جۇش ئۇرىدۇ ياشلىق ھېسلىرىم (ئەركىن قەييۇم يالچىن)

ئەرچىن

جۇش ئۇرىدۇ ياشلىق ھېسلىرىم
ئەركىن قەييۇم يالچىن

ئاشۇ كېچە

ئاشۇ كېچە ساقلىدىم سېنى ،
گاھ شىۋىرغان سوغۇق بولسىمۇ .
كۆز يېشىمنى تۆكمىدىم ئەمما ،
يۈرەكلىرىم دەردكە تولسىمۇ .

مەھەللەڭگە باردىم نەچچە رەت ،
چۈشلىرىمدە سېنى قولتۇقلاپ .
ۋىسالىڭغا تېخى يېتەلمەي ،
ئۆتكەن كۈنگە كۈلدۈم قاقاقلاپ .

كۆز ئالدىمدىن كەتمەيتتىڭ پەقەت ،
گاھ نامايان بولاتتىڭ خىرە .
كۆزلىرىمنى كۆزۈڭگە تىكسەم ،
سەن بوينۇمغا سالاتتىڭ گىرە .

ئاشۇ كېچە يۈردۈم مەن تەنھا ،
تاپالمىدىم يار سېنى ئىزلەپ .
كۈتكەن ئىدىم سەندىن زور ئۈمىد ،
لېكىن ماڭا بەرمىدىڭ پۇرسەت .

سۆيمىسەڭمۇ مېنى يۈرەكتىن ،
مەن سۆيىمەن سېنى ئەي نىگار .
مەيلى كۆڭلۈڭ بولسۇن ئۆزگىدە ،
پاك سۆيگۈمگە بەرمىگىن ئازار .

يارغا مەكتۇپ

كۆك تىكەنگە ئوخشاتماڭ قىزچاق ،
بېغىمدىكى گۈل – چېچەكلەرنى .
مەن يوق چاغدا قوغلاپمۇ يۈرمەڭ ،
ئۇچۇپ يۈرگەن كېپىنەكلەرنى .

ياشنىتىمەن باغرىمدا سېنى ،
ئاداققىچە ئەزىزلەپ سۆيۈپ .
تېز جاۋاب بەر ، يۈرىمەن ئەنە ،
ھېجرانلاردا ئوتۇڭدا كۆيۈپ .

تەكلىپىمدىن دېلىغۇل بولۇپ ،
غەم يەپ يۈرمەڭ مېنىڭدىن لېكىن .
بىر تىلەك بار يۈرەك قېتىمدا ،
بولسىكەن دەپ ئانامغا كېلىن .

سۆيگۈ دېگەن

قىزىلگۈلگە ئوخشايسەن جانان ،
يۈزۈڭگە خال بەكمۇ ياراشقان .
شۇڭا سېنى ئاللاھ ئېگەممۇ ،
پەقەت ماڭا ئاتاپ ياراتقان .

ئالما تاپسام يېرىمى سېنىڭ ،
ئۆزۈم يالغۇز يىمەيمەن ئەسلا .
چۈنكى سېنىڭ مۇبارەك ئىسمىڭ ،
دىل بېتىمغا يېزىلغان تۇرسا ؟

ئۆزگىلەرگە قىلمايمەن بايان ،
كۆڭلۈمدىكى مەخپىيەت – سىرنى .
يۈرىكىمدە پەقەت سەنلا بار ،
سۆيمەيمەن ھەم باشقا بىرسىنى .

سۆيگۈ بىلەن ياشايلى گۈلۈم ،
سۆيگۈ دېگەن گويا بىر سەنئەت .
پۇراق چاچسۇن سۆيگۈ گۈلىمىز ،
سۆيگۈ دېگەن گۈزەل تەبىئەت .

ئانا

سېغىنغاندا سېنى جان ئانا ،
سۈرىتىڭگە قاراپ تويمايمەن .
بىر ئاللاھدىن تىلەپ ئۆمرۈڭنى ،
شاماللاردىن سالام يوللايمەن .

ئۇزاتقاندا ئوقۇشقا مېنى ،
كۆزلىرىڭگە ياش ئالدىڭ ئانا .
ئەركە ئوغلۇم يىراق كەتتى دەپ ،
يۈرەك – باغرىڭ بولدىغۇ يارا .

غەم قىلمىغىن مېھرىبان ئانا ،
ئۈمىدىڭنى چوقۇم ئاقلايمەن .
ياخشى ئوقۇ دېگەن سۆزۈڭنى ،
ئىشەن ماڭا ، دىلدا ساقلايمەن .

مەكتۇپ يازدىم ساڭا ئانىجان ،
ناتونۇش بۇ ھەيۋەت شەھەردە .
تىلە مېنىڭ بەختىمنى ئانا ،
گۈل يۇرتۇمدا ، سۈزۈك سەھەردە .

( ئاپتور: باي ناھىيە تيەنچىن كۆمۈرچىلىك شىركىتىدە)

زۇھرە

شېئىرلىرىڭىزنى بەك ياقتۇردۇم،قەلەملىرىڭىز ھارمىغاي!