(ئىسمىنى ئاشكارىلاشنى خالىمىغان كېلىننىڭ ھېكايىسى ) ئوتتۇرا مەكتەپنى پۈتتۈرگەندىن كېيىن ئۆيىمىزگە يېقىن يەردىكى بىر فابرىكىدا ئىشلەشكە باشلىدىم.ئىشداشلىرىمنىڭ كۆپىنچىسى خوتۇن-قىزلار ئىدى.ئىشىمىزمۇ ئاسانئىدى،شۇنىڭ ئۈچۈن بۇ ئىش ماڭا خۇشاللىق ئاتا قىلاتتى. ئون سەككىز يېشىمدا ھازىرقى ئائىلىگە كېلىن بولۇپ كىردىم،قېينانام بى قاراشتا تولىمۇ سىرلىق،ئىچىمدىكىنى تاپ دەيدىغانلارغا ئوخشاپ كېتەتتى،مەھەللىدە نۇرغۇن ئاياللار ئۇنىڭدىن ھېيقاتتى،مەنمۇ دەسلىپىدە سەل قورۇنۇپ يۈردۈم،كېيىن قېينانامنىڭ ئاقىل،مىھىربان ئىكەنلىكىنى بىلدىم.قېينانام بىرەر يەردە ئىشلىمىگەن ئىكەن،بەلكى شۇنىڭ ئۈچۈن بولسا كېرەك.ئەتىگەندە ئىشقا ماڭغىنىمىزدا ھەممىمىزگە ئالاھىدە ئېتىبار بېرەتتى،خۇدددى ئىشلىگەنلەرگە ھەۋەس قىلغاندەك قىلاتتى. تېز ئارىدا قېينانام بىلەن ناھايىتى ئىناق بولۇپ كەتتۇق،ئانا-بالا،ھەدە-سىڭىلدەك بولۇشۇپ كەتتۇق،قانداقلا ئىش بولسا بىرگە قىلاتتۇق.كىيىمنىمۇ بىر خىل كىيىشكە تىرىشاتتۇق،ئۆزۈمچە مەندە بەخىتلىك ئادەم يوق ئىدى،ئۆز ئانام ۋە ئاتاممۇ مېنىڭدىن خاتىرجەم ئىدى. لېكىن.........بەزىدە بەختىم ئۇزاققا سوزۇلمايدىغاندەك كۆرۈنەتتى.سەۋەبى....ئارىدىن ئۈچ-تۆت يىل ئۆتكەن بولۇشىغا قارىماي،تېخى پەرزەنتىلىك بولمىغان ئىدۇق،سېزىپ تۇراتتىم،قېينانام مېنىڭدىنمۇ ئارتۇق بىئارام بولۇپ تۇراتتى.نەۋرە كۆرۈشنى ئارزۇ قىلاتتى.ئەمما ئۇمۇ خۇددى ئوغلىغا ئوخشاش ئىچىدىكى بۇ تۇيغۇلىرىنى ماڭا سەزدۈرمەسلىككە تىرىشاتتى.يىللار ئۆتكەنسېرى ئىچىم تېخىمۇ تىت-تىت بولاتتى.كۆپ ھاللاردا ھېچكىمگە سەزدۈرمەي يىغلاپمۇ ئالاتتىم،ئەنە شۇنداق ۋاقىتلاردا قېينانام چىرايىمدىكى ئۆزگىرىشلەرنى كۆرۈپ قالسا،كايىپ كېتەتتى. -نېمىشقا ئۆزىڭىزنى قىينايسىز؟دوختۇرلارنىڭ گېپىگە قارىغاندا ھەرگىز ئۈمىدسىزلەنمەسلىك كېرەك ئىكەن.بۇنىڭدىن كېيىن نۇرغۇن بالىلىق بولۇپ كەتسىڭىز ئەجەپ ئەمەس.شۈكۈر قىلىڭ،ياخشى ئېرىڭىز بار،ياخشى ئىش ئورنىڭىز بار،بۇ ھەم كاتتا دۆلەت بالام،ئويلاۋېرىپ ئۆزىڭىزنى كېسەل قىلىۋالماڭ... قېينانامنىڭ بۇ گەپلىرى ماڭا تەسەللىي بولاتتى،بىراق بالا ئائىلىنى باغلاپ تۇرىدىغان زەنجىر دەپ بىكارغا ئېيتمىغان ئىكەن.