بالىلىرىم ، قۇلاق سېلىڭلار
1. ئەخمەق ، ئەقىلسىز ئادەم قوشنىسىدىن قۇسۇر ئىزدەيدۇ ، قوشنىسىنى ھاقارەتلەيدۇ . سىلەر ئۇنداق قىلماڭلار ، قوشناڭلار ، باشقا مىللەت كىشىلىرى بىلەن ئىناق ئۆتۈڭلار .
2 . ھەر بىر مىللەتنىڭ مەدەنىيىتى ئۆزگىچە بىر خەزىنە . بالىلىرىم ، ئۆز مەدەنىيىتىڭلارنى قەدىرلەش بىلەن بىللە ، باشقا مىللەتلەرنىڭ مەدەنىيىتىدىكى ئارتۇقچىلىقلارنىمۇ ئۆگىنىشكە سەل قارىماڭلار .
3 . بىلىڭلاركى ، بىزنىڭ تەربىيىچىمىز ئۈچ : 1 ) قۇچىقى كەڭ تەبىئەت ؛ 2 ) كىتاب ( پۈتۈكلەر ) ، ۋاقىت ؛ 3 ) ئاتا – ئانا ، ئۇستاز ، جەمئىيەت .
4 . سەمىڭلاردا بولسۇنكى ، قانچىكى كۆپ تىل بىلسەڭلەر ئىشىڭلار شۇنچە ئاسان بولىدۇ ، بىلىمنى قانچىكى كۆپ ، ئەتراپلىق ئىگىلىسەڭلار شۇنچە روناق تاپىسىلەر . ئەقىل – پاراسىتىڭلار قانچىكى كۈچلۈك بولسا ، ئەل ئىچىدە شۇنچە ئىززەت – ھۆرمەت تاپىسىلەر . ئۆزۈڭلارنى ئاسرىساڭلار ساغلام تەن ، ساپ ئەقىل يېتىلدۈرۈشكە ئەھمىيەت بەرسەڭلەر ، ئۆزۈڭلارغىمۇ ، ئەلگىمۇ نەپ يەتكۈزەلەيدىغان بولۇسىلەر .
5 . ياشلىقتىكى كۈچ – غەيرىتىڭلاردىن ، گۈزەللىكىڭلاردىن ، جۇشقۇن – شوخلۇقۇڭلاردىن ، كېلىشكەن قامىتىڭلاردىن مەغرۇرلانماڭلار ، ياشلىقنىڭ تەلۋىلىكى ، ئالدىراڭغۇلۇقىغا بېرىلمەڭلەر . ھەرقانداق ئىشنى قىلىشتا ‹‹ يەتتە ئۆلچەپ بىر كېسىش ›› نى ئۆگىنىۋېلىڭلار .
6 . پىشقەدەم ، تەجرىبىلىك كىشىلەرنى دوست – ئۇستاز تۇتۇڭلار ، ئۇلارنىڭ بارىدا قورسىقىدىكى بىلىمىنى ئىگىلىۋېلىڭلار ، ئۇلارغا ھەمىشە ھەمدەم بولۇشقا تىرىشىڭلار ، ئۇلاردىكى ئادىمىيلىك پەزىلەت ، جاپاغا چىداش ، ئۈمىدۋارلىقلارنى تاكامۇل ئۆزلەشتۈرۈۋېلىڭلار .
7 . ھاياتىڭلارنىڭ ئالتۇن پەسلى بولغان ياشلىقىڭلارنى ھاياتىڭلارنىڭ كېيىنكى دەملىرىگە ئۇل سېلىشقا سەرپ قىلىڭلار ، ئۇنىڭ ھەربىر دەقىقىسىدە ئۆمۈر بېغىڭلارغا بېزەك بولىدىغانلىكى بىلىم ، ئارتۇقچىلىقلارنى ئىگىلەڭلار .
8 . ئاز سۆزلەپ ، كۆپ ئاڭلاشقا ئادەتلىنىڭلار ، بوھتان ، قۇرۇق گەپتىن يىراق تۇرۇڭلار .
9. قەيسەر ، ئىرادىلىك ، كەڭ قورساق بولۇڭلار ، ئېغىز ئۆتكىلىنى پۇختا ئىگىلەشكە ماھىر بولۇڭلار .
10. باشقىلارنىڭ ئەيىبى ، يېتەرسىزلىكىگە كۈلمەڭلەر ، ناچارلارغا ئازار بەرمەڭلەر .
11. ئادەتتە ياشلارنىڭ شەيتىنى كۈچلۈك ، كۈلكىسى كۆپ بولىدۇ . ئەمەلىيەتتىغۇ كۈلۈش سالامەتلىككە پايدىلىق . بىراق ، كۈلدۈم دەپ ئورۇنسىز كۈلۈۋېرىش ، ئارتۇقچە مەسخىرىۋازلىق قىلماسلىق كېرەك .
