ئادىل غوجالىم
توي قىلىپ 10 يىلدىن كېيىن...
توي قىلغان تۇنجى يىلى ئەر - خۇتۇن ئىككىڭلار ھەر قانداق ئىشتا بىر - بىرىڭلارغا شەرتسىز يول قويىسىلەر ، 10 يىلدىن كېيىن بىر - بىرىڭلارغا ئامالسىز يول قۇيىدىغان بولىسىلەر .
توي قىلغان تۇنجى يىلى ئايالىڭىز خىزمەتتتىن كېچىكىپرەك كەلسە ياكى ئانىسىنىڭ ئۆيىگە كېتىپ كەچ قالسا ، ئەنسىرگىنىڭىزدىن دېرىزە ئالدىغا تۇرۇپ ئۇنىڭ كېلىشىنى تۆت كۆز بىلەن كۈتىسىز . 10 يىلدىن كېيىن سىز يېرىم كېچىگىچە كەلمىسىڭىز ئۇيقۇسىز ھالدا دېرىزە ئەينىكىدىن قارايدىغىنى ئايالىڭىز بۇلىدۇ .
توي قىلغان تۇنجى يىلى دوستلىرىڭىز بىلەن ئولتۇرىدىغان بۇلۇپ قېلىپ ئايالىڭىزدىن 100يۈەن سورىسىڭىز يەتمەي قالمىسۇن دەپ 200 يۈەن بېرىدۇ ، 10 يىلدىن كېيىن ئىدارىدىن بەرگەن مىڭ يۈەن مۇكاپات پۇلىنى چۈشتە ئايالىڭىزغا بېرىپ، چۈشتىن كېيىن 100 يۈەن سورىسىڭىز،ئايالىڭىز كۆزىنى چەكچەيتىپ تۇرۇپ « نېمە قىلىسىز ئۇنچىۋالا كۆپ پۇلنى »دېگىنىنى ئاڭلايسىز.
تۇي قىلغان تۇنجى يىلى ئايالىڭىز ئۆيدىكى ئۇششاق - چۈششەك ئىشلار ئۈچۈن خاپا بولۇپ قالسا ئۇدۇللا بېرىپ سىزنىڭ ئانىڭىزغا دەيدۇ ، 10 يىلدىن كېيىن ئۆيدىكى ئىشلارنى ئىچىڭىزگە پاتۇرالماي ھاراقنىڭ كۈچى بىلەن دوستلىرىڭىزغا دەيسىز ، دوستلىرىڭىز كەچتە دەيدىغانغا گەپ تاپالمىغىندەك ئايالىغا دەيدۇ،شۇنىڭ بىلەن ئەتىسىدىن باشلاپ سىلەرنىڭ ئۆيدىكى ئىشلار داستانغا ئايلىنىپ ھەممە يەردە سۆزلىنىدۇ .
توي قىلغان تۇنجى يىلى سىز ئائىلىدىكى ئەڭ مۇھىم،ھۆرمەتلىك ئادەم بۇلىسىز . 10 يىلدىن كېيىن بۇ ئورۇنغا تەبىئىي ھالدا بالىڭىز ئولتۇرىدۇ ، سىز بولسىڭىز ئىككى بايغا بىر مالاي بۇلىسىز .
توي قىلغان تۇنجى يىلى خىزمەتتە نەتىجە يارىتىپ ئىلغار شەخس بولۇپ باھالانسىڭىز ، گېزىت - ژورناللاردا ماقالىڭىز ئېلان قىلىنسا ، ئايالىڭىز سىز ئەڭ ياخشى كۆرىدىغان نەرسىلەرنى ئېلىپ،مەززىلىك تاماقلارنى ئېتىپ سىزنى تەبرىكلەيدۇ . 10 يىلدىن كېيىن بېرىلگەن مۇكاپات ياكى قەلەم ھەققىنى سۈرۈشتۈرىدۇ .
توي قىلغان تۇنجى يىلى خوتۇنىڭىزغا« بۇ دۇنيادا پەقەت سېنىلا ياخشى كۆرۈمەن»دېسىڭىز چەكسىز بەخت ئىچىدە تاتلىق كۈلۈمسىرەپ،ناز-كەرەشمە بىلەن سېنى چىڭ قۇچاغلايدۇ. 10 يىلدىن كېيىن ئۇنىڭغا بۇ گەپنى دېسىڭىز،پەرۋامۇ قىلىپ قويماستىن،بەلكى كۆزىڭىزگە گۇمان بىلەن سوغۇق كۈلۈپ قۇيىدۇ .
