نورۇزنامە ئاپتورى ئابدۇقادىر مەتسېدىق
(چىرا ناھىيىلىك مائارىپ ئىدارىسىدىن) 
ئىللىق قۇياش نۇر تۆكۈپ يۇرتىمىزنىڭ ھۆسنىگە، يىلنىڭ ئىشى خىسلەتلىك نورۇز بىلەن باشلاندى. باھار ھىدى ئويغاتقاچ دىلدا تاتلىق ئارزۇلار، دېھقان ئاكام يەڭ تۈرۈپ ئېتىزلارغا تاشلاندى.
كۆڭۈللەرگە زوق بەردى غۇر-غۇر باھار شامالى، بۇلۇت تارقاپ سۈزۈلدى كۆك ئاسماننىڭ جامالى، كۈن تەپتىدە قايرىلدى ئاق چوققىنىڭ رومالى، بۇلاقلارنىڭ جىلۋىگەر خۇمار كۆزى شاشلاندى.
ناخشا-مۇقام قاينىدى داپ-دۇتارلار سازلىنىپ، چۈشتى لەرزان ئۇسۇلغا مەجنۇنتاللار نازلىنىپ، كۈلدى ئۆستەڭ-ئامبارلار چايكا،ئۆردەك،غازلىنىپ، باغدا كۆچەت بىخ سۈرۈپ نوتىلاندى-چاچلاندى.
بەرگلەردە ئېچىلدى گۈل-چېچەكلەر ھۈپپىدە، دىماقلارغا ئۇرۇلدى خۇشپۇراقلار گۈپپىدە، شاختا قۇشلار سايرىدى بەزمە قىلىپ جۈپپىدە، مۇنبەت تۇپراق باھارنىڭ ئاپتىپىدا ئاشلاندى.
ئىشقا چۈشتى كەتمەنلەر كۈن نۇرىدا پارقىراپ، يەرنى چوڭقۇر ئاغدۇردى تىراكتۇرلار خارقىراپ، تەكشى قىلدى ئەينەكتەك سوقا-يامپان دارقىراپ، ئېتىزلارنىڭ دۈمبىسى راھەتلەندى-قاشلاندى.
ھەممە كەلدى غەيرەتكە ئىچ-ئىچىدىن روھلىنىپ، بوۋاقلارمۇكۈلدى شات ئۇيقۇسىدىن ئويغىنىپ، كۈتەربىزنى زەر قۇياش ئۇپۇقلاردا چوغلۇنۇپ، بۇۋايلارمۇ ئۈمۈتتە يىگىتلەردەك ياشلاندى. 
بۇ يازمىنى ئاخىرىدا fatima تەھرىرلىگەن. ۋاقتى 2011-3-21 19:10
| 
يوللانغان ۋاقتى 
يوللانغان ۋاقتى 
