ئىسا ئەلەيھىسسالامنىڭ مۆجىزىلىرى
ئىسا ئەلەيھىسسالام ئىسرائىل ئەۋلادى پەيغەمبەرلىرىنىڭ ئەڭ ئاخىرقىسى بولۇپ، ئۇ مۇسا ئەلەيھىسسالامنىڭ شەرىئىتىنى تولۇقلىغان ھالدا كەلگەن. ئۇلار ئۆز زامانىسىنىڭ سەۋىيىسىگە كۆرە، تىببى ماھارەتلىرى بىلەن پەخرىلىنىۋاتقان دەۋرىدە ئاللاھ تائالا ئىسا ئەلەيھىسسالامغا ئۇلارنىڭ تىببىي ماھارەتلىرىنىڭ تۈرىگە شەكلى جەھەتتىن ئوخشىشىپ كېتىدىغان مۆجىزىلەرنى ئاتا قىلىش ئارقىلىق ئىسرائىل ئەۋلادىنى تەۋھىدكە يېتەكلەش ئۈچۈن ئەۋەتكەن. ئۇلارنىڭ تىببى ماھارەتلىرى ئىسا ئەلەيھىسسالامنىڭ مۆجىزىلىرى ئالدىدا ھېچنەرسىگە ئەرزىمەس بولۇپ قالغان.
ئاللاھ تائالا ئىسا ئەلەيھىسسالامنىڭ قولىدا تەبىئەت قانۇنىيەتلىرىنى بۇزۇپ تاشلايدىغان نۇرغۇن ئىشلارنى ئىجرا قىلغان بولۇپ، ئۇلارنىڭ ھەممىسى مۆجىزىلەر ئەمەس ئىدى. بەلكى ئۇلارنىڭ جۈملىسىدىن ئىكرام مەنىسىدە بولغانلىرىمۇ، ئاللاھنىڭ ئىزنى بىلەن لايدىن قۇش ياساپ پۈۋلەپ، جان كىرگۈزۈش، تۇغما كور ۋە بەرەسلەرنى ساقايتىش، ئۆلۈكلەرنى تىرىلدۈرۈش، ئاۋامنىڭ كۈندىلىك يەيدىغان ۋە ئۆيلىرىدە ساقلاپ قويغان نەرسىلىرىدىن خەۋەر بېرىش قاتارلىقلارغا ئوخشاش پەيغەمبەرلىكىنىڭ ھۆججىتى بولغان مۆجىزىلەرمۇ بار ئىدى.
ئىسا ئەلەيھىسسالامنىڭ ئاتىسىز يارىتىلىش ۋە بۆشۈكتىكى چېغىدىلا ئىنسانلار بىلەن سۆزلىشىش مۆجىزىسى
ھەزرىتى مەريەم نامىزىنى تۈگىتىپ، گۈلگە سۇ قۇيۇش ئۈچۈن ھۇجرىسىدىن چىقاي دەپ تۇرىشىغا، پەرىشتىلەر ئۇنىڭغا مۇنداق خىتاب قىلدى:
{«ئى مەريەم! ئاللاھ ھەقىقەتەن سېنى (پۈتۈن ئاياللار ئىچىدىن تاللىدى، سېنى پاك قىلدى، سېنى پۈتۈن جاھان ئاياللىرىدىن ئارتۇق قىلدى»}.سۈرە ئال ئىمران 43 - ئايەت.
ھەزرىتى مەريەم بۇ كۈنلەردە روھىي ۋە جىسمانىي جەھەتتىن ئۆزگىرىش بولىۋاتقانلىقىنى، ئۆزىدە ئالاھىدە روھىي كۈچ بولىۋاتقانلىقىنى ھېس قىلىۋاتاتتى.
ھەزرىتى مەريەم بۇ سۆزلەردىن ئاللاھ تائالانىڭ ئۇنى تاللىغانلىقىنى، پاكلىغانلىقىنى، ۋە شۇ زاماندىكى بارلىق ئاياللاردىن ئۈستۈن قىلغانلىقىنى چۈشەندى.
پەرىشتىلەر يەنە مۇنداق دېدى:
{«ئى مەريەم! پەرۋەردىگارىڭغا ئىتائەت قىل، سەجدە قىل ۋە رۇكۇ قىلغۇچىلار بىلەن بىللە رۇكۇ قىل»}سۈرە ئال ئىمران 42 - ئايەت.