توي قىلغان تۇنجى يىلى ئۆيگە دوستلىرىڭىزنى چاقىرماقچى بولسىڭىز ئايالىڭىز ئۆينىڭ ئىچىدە پايپىتەك بۇلۇپ يۈرۈپ تەييارلىق قىلىدۇ ،خۇشاللىقتىن تېخى ئۆزى قىلالمايدىغان ئۆزگىچە تەملىك تاماقلارنى ئانىسىغا ئەتتۈرۈپ ئۆيگە ئېلىپ كېلىدۇ . 10 يىلدىن كېيىن ئۈچ - تۆت دوستىڭىزنى ئۆيگە تەكلىپ قىلغانلىقىنى دېسىڭىز«قاراڭ ،كۆرۈپ تۇرۇپسىز، بۈگۈن بەك ھېرىپ كەتتىم ، ئۇنىڭ ئۈستىگە بالىنىڭمۇ مىجەزى يوق،بىز ئۆيدە ۋاراڭ-چۇرۇڭنى كۆتۈرەلمەيمىز، ئەڭ ياخشىسى ئۇلارنى ئاشخانىغا باشلىڭە » دەيدۇ .
توي قىلغان تۇنجى يىلى خاتىرە سۈرەتكە چۈشمەكچى بولغاندا،ئىككىڭلار ياسىنىش ئۈچۈنلا بىر-ئىككى سائەت ۋاقىت سەرپ قىلىسىلەر.10يىلدىن كېيىن خوتۇنىڭىز:«ئەتە ئائىلە بويىچە خاتىرە سۈرەتكە چۈشەيلى»دېسە،سىز:«ۋاي،مەن بەك ئالدىراش،ۋاقتىم يوق»دەيسىز.
توي قىلغان تۇنجى يىلى خوتۇنىڭىز سىزگە ئارتۇقچىلىقى بەكمۇ كۆپ ، ئىشچان،مۇلايىم،كەمسۆز كۆرۈنىدۇ،10 يىلدىن كېيىن ئۇ ئۇنداق ئەمەستەك،باشقىچە ئادەمگە ئايلىنىپ قالغاندەك ، كۆزىڭىزگە ھازازۇل،توختىماي سۆزلەيدىغان،بىشەم ، مۇتىھەم،ھورۇن خوتۇندەك كۆرۈنىدۇ .
توي قىلغان تۇنجى يىلى ئايالىڭىزنى باشقىلار بىلەن سېلىشتۈرۈپ كۆرۈپ شەھەر بويىچە ئەڭ گۈزەل ، ھەر جەھەتتىن يېتىشكەن قىزنىڭ بىرسى،ئۇنىڭ ئالدىغا ئۆتىدىغىنى يوق دەپ ئۇنى ئېلىۋالغانلىقىڭىزغا پەخىرلىنىپ كېرىلىپ يۈرىيسىز ، 10 يىلدىن كېيىن ئەتىگىنى ئويغۇنۇپلا قاپاقلىرى ئىششىپ ساڭگىلىغان،چاچلىرى پاخپايغان،ئۇخلاش كىيىمى لەپپەڭشىپ تۇرغان،ساپما كەشنى يەكپاي كېيىپ يۈرگەن ئايالىڭىزنى كۆرۈپ ئېغىر خۇرسىنىسىز .
توي قىلغان تۇنجى يىلى سۆيگۈ-مۇھەببەتنىڭ كۈچ قۇدرىتى،ياشلىق باھارنىڭ گۈزەل ھېس-تۇيغۇلىرى ئىچىدە ئايالىڭىزنى تۇغۇلۇپلا ياخشى كۆرۈپ قالغاندەك،گويا ئۇسىز ئۈچۈنلا بۇ دۇنياغا ئاپىرىدە بولغاندەك،بىر جان –بىر تەندەكلا ھېس قىلىپ ھاياتتىن تولىمۇ خۇرسەن بولىسىز.10يىلدىن كېيىن ئۇنىڭ باشقا خەقنىڭ بالىسى ئىكەنلىكىنى،بەزەن گەپ-سۆزلىرىدىن،ھەرىكەت قىلىقلىرىدىن،سىزگەبولغان مۇئامىلىسىدىن گويا ئۇنى تۇنجى قېتىم كۆرىۋاتقاندەك ھېس قىلىسىز.
توي قىلغان تۇنجى يىلى سىز ھەر قانچە يالغان گەپ قىلسىڭىزمۇ ئايالىڭىز ئىشىنىدۇ ، بەزىدە مېنى ئەكىلىتىپ چاقچاق قىلىۋاتىدۇ دەپ ئويلايدۇ . 10 يىلدىن كېيىن سىز قولىڭىزنى يۈرىكىڭىزگە قويۇپ راست گەپ قىلسىڭىزمۇ،ئۇ گېپىڭىزگە ئىشەنمىگەندەك قىلىپ چەكچەيگىنىچە كۆزىڭىزنىڭ ئىچىگە ئۇزۇندىن-ئۇزۇن قاراپ كېتىدۇ.
