غەپلەت
(مىكرو ھېكايە)
ئابدۇرەھمان ھەبىبۇللا
_بوۋا،بوۋا،يەر تەۋرىدى،تېز بول!دەرھال سىرتقا چىقىپ كېتەيلى!
_جىم ئولتۇرۇپ تېلېۋىزور كۆرگىنە ،بالام.نەدىكى يوق گەپنى قىلىدىكەنسەن،نەدە يەر تەۋرىسۇن،ھەممە يەر ساپساق،تىنچلىق تۇرمامدۇ.
_بوۋا،راست دەۋاتىمەن،قارىغىنە،لامپۇچكا پۇلاڭلاۋاتىدۇ.
_لامپۇچكا دېگەن شامال چىقسىمۇ پۇلاڭلايدۇ.بىرەر تال ساقىلىممۇ قىمىرلاپ قوياي دېمىسە،نەدىكى گەپنى قىلىدىكەنسەن.ئادەمنى ئارامىدا تېلېۋىزور كۆرگىلى قويغىنە،يوق گەپنى قىلماي.
_قارا!ئىشەنمىسەڭ شىرە ئۈستىدىكى قاچىلارمۇ تاراقشىپ كېتىۋاتىدۇ.
_ھە،ئەسلى قورسىقىڭ ئېچىپ كېتىپتىكەندە!سەل تۇرۇپ تۇر،فىلىم تۈگىسىلا نان ئېلىپ بېرەي.
_بوۋا!بەك قورقۇۋاتىمەن.تېز بول،ئۆيدىن سىرتقا چىقىپ كېتەيلى.ئەنە،تېلېۋىزورمۇ مىدىرلاشقا باشلىدى.
_ھوي!راست،تېلېۋىزوردىكى كۇڭجۇ*نىڭ ئاپىسىمۇ دەلدەڭشىپ كېتىۋاتىدۇيا؟كۇڭجۇنىڭ ئاپىسىنىڭ بۈگۈن مىجەزى يوقمۇ ياكى راستىنلا يەر تەۋرىدىمۇ؟
_ئا!ھا!!............
دەل شۇ چاغدا گۈلدۈر-قاراس قىلغان ئاۋاز بىلەن تەڭ ئۆينىڭ تۆت تېمى ئۆرۈلۈپ چۈشتى،بوۋايمۇ،نەۋرىسىمۇ،كۇڭجۇنىڭ ئاپىسىمۇ ئۆي ئاستىدا كۆمۈلۈپ قالدى.
*كۇڭجۇ_كورىيىنىڭ كۆپ قىسىملىق تېلېۋىزىيە فىلىمى<<يەنە بىر كۆرسەم>>دىكى پېرسوناژ.
ئاپتۇر:قاغىلىق ناھىيە قاغىلىق بازىرى خەلق ھۆكۈمىتىنىڭ خادىمى
