ئايىتەلكۇرسى (ئارۇزچە)
بىرلا ئاللاھتىن بۆلەك يوقتۇر يەنە غەيرى ئىلاھ،
دائىما تىرىك ئەبەتكى ھەممىگە شەكسىز سىپاھ.
ئۇخلىماس، بولغاچقا ھەممە ئىلكىدە ئاسمان، زىمىن،
كىم ئىرۇر ئانىڭغا تەڭداش ھەممىگە مەلھەم-شىپا؟
ھېچ نەزەرسىز قالمىغايلەر ئىپتىدادىن ئىنتىھا،
ۋەلېكىن ئىنسان ئۆزى ۋەھيىچە سۈرگەي سىياھ.
كۇرسىدا ئاسمان، زىمىنى، بىھەرەجسىز ساقلىغاي،
شۇل سەبەبتىن مەرتىبە ھەم ئۇلۇقلۇق مىڭ راۋا.
ئايىتەلكۇرسىنىڭ ئەسلىسى:
بىر اﷲ دىن باشقا ھېچ ئىلاھ يوقتۇر؛ اﷲ ھەمىشە تىرىكتۇر، ھەممىنى ئىدارە قىلىپ تۇرغۇچىدۇر؛ ئۇ مۈگدەپ قالمايدۇ، ئۇنى ئۇيقۇ باسمايدۇ؛ ئاسمانلاردىكى ۋە زېمىندىكى ھەممە نەرسە اﷲ نىڭ (مۈلكى) دۇر؛ اﷲ نىڭ رۇخسىتىسىز كىممۇ اﷲ نىڭ ئالدىدا شاپائەت قىلالىسۇن؛ اﷲ ئۇلارنىڭ ئالدىدىكى (يەنى دۇنيادا قىلغان)، كەينىدىكى (يەنى ئۇلار ئۈچۈن ئاخىرەتتە تەييارلىغان) ئىشلارنىڭ ھەممىسىنى بىلىپ تۇرىدۇ؛ ئۇلار اﷲ نىڭ مەلۇماتىدىن (اﷲ) ئۇلارغا بىلدۈرۈشنى خالىغان نەرسىلەردىن (يەنى پەيغەمبەرلەرنىڭ تىلى ئارقىلىق بىلدۈرگەن نەرسىلەردىن) باشقا ھېچ نەرسىنى بىلمەيدۇ، اﷲ نىڭ كۇرسى (مەلۇماتى) ئاسمانلارنى ۋە زېمىننى ئۆز ئىچىگە ئالىدۇ. ئاسمان-زېمىننى ساقلاش ئۇنىڭغا ئېغىر كەلمەيدۇ. ئۇ يۇقىرى مەرتىۋىلىكتۇر، ھەممىدىن ئۇلۇغدۇر.