توي قىلغان تۇنجى يىلى ئايالىڭىز بىلەن بازار ئارىلاۋىتىپ بىرەر قىز ساۋاقدىشىڭىز بىلەن ئۇچرىشىپ قېلىپ سالاملاشسىڭىز ، ئايالىڭىزمۇ سىز بىلەن تەڭ قىزغىن سالاملىشىدۇ ، ھەتتا ئۇنىڭغا تەشەببۇسكارلىق بىلەن«تونۇشۇپ قالايلى،بۇنىڭدىن كېيىن ئارىلىشىپ ئۆتەيلى،ئۆيلەرگە بېرىڭ»دېگەندەك گەپلەرنى قىلىدۇ.10 يىلدىن كېيىن كوچىدا ئۇچرىشىپ قالغان بىرەر قىز ساۋاقدىشىڭىز بىلەن بەش - ئون مىنۇت چاقچاق ئارىلاش قىزغىن پاراڭلىشىپ تۇرۇپ قالسىڭىز،ئۆيگە قايتقاندىن كېيىن چاچلىرى پاخپايغان،كۆزلىرى چەكچىيىپ،قاپاقلىرى تۈرۈلگەن بىرى بىلەن بۇلىدىغان بىر مەيدان شىددەتلىك جەڭگە تەييارلىق قىلىپ قويسىڭىز بۇلىدۇ .
توي قىلغان تۇنجى يىلى ئايالىڭىز بىلەن بەزى ئىشلار تورىلىق تەگىشىپ قېلىپ ئايالىڭىز ئانىسىنىڭ ئۆيىگە يامانلاپ كەتسە ، كەچتە ئانىسى قىزىنى قولىدىن يېتىلىگەن پېتى ئۆيىڭىزگە ئەكىلىدۇ، ئاندىن ئىككىڭلارنى ئولتۇرغۇزۇپ تۇرۇپ ئۆي تۇتۇشنىڭ ئاسان ئەمەسلىكىنى ، ئالدىڭلاردا تېخى نۇرغۇن كۈنلەرنىڭ بارلىقىنى، بىر - بىرىڭلارنىڭ كەمچىلىكىنى ئەپۇ قىلىپ ئۆتۈشىڭلارنىڭ كېرەكلىكىنى،ئاندىن تۇرمۇش قۇرۇش يولىنىڭ تەجرىبىلىرىنى سۆزلەپ نەسىھەت قىلىدۇ.10يىلدىن كېيىن ئايالىڭىز ئانىسىنىڭ ئۆيىگە يامانلاپ كەتسە ، سىزنىڭ ئانىڭىز ئىككى - ئۇچ ئايالنى ئۆزىگە ھەمرا قىلىپ ، قولىدا داستىخان كۆتۈرگەن ھالدا قېينىئانىڭىزنىڭ ئالدىغا بېرىپ ئەپۇ سوراپ ئايالىڭىزنى ياندۇرۇپ كېلىدۇ .
توي قىلىپ 10 يىلدىن كېيىن...
ئادەم تۇرمۇش قۇرغانىكەن،ھەر خىل دىشۋارچىلىقلارغا يولۇقىدۇ ، خوشاللىققا،بەختكە چۆمۈلىدۇ . نىكاھلىق تۇرمۇشتا تۈرلۈك،تۈمەن قىيىن ئىشلار،باش قېتىنچىلىقلىرى قەدەمدە بىر ئۇچراپ تۇرىدۇ . مۇھەببەتلەشكەنلەر بىر - بىرىنى ياقتۇرۇپ قېلىشتىن باشلىنىپ،كېيىن بىر - بىرىدىن ئايرىلالماس بولۇپ قالغانلىقىنى ھېس قىلىشقانلىقى ئۈچۈن توي قىلىدۇ . ئەمما توي قىلغاندىن كېيىن ھەر ئىككىيلەن ئاستا - ئاستا ئۆزلىرىنىڭ مېجەز خاراكتېردىن تارتىپ تۇرمۇش ئۇسۇلىغىچە بىر- بىرىگە تامامەن ئوخشىمايدىغان ئىككى ئادەم ئىكەنلىگىنى ھېس قىلىشىدۇ . چۈنكى بۇ ۋاقىتتا ئۇلارنىڭ زېممىسىگە تۇرمۇشنىڭ تۈگمىنىنى چۆرگىلىتىش ۋەزىپىسى يۈكلەنگەن بولغاچقا،دەل مۇشۇنداق مۇرەككەپ جەرياندىلا ئاندىن ئەر - خوتۇن ئىككىيلەن ئۆزلىرىنىڭ باشقا – باشقا ئىككى ئائىلىدە چوڭ بولغان ئىككى ئادەم ئىكەنلىگىنى ھېس قىلىدۇ .
