رەسىم:
پۈتۈن قىرغىزىستان تەۋەسىدە ئوش بىلەن جالالئاباد شەھەرلىرىدە يۈز بەرگەن ئېچىنىشلىق ۋەقەلەر ئەسلەندى.
تۈركىيە ئاۋازى رادىيوسى خەۋىرى: قىرغىزىستاننىڭ جەنۇبىغا جايلاشقان ئوش بىلەن جالالئاباد شەھەرلىرىدە چىققان ئېتنىك توقۇنۇشلارنىڭ بىر يىللىقى مۇناسىۋىتى بىلەن پۈتۈن دۆلەت تەۋەسىدە ئەسلەش مۇراسىمى ئۆتكۈزۈلدى.
ئوش شەھەرلىك ھۆكۈمەت بىناسىنىڭ يېنىدىكى باغچىدا قىرغىز ۋە ئۆزبېك ئانىلارنىڭ كۆز – ياشلىرىغا سىمۋول قىلىنىپ، «ئانىلارنىڭ كۆز – ياشلىرى» دەپ نام بېرىلگەن ھەيكەلنىڭ يوپۇقى، قىرغىزىستان پىرېزىدېنتى روزا ئوتۇنبايېۋا، پارلامېنت باشلىقى ئەھمەتبېك كەلدىبېكوۋنىڭ قاتنىشىشى بىلەن ئېچىلدى.
مۇراسىم ئىشتىراكچىلىرى ھەيكەلگە گۈل قويغاندىن كېيىن، مۇراسىم ئۆتكۈزۈلىدىغان مەيدانغا ئۆتتى. مۇراسىم ھاياتىدىن ئايرىلغانلار ئۈچۈن سۈكۈتتە تۇرۇش بىلەن باشلاندى. مۇراسىمغا دۆلەتنىڭ بەزى مىنىستىرلىرى، پارلامېنت ئەزالىرى، رايون رەھبەرلىرى، باش ئەلچىلەر ۋە بەزى چەت ئەللىك مەسئۇللار قاتناشتى.
قىرغىزىستان پىرېزىدېنتى روزا ئوتۇنبايېۋا مۇراسىمدا قىلغان سۆزىدە، «ئانىلارنىڭ كۆز – ياشلىرى» دېگەن ھەيكەلنى قىرغىزىستاندا بۇ خىل ئېچىنىشلىق ۋەقەلەرنىڭ قايتا يۈز بەرمەسلىكى ئۈچۈن تىكلىگەنلىكىنى بىلدۈردى.
«بىز بىر مىللەت، بۇندىن كېيىن بىللە ياشايمىز. بىرلىشىشتىن باشقا تاللاش يولىمىز يوق» دېگەن روزا ئوتۇنبايېۋا، دۆلەتتە ئادالەتنىڭ كۈچىيىشى ئۈچۈن كەمبەغەللىككە ۋە قارا جەمئىيەتكە قارشى كۈرەش قىلىش كېرەكلىكىنى تەكىتلىدى.
قىرغىزىستان باش مىنىستىرى ئالماسبېك ئاتامبايېۋ بىشكەكتىكى باش مىنىستىرلىك بىناسى ئالدىدا ئۆتكۈزۈلگەن ئەسلەش مۇراسىمىدا سۆز قىلىپ، قىرغىزىستاندا بۇ خىلدىكى پاجىئەلەرنىڭ يۈز بەرمەسلىكىنى تىلىدى ۋە ئېغىر كۈنلەردە قىرغىزىستاندىن ياردىمىنى ئايىمىغان دۆلەتلەرگە رەخمەت ئېيتتى.
ئالماسبېك ئاتامبايېۋ، ۋەقەلەرنىڭ دەرھال بېسىقتۇرۇلىشىدا ئۆزبېكىستان رەھبىرى ئىسلام كەرىموفنىڭ ئوينىغان رولىنىڭ مۇھىم ئىكەنلىكىنى ئەسكەرتىپ، قىرغىزىستان خەلقىنىڭ جىنايەتچىلەرنىڭ تۇتۇلۇشى ۋە جازاغا تارتىلىشىنى ئۈمىد قىلىدىغانلىقىنى تەكىتلىدى.
قىرغىزىستاننىڭ جەنۇبىدا قىرغىزلار بىلەن ئۆزبېكلەر ئارىسىدا 2010 – يىلى 6 – ئاينىڭ 10 – كۈنىدىن 15 – كۈنىگىچە يۈز بەرگەن توقۇنۇشلاردا 435 ئادەم ئۆلگەن بولۇپ، تەخمىنەن 3 مىڭ ئادەم يارىلانغانىدى. 500 مىڭدىن ئارتۇق ئادەم پاناھلىنىشقا مەجبۇر بولغان ھەمدە يۈز بەرگەن ۋەقەلەردە ئۆزبېكلەرگە ئائىت ئۆيلەر، خىزمەت يەرلىرى ۋە مەكتەپلەرگە ئوت قويۇپ بېرىلگەنىدى.
