(غەزەل)
مۇھەممەدجان راشىدىن
بىزنى ئاچ قالدۇرمىدىڭ ئاپەتتىمۇ، سەھرالىرىم،
بارچىدىن ئۇزسەن چىدام - تاقەتتىمۇ، سەھرالىرىم. 
قۇترىغان جۇتتىن يۇلۇپ ئالغان راھەت بىر باشقىكەن،
بار ئىكەن راھەت دېگەن راھەتتىمۇ، سەھرالىرىم.
جەبرىگاھسەن جان تالاشقان ھەپتە - ئاي گاھ جۇت بىلەن،
تەڭدىشىڭ يوقتۇر روھىي قامەتتىمۇ، سەھرالىرىم.
مەيلى مۆلدۈر، مەيلى قار، ھەر جۇتقا پەرۋايىڭ پەلەك،
كېلىسەن قىلماي پىسەنت ئادەتتىمۇ، سەھرالىرىم.
كەلدى دېھقان جاي ئېلىپ ئىسسىق قۇچاقىڭدىن سېنىڭ،
بار ئۆزۈڭ، چۈنكى جىمى ھاجەتتىمۇ، سەھرالىرىم.
بارچە قۇش - جانلار سېنىڭ قوينۇڭدا كەلدى كۆڭلى توق،
كەتمىدى سەندىن، ئۆلەر ھالەتتىمۇ، سەھرالىرىم.
كېلىدۇ ھەر يىل باھاردا ئاۋۋال ساڭا قۇت چاچقىلى،
بار نېسىۋەڭ خىلمۇخىل ئامەتتىمۇ، سەھرالىرىم.
بىر سەۋرچان مويسىپىتسەن، بۇ سەۋر ھەم بۇ چىدام
بار سېنىڭدە ھەر مىنۇت، سائەتتىمۇ، سەھرالىرىم. | 
يوللانغان ۋاقتى 2011-1-31 18:08
يوللانغان ۋاقتى 2011-2-1 10:39
