«مىليون گۈل» فىلىمى ھەققىدە «شىنجاڭ سەنئىتى» ژورنىلىدا قىسقىچە سۆھبەت
ئىلاۋە: «شىنجاڭ ھۆرىيەت كىنو-تېلېۋىزىيە چەكلىك شىركىتى» مەبلەغ سېلىپ ئىشلىگەن كۆپ قىسىملىق تېلېۋىزىيە تىياتىرى«مىليون گۈل» نىڭ ئالدىنقى ئىككى قىسىمى پۈتۈپ بازارغا سېلىندى. شۇ مۇناسىۋەت بىلەن بىز مەزكۇر شىركەتنىڭ خوجايىنى ،«مىليون گۈل» فىلىمىنىڭ فىلىم ئىشلىگۈچىسى ھەم باش رېجىسسورى ياش سەنئەتكار ئابلىز ئابدۇرىشىت ئەپەندىنى زىيارەت قىلدۇق.
سوئال: «مىليون گۈل» نىڭ مەنىسى ھەققىدە قىسقىچە چۈشەنچە بەرسىڭىز؟
جاۋاب: بۇ فىلىم مىليونلىغان كەسىپتىكى مىليونلىغان كىشىلەرنىڭ مىليونلىغان تۇرمۇش كارتىنىلىرىنى يورۇتۇپ، شۇ ئارقىلىق مىليونلىغان ياشاش يولىنى ئېكران ئارقىلىق كۆرسىتىپ بېرىشنى مەقسەت قىلىدۇ. ھەم مىليونلىغان كۆرگۈچىلەرنى فىلىمدىكى مەركىزىي ئىدىيە ئارقىلىق مەنىۋى تەربىيەگە ئىگە قىلىشنى نىشان قىلىدۇ. شۇڭا، فىلىم نامىنى«مىليون گۈل» دەپ بېكىتىشنى قارار قىلدۇق.
سوئال: «مىليون گۈل» نىڭ ۋەقەلىكى، راۋاجى، تارقىتىش شەكلى ۋە دائىرىسى توغرىسىدا سۆزلەپ بېرەمسىز؟
جاۋاب: بۇ فىلىم ھازىرقى ئۇيغۇرلار تۇرمۇشىنىڭ ھەرقايسى قاتلاملىرىدىكى مۇھەببەت-نەپرەت ۋە رىقابەت كارتىنىلىرىنى ئارقا كۆرۈنۈش قىلغان. فىلىمدە تۇرمۇشتىكى بىر-بىرىگە زىچ باغلىنىشلىق بولغان روھىي ھالەت ، تۇرمۇش ئۇسۇلى، كەسىپ، قابىلىيەت قاتارلىقلار تەسۋېرلىنىپ مۇھەببەت-نەپرەتنىڭ سەۋەبى، شۇنداقلا راۋاجى، يۇقىرى پەللىسى، خاتىمىسى ئىستېخىيەلىك رەۋىشتە بايان قىلىنىدۇ. ھەمدە بىزنى يامان ئىللەتتىن ئىبرەت ئېلىپ، ياخشى خاراكتىرنى تۇرمۇش ئادىتىمىزگە ئايلاندۇرۇشقا يىتەكلەيدۇ. فىلىمنىڭ كېيىنكى قىسىملىرى داۋاملىق ئىشلىنىپ كۆرۈرمەنلەر بىلەن پەسىل، يىل دەۋرنى بىللە ئۆتكۈزىدۇ. فىلىم شىنجاڭنىڭ ھەرقايسى ۋىلايەت، شەھەر، ناھىيە-بازارلىرىدىن تارتىپ چەت-يېزا قىشلاقلىرىغىچە تارقىتىلىدۇ.
