قىزىل چىش چوتكىسى(ھىكايە)

eltikin

قىزىل چىش چوتكىسى

ليۇ تىڭجى (سىنگاپور)

سەھەر، قۇياش نۇرى يىپەك پەردىدىن ئۆتۈپ ھۇجرامنى جىمجىتقىنە يورۇتۇپ تۇراتتى. مەن ئورنۇمدىن تۇرۇپ ئاستا مېڭىپ تازىلىق ئۆيىگە كىردىم. تازىلىق ئۆيىدىكى ئىككى تال چىش چوتكىسىغا قاراپ تۇرۇپلا قالدىم، يېشىل چىش چوتكىسىنىڭغۇ مېنىڭ ئىكەنلىكى ئېنىق، ئەمما قىزىل چىش چوتكىسى كىمنىڭدۇ؟ ياكى ئالدىنقى قېتىم بىرنى ئارتۇق ئالغاندىمەنمۇ؟ مەن ئۇ قىزىل چىش چوتكىسىغا قاراپ بىر ھازا تېڭىرقاپ تۇرغاندىن كېيىن، ئۇنى ئەخلەت چېلىكىگە تاشلىۋەتتىم. بىر ئادەمنىڭ ئىككى چىش چوتكىسى ئىشلىتىشىنىڭ نېمە ھاجىتى؟
چىشىمنى چوتكىلاۋاتسام بىر ئاۋاز ئاڭلاندى. يەنە شۇ ناتۇنۇش ئايال. قاچاندىن باشلانغانكىن، بىر ياش ئايال ھەر كۈنى مېنىڭ ئۆيۈمنى تازىلايدۇ. ۋاقىتلىق خىزمەتچى تەكلىپ قىلغان - قىلمىغىنىم ئېسىمدە يوق، ئەمما ئۆيۈمنىڭ تازىلىنىشى كېرەكلىكىگە مەن ئىقرار، شۇڭا ئۇنىڭدىن ھېچنېمىنى سوراپ باقمىدىم. ئۇنىڭ چىرايى قانداقراقتۇ؟ پەقەتلا ئېسىمگە ئالالمىدىم، ئادەتتىكىچىلا بولغاندىكىن، مېنىڭ ئاتايىتەن بېشىمنى چىقىرىپ قاراپ بېقىشىمنىڭ ھاجىتى يوقتە؟ يېشىل چىش چوتكىسىنى ئىستاكاننىڭ ئىچىگە سېلىپ قويۇپ، مېھمانخانىغا كىرىپ ئولتۇردۇم، تاماق ئۈستىلىگە قىزىق شوۋىگۈرۈچ، بىر تەخسە چىلانغان سەي، بىر تەخسە چىلانغان تەرخەمەك، يەنە بىر ئىستاكان يېڭىلا تەييارلانغان مېۋە سۈيى تىزىپ قويۇلغانىدى. بىرتال چىلانغان پۇرچاقنى چوكىدا قىسىپ ئاغزىمغا سالدىم، يېيىشلىك ئىكەن. بۇ ئايال خىزمەتكارنىڭ قولىنىڭ بۇنداق تاتلىق ئىكەنلىكى ئەجەپ ئېسىمدە يوققۇ؟ ئەمدى ئۇنى تېخىمۇ كەتكۈزۈۋەتكۈم كەلمىدى. تازا ئىشتىھا بىلەن غىزالىنىۋاتقىنىمدا، ئۇ خىزمەتكار بېشىنى سېلىپ يەرنى سۈرتكەچ يېنىمدىن ئۆتتى. ئۇنىڭ يېشى مېنىڭدىن كىچىكتەك قىلاتتى، ئەمما ئاق چاچلىرى مېنىڭكىدىن خېلىلا كۆپ ئىدى. ئۇنىڭ پول سۈرتكۈچنى تۇتقان قوللىرى پول سۈرتكۈچنىڭ دەستىسىدىنمۇ ئىنچىكە كۆرۈنەتتى.
ــــ تەمى بولامدىكەن؟، ـــ ئۇنىڭ زىل ئاۋازى قۇلىقىمغا كىردى.
ــــ ھە، بولىدىكەن، ـــ مەن كۈلۈمسىرەپ تۇرۇپ جاۋاب بەردىم.