خوش خەۋەردىن كېيىنكى بۇيرۇق ئۇنىڭ ئاللاھقا بولغان ئىخلاسىنى، سەجدىسىنى ۋە رۇكۇسىنى ئاشۇراتتى.
مەريەم گۈلنى ئۇنتۇپ قايتا ناماز ئوقۇشقا باشلىدى، ئۇ ناماز ئوقۇۋېرىپ يېرىم كېچە بولغانلىقىنى سەزمەي قالدى. نامىزىنى تۈگەتكەندىن كېيىن يادىغا يەنە گۈل كەلدى، چېلەككە ئازراق سۇ ئېلىپ، گۈل سۇغۇرۇشقا چىقتى. بۇ يەر مەريەمنىڭ ناماز – ئىبادەت قىلىشى ئۈچۈن ئايرىلغان يەر بولغاچقا ھېچكىم بۇ يەرگە يېقىنلاشمايتتى.
مەريەم گۈلگە سۇ قۇيدى، ئاندىن چېلەكنى يەرگە قۇيۇپ، ئىككى كىچىدە بىر ھەسسە ئۆسكەن گۈلگە دىققەت بىلەن قارىدى.
مەريەم ئۇشتۇمتۇت يېقىنلا يەردە توختىغان ئاياق تىۋىشىنى ئاڭلىدى. بۇ، مېڭىۋاتقان ئاياغنىڭ تىۋىشى ئەمەس ئىدى...
بۇ، شېغىل، قۇم ۋە تۇپراقلارنىڭ ئۈستىدە تۇرغان ئاياغنىڭ تىۋىشى ئىدى.
مەريەم ئۆزىنىڭ يالغۇز ئىكەنلىكىنى ھېس قىلىپ قورقتى. ئەتراپنى دىققەت بىلەن كۆزەتكەن بولسىمۇ، ھېچنەرسە كۆرۈنمىدى.
ئارقىدىنلا پارلىغان نۇر ئىچىدە بىر كىشىنىڭ تۇرغانلىقىنى كۆرۈپ چۆچۈپ كەتتى.
بۇ ئەھۋال ئۇنىڭغا ئاجايىپ بىر چۈشتەك بىلىندى. ئەمما بۇ چۈش ئەمەس ئىدى.
مەريەم ئۇنى بۇرۇن كۆرۈپ باقمىغان ئىدى. ئۇنىڭ پېشانىسى ئايدىنمۇ پارقىراق ئىدى، كۆزلىرى سۈرلۈك كۆرۈنسىمۇ، چىرايىدىن مۇلايىملىق چىقىپ تۇراتتى. ئۇنىڭ يۈزى مىليونلارچە يىلدىن بىرى ئاللاھ تائالاغا ئىبادەت قىلغان كىشىنىڭ يۈزىدەك شەرەپلىك كۆرۈنەتتى.
مەريەم ئۆز – ئۆزىدىن ئۇنىڭ كىم ئىكەنلىكىنى سورىدى. ناتونۇش كىشى مەريەمنىڭ ئويلىغانلىرىنى بىلگەندەك:
- ئەسسالامۇ ئەلەيكى، ئى مەريەم! - دېدى.
مەريەم بۇنىڭ بىر ئىنسان ئاۋازى ئىكەنلىكىنى سەزدى. ئۇ سالامغا جاۋاپ قايتۇرمايلا: {«مەن ھەقىقەتەن مەرھەمەتلىك ئاللاھقا سېغىنىپ سېنىڭ چېقىلىشىڭدىن پاناھ تىلەيمەن، ئەگەر سەن تەقۋادار بولساڭ (ماڭا چېقىلمىغىن)»}. سۈرە مەريەم 18- ئايەت.
مەريەم ئاللاھدىن پاناھلىق تىلىدى. ئۇنىڭ ئاللاھنى تونۇيدىغان ۋە تەقۋادار ياكى ئەمەسلىكىنى سورىۋىدى، ئۇ يەردە تۇرغان كىشى ئىللىق كۈلۈمسىرىگەن ھالدا:
{«مەن ساڭا بىر پاك ئوغۇل بېرىش ئۈچۈن ئەۋەتىلگەن پەرۋەردىگارىڭنىڭ ئەلچىسىمەن» دېدى}. سۈرە مەريەم 19- ئايەت.
