ئىز تورى-爱智网

　　  جۇڭگو ئۇيغۇرچە رادىيو تورى 14-ئۆكتەبىر بېيجىڭ خەۋىرى: ياۋروپا كېڭىشىنىڭ رەئىسى ۋانرومپېي بىلەن ياۋروپا ئىتتىپاقى كومىتېتىنىڭ رەئىسى باراسسو 13-ئۆكتەبىر بايانات ئېلان قىلىپ ياۋروپا پۇل-مۇئامىلە مۇقىملىق مېخانىزمىنى كېڭەيتىش لايىھەسىنىڭ سلوۋاكىيە پارلامېنتىدا ماقۇللانغانلىقىنى تەبرىكلىدى. باياناتتا مۇنداق دەپ كۆرسىتىلدى: مەزكۇر قارارنىڭ ماقۇللىنىشى ياۋرو رايونى پۇل-مۇئامىلىسىنىڭ مۇقىملىقىنى تېخىمۇ كۈچلۈك، تېخىمۇ جانلىق قۇرال بىلەن تەمىنلەيدۇ، ئۇ ياۋرو رايونىدىكى 17 ئەزا دۆلەت، ھەتتا پۈتكۈل ياۋروپا ئەللىرى ئىتتىپاقىغا پايدىلىق. سلوۋاكىيە پارلامېنتى 13-ئۆكتەبىر 114 كىشىنىڭ قوشۇلۇشى، 30 كىشىنىڭ قارشى تۇرۇشى، 3 كىشىنىڭ ۋاز كېچىشى بىلەن ياۋرو رايونى 7-ئاينىڭ 21-كۈنى ئۆتكۈزگەن باشلىقلار يىغىنىدا ئوتتۇرىغا قويغان ياۋروپانىڭ پۇل-مۇئامىلە مۇقىملىق مېخانىزمىنىڭ كۆلىمىنى كېڭەيتىش ۋە جانلىق ئىشلىتىش توغرىسىدىكى قارارىنى ماقۇللىدى، بۇنىڭ بىلەن بۇ قارارنىڭ رەسمىي يولغا قويۇلۇشىدىكى ئاخىرقى بىر توسالغۇ تۈگىتىلدى.