غېرىبلىقنىڭ ئاخىرى
غېرىبلىقنىڭ ئاخىرى
يارغول
بۈگۈن مەن ھېچكىمنى ئىزدەپ بارمىدىم،
ماڭىمۇ ھېچيەردىن كەلمىدى سالام.
غېرىبلىق دەرىخى ئېگىزدۇر-ئېگىز،
شاخلاردىن ساڭگىلاپ تۇرار دىل يارام.
ياشىدىم بەك تىمتاس بىر قاقاسلىقتا،
سايە بار ئۇندا بىر، ئۇ مېنىڭ سايەم.
جۈپتى بار ھەركىمنىڭ ھەممە-ھەممىنىڭ،
ۋە يەنە تەنھادۇر ھەر قانداق ئادەم.
خەت كېلىپ باقمىدى ئاسماندىن ماڭا،
مەنمۇ ھەم قۇشلاردىن سالالمايمەن خەت.
ئوقۇغان كەبى مەن كىتابۇللاھنى،
ئۇزاقتىن ئۆزۈمنى ئوقۇدۇم پەقەت.
چېچەكلەر ئېچىلىپ باقمىدى نەۋاق،
كۈزدىكى دەرەختۇر مېنىڭ بۇ قەلبىم.
كۆزۈمدە پارلىغان بىر قەترە ياشتىن،
قۇدرىتىڭ ئاياندۇر رەھمانۇ-رەھىم.
ياشىدىم بەك تىمتاس بىر قاقاسلىقتا،
سايە بار ئۇندا بىر، ئۇ مېنىڭ سايەم.
جۈپتى بار ھەركىمنىڭ ھەممە-ھەممىنىڭ،
ۋە يەنە تەنھادۇر ھەر قانداق ئادەم.
مۇشۇ مىسرالار ماڭا بەك يارىدى...
مۇڭلۇق لىرىكىڭىزغا رەھمەت ياشىدىم بەك تىمتاس بىر قاقاسلىقتا،
سايە بار ئۇندا بىر، ئۇ مېنىڭ سايەم.
جۈپتى بار ھەركىمنىڭ ھەممە-ھەممىنىڭ،
ۋە يەنە تەنھادۇر ھەر قانداق ئادەم.
مۇشۇ مىسرالار ماڭا بەك يارىدى...
مۇڭلۇق لىرىكىڭىزغا رەھمەت چەكسىز ئىشەنگۈچى...
يارغول
بۇ يەردىكى بۇلۇتلارنىڭ رەڭگى قارا،
بۇ يەردىكى قۇشقاچلارنىڭ باغرى يارا.
كۆزلىرى نەم دەرەخلەرنىڭ،چېچەكلەرنىڭ،
ئاخىر ئۆزۈم يېگانىمەن جىلۋە ئارا.
بۇ يەردىكى دەريالارنىڭ دەردى ئۇلۇغ،
بۇلاقلارنىڭ نالىلىرى بۇلدۇق بۇلدۇق،
بۇ يەردىكى ئادەملەرنىڭ دىلى سۇنۇق،
ئاخىر ئۆزۈم يېگانىمەن جىلۋە ئارا.
پەسىللىرى سارغايغان،ھېچ گۈللىرى يوق،
يۇلتۇزلىرى خىرە-خىرە، نۇرلىرى يوق.
بۇ يەرلەرنىڭ مەنزىلى كۆپ،يوللىرى يوق،
ئاخىر ئۆزۈم يېگانىمەن جىلۋە ئارا.
بۇ يەرلەرنىڭ ئوردىسى كەڭ،شائىرى كۆپ،
ھايات قېلىش مەيدانىدا باتۇرى كۆپ.
ئەنە دۇنيا تۇرماقتىدۇر ئۆكسۈپ-ئۆكسۈپ،
ئاخىر ئۆزۈم يېگانىمەن جىلۋە ئارا.
*
قايدىن تاپىمەن
ئايالىم زۆھرەگە بېغىشلايمەن
ئىزگۈ ھېس، خىيالنى ئايدىن تاپىمەن،
ئوينىغان شامالنى سايدىن تاپىمەن.
ئەي مېنىڭ ئۆمرۈمگە ياغقان ئامىتىم،
سېنىڭدەك ئايالنى قايدىن تاپىمەن.
قامەت ۋە يۈكسەكلىك تاغدىن تېپىلار.
مال دۇنيا،تىللا ھەم بايدىن تېپىلار،
رەڭمۇ رەڭ چېچەكلەر باغدىن تېپىلار،
سېنىڭدەك ئايالنى قايدىن تاپىمەن.
قۇياشتىن زوق ئالغان ئىللىق نۇرۇم سەن،
بىر دانەم،يېگانەم ھەم يالغۇزۇم سەن.
ھېچكىمگە ئېيىتمىغان پىنھان سۆزۈمسەن،
سېنىڭدەك ئايالنى قايدىن تاپىمەن.
لىققىدە مۇھەببەت باركەن :lolمۆلدۆردەك تاپتازا مۇخەببەت!
بەت:
[1]