شارابخور دۇنيا
ئايلانماقتا دۇنيا،
شارابخور ئاياللارنىڭ تومۇرىدا.
ئەرلەر ئۆلۈمنى كۈتمەكتە جىمجىت،
ھاياسى يىرتىلغان بەزمىخانىدا.
ئاياللار
ئۆز قەلبىدە ئۇنتۇلغان.
نۇمۇسنى
قەدەھلەرگە قاچىلاپ،
يۇتماقتا ۋە ئاستا-ئاستا
ئايلانماقتا ئالۋاستىلارغا.
بىلمەيدۇ،
بۈگۈنكى ئايال
كىم ئۈچۈن ياسىنىپ يۈرگىنىنى،
كىم ئۈچۈن مەست بولۇپ كۈلگىنىنى،
كىم ئۈچۈن تىرىلىپ،ئۆلگىنىنى،
ئاياللار يېشىلگەندە مەستلىكتىن،
ئەرلەرنىڭ ئۇيقۇسى قاچىدۇ.
غۇرۇر چېچەكلىسە قان رەڭدە،
مەھبۇسلار تىنىقىدا ئوت ئاچىدۇ.
ئەي،شارابخور دۇنيا،
مەست قىلماقچىمۇ سەن ھەممىنى،
قالدۇرۇپ قوي.
قىيامەتنىڭ بوسۇغىسىدا،
كۆيۈك تەننىڭ بىر پارچىسىنى.
<<ئوت پەسلى >>ناملىق شېئىرلار توپلىمىدىن.
ئاپتور:ئايىمنىسا سۇلايمان.
