ئەسسالام كۆپچىلىك ھەممىمىزگە مەلۇم بولغىنىدەك جۇڭگو دەرىجىدىن تاشقىرى پۇتبول بىرلەشمىسى 2-ئايلانما ، 10-چىسلادىكى خاڭجۇ يېشىل شەھەر كوماندىسى بىلەن بېيجىڭ گوئەن كوماندىسى ئوتتۇرسىدىكى مۇسابىقە بېيجىڭدا ئۆتكۈزۈلدى . پەخىرلىك ئوغلانىمىز بارى ھەل قىلغۇچ كاللا توپتىن بىرنى ئۇرۇپ بارلىق ئۇيغۇر پۇتبول مەستانىلىرىغا يەنە بىر قېتىم زور خوشاللىق ئاتا قىلدى
مۇسابىقىنىڭ بېيجڭدا ئۆتكۈزىلىدىغىنىنى خېلى بۇرۇنلا بىلگەچكە بېيجڭدا ئوقۇۋاتقان ، ئىشلەۋاتقان ھۇرراچىلار بۇ مۇسابىقىنى نەق مەيدانغا بېرىپ كۆرۈش ۋە پۇرسەت يار بەرسە بارى بىلەن يۈز كۆرۈشۈپ ئەھۋاللىشىش چوتىنى سوقۇپ ئولتۇرغان ئىدۇق . ئەمما مۇسابىقىنىڭ ئالدىنقى كۈنىلا ئۇنىڭ بىلەن ئالاقە قىلىپ يۈز كۆرۈشۈشكە بولىدىغانلىقىنى جەزىملەشتۈرگەچكە تەييارلىقسىزلا بېرىپ قالدۇق . ئۇنى ئوبدان بىر زىيارەت قىلىشقىمۇ ئۈلگىرەلمىدۇق . لېكىن قىسقىغىنە بىرگە غىزالىنىش نىسىپ بولۇپ دىدارلاشتۇق.
    بېلەت خېلى بۇرۇنلام بېلەت ھايانكەشلىرى تەرىپىدىن توپ  سېتىۋېلىنىپ بولغاچقا مۇسابىقە باشلاشتىن بىركۈن بۇرۇن بېيجىڭ ئىشچلار تەنتەربىيە مەيدانىغا بېرىپ دەرۋازا ئالدىدىكى ھايانكەشلەردىن بېلەت سېتىۋېلىشقا مەجبۇر بولدۇق . ئىككىمىز بارغان ئىدۇق ،ئۇلار بېلەتنى ئەسلىدىكى باھاسىدىن خېلىلا ئاشۇرۇپ ساتىدىكەن ، بىز باھا تالىشىپ ، ئۇلار بەرمەي . بىزدىن شىنجاڭنىڭ پۇتبول ئىشلىرىنى تولا سورىدى ، بارىغا مەدەت بەرگىلى كەلگەنلىكمىزنى ئاڭلاپ ، خېلى ئۇزۇن ۋاقىتقىچە كەتمەي ، سەۋىر قىلىپ ساقلىغىنىمىزدىن تەسىرلەنگەن بىر سالاپەتلىك،ئاڭلىق  ھايانكەش بۇرادەر ئەرزان باھادا بېلەت سېتىپ بەردى .
بېيجىڭ كوماندىسىنىڭ بۇ پەسىللىك تۇنجى مەيدان ساھىپخان مۇسابىقىسى بولغاچقا مەستانىلەر بەك كۆپ ھەم تەلۋە ئىدى . بىزنى ئۇرۇپ كەتمىسۇن دەپ ئىنتايىن مۇلايىملىق بىلەن مۇسابىقە كۆردۇق ، ھاھا
بارى مەيدانغا چققۇچە بېيجىڭ كوماندىسىغا بولۇشۇپ خاڭجۇ كوماندىسىنى راسا تىللىدۇق ،بارى چىقىشى بىلەن ئۈنىمىز ئىچىمىزگە چۈشۈپ كەتتى . پاھ ! مانا ، بارى بىر توپ ئۇردى ، ۋارقىرايلى دېسەك تاياق يەيمىز ،ۋارقىرىمايلى دېسەك ما ئىچىمىز توشۇپ پارتىلاي دېدى . شۇنىڭ بىلەن ھەممىمىز ھەرخىل قىلىق قىلىپ ئىچىمىزنى ئازراق بوشاتتۇق . مۇسابىقە تۈگىگەندىن كېيىن كۆرۈشىشكە كېلىشىپ قويغان بولغاچقا مەيدان سىرتىدا ئۇنى ساقلاپ تۇردۇق . ساقلا ،ساقلا ،ساقلا  ئىككى سائەت ساقلىدۇق . كېيىن تېلفوندا تېرنىرنىڭ قەتئىي رۇخسەت قىلمىغانلىقى ، ئۆزلىرىنىڭ مەيدانغا يېقىن جايدىكى مېھمان سارايغا ئورۇنلاشقانلىقىنى ئېيتىپ ، بىزنى تەكلىپ قىلدى.بىز باردۇق . مېھمان ساراينىڭ ئۆزبېكلەر ئاچقان بىر رېستۇرانى بار ئىكەن ، ئۇ چىقىپ بىزنى ئىچىگە تەكلىپ قىلدى ، گەرچە بۇرۇن تونۇشمايدىغان ،كۆرۈشۈپ پاراڭلاشمىغان بولساقمۇ شۇنداق ئىللىق ھېس قىلىشتۇق ، خۇددى كۆرۈشمىگىلى ئۇزۇن بولغان قېرىنداش ئاكا-ئۇكىلاردەك !  
سىز كۆرۋاتقان بۇ تېمىنىڭ مەنبەسى★ھۇررا مۇنبىرى ★