بۇ، پەرىشتىلەرنىڭ كاتتىسى، رۇھۇل ئەمىن جىبرىئىل ئەلەيھىسسالام بولۇپ، مەريەمنىڭ ئالدىغا بىر ئىنسان سۈرىتىدە كەلگەن ئىدى.
مەريەم ھاياجانلىنىپ، تىترىگەن ھالدا بېشىنى كۆتۈردى، رۇھۇل ئەمىن ئىنسان سۈرىتىدە ئۇنىڭ ئالدىدا تۇراتتى.
مەريەم ئۆزىنىڭ تېخى ياتلىق بولمىغان قىز ئىكەنلىكىنى، ئۆزىگە ھېچقانداق كىشىنىڭ قۇلى تەگمىگەنلىكىنى ئويلىدى. ياتلىق بولماي تۇرۇپ بالا تۇغۇش مۇمكىنمۇ؟
بۇلارنى ئويلىغان مەريەم رۇھۇل ئەمىنگە:
{«ماڭا كىشى يېقىنلاشمىغان تۇرسا، مەن پاھىشە قىلمىغان تۇرسام، قانداقمۇ مېنىڭ ئوغۇل بالام بولسۇن؟» دېدى}. سۈرە مەريەم 20 – ئايەت.
رۇھۇل ئەمىن - جىبرىئىل ئەلەيھىسسالام:
{«ئەمەلىيەت سەن دېگەندەكتۇر، (لېكىن پەرۋەردىگارىڭ ئېيتتى: ئۇ ماڭا ئاساندۇر. ئۇنى كىشلەرگە قۇدرىتىمىزنى كۆرسىتىدىغان) دەلىل ۋە بىز تەرەپتىن بولغان مەرھەمەت قىلدۇق، بۇ تەقدىر قىلىنىپ بولغان ئىشتۇر»}. سۈرە مەريەم 21 – ئايەت.
مەريەمنىڭ ئەقلى رۇھۇل ئەمىننىڭ سۆزلىرىنى قوبۇل قىلدى.
ئاللاھ خالىسا، ھەرقانداق ئىش بولىدىغان تۇرسا، ئۇنىڭغا ھېچبىر ئىنساننىڭ قۇلى تەگمەي تۇرۇپ بالا تۇغۇشى غەلىتىلىكمۇ؟ ئۇلۇغ ئاللاھ ئادەم ئەلەيھىسسالامنى تېخى ئەركەك ۋە ئايال يوق چاغدا ئاتىسىز، ئانىسىز ياراتقان، ھاۋانى ئادەمدىن ياراتقان يەنى ئۇنىمۇ ئايالسىز، ئەركەكتىن ياراتقان ئىدى. ئەمدى مەريەمنىڭ ئوغلىنىمۇ ئاتىسىز يەنى ئەرسىز ئايالدىن ياراتماقچى ئىدى.
ئادەتتە، ئىنسان ئەر ۋە ئايالدىن يارىتىلىدۇ، ئۇنىڭ ئاتا ۋە ئانىسى بولىدۇ. بىراق مۆجىزە ئاللاھنىڭ خالىشى بىلەن ۋۇجۇدقا كېلىدۇ.
جىبرىئىل ئەلەيھىسسالام تەكرار مۇنداق دېدى:
{«ئى مەريەم! ئاللاھ ساڭا (ئاتىنىڭ ۋاسىتىسىسىز) ئاللاھ نىڭ بىر كەلىمىسى (دىن تۆرەلگەن بىر بوۋاق) بىلەن خۇش خەۋەر بېرىدۇكى، ئۇنىڭ ئىسمى مەسىھ مەريەم ئوغلى ئىسادۇر، ئۇ دۇنيا ۋە ئاخىرەتتە ئابرويلۇق ۋە ئاللاھ غا يېقىنلاردىن بولىدۇ. ئۇ بۆشۈكتىمۇ (يەنى بوۋاقلىق چېغىدىمۇ)، ئوتتۇرا ياش بولغاندىمۇ كىشىلەرگە (پەيغەمبەرلەرنىڭ سۆزىنى) سۆزلەيدۇ ۋە (تەقۋادارلىقتا كامىل) ياخشى ئادەملەردىن بولىدۇ»}. سۈرە ئال ئىمران 45 – 46 – ئايەتلەر.
