بەختىمنى ئىزدەيمەن
ئابدۇرېشىت خوجا
ئەركىلەپ بېقىشىڭ ئەسلەتتى گۈلنى،
بۇ دۇنيا كۆزۈمگە گۈلدەك كۆرۈندى..
ئەتراپقا قارىسام سەن يوق، دىلىمن،
بىر ئازاب چىرمىدى، باغرىم تىلىندى..
ئاھ، دېدىم، ئاشۇ دەم بەزلەپ كۆڭۈلنى،
ئوتلىرىڭ يۈرەكتە چوغدەك بىلىندى..
ئاھ دېدىم، ئاھلىرىم يەتتى پەلەككە،
كۆزيېشىم يامغۇرى ئۇندىن ياغامدۇ..
جۈرئىتىم كەممىكەن، كىملەردە سەۋەن،
گۈزەللەر ياۋاشقا بىغەم باقامدۇ..
سۆيۈمەن دەۋاتسام قاپاقنى تۈرسە،
بۇ قىلىق كۆڭۈلگە، دەپ باق، ياقامدۇ..
بېغىمدا گۈللەر كۆپ، ھىدى ئۆزگىچە،
كىم پۇراپ تاشلىدى، پۇرىماقچى كىم.
تەسەللى تاپمايدۇ سۆيمەي قانغۇچە،
بۇ كۆڭلۈم چىگىشتۇر، يەشمىدى ھېچكىم.
.
قويغىنىم ، تۇتقىنىم ئېسىمدە ئەمەس،
مەن شۇنداق سەۋدايى، بىلمەيدۇ ھېچكىم..
ئويلايمەن ئويلارنىڭ پايانى كەڭرى،
ئۆزۈمگە كايىيمەن قەلبىمنى تۈزەپ..
ھېچ بىر قىز كەلمەيدۇ مەستانە كەبى،
بىلىپ قال، سۆيگۈنىڭ مانا مەنغۇ، دەپ..
بىلىنمەس كۆڭلۈمغۇ ئۆزۈمگە ئەگرى،
ئىزدەيمەن بەختىمنى قايسى قىزدا دەپ..
باغلارغا قارايمەن بۇلبۇل سايرىسا،
چېمەنلەر ئىچىدىن يۇلقۇنار تىلەك..
گۈل پۇراپ قانمىسام، قانمىسام ئاخىر،
بولامدۇ تەشنالىق بۇنىڭدىن بۆلەك..
مىڭ ئازاب ئېچىدە تۇرۇپمۇ يەنە،
چىقارماي تۇرىدۇ تېۋىش بۇ يۈرەك..
قايسى بىر رەناغا يازدىم بېغىشلاپ،
قەلبىمنىڭ قېتىنى ئىزھارلاپ شېئىر..
بۇ ھىجران سۈيلەپلا تۇرغاچ مۇھەببەت،
يۈرگۈزدۈم قايسى بىر شەيئىگە پىكىر..
كۆزۈمگە كۆرۈندى كىم گۈزەل، كىم سەت،
ئالدىمنى توسقىنى قايسى ئېگىز قىر؟
مەنبە: شىنجاڭ گېزىتى | 
يوللانغان ۋاقتى 2011-1-25 00:00
يوللانغان ۋاقتى 2011-1-25 18:46