ئەنە شۇ ئەڭ مۇھىم زەنجىرنىڭ ئائىلىمىزدە كەمتۈكلۈكى بىلىنىپ تۇراتتى.چۈنكى بۇ ئائىلىدە مەن يالغۇز كېلىن ئەمەستىم. بىزنىڭ تويىمىزدىن ئىككى يىل ئۆتكەندىن كېيىن قېينئىنىمنىڭ تويىنى قىلىدۇق،بىر يىل ئۆتمەي يەڭگەمنىڭ ئانىسى ئوغۇل نەۋرىسىگە بۆشۈك ياساپ ئېلىپ كەلدى،بۆشۈك تويىدا ئالدىراپ خىزمەت قىلىۋاتىمەنۇ،نەزىرىمدە ھەممىسى ماڭا قاراۋاتقاندەك قىلاتتى.ئۆزۈمدىن ئۆتۈۋاتقانلىقىنى ئۆزۈم بىلىمەن.ئۇلار (خۇدايىم سىزگىمۇ ھەم پەرزەنت ئاتا قىلسۇن)دېگەن تىلەكلىرى.(پالانى يەردە بىر ياخشى دوختۇر بار ئىكەن.پالانچى ئون يىلدىن كېيىن تۇغۇپتۇ)دېگەن گەپلىرى يۈرىكىمگە تىكەندەك سانجىلاتتى. كەيپياتىم بارا-بارا ئۆزگىرىپ ئىلىگىرىكى خۇشال،كۆڭلى توق كېلىنگە ئوخشىماي قالدىم.رەڭگىم سولۇپ،ئورۇقلاشقا باشلىدىم.قېينىنىمنىڭ چىرايلىق چوڭ بولۇۋاتقان ئوغلىنى ئوينىتىۋاتقىنىمدا ئۇنىڭ تاتلىق قلىقلىرىغا مەھلىيا بولۇپ،ئۆزۈمنى ئۇنتۇپ يايراپ كېتەتتىم،لېكىن بۇ خۇشاللىقىم بىردەمدىلا غايىپ بولاتتى،قېيناناملار مېنىڭ خۇشاللىقمنى كۆرۈپ خۇرسەن بولۇشىسا،مەن ئۇلار ماڭا ئېچىنۋاتىدۇ دەپ ئويلاتتىم. قېينانامنىڭ مەسلىھەتى بىلەن ئىككى-ئۈچ يىلدىن بېرى داۋالىنىپ كېلىۋاتاتتىم،گەرچە مېنى داۋالىغان دوختۇرلار داڭلىق دوختۇرلار بولسىمۇ،لېكى بۇ داۋالاشنىڭ نەتىجىسى چىقمايۋاتاتتى،ئېرىممۇ قېيناناممۇ ماڭا تەسەللىي بېرىپ كېلىۋاتقان بولسىمۇ،بىر كۈن ئەمەس بىر كۈنى ئۇلانرىڭ سەۋرى تاقىتىنىڭ ھامان ئاخىرلىشىدىغانلىقىنى ئويلاپ قالاتتم. ئاخىرى شۇنداق بولدى. ئالتە يىل بولغاندا ،بىر كۈنى ئېرىم ئۆيگە قاتتىق مەست بولۇپ قايتىپ كەلدى.ئىلىگىرى بۇنداق ئەھۋال زادىلا يۈز بەرمىگەن ئىدى،شۇڭا نېمە قىلىشىمنى بىلەلمەي قالدىم.قېينانام كېلىپ ياردەملەشتى،بىر ئامال قىلىپ ئېرىمنى ياتقۇزۇپ قويدۇق. -قەيەردە بۇنداق بولۇپ كەلگەندۇ بۇ يۈزسىز-دېدى قېينانام.ئارىلاپ-ئارىلاپ،شۇنداقتىمۇ ئۇ ئائاخىرى ئۇخلاپ قالدى، بۇنىڭدىن ئۈچ-تۆت كۈن بۇرۇن بىر دوستىنىڭ ئۇنى ئوغۇل تويىغا چىللاپ كەلگىنى ئېسىمگە چۈشتى.