تېخى ھامىلدار بولماي تۇرۇپ تۇغماقچى بولغان ئوغلىنىڭ ئىسمىنى ئاڭلىغان مەريەم ھەيرانلىققا چۆمدى. ئوغلىنىڭ دۇنيا – ئاخىرەتتە، ئابرۇيلۇق ۋە ئاللاھقا يېقىنلاردىن بولىدىغانلىقىنى، بوۋاق چېغىدىمۇ، چوڭ بولغاندىمۇ ئىنسانلار بىلەن سۆزلىشىدىغانلىقىنى بىلگەنىدى. رۇھۇل ئەمىن قولىنى كۆتۈرۈپ ھاۋانى مەريەم تەرەپكە ئىتتىرگەندىن كېيىن كۆزدىن غايىب بولدى.
{ئۇنىڭغا بىزنىڭ تەرىپىمىزدىن بولغان روھنى پۈۋلىدۇق (پۈۋلەنگەن روھ ئۇنىڭ ئىچىگە كىرىپ، ئۇ ئىساغا ھامىلدار بولدى)، ئۇنى ۋە ئوغلىنى ئەھلى جاھان ئۈچۈن (بىزنىڭ قۇدرىتىمىزنى كۆرسىتىدىغان) دەلىل قىلدۇق}. سۈرە ئەنبىيا 91 – ئايەت.
كۈنلەر ئۆتتى... مەريەم ھامىلدار بولغانلىقىنى بىلدى. ئۇنىڭ ھامىلدارلىقى باشقا ئاياللارنىڭكىگە ئوخشىمايتتى. مەريەم بىر كۈنى خورما دەرەخلىرى قاپلىغان، يىراقلىقتىن ھېچ كىشى بارمايدىغان بىر يەرگە كەلدى. خەلق ئۇنىڭ ھامىلدار ئىكەنلىكىنى بىلمەيتتى.
مەريەم دەم ئېلىش ئۈچۈن بىر تۈپ ئېگىز ۋە يوغان خورما دەرىخىنىڭ ئاستىدا پىكىر قىلىپ ئولتۇردى.
{تولغاقنىڭ قاتتىقلىقى ئۇنى (يۆلىنىۋېلىش ئۈچۈن) بىر خورما دەرىخىنىڭ يېنىغا كېلىۋېلىشقا مەجبۇر قىلدى. مەريەم: «كاشكى مەن بۇنىڭدىن ئىلگىرى ئۆلۈپ كەتكەن بولسامچۇ! كىشلەر تەرىپىدىن ئۇنتۇلۇپ كەتكەن (ئەرزىمەس) نەرسىگە ئايلىنىپ كەتسەمچۇ!» دېدى}. سۈرە مەريەم 23- ئايەت.
مەريەمنى تۇغۇت سانچىقى بىلەن بىللە باشقا ئاغرىق – كۈلپەتلەرمۇ كۆتىۋاتاتتى، خەلق نېمە دەپ قېلىشى مۇمكىن؟ ئۇلار مەريەمنى پاك دەپ بىلەتتى. خەلق ئىنسان قولى تەگمىگەن مەريەمنىڭ بالا تۇغىشىغا قانداق ئىشىنىدۇ؟ ئۇلارنىڭ گۇمانلىق قاراشلىرىنى، قالايمىقان سۆز – چۆچەكلىرىنى ئويلىغان مەريەمنىڭ كۆڭلى ئىنتايىن يېرىم بولدى.
دەل شۇ چاغدا، ئاللاھنىڭ تەقدىرى بىلەن ئىنسانلارنىڭ ئازاپلىرىنى قەلبىگە يۈكلىگەن ئوغۇل تۇغۇلدى. مەريەم ئۆزىنىڭ ئۆلۈمىنى ۋە ئۇنتۇلۇپ كېتىشىنى تىلەپ تۇرۇشىغا:
{جىبرىئىل ئۇنىڭغا خورما دەرىخىنىڭ ئاستىدىن نىدا قىلدى: «غەم قىلمىغىن، پەرۋەردىگارىڭ سېنىڭ ئاستىڭدىن (ئېقىپ تۇرىدىغان) بىر ئېرىقنى پەيدا قىلدى. خورما دەرىخىنى ئۆز تەرىپىڭگە ئىرغىتقىن، ئالدىڭغا پىشقان يېڭى خورمىلار تۆكۈلىدۇ. (بۇ شېرىن خورمىدىن) يېگىن، (بۇ تاتلىق سۇدىن) ئىچكىن ۋە خۇرسەن بولغىن، بىرەر ئادەمنى كۆرسەڭ (ئۇ بالا توغرۇلۇق سورىسا): مەن ھەقىقەتەن مەرھەمەتلىك ئاللاھقا ۋەدە بەردىم، بۈگۈن ھېچ ئادەمگە سۆز قىلمايمەن, دېگىن»}. سۈرە مەريەم 24 – 26.