12. ناۋادا بىرەر يىغىلىش – سورۇنلاردا سۆزلەش نۆۋىتى بېرىلسە ، ئاڭلىغۇچىلارنى بىزار قىلىدىغان باش – ئاخىر يوق تۈگىمەس ۋالاقتەگكۈرۈپلىكتىن كۆرە ئاز ، ئەمما ساز سۆزلەشنى ئۆگىنىۋېلىڭلار .
13. كىشىلەر بىلەن ئوچۇق چىراي ، قىزغىن مۇئامىلە قىلىڭلار ، ئەدەپلىك ، قائىدىلىك بولۇڭلار ، مىسكىن چىرايلارغا ئىللىقلىق ئاتا قىلىشنى ، رەزىللىككە نەپرەت ياغدۇرۇشنى بىلىۋېلىڭلار .
14. ھايات بىلەن ماددىي بايلىق تەبىئەتنىڭ ئىنساننىڭ ئەجرىگە يارىشا بېرىدىغان سوۋغىسى . ئۇنىڭدىن تىرىشچانلىق ، قانائەتچانلىق بىلەن پايدىلىنىشنى بىلىش ئاقىلانىلىك .
15. بالىلىرىم ، مېنىڭچە ، ھاياتلىقتا ئەڭ ۋاپادار دوست كىتابتۇر . كىتاب ئوقۇمىغان دەملىرىڭلارنى جاھالەت چاغلىرى ھېسابلاڭلار .
16. بىلىملىك ، ھىممەتلىك ، ئىنتىلىشچان كىشىلەر ھامان ئانچىكى نەتىجە بىلەن قانائەتلەنمەيدۇ ، يەنىمۇ يۇقىرى پەللىگە يېتىشكە تىرىشىدۇ . بىلىڭلاركى ، بۇ ئىنساننى روناق تاپقۇزىدىغان قۇتلۇق يول .
17. سەمىڭلاردا بولسۇنكى ، تۇرمۇشنىڭ ئاچچىق – چۈچۈكىنى تېتىماي ، دوقاللىرىنى باشتىن كەچۈرمەي تۇرۇپ ، ئۇنىڭ ‹‹ جەننىتى ›› دىن بەھرىلىنىش مۇمكىن ئەمەس . چۈنكى ، ‹‹ جاپا چەكمەي ھالاۋەت يوق ›› تە .
18. بالىلىرىم ، ‹‹ ۋاقىت ئاتقان ئوق ›› دېگەن ھېكمەتنىڭ مېغىزىنى ئوبدان چېقىشنى بىلىۋېلىڭلار . بىزدە يەنە ‹‹ ۋاقتىڭ كەتتى بەختىڭ كەتتى ›› ، ‹‹ ۋاقىت ئالتۇندىن قىممەت ›› دېگەندەك ئەقلىيىلەر كۆپ . بۇلارغا ئەھمىيەت بېرىڭلار ، ھاياتىڭلارنىڭ ھەر بىر دەقىقىسىنى بىھۇدە ئۆتكۈزمەسلىككە تىرىشىڭلار .
19. بالىلىرىم ، سىلەردىن تەكرار – تەكرار ئۆتۈنىدىغىنىم يۈرۈش – تۇرۇش ، كىيىنىشتە مىللىتىمىزنىڭ ئۆرپ – ئادەت ، قائىدە – يوسۇنلىرىغا قەتئىي ئەمەل قىلىڭلار . بىلىڭلاركى ، ھەرقانچە قىلىپمۇ يا ئۇ ، يا بۇ بولالمايسىلەر . دەۋرىمىزدە خاسلىقنىڭ تەكىتلىنىۋاتقانلىقىمۇ شۇ .
20. سادىغاڭ كېتەي بالىلىرىم ، ‹‹ ساغلام تەندە ساپ ئەقىل ›› دېگەن ھېكمەتنىڭ روھى بويىچە تەنتەربىيە ( چېنىقىش ) قا سەل قارىماڭلار . چۈنكى ، ساغلاملىق ھەممىنىڭ كاپالىتى . بالىلىرىم ، ئۇنىڭسىز نېمىلەرنى ئارزۇ قىلىش مۇمكىن ؟ !
ئوبۇلھەسەن داۋۇت تۈزگەن
![](\"Images/Emoticons/4.gif\")
ماقۇل موما
بىر ئادەمنىڭ ئەجىر ئەمگىگى ياخشى بولسۇن يامان بولسۇن،ئۇنىڭغا يۇقارقىدەك مۇئامىلىدە بولۇش سېپى ئۈزىدىن بەدبەخلىقنىڭ ئىپادىسى. دېمەككە ئوڭاي، قىلماق مۈشكۈل تەدبىراخون، نىم بولۇۋاتىمىز؟ نەسىھەت دىگەن ئاچچىق بولمامدۇ بۇزرۇكۋار مۇما.![](\"Images/Emoticons/14.gif\")
![](\"Images/Emoticons/14.gif\")