شۇڭا توي قىلغاندىن كېيىنكى 10 يىل ناھايىتى تاتلىق،ئەمما ئۆزىگە چۇشلۇق ئاچچىق-چۈچىكىمۇ بار ھەم خەۋپ - خەتەرگە تولغان پەيت دەپ قارىلىدۇ.بۇ تۇرمۇشىمىزدىكى ئەڭ گۈزەل ھەم ئەڭ ئاسان ئادىشىدىغان ۋاقىت. بۇ ۋاقتتا كۆپۈنچە ئەر - خوتۇنلار ئادەتتە بىر ياكى ئىككى بالىلىق بولغان بۇلىدۇ. شۇڭا ئائىلىنىڭ تۈرلۈك ئېھتىياجلىرى،بالىلارنىڭ غېمى،ئەر - ئايال ئىككەيلەننى روھىي ۋە جىسمانىي جەھەتتىن خېلىلا چارچىتىدۇ. ئايال ئەينەكتىن سۇلغان چىرايى ، يوغىنىغان ساغرىسى،بوشۇشۇپ ساڭگىلىغان قۇرسىقى،قورۇق چۈشكەن يۈزلىرىنى كۆرۈپ خۇرسىنىدۇ،ئۆزىدىن زىلۋا،چىرايلىق قىز - چوكانلارغا قاراپ شۇلاردەك ياسانغۇسى ، ئاشۇلاردەك كىيىنىپ ، غەم - غۇسسىسىز يۈرگىسى كېلىدۇ.ئۆزىنىڭ قېرىپ كېتىۋاتقانلىقىدىن ھەسرەتلىنىپ،ئەتراپلارغا قاراپ سالىدۇ، بەزىدە مۇشۇنداق بۇلۇپ قېلىشنىڭ سەۋەبىنى ئېرىدىن ئىزدىگۈسى كېلىپ ئۇنىڭ بىلەن سوقۇشىدۇ،جىدەل قىلىدۇ.ئەرلەر ئۆيدىكى ۋاراڭ – چۇرۇڭ،تۈگىمەس ئۆي ئىشلىرى، جىدەل - ماجرالاردىن زېرىكىپ سىرتلاردا قاڭقىپ يۈرۈشكە،ئۆيگە كەچ قايتىشقا ئادەتلىنىشكە باشلايدۇ . ھەتتا بەزىدە ئۇچۇپ يۈرگەن كەپتەرلەرگە باسماق قۇرۇشنى ئويلاپ قالىدۇ. مانا بۇ تويدىن كېيىنكى 10 يىلنى خەتەرلىك دېيىشىمىزنىڭ سەۋەبى . شۇڭا سىز ئالدىڭىزدا كېلىدىغان 20 يىلىڭىز،30 يىلىڭىزنى خاتىرجەم ئۆتكۈزەي دېسىڭىز،مۇشۇ 10 يىللىق تۇرمۇش تەجرىبىڭىزنى ئوبدان يەكۈنلەپ ، تۇرمۇشنىڭ يۈگىنىنى قۇلىڭىزدا توغرا ھەم چىڭ تۇتۇڭ . ئېسىڭىزدە بولسۇنكى ، ھەممە ئىشنىڭ زىيادە مۇككەممەل بۇلىشىنى تەلەپ قىلىش ئادەمنى بارا - بارا تۇرمۇش لەززىتىدىن بارغانسېرى يىراقلاشتۇرىۋېتىدۇ. زىيادە قۇسۇرچىلىق ، ئۆزىنىڭىنىلا راست قىلىش،يارقىنلىقنى قوغلىشىش بەختتىن،بارغانسېرى ياتلاشتۇرىۋېتىدۇ.شۇنىڭ ئۈچۈن بىر - بىرىگە كەڭ قورساق بولغاندا،بىر – بىرىنى،چۈشەنگەندە، ئىناق ئۆتۈشكە ئادەتلەنگەندە، ماسلاشقاندا،گەپ يوق« ئالتۇن توي » غىچە بىر - بىرىڭلارغا يار-يۆلەك بولۇپ،ئۈمرىڭلارنى جىدەل – ماجراسىز، كۆڭۈل ئاغرىقسىز ئۆتكۈزەلەيسىلەر.شۇڭا كونىلار دېگەندەك تۇرمۇشمۇ،بەختمۇ سەل غۇۋاراق بولغىنى ياخشى.
مەنبە«ئاسىيا كنىدىكى»
شىنىجاڭ يازغۇچىلار تۇرى .
يۇللۇغۇچى مەتۇرسۇن ئېلى نۇرى