بوۋاقنىڭ يۈزى ئىنتايىن سۆيۈملۈك ئىدى. سۆيۈملۈك ئوغلىغا مېھرىبانلىق بىلەن قاراپ، شىرىن خورمىلارنى يەپ، تاتلىق سۇدىن ئىچكەن مەريەمنىڭ قەلبى ھۇزۇرغا تولۇپ، كۆڭلى ئارامىغا چۈشتى.
پاك مەريەمنىڭ كۆڭلى بىردەم ھۇزۇر ۋە راھەتكە تولغان بولسىمۇ، زېھنى باشقا نەرسىنى ئويلاپ، يەنە ئەندىشە قىلىشقا باشلىدى.
مەريەم مەسجىدكە يېقىنلاشقاندا، خەلق ئۇنىڭ بىر بوۋاق كۆتۈرۈۋالغانلىقىنى، ئۇنى باغرىغا باسقان ھالدا ئاستا كېلىۋاتقانلىقىنى كۆردى.
{مەريەم بوۋاقنى كۆتۈرۈپ قەۋمىنىڭ ئالدىغا كەلدى، ئۇلار ئېيتتى: «ئى مەريەم! سەن ھەقىقەتەن غەلىتە ئىش قىلدىڭ. ئى ھارۇننىڭ ھەمشىرىسى! سېنىڭ ئاتاڭ يامان ئادەم ئەمەس ئىدى، ئاناڭمۇ يولدىن چىققان خوتۇن ئەمەس ئىدى»}. سۈرە مەريەم 28 – ئايەت.
بۇ سۆزدە مەريەمگە ئىپپەتسىزلىك تۆھمىتى بار ئىدى. رەزىل پىتنىخورلار ئېنىقلىماستىن، تەكشۈرمەستىن ئۇنىڭغا تۆھمەت چاپلاۋاتاتتى. ياخشى بىر ئائىلىنىڭ قىزى تۇرۇپ قانداقلارچە بۇ ئىش يۈز بەردى؟ دەپ ئۇنى ئەيىبلەۋاتاتتى. ئۇلار پاك مەريەمنى توختىماي قارىلاۋاتاتتى. ئەمما مەريەمنىڭ كۆزلىرى غۇرۇر ۋە ئانىلىق ھېسسىياتى بىلەن چاقنايتتى، يۈزدە ئىشەنچ نۇرى پارلايتتى. ئۇ بەكمۇ چارىسىز ئىدى، سوئاللار كۆپەيگىلى تۇردى، ئەمما ئۇ ھېچ كىمگە جاۋاپ بەرمەيتتى. ئاخىرى ئۇ قولى بىلەن بوۋاققا ئىشارەت قىلدى. ئىنسانلار ھاڭ – تاڭ قېلىشتى. ئۇلار مەريەمنىڭ گەپ قىلمايدىغانلىقىنى، بۇنىڭ نېمە ئىش ئىكەنلىكىنى بوۋاقتىن سورىشىنى تەلەپ قىلىۋاتقانلىقىنى چۈشۈنۈپ، مەريەمگە:
{«بۆشۈكتىكى بوۋاققا قانداق سۆزلەيمىز» دېدى}. سۈرە مەريەم 29 – ئايەت.
{بوۋاق ئېيتتى: «مەن ھەقىقەتەن ئاللاھنىڭ بەندىسىمەن، ماڭا كىتابنى بەردى ۋە مېنى پەيغەمبەر قىلدى. قەيەردە بولاي مېنى بەرىكەتلىك قىلدى، ھاياتلا بولىدىكەنمەن، ماڭا نامازنى، زاكاتنى ئادا قىلىشنى تەۋسىيە قىلدى. مېنى ئانامغا كۆيۈمچان قىلدى، مېنى مۇتەكەببىر، شەقى قىلمىدى. مەن تۇغۇلغان كۈنۈمدە، ۋاپات بولغان كۈنۈمدە، تىرىلىىپ قەبرەمدىن تۇرغۇزۇلغان كۈنۈمدە (ئاللاھ تائالا تەرىپىدىن بولغان) ئامانلىققا ئېرىشىمەن»}. سۈرە مەريەم 30 – 33.
