نىكاھ بەئەينى بىر ماشىنا نۇرغۇن كىشىنى نىكاھنى بىر جۈپ ئاياغقا ئوخشىتىپ ، << پۇتقا كەلگەن - كەلمىگەنلىكىنى پەقەت ئۇنى كىيگەن ئادەمنىڭ ئۈزىلا بىلىدۇ >> دېيىشىدۇ . مېنىڭچە بولغاندا ، نىكاھ بەئەينى بىر ماشىنىغا ئوخشايدۇ . نىكاھ ھەقىقەتەن بىر ماشىنىغا ئوخشايدۇ . ئەمما ماشىنىلارنىڭ دەرىجىسى ، باھاسى بىر - بىرىگە ئوخشىمايدۇ . ماشىنىغا ھاجىتى چۈشكەن كىشىمۇ ئۆزىنىڭ ھېس - ھەۋىسى ، ئەھۋالىغا بېقىپ سېتىۋالىدۇ . بۇ ھەم سەل چاغلاشقا بولمايدىغان مۇھىم نوقتا سانىلىدۇ . نىكاھلىنىشمۇ شۇنىڭغا ئوخشايدۇ . داغدۇغا بىلەن ھەشەمەتلىك توي قىلامسەن ياكى تۆت ئاغىنەڭنى يىغىپ ئاددىي داستىخان سالامسەن ، بۇنى ئۆزۈڭنىڭ ھالىغا بېقىپ تاللايسەن . يېڭى ماشىنا سېتىۋالغانكەنسەن ، ئۇنى ئېھتىيات بىلەن ئاۋايلاپ ھەيدىمىكىڭ لازىم . شوپۇرلۇققا ھەرقانچە ئۇستا بولساڭمۇ ، ماشىنىنى يەنىلا ئاۋايلاپ ھەيدىمىسەڭ ئالىمادىس بالا - قازادىن ساقلانمىقىڭ تەس . كونىلاردا <<ئاۋايلىساڭ ئۇزاق يېتەر >> دەيدىغان گەپ بار . نىكاھتىن ئىبارەت بۇ << ماشىنا >> ڭنىڭ ئۆمرى ئۇزۇن بولسۇن دەيدىكەنسەن ، ئۇنى ئېھتىيات بىلەن ئاۋايلاپ ھەيدىمىكىڭ زۆرۈر . بەزى شوپۇرلار ئۆزىنىڭ ئۇستىلىقىغا زىيادە ئىشىنىپ ماشىنىنى بولۇشىغا ئۈچۈرىدۇ - دە ، ئاقىۋەتتە بىر يەرگە << ۋاڭ >> ڭىدە ئۈسسۈپ سېلىپ ، بالا - قازا تېرىيدۇ . بۇ ئۆزۈڭگىمۇ ، ئۆزگىگىمۇ زىيانلىق ، ئەلۋەتتە . ماشىنىلىق بولغاننىڭ دەسلىپىدە ئۇ يېڭىلىق تۇيۇلۇدىغانلىقى ئۈچۈن ئۇنى ئاسراپ - ئاۋايلايسەن . لېكىن ۋاقىتنىڭ ئۇزۇرىشىغا ئەگىشىپ ، ماشىنىنى ئاسراشقا ئېرىنچەكلىك قىلىسەن . ھالبۇكى ، ماشىنا ئۇزۇن مەزگىل ماڭغاندىن كېيىن ئۇيەر - بۇ يېرىدىن كاشىلا چىقىشقا باشلايدۇ ، ئەلۋەتتە . بۇنداق چاغلاردا ماشىنىنى ئاسراش ۋە رېمۇنت قىلىش تېخىمۇ زۆرۈر . نىكاھنى ئېلىپ ئېيتىدىغان بولساق ، ئەر - خۇتۇن ئۇزۇن مۇددەت بىر ئۆيدە تۇرغاچقا ، بارا - بارا بىر - بىرىنىڭ كۆزىگە سىغمايدىغان