شۇ يەردە دوستلىرى ئارىسىدا بېشىنى كۆتۈرەلمەي ئولتۇرغان بولسا كېرەك .شۇ ئەلەم بىلەن ئىچكەندۇر،-دەپ ئويلىدىم ئۆزۈمچە. تاڭ ئاتقۇچە كىرپىك قاقمىدىم،ئېرىممۇ بىئارام بولۇپ چىقتى،نېمە ئۈچۈن تۇيمايسەن دەپ تەنە قىلسىمۇ بۇنچىلىك قىينالماستىم،شۇنىڭ بىلەن تاڭغىچە يىغلاپ چىقىتىم.تاڭغا يېقىن ئېرىم بىردىنلا جىمىپ كەتتى،قاراپ باقاي دەپ كىرسەم بېشى يەردە يېتىپتۇ،ياستۇقى نېرىدا سۈرۈلۈپ كېتىپتۇ،ياستۇقنى قويۇپ بېرەپ دەپ تۇتقىنىمنى بىلىمەن،شۇئان سەزدىمكى،ياستۇق ھۆل ئىدى.دېمەك ئۇمۇ ماڭا ئوخشاش يىغلاپتۇ.بۇنىڭ بىلەن كۆكسۈمگە بىراۋ خەنجەر سانجىغاندەك بولدى. قېين يەڭگەمنىڭ يەنە ئاي،يېقىنلاپ قالغان ئىدى،ئەگەر كۆزى يورۇپ قالسا يەنە مېنىڭ يارام ئېچىللىشقا باشلايدۇ،ئەمدى بۇنىڭغا چىدىيالمايمەن.ھېچكىمگە بىلدۈرمەي كېتىشىم كېرەك.ئاستىلا كېتىشىم كېرەك،شۇنداق قىلىپ مەن كەتمەكچى بولدۇم،نەگە بېرىشىمنى،نېمە قىلىشىمنى بىلمەيمەن. ئەمما قەتئىي قارارغا كەلگەن ئىدىم.قەيەردىن كۈچ پەيدا بولدىكى بىلمەيمەن،گېلىمغا ئاللىقانداق بىر نەرسە تۇرۇپ قالغاندەك بولۇپ،كىيىملىرىمنى كىيدىم،چىراغنى ياندۇرمايلا تاڭنىڭ خىرە-شىرە يورۇقىدا ئالتە يىل ياشىغا ئۆيۈمنى كۆزدىن بىر قۇر كەچۈردۈم-دە،ئاستا بوسۇغىدن ئۆتتۈم،دەرۋازىنىڭ قولۇپىنى ئاستا ئېچىۋاتقىنىمدا بىراۋ كېلىپ قولۇمنى تۇتتى، قارىسام قېينانام ئىكەن.بېشىمۇ،پۇتىمۇ يالاڭ قېينانام ئالدىمدا تۇراتتى.ئۆزۈمنى زادى تۇتۇۋالالمىدىم،قېينانامنىڭ باغرىغا ئۆزۈمنى تاشلاپ ئۆكسۈپ -ئۆكسۈپ يىغلىدىم. -ئانا،رازى بولۇڭ،ئوغلىڭىزنىڭ ئۆمرى بۇنداق ئۆتۈپ كەتمىسۇن،سىزمۇ قېينىلىپ كەتتىڭىز. ئەلەمدىن ئۆرتىنىپ كۆپ گەپلەرنى قىلدىم،لېكىن ھەممىسىنىڭ مەزمۇنى يۇقىرىدىكى سۆزلەرگە مۇجەسسەملەنگەن ئىدى،قېينانام ئۈندىمىدى. شۇ كۈنى قېينانام مېنى قۇچاقلاپ ئۆز خانىسىغا ئېلىپ كىرىدى.ئىش ۋاقتى بولغىچە ماڭا تەسەللىي بېرىپ ئولتۇردى.ئالتە بالىنى چوڭ قىلغانلىقىنى،بىرەر ئورۇندا ئىشلىيەلمىگەنلىكى ئۈچۈن باشقىلارنىڭ كىرىلنى ئۆيىگە ئېلىپ كېلىپ يۇيۇپ بەرگەنلىكىنى،شۇنىڭغا ئوخشاش نۇرۇغن قېينچىلىقلارنى سۆزلەپ بەردى.