پىتنە – پاساتچىلارنىڭ يۈزلىرى بوۋاقنىڭ سۆزى تۈگىمەستىلا سارغىيىپ تاترىپ كەتتى.
ئۇلار كۆزلىرىنىڭ ئالدىدا ئوچۇقتىن – ئوچۇق بىر مۆجىزىگە شاھىت بولۇۋاتاتتى. بوۋاقنىڭ سۆزى ئۇلارنىڭ ھاكىمىيىتىنىڭ يىقىلىش ئالدىدا ئىكەنلىكىنى بىلدۈرەتتى. بوۋاق چوڭ بولغاندا ئۇلارنىڭ ھەممىسى كېرەكسىز بولۇپ قالاتتى. ئۇ چاغدا ھېچقايسىسى ئىنسانلارغا "كەچۈرۈم" بىلەتلىرىنى ساتالمايدىغان، ئۆزلىرىنى "كۆكنىڭ يەردىكى ۋەكىللىرى" قىلىپ كۆرسىتىپ، ئۇلارغا زۇلۇم قىلالمايدىغان بولۇپ قالاتتى.
قۇش شەكلىدىكى لايغا پۈۋلەپ ئۇنى راست قۇشقا ئايلاندۇرۇش مۆجىزىسى
ئىسا ئەلەيھىسسالام لايدىن قۇشنىڭ ھەيكىنىلى ياساپ، ئاندىن ئۇنىڭغا پۈۋلىسە، ئۇ ئاللاھنىڭ ئىزنى بىلەن ھەقىقىي راست قۇشقا ئايلىناتتى.
ھەر قانداق بىر ئىنسان لايدىن قۇشنىڭ ھەيكىلىنى ياسىيالىشى مۇمكىن لېكىن ئاللاھ تائالا ئىسا ئەلەيھىسسالامغا لايدىن قۇش ياساپ، ئاندىن ئۇنىڭغا پۈۋلىسە، ئۇنىڭ ھەقىقىي قۇشقا ئايلىنىش مۆجىزىسىنى ئاتا قىلغان.
ئىسا ئەلەيھىسسالام خەلقنىڭ ئالدىدا لاينى قۇش شەكىلدە ياساپ، ئاندىن ئۇنى پۈۋلەيتتى – دە، ئۇ قۇشقا ئايلىنىپ ئۇچاتتى.
ئاللاتائالا مۇنداق دەيدۇ: {ئۇنى بەنى ئىسرائىلغا پەيغەمبەر قىلىپ ئەۋەتىدۇ. (ئۇ دەيدۇ): «شۈبھىسىزكى، سىلەرگە مەن رەببىڭلار تەرىپىدىن بولغان (پەيغەمبەرلىكىمنىڭ راستلىقىنى كۆرسىتىدىغان) بىر مۆجىزە ئېلىپ كەلدىم، مەن سىلەرگە لايدىن قۇشنىڭ شەكلىدەك بىر نەرسە ياسايمەن، ئاندىن ئۇنىڭغا پۈۋلەيمەن - دە، ئاللاھ نىڭ ئىزنى بىلەن، ئۇ قۇش بولىدۇ»}. سۈرە ئال ئىمران 49 – ئايەت.
«ئىسا ئەلەيھىسسالام لايدىن قۇش ياساپ، ئاندىن ئۇنىڭغا پۈۋلىدى، ئۇ شۇ ھامان جانلىق قۇشقا ئايلاندى. ئۆز جىسمىدىن بولمىغان نەرسە جىسىمنىڭ ئىچىگە كىردى. مانا بۇ، جىسىم بولمىغان نەرسە روھتۇر. روھ قۇرۇق لاينىڭ ئىچىگە ئېقىپ كىردى ۋە قۇشقا جان كىردى. ھەقىقىي ئېتىبارغا لايىق بولغىنى بەدەن ئەمەس، بەلكى رۇھتۇر». (ئەھمەد بەھجەتنىڭ "ئاللاھنىڭ پەيغەمبەرلىرى" دېگەن كىتابىدىن)
تۇغما كورنى، بەرەس كېسىلىنى ساقايتىش مۆجىزىسى
ئاللاھ تائالا قۇرئان كەرىمدە ئىسا ئەلەيھىسسالامنىڭ: {«تۇغما كورنى، بەرەس كېسىلىنى ساقايتىمەن»} دېگەنلىكىنى بايان قىلىدۇ. سۈرە ئال ئىمران 49 – ئايەتنىڭ بىر قىسمى.
