ئىككى شېئىر (ئەھەت غازى)

ئەرچىن

ئىككى شېئىر

پەرق ئەت
ئەھەت غازى

بىلىم باشقا گەپتۇر ، بىلىش باشقا ،
كۈلكە باشقا گەپتۇر ، كۈلۈش باشقا .
ئادەملەر ئادەمگە ئوخشايدۇ بىراق