بوپقالىدۇ ؛ ھەتتا تۇرمۇشتىكى نېرى - بېرى ئىشلار تۈپەيلى ئارىدا زىددىيەت تۇغۇلىدۇ . بۇنداق چاغدا ئەر - خوتۇن بىر - بىرىنى چۈشىنىشى ، كەڭ قورساق ۋە ئەپۇچان بولۇشى لازىم . بولۇپمۇ ئەپۇچانلىق خۇددى سىلىقلاش مېيىغا ئوخشاش نىكاھتىن ئىبارەت بۇ ماشىنىنىڭ زاپچاسلىرىنى بىمالال يۈرۈشۈش ئىمكانىيىتىگە ئىگە قىلىدۇ . لېكىن بۇنىڭلىق بىلەنلا << ئىش تامام ، ۋەسسالام >> دېمە . چۈنكى بەزىدە ماشىنىنىڭ ئۇپىرىغان زاپچاسلىرىنى ئالماشتۇرۇپ تۇرغاندەك ، نىكاھمۇ يېڭى - يېڭى مەنالارغا موھتاج بولىدۇ . مۇشۇنىڭغا قادىر بولالىساڭلا ، نىكاھتىن ئىبارەت بۇ ماشىناڭنى ھەر ۋاقىت بىمالال ، بىخەتەر ھەيدىيەلەيسەن . بەزىلەر باشقىلارنىڭ ئۆزىنىڭكىدىن يېڭى ۋە ئېسىل ماشىنىلارنى ھەيدەپ كېتىۋاتقانلىقىنى كۆرۈپ ، << قوشنامنىڭ قوش كۆرۈنۈپتۇ >> دېگەندەك مەيۇسلىنىدۇ . بۇنى توغرا چۈشۈنىشكە بولىدۇ ، ئەلۋەتتە . لېكىن نىكاھتىن ئىبارەت بۇ ماشىنىنى ھەرگىزمۇ باشقىلارنىڭكىگە سېلىشتۇرۇشقا بولمايدۇ . چۈنكى ، بىراۋ ھەيدەپ كېتىۋاتقان ئېسىل ماشىنا ئۇ كىشىنىڭ ئائىلىۋى ماھىيىتىگە ئەمەس ، بەلكى تاشقى قىياپىتىگىلا ۋەكىللىك قىلالايدۇ . ماشىنىنىڭ چىرايلىقلىقى ئۇنىڭ ئىقتىدارىنىڭ زىيادە يۇقىرلىقىدىن دېرەك بەرمەيدۇ . باشقىلار پوزۇر ماشىنىلارنى ھەيدەپ يۈرگىنى بىلەن يۇقىرى ئۆسۈملۈك ماشىنا قەرزىنى ۋاقتى - قەرەلىدە تۆلەيمەن ، دەپ تېشىدا ھېيىت ئويناپ ، ئىچىدە روزا تۇتۇۋاتقان بولۇشى مۇمكىن . ھەدېسىلا ئۆزۈڭنىڭكىنى باشقىلارنىڭكى بىلەن سېلىشتۇرۇپ ئولتۇرماي ، چىن ئىخلاسىڭ بىلەن ئاۋايلا ، ئاسرا ، قوغدا . نىكاھتىن ئىبارەت بۇ ماشىنا ئۆزىنىڭ بەخت رولىنى قولۇڭغا تۇتقۇزغانكەن ، ئۇنداقتا سائادەت مەنزىلىڭگە ئۆمۈرلۈك ھەمرىھىڭ بىلەن بىرگە سەپەر قىلىش ئۈچۈن ھەسسىلەپ تىرشىشىڭ كېرەك ... مەنبە : خاتېرەمدىكى ئىبارىلەردىن ... ئەھمىدى << شەيدائىي >> | 
يوللانغان ۋاقتى 2011-1-19 11:49
يوللانغان ۋاقتى 2011-1-19 13:31