ــــ ئۇنداق بولسا كۆپرەك يەڭ، ـــ ئۇ جاۋابىمنى ئاڭلاپ تولىمۇ خوشال بولغاندەك قىلاتتى، ئەمما ئۇنىڭ ئاۋازىغا خۇشاللىقتىن باشقا يەنە تىل بىلەن ئىپادىلەش تەس بولغان بىرخىل ھېسسىيات ئارىلىشىپ كەتكەن ئىدى. ئۇنىڭ ئاۋازى قەلىب دەرۋازامنى يېنىككىنە چەككەندەك قىلدى، مەن بىردىنلا ئۇنىڭ گەۋدىسىنىڭ كەينىدىن قارىغاندا تېخىمۇ ۋىجىك كۆرۈنۈپ، كىشىنىڭ ھېسداشلىقىنى قوزغايدىغانلىقىنى ھېس قىلدىم.
چوكىنى قويۇشۇمغا، بېشىم پىررىدە قېيىپ كەتتى، ئورۇندۇققا تايىنىپ ئاستا تۇرۇپ، چوڭقۇر نەپەس ئېلىۋالدىم – دە، ھۇجرامغا كىرىپ ئارام ئالماقچى بولدۇم. يېقىندىن بېرى سالامەتلىكىم ياخشى ئەمەس ئىدى، ئوتتۇرا ياشقا بېرىپ قالدىم ئەمەسمۇ، ئېموننىت كۈچۈممۇ ئەينى يىللاردىكىدەك ياخشى ئەمەس.
كارىۋاتتا يېتىپ كۆزۈم ئەمدى ئۇيقۇغا بېرىشىغا، ئۇ ئايال خىزمەتكار مېنى ئويغىتىۋېتىشتىن ئەنسىرىگەندەك، ناھايىتى ئاۋايلاپ دەسسەپ كىرىپ كەلدى، ئۇ يېنىمغا كېلىپ يوتقاننى يېپىپ قويۇپ تازىلىق ئۆيىگە كىرىپ، ئالدىراش ئەخلەت چېلىكىدىكى قىزىل رەڭلىك چىش چوتكىسىنى ئالدى.
ئۇ بىر-بىرىگە ياندىشىپ تۇرغان ئىككى تال چىش چوتكىسىغا قاراپ چوڭقۇر ئۇھسىندى. كۆزىدىن ئاققان ياش ئۇنىڭ مەڭزىنى بويلاپ ، مېنىڭ يۈرىكىمگە تامچىلىدى. ئۇنىڭ يېنىغا بېرىپ تەسەللى بەرگۈم كەلدى، ئەمما زادى نېمە دېيىشنى بىلمەيتتىم، پەقەت نەچچە مېتىرلا كېلىدىغان ئارىلىقىمىز ماڭا ناھايىتى يىراقتەك بىلىندى. ئۇ كارىۋىتىمنىڭ يېنىغا كېلىپ، بىر قاتار كومىلاچ دورىلارنى ئىشكاپ ئۈستىگە قويۇپ قايتا-قايتا جىكىلىدى:
ــــ ئەتىگەندە، كەچتە ئۈچ تالدىن ئىچىسىز ، ئۇنتۇپ قالماڭ، بولامدۇ؟
مەن گاراڭ ھالەتتە ئۇ دورىلارغا قارىدىم، ئۈستىگە« TacrineHCI(Cognex) خاتىرىسىنى يوقىتىش كېسىلىنى داۋالايدۇ» دەپ يېزىلغان ئىدى. دورا ئىچىشنى قانچە قېتىم ئۇنتۇپ قالغاندىمەن ــ ھە! ئېسىمگە كەلدى، نېمىشقا تاماق ئۈستىلىدە قىزىق شوۋىگۈرۈچ تىزىقلىق تۇرىدۇ؟ يەنە تېخى ھېلىقى قىزىل رەڭلىق چىش چوتكىسىمۇ بار، ئۇنى تاشلىۋەتكەن ئىدىمغۇ، نېمىشقا يەنە تازىلىق ئۆيىدىكى ئىستاكاندا تۇرىدۇ؟


ئايگۈل زوردۇن تەرجىمىسى

herep

ياخشى ھىكايىكەن . رەخمەت سىزگە .

salkin11

يازمىڭىزغا رەھمەت ! ...

606113016

muslima12

كۆپ - تەشەككۈر.