سوئال: «مىليون گۈل» فىلىمىنى ئىشلەش جەريانىدا نېمىلەرنى ھېس قىلدىڭىز؟
جاۋاب: فىلىمنى ئىشلەش جەريانىدا ئويلىغىنىمدىنمۇ كۆپ يېڭى تەسىراتلارغا ئىگە بولدۇم. كەسپىي خادىملارنىڭ مەسئۇلىيەتچانلىقى ۋە قىزغىنلىقىدىن ئىشەنچىم تېخىمۇ ئاشتى. ئەڭ مۇھىمى شىركىتىمىز ھازىرقى كىنو-تېلېۋىزىيە ساھەسىدىكى نەق مەيداندا ئاۋاز ئېلىش، ئارتىسنىڭ ئۆزىنىڭ ئاۋازىنى ئىشلىتىش، مۇھىتنىڭ ھەقىقىي ئاۋازىنى ئىشلىتىش ئۆلچىمىنى قوللىنىشنى ئىشقا ئاشۇردى. شۇنداقتىمۇ بۇ مەشغۇلات بىز ئۈچۈن تۇنجى ئىش بولغانلىقى ئۈچۈن ئارتىسلىرىمىز يۇرت شىۋىسى، ئاۋاز تۈسى جەھەتتىن خېلى ئوبدانلا قىينالدى. بۇنىڭدىن شەخسەن ئۆزۈممۇ مۇستەسنا ئەمەس، ئەلۋەتتە. قۇربىمىزنىڭ يىتىشىچە تەييارلىغان نەق مەيداندا ئاۋاز ئېلىش ئۈسكۈنىلىرىنىڭ ئىقتىدارى ئىچكىرى ئۆلكىلەر ۋە چەت ئەللەردىكى مۇشۇ خىل كەسپكە سەپلىنىدىغان ئۈسكۈنىلەردىن خېلىلا پەرقلىنىپ تۇرسىمۇ بىز يەنىلا ئاۋاز، سۈپەت جەھەتتىن كۆزلىگەن نىشانغا يېقىنلاشتۇق ھەم مول تەجرىبىگە ئىگە بولدۇق. ئەلۋەتتە بىز يەكۈنلىگەن بۇ تەجرىبىلەر فىلىمنىڭ كېيىنكى قىسىملىرىنىڭ ئاۋاز تۈسى جەھەتتىكى سۈپىتىنىڭ تېخىمۇ ياخشى بولىشىغا تۈرتكە بولۇشى ئېنىق. كۆرۈرمەنلەرگە تەكىتلەپ ئۆتۈشكە تېگىشلىك يېرى شۇكى، كىنو ساھەسىدە فىلىمدىكى ئوبرازلارنىڭ نەق مەيداندا ئاۋاز ئېلىش مەشغۇلاتى دۇنيا بويىچە ئۆلچەملەشكەن. پەقەت ئۇيغۇرلارنىڭ فىلىملىرىلا بۇنىڭ سىرتىدا قېپ قالدى. بىز بۇ جەھەتتە يېڭى بىر قەدەمنى باستۇق.
«مىليون گۈل» فىلىمىنى كۆرگەن ھەرقانداق بىر كۆرۈرمەن تۇنجى تۇيغۇسىدا فىلىمدىكى پېرسوناژلارنىڭ ئاۋاز تۈسىگە كۆنەلمەسلىكى مۇمكىن.ئەلۋەتتە بۇ ئۇسۇل ئۇيغۇر كىنوچىلىقى ئۈچۈن يېڭى ئىش بولغاچقا ، ئۇنىڭغا كۆنۈش ئۈچۈن ۋاقىت، جەريان كىتىدۇ. فىلىمنىڭ كېيىنكى قىسىملىرىنى ئىشلەش جەريانىدا كۆرۈلگەن مەسىلىلەرنى ھەل قىلىش بىلەن بىللە، ئارتىسلىرىمىزنىڭ ئاۋاز تۈسى جەھەتتىكى مەشىقىنى تېخىمۇ كۈچەيتىشكە ھەم ئۈسكۈنە-تېخنىكىلىرىمىزنى يېڭىلاپ تېخىمۇ سۈپەتلىك فىلىمنى كۆرۈرمەنلەرنىڭ ھوزۇرىغا سۇنۇشقا تىرىشىمىز.
سوئال: قانۇنسىز كۆچۈرۈپ تارقاتقۇچىلارنىڭ خەۋىپىدىن ئەندىشە قىلامسىز؟ قانداق تەدبىر قوللانماقچى؟ يەنە قانداق دەيدىغانلىرىڭىز بار؟
جاۋاب: فىلىم ئىشلىگۈچى شىركەتلەر ۋە فىلىم تارقاتقۇچىلار بۇ خىل ئەندىشىدىن مۇستەسنا ئەمەس. لېكىن ئەسەر ھوقۇقى قانۇنىنىڭ تېخىمۇ ئىزچىللىشىشىغا ئەگىشىپ، قانۇنسىز كۆچۈرۈپ تارقاتقۇچىلارغا تاقابىل تۇرۇش ئېڭىمىز بارغانسېرى كۈچىيىپ، كۆچۈرمىكەشلەرگە زەربە بېرىش ئىشەنچىمىز ئاشماقتا. شىركىتىمىز رەسمىيەتلىرى تولۇق، قانۇننىڭ قوغدىشىغا ئىگە كەسىپلەشكەن كىنو-فىلىم ئىشلەش شىركىتى. بىز فىلىمنى بازارغا سېلىش بىلەن بىرگە قانۇنسىز كۆچۈرۈپ تارقاتقۇچىلارنى كۈچىمىزنىڭ بارىچە تەكشۈرۈپ ئېنىقلايمىز.