بۇنىڭغا سېلىشتۇرغاندا مېنىڭ تەشۋىشمنىڭ ھېچنېمىگە ئەرزىمەيدىغانلىقىنى،خۇدادىن ئەمىد كۆپلۈكىنى ئېيتتى.ئاينىڭ ئون بەزى قاراڭغۇ بولسا،ئون بەزى يورۇق بولىدۇ دېگەننى چۈشەندۈردى. ئېرىم ئىشقا مېڭىشتىن بۇرۇن ئۈچىمىز بىرگە ناشتا قىلدۇق،ئېرىم نە ماڭا،نە ئانىسىغا بېشىنى كۆتۈرۈپ قارىيالمايتتى،مەنمۇ خۇددى شۇنداق ھالەتتە ئىدىم.قېينانام چاي قۇيدى،بەلكىم بىز چاينى ئەمەس،چاي بىزنى ئىچتى... شۇ كۈنى كېچىسى يەڭگەمنىڭ كۆزى يورىدى،بىر ئوغۇل،بىر قىز جۈپ پەرزەنت كۆردى.مەن قېينانامنى مۇبارەكلەپ كىرسەم،ئۇ مېنى باغرىغا بېسىپ يىغلىدى.بۇ مېنىڭ قېينانامنىڭ كۆز يېشىنى تۇنجى قېتىم كۆرۈشۈم ئىدى. بۇنىڭدىن كېيىن ئىش كۆپ بولىدۇ بالام،ئەگەر رۇخسەت قىلشىسا ئىشتىن ۋاقىتلىق توختىۋېلىڭ،ھەدە-سىڭىللىق دېگەن مۇشۇنداق چاغدا بىلىنىدۇ،يەڭگىڭىزنىڭ قىرىقى توشقىچە يېنىدا بولغىنىمىز ياخشى. قېينانامنىڭ دېگىنىچە قىلدىم.يەڭگەم تۇغۇتخانىدىن چىقىدىغان كۈندىن بىر كۈن بۇرۇن قېينانام ئۆيۈمنى سەرەمجانلاشتۇرۇشۇمنى،شۇ ئۆيگە جاي ھازىرلىشىمنى ئېيتتى،ھەيران بولدۇميۇ،ئەمما دېگىنىنى قىلدىم،ئۇنىڭ ئويلىغانلىرى باشقا ئىكەن. يەڭگەم بىلەن بوۋاق ئۆيگە ئېلىپ كېلىنگەندىن مېنىڭ ئۆيۈمنىڭ ئىشكى ئالدىغا پايانداز سېلىنىدى،بوۋاق بىرىنچى بولۇپ مېنىڭ ئۆيۈمگە ئېلىپ كىرىلىدى،ھەم خۇشاللانغان،ھەم خورلۇقۇم كەلگەن ھالدا يۈگۈرۈپ يۈرۈپ ئۇلارغا خىزمەت قىلىدىم،كەچتە قېينانام ۋە يەڭگەمنىڭ ئانسى مەن بىلەن ئېرىم ئۈچۈن زور بىر خۇشخەۋەرنى ئېيتىشتى،ئوغۇل بىزنىڭ بولارمىش،ئۇنى بىز تەربىيلەيدىكەنمىز. مەن قۇلاقلىرىمىغا ئىشەنمەي قالدىم،قېينانام ئۇزاق سۆزلىدى،يەڭگەمنىڭ ئانىسىمۇ يىغلاپ تۇرۇپ دۇئا قىلدى. -قۇدامنىڭ كېلىنگە بولغان مېھرىنى كۆرۈپ تۇرۇپ،(ياق)دېيىشىم ئىنساپتىن ئەمەس،بىر قىزىم ئىككى بولدى،ئەمدى سىلەر يەڭگە ئەمەس،بەلكى قىيامەتلىك ئىگىچى-سىڭىل بولدۇڭلار. مەن يەڭگەم بىلەن قۇچاقلاشتىم،ئېرىم بىلەن ئىنسىمۇ شۇنداق قۇچاقلاشتى،دېمەك قېينانام بۇنى بۇرۇنلا ئويلىغان ئىكەن،يەڭگەمنىمۇ بۇنىڭغا كۆندۈرگەن ئىكەن.