ئاللاھ تائالا ئىسا ئەلەيھىسسالامنى كۈچلەندۈرۈش ئۈچۈن، ئۇنىڭغا تۇغما كورنى، بەرەس كېسىلىنى ساقايتىش مۆجىزىسىنى ئاتا قىلغان بولۇپ، ئۇ ئۆز زامانىسىدىكى دوختۇرلار داۋالاپ ساقايتالمىغان تۇغما كورنى ۋە بەرەس كېسىلىنى ساقايتالايتتى. ئۇنىڭ ئاددىي ۋە پاكىز كىيىمىنىڭ پېشى بىر كېسەل كىشىلەرگە تەككەن ھامان ساقىيىپ كىيەتتى. مۇبارەك قولىنى تۇغما كورنىڭ ياكى بەرەس كېسىلىگە مۇپتىلا بولغان كىشىنىڭ تېنىگە قويسا، ئۇ دەرھال ساقىياتتى.
ئىسا ئەلەيھىسسالامنىڭ زامانىدا تىببىي ئىلىم شۇنچە تەرەققى قىلغان بولسىمۇ، لېكىن ئۇ زاماننىڭ دوختۇرلىرى تۇغما كورنى، بەرەس كېسىلىنى داۋالاشتىن ئاجىز كەلگەن ئىدى. ئاللاھ تائالا پەيغەمبىرى ئىسا ئەلەيھىسسالامغا بۇ خىلدىكى كېسەللەرنى ساقايتىش مۆجىزىسىنى ئاتا قىلىپ، ئۇنىڭ ھەقىقىي پەيغەمبەر ئىكەنلىكىنى ئىسپاتلىغان.
ئۆلۈكلەرنى تىرىلدۈرۈش مۆجىزىسى
ئاللاھ تائالا قۇرئان كەرىمدە يەنە ئىسا ئەلەيھىسسالامنىڭ: {«ئاللاھنىڭ ئىزنى بىلەن ئۆلۈكلەرنى تىرىلدۈرىمەن»} دېگەنلىكىنىمۇ بايان قىلىدۇ. سۈرە ئال ئىمران 49 – ئايەتنىڭ بىر قىسمى.
ئىسا ئەلەيھىسسالامنىڭ مۆجىزىلىرىنىڭ بىرى ئۆلۈكلەرنى تىرىلدۈرۈش بولۇپ، ئۇ قەبرىدىكى ئۆلۈكلەرنى چاقىرغان ھامان ئۆلۈكلەر ئاللاھنىڭ ئىزنى بىلەن تىرىلىپ، ئۇنىڭ ئالدىغا كېلەتتى.