گەرچە قانۇنسىز كۆچۈرۈپ تارقاتقۇچىلار ئارىمىزدىكى مەدەنىيەت سەۋىيەسى بىر قەدەر تۆۋەنلەر بولسىمۇ،ئەمما،ھازىر بۇ يامان ئىللەت بارا-بارا پايدا-مەنپەئەت ئالدىدا ئۆزىنى يوقىتىپ قويىۋاتقان «‹مەدەنىيەت-سەۋىيەسى يۇقىرى»لارغا يۇقىۋاتىدۇ. ھەتتا ئارىمىزدىكى خېلى كۆپ قىسىم كىشىلەر قانۇنلۇق ئەسلى نەشىردىكى ئۈن-سىن پىلاستىنكىلىرىنى سېتىۋېلىشنىڭ ئورنىغا ئوغرىلىقچە كۆچۈرۈپ تارقاتقان سۈپەتسىز پىلاستىنكىلارنى سېتىۋالىدىغان «ئوغرىغا شېرىك بولۇش» قىلمىشىنى سادىر قىلىپ، ئۇلارغا بازار ھازىرلاپ بېرىۋاتىدۇ.
ھەيرانمەن، قانۇننىڭ ھەيۋىسى كۈچىيىۋاتقان بۈگۈنكى كۈندە ئاشۇ قانۇنسىز كۆچۈرۈپ تارقاتقۇچىلار نىمىشقا قانۇننىڭ تورىدىن چۈشۈپ قالىدۇ؟ «ئوغرىغا شېرىك بولغۇچىلار» نىمىشقا ئويلانمايدىغاندۇ؟
سوئال: «مىليون گۈل» فىلىمىنىڭ كېيىنكى قىسىملىرىنى قاچان كۆرىمىز؟ بۇ فىلىم نەچچە قىسىملىق؟ فىلىمدە قانداق يېڭىلىقلار بار؟
جاۋاب: فىلىمىمىزنىڭ دەسلەپكى ئىككى قىسمى بازارغا سېلىنغاندىن كېيىن، مۆلچەر بويىچە ھەر ئايدا بىر قىسىم ياكى ئىككى قىسىمنى پۈتتۈرۈپ بازارغا سېلىشنى ئويلىشىۋاتىمىز. فىلىمنىڭ نورمال داۋاملىشىشىغا ئەگىشىپ نۇرغۇنلىغان يېڭى ئىدىيەلەر مەيدانغا كىلىدۇ. فىلىمنىڭ 100قىسىم ئىشلىنىشى پىلانلىنىپ بولدى.
سوئال: كۆرۈرمەنلەرگە ۋە ھەمكارلاشقۇچىلىرىڭىزغا دەيدىغان قانداق گەپلىرىڭىز بار؟
جاۋاب: كەڭ كۆرۈرمەنلەرنىڭ قاغجىراش گىردابىغا بېرىپ قالغان مەنىۋىيىتىنى پۈتۈن كۈچىمىز بىلەن قاندۇرۇش بىزنىڭ مەقسىتىمىز.بىز كەڭ كۆرۈرمەنلەرنى ھەقىقىي مەھسۇلاتنى سېتىۋېلىپ، ھەقىقى سۈزۈكلۈك ۋە ئېنىقلىقتىن، يۇقىرى ماھارەتتىن ھۇزۇرلىنىش ئادىتىنى يىتىلدۈرۈشكە، بىزگە ماسلىشىپ نومۇسسىز كۆچۈرۈپ تارقاتقۇچىلارغا زەربە بېرىش كۈرىشىگە ئاتلىنىشقا ھەم ئۇيغۇر كىنوچىلىقىنىڭ كەلگۈسى ۋە ساغلام تەرەققىياتىنى قوللاش ۋە قوغداش كۈرىشىگە قاتنىشىشقا چاقىرىمىز.
مۇخبىر: رەيھانگۈل كېۋىر
مەنبە: «شىنجاڭ سەنئىتى» ژورنىلىنىڭ2011-يىللىق1-سانىدىن ئېلىندى.
| 
يوللانغان ۋاقتى 
يوللانغان ۋاقتى 
