جۇڭشىن ئاگېنتلىقىنىڭ 3-ئاينىڭ 17-كۈندىكى تېلېگراممىسى، ياپونىيىدىكى قاتتىق تەۋرەشنىڭ تەسىرىدىن جۇڭگونىڭ بىر قىسىم رايونلىرىدا 3-ئاينىڭ 16-كۈنىدىن باشلاپ ئاش تۇزىنى تالىشىپ سېتىۋېلىش ھادىسىسى يۈز بەردى. ئاش تۇزىنىڭ بازاردىكى ئېھتىياجىنى كاپالەتكە ئىگە قىلىش ئۈچۈن، جۇڭگو تۇز سانائىتى باش شىركىتى ھەرقايسى ئۆلكە، ئاپتونوم رايون ۋە بىۋاسىتە قاراشلىق شەھەرلەرگە جىددىي ئۇقتۇرۇش چۈشۈردى.
ئۇقتۇرۇشتا مۇنداق دېيىلدى:«ھەر دەرىجىلىك تۇز سانائىتى شىركەتلىرى بۇ ئىشقا يۈكسەك ئەھمىيەت بېرىشى، بازار ئەھۋالىغا ئىنچىكىلىك بىلەن دىققەت قىلىشى، تېزدىن بازار جىددىي ئېھتىياجنى قامداش خىزمىتى مېخانىزمىنى تۇرغۇزۇپ، بازاردىكى تەڭپۇڭلۇقنى ئەسلىگە كەلتۈرۈشى كېرەك».
شۇنىڭ بىر ۋاقىتتا، ئىشلەپچىقىرىش تەشكىلاتلىرىنى باشقۇرۇشنى كۈچەيتىپ، ھەرقايسى تۇز ئىشلەپچىقىرىش نۇقتىسى قىلىپ بېكىتىلگەن كارخانا-زاۋۇتلار تۇز مەھسۇلاتىنى ئىشلەپ چىقىرىشنى تېزلىتىپ، تۇر مەھسۇلاتىنىڭ زاپاس مىقدارىنى يۇقىرى كۆتۈرۈپ، سېتىش رايونلىرىدىكى جىددىي تەقسىملەش تەييارلىقىنى ياخشى ئىشلەش كېرەك.
ئۇنىڭدىن باشقا، سېتىش رايونلىرىدىكى بازارلارنى باشقۇرۇشنى كۈچەيتىپ، تەييار تۇز مەھسۇلاتىنى تەقسىملەشنى زورايتىپ، ھەرقايسى رايونلاردىكى ئىسكىلاتلاردا تۇز مەھسۇلاتى كەم بولۇشنىڭ ئالدىنى ئېلىش كېرەك. تالىشىپ سېتىۋېلىش مەزگىلىدە، تۇز سانائىتى شىركىتى 24 سائەت تەقسىملەش مۇلازىمىتىنى تەمىنلەپ، بازاردىكى تەمىنلەشكە كاپالەتلىك قىلىدۇ. ھازىر بەزى جايلاردا تالىشىپ سېتىۋېلىش ھادىسىسى يۈز بەردى. تۇز سانائىتى شىركىتى، دەل ۋاقتىدا ھەر قايسى يەرلىك ھۆكۈمەتلەرگە دوكلات يوللاپ، ئۇلارنىڭ قوللىشىنى قولغا كەلتۈردى. ھەر دەرىجىلىك ھۆكۈمەت مال باھا تارماقلىرى تۇز مەھسۇلاتىنىڭ باھاسىنى ئۆستۈرۈۋېلىشىغا، ئۆزى خالىغان باھادا سېتىشىغا، ھەمدە تاۋارلارنى بېسىپ قويۇش يولى بىلەن ھايانكەشلىك قىلىش قىلمىشىغا قاتتىق زەربە بېرىدۇ».
كۈندىلىك گېزىتنىڭ بۇ ھەقتىكى خەۋىرىگە قارىغاندا، ئاش تۇزىنى تالىشىپ سېتىۋېلىش يۈز بەرگەن ھەرقايسى ئۆلكە دەرىجىلىك تۇز سانائىتى شىركەتلىرى ھەر كۈنى چۈشتىن بۇرۇن، ئۆزى تەۋە شەھەرنىڭ نۆۋەتتە بازار ئەھۋالنى جۇڭگو تۇز سانائىتى باش شىركىتىگە مەلۇم قىلىپ تۇرۇشى كېرەك ئىكەن. بۇ خىل ھالەت بازاردىكى تەڭپۇڭلۇق ئەسلىگە كېلىپ بولغۇچە داۋاملىشىدىكەن.
جۇڭگو تۇز سانائىتى باش شىركىتىنىڭ تېڭشۈن تورىدىكى مىكرو بلوگىدا بۇ ھەقتە مۇنداق دېيىلدى:«نۆۋەتتە، بىزنىڭ شىركىتىمىز ئاش تۇزىنىڭ باھاسىنى ئۆستۈرگىنى يوق، بىر تۈركۈم قانۇنسىز سېتىقچىلارنىڭ مەقسىتى پىتنە-ئىغۋا تارقىتىپ، ئارىدىن نەپ ئالماقچى. ئەگەر ئاش تۇزىنىڭ باھاسى نورمال ئەھۋالدىكىدىن ئۆرلىتىۋالغان قىلىمىش بايقالسا، بىز ئالاقىدار تارماقلار بىلەن بىرلىكتە زەربە بېرىمىز. تۇز مەھسۇلاتنى پۈتۈن كۈچىمىز بىلەن بىلەن تەمىنلەشكە تېرىشىمىز. بىز بازاردىكى تەڭپۇڭلۇق ئەسلىگە كېلىپ بولغۇچە، 24 سائەت تۇز مەھسۇلاتى تەمىنلەش مۇلازىمىتىنى يولغا قويدۇق، كۆپچىلىكنىڭ خاتىرجەم بولۇشىنى سورايمىز».
جۇڭگو تۇز سانائىتى باش شىركىتىنىڭ تېڭشۈن تورىدىكى مىكرو بلوگىدىكى يەنە بۇنىڭغا ئالاقىدار ئۇچۇرلاردا مۇنداق دېيىلدى:« ئاش تۇزى بولسا دۆلەت باھاسىنى بېكىتكەن مەھسۇلات، بىزنىڭ شىركىتىمىز ئاش تۇزىنىڭ باھاسىنى ئۆستۈرەلمەيدۇ. ئەگەر سىز قانۇنسىز سېتىقچىلارنىڭ مۇشۇنداق قىلمىشىنى بايقىسىڭىز، مۇناسىۋەتلىك مال باھا ئىدارىلىرىگە ۋە سودا-سانائەتنى مەمۇرىي باشقۇرۇش ئورۇنلرىغا مەلۇم قىلسىڭىز بولىدۇ. ئەگەر ئۆيىڭىزدىكى تۇز سىزنىڭ بىر ھەپتە ئېستىمال قىلىشىڭىزغا يەتسە، ئۇنداقتا كۆپ سېتىۋالمىسىڭىز بولىدۇ».
مەنبە نۇرتورى
