارلامېنتتا ئاۋازغا قويۇلدى.
ئەنگلىيە پارلامېنتى، بۇ ھالقىلىق مەسىلىنى خەلقنىڭ ئاۋازىغا قويۇش - قويماسلىق مەسىلىسىنى پارلامېنتتا ئاۋازغا قويدى.
111 پارلامېنت ئەزاسى ئەنگلىيەنىڭ ياۋروپا ئىتتىپاقى ئەزالىقىنى رېفېراندۇم ئارقىلىق بېكىتىپ چىقىشنى قوللاپ ئاۋاز بەرگەن بولسا، 484 پارلامېنت ئەزاسى رېفېراندۇمغا قارشى چىقتى.
بۇنىڭدىن باشقا، ئەنگلىيە گواردىئان گېزىتى ئېلان قىلغان خەلق رايىنى سىناش نەتىجىسىگە ئاساسلانغاندا، خەلقنىڭ 70%ى ئەنگلىيەنىڭ ياۋروپا ئىتتىپاقى ئەزالىق مەسىلىسىنىڭ رېفېراندۇم ئارقىلىق بېكىلىتىشنى ئويلايدىكەن.
راي سىناشقا قاتناشقانلارنىڭ 49%ى بولسا، ئەنگلىيەنىڭ ياۋروپا ئىتتىپاقىدىن چېكىنىپ چىقىشىنى ياقلايدىكەن.
...........................؛؛؛
