بىر ئوقۇغۇچىنىڭ ئوقۇتقۇچىسىغا يازغان خېتى

قۇربان

	مۇئەللىم، ماڭا نېمىنى ئۆگىنىشنى ئەمەس، قانداق ئۆگىنىشنى ئۆگىتىڭ، قانداق تەپەككۇر قىلىشنى ئۆگىتىڭ. مۇشۇنداق بولغاندىلا ئۆلۈك يادلاشتىن خالىي بولۇپ، چوڭقۇر تەپەككۇر قىلىش ئادىتى يېتىلدۈرگىلى بولىدۇ. ساۋاقداشلىرىمنىڭ ئالدىدا مېنى دۆشكەللىمەڭ، ساۋاقداشلىرىم مېنى يەكلىسە ياكى كۆزگە ئىلمىسا، ئۆزۈمنى قويىدىغان يەر تاپالماي قالىدىكەنمەن. سىز مېنى ئايرىم يەردە سەمىمىي تەنقىد قىلسىڭىز، مەن تەنقىدىڭىزنى خۇشاللىق بىلەن قوبۇل قىلىمەن. ئارتۇقچىلىقىمنىمۇ كۆرۈڭ، مۇشۇ ئاساستا تۇرغۇزۇلغان ئۆزىگە ئىشىنىش تۇيغۇسى مېنى ئالغا بېسىشقا ئىلھاملاندۇرىدۇ. ھە دېسە مەن ياخشى قىلالمىغان ئىشلارغا ئېسىلىۋالماي، مەن قىلغان ياخشى ئىشلارنىمۇ خاتىرىلەپ قويۇڭ. سىز مېنىڭ مەغلۇبىيىتىمنى ئەمەس، مۇۋەپپەقىيىتىمنى تەكىتلىگەن چاغدا مەن ئۆزۈمنى ئۈزلۈكسىز مۇكەممەللەشتۈرىمەن. خاتالىق سادىر قىلسام، ماڭا تەن جازاسى بەرمەڭ، شۇنداقلا كۆڭلۈمگە ئازار بەرمەڭ. كۆڭلۈمگە ئازار بەرسىڭىز، غۇرۇرۇمنى دەپسەندە قىلىپ، مېنى چۈشكۈنلەشتۈرۈۋېتىسىز. ماڭا ئىشىنىڭ ھەمدە ماڭا ئىشىنىدىغانلىقىڭىزنى ئىپادىلەڭ، بىر ئىشنى قايتا - قايتا تەكىتلەۋەرسىڭىز، ماڭا ئىشەنمەيدىغانلىقىڭىزنى بىلدۈرىدۇ، بۇ مېنى مەغلۇبىيەتكە يۈزلەندۈرۈشى مۇمكىن. ھەممىنى بىر قېلىپقا سېلىۋالسىڭىز، مەن ئۆزۈمنى ئىپادىلەشكە ئامالسىز قالىمەن. ھەممىگە بىر كۆزدە قاراڭ، سىز بەزى ئوقۇغۇچىلارنى نەزەرگە ئېلىپ، قالغان ئوقۇغۇچىلارغا ئېتىبارسىز قارىسىڭىز، بىزنىڭ مۇناسىۋىتىمىزگە تەسىر يەتكۈزىسىز. سىز قابىلىيىتىمنى ئۆستۈرۈش ئۈچۈنلا ئەمەس، بەلكى ئارتۇقچىلىقىمنى جارى قىلدۇرۇش ئۈچۈن ماڭا ياردەم بېرىڭ، چۈنكى مەن ياخشى بىر ئوقۇغۇچى بولۇشتىن ئاۋۋال ياخشى ئادەم بولۇشۇم كېرەك. مەنبەسى:جۇڭگو ئۇيغۇرچە رادىيو تورى