شۇ كۈنى كېچىسى بوۋاقنىڭ يېنىدا ئۇخلىماي چىقتىم،بۇ چۈشۈممۇ ياكى ئوڭۇممۇ دەپ ئويلىدىم. شۇنداق قىلىپ بىز بالىلىق بولدۇق،پەقەت بوۋاقنىڭ قورسىقى ئاچقاندىلا يەڭگەم ئۇنى ئېمىتىپ بېرەتتى،قالغان چاغلاردا ئۇنىڭ ھالىدىن قېينانام بىلەن مەن خەۋەر ئالاتتۇق،بالىمىز ئىككى ياشقا توشقاندىن كېيىن مەن يەنە ئىشقا چۈشۈپ كەتتىم. ئېيتىسام بەلكىم ئىشەنمەسىسىز، تۇرۇپ-تۇرۇپ بۇ بەخىتىمگە ئۆزۈممۇ ئىشەنمەيمەن،بۇ راستمۇ دەپ ئويلاپ قالىمەن،مېھر مېھىرنى ئويغىتىدۇ دېگەن گەپ راستمۇ ياكى دوختۇرلارنىڭ داۋاسى تەسى قىلدىمۇ،ئوغلۇمنى ئەركىلىتىپ،قىلقلىرىدىن سۆيۈنۈپ يۈرگەن كۈنلىرىمدە خۇشاللىقمىغا يەنە خۇشاللىق قوشۇلدى،مەن ئۆزۈمنىڭ ھەقىقىي ئانا بولۇپ قالغانلىقىمنى مەن ھامىلىدار بولغان ئىكەنمەن،بۇ خەۋەر ئالدى بىلەن قېينانامغا ئېيتتىم،قېينانام سۆيۈنگەنلىكىدىن كۆزلىرىگە ياش ئالدى. مېنىڭ بارلىق بەختىمنىڭ سەۋەبچىسى مانا شۇ قېينانا-ياق،ھەقىقىي ئانام،ھازىر ئىككى ئوغلۇم،ئىككى قىزىم بار،تۇنجى ئوغلىمىز ئون ئۈچ ياشتا،ئەگەر مەن كەتمەكچى بولغان كېچىسى قېينانام مېنى تۇتۇپ قالمىغان ،يەڭگەم ئالىيجاناپ بولمىغان،كەمتۈك كۆڭلۈمنى ۋە باغرىمنى تولدۇرمىغان بولسا شۇ بالىلىرىم،شۇ بەخىتىممۇ بولماس ئىدى. گەرچە نامىمىزنى يوشۇرغان بولساممۇ قېرىنداشلىرىمىز،قولۇم-قوشنىلىرىمىز بۇنىڭ راستىلىقىنى بىلىدۇ،شۇنىڭ ئۈچۈن ھەم بۇ ساددا،لېكىن ئۇلۇغ ئايالغا بىر ئۆمۈر تەزىم قىلىشقا تەييارمەن. مەنبە؛روھىم پاكلىقى
| 
يوللانغان ۋاقتى 
يوللانغان ۋاقتى 