مۇپەسسىرلەر ئىسا ئەلەيھىسسالامنىڭ دوستى ئازەرنى، بىر ئەر – ئايالنىڭ ئوغلىنى بىر ئايالنىڭ يالغۇز قىزىنى ۋە نۇھنىڭ ئوغلى سامنى تىرىلدۈرگەنلىكىنى ئېيتىشىدۇ. ئىسا ئەلەيھىسسالام ئاللاھنىڭ ئىزنى بىلەن ئەۋۋەلقى ئۈچ كىشىنى تىرىلدۈرگەندە، يەھۇدىلار: سەن يېقىندا ئۆلگەنلەرنى تىرىلدۈردۈڭ، بەلكى ئۇلار ئۆلمەي يۈرىكى توختاپ قالغانلار بولۇشى مۇمكىن، - دېيىشىپ، ئۇنىڭدىن نۇھنىڭ ئوغلى سامنى تىرىلدۈرۈشنى تەلەپ قىلدى. ئىسا ئەلەيھىسسالام ئۇلارنى نۇھنىڭ ئوغلى سامنىڭ قەبرىسىنى كۆرسىتىشنى بۇيرىدى ۋە ئۇلار بىلەن بىرلىكتە سامنىڭ قەبرىسىگە يىتىپ كەلدى. ئۇ ئاللاھقا دۇئا قىلىۋىدى، سام چاچلىرى ئاقارغان ھالدا قەبرىسىدىن چىقتى. ئىسا ئەلەيھىسسالام ئۇنىڭدىن: سىلەرنىڭ زامانىڭلاردا چاچ ئاقىرىش بولمىسا، سېنىڭ چېچىڭ نېمىشقا ئاقىرىپ كەتتى؟ - دەپ سورىدى. سام: ئى ئاللاھنىڭ روھى ئىسا! سەن مېنى چاقىرغاندا: ئاللاھنىڭ روھىغا جاۋاپ بەر! – دېگەن بىر ئاۋازنى ئاڭلىدىم. قىيامەت قايىم بولغان ئوخشايدۇ دەپ ئويلاپ، دەھشەتلىك قورقۇنچتىن چېچىم ئاقىرىپ كەتتى، - دېدى.
ئىسا ئەلەيھىسسالام ئەزالىرى سېسىپ، چىرىپ، تۇپراققا ئايلىنىپ كەتكەن جەسەتنى چاقىرىۋىدى، ئۆلۈك تىرىلىپ، ئورنىدىن تۇردى.
ئەگەر بۇ ئۆلۈك يەھۇدىلارنىڭ ئېيتقىنىدەك، پەقەت جەسەتتىنلا ئىبارەت بولغان بولسا ئۇنىڭ تىرىلىشى مۇمكىن بولمايتتى. چۈنكى جەسەت چىرىپ كەتكەن ئىدى. ئەمما ئۆلۈك تىرىلدى. ئۇنىڭ جەسىتى ھاياتقا قايتىپ كەلدى. قەبرىدىن چىقتى ۋە سۆزلىدى. ئۇنداقتا بۇ يەردىكى ئىشنىڭ جەريانى قانداق؟
ئەسلىدە، ئىسا ئەلەيھىسسالام ئاللاھنىڭ ئىزنى بىلەن ئۇنىڭ روھىنى چاقىرغان. روھ جەسەتكە كىرگەندىن كېيىن، جەسەت ئورنىدىن تۇرغان. تۇپراق جەسەتكە ئۆزگەرگەن. دېمەك، ھاياتلىقنىڭ ھەقىقىي مەنبەسى رۇھتۇر. دېمەككى، ئۆلگەندىن كېيىن تىرىلىش ۋە قىيامەت كۈنى ئورنىدىن تۇرۇش ھەقتۇر. ئىسا ئەلەيھىسسالام ئۇلارنى خەلقىگە ئۆلگەندىن كېيىن تىرىلىشنىڭ ۋە ئاخىرەت كۈنىنىڭ ھەق ئىكەنلىكىنى ئىسپاتلاش ئۈچۈن تىرىلدۈرگەن ئىدى.
ئىسا ئەلەيھىسسالامنىڭ ئۆلۈكلەرنى تىرىلدۈرۈشى ھەققىدىكى قىسسىلەر قۇرئان كەرىمدە تەپسىلى بايان قىلىنمىغان. ئاللاھ تائالا پەقەت ئىسا ئەلەيھىسسالامنىڭ ئۆزىنىڭ ئىزنى بىلەن ئۆلۈكلەرنى تىرىلدۈرگەنلىكىنىلا بايان قىلغان.
ــــــــــــــــــــــــــــــــــــــــــــــ
پايدىلانغان مەنبەلەر:
1- قۇرئان كەرىم ئۇيغۇرچە تەرجىمىسى.
2- د. ئابدۇرەھمان جامالنىڭ: قۇرئان كەرىم ۋە ھەدىس شەرىف سايىسى ئاستىدا خارق ئادەت ئىشلار، دېگەن كىتابى.
3- ئۇستاز ئەھمەد بەھجەتنىڭ ئاللاھنىڭ پەيغەمبەرلىرى دېگەن كىتابىنىڭ ئۇيغۇرچە تەرجىمىسى.
تەييارلىغۇچى: ئوبۇلقاسىم ئەھمىدى
مەنبە: ھەقىقەت ئىسلام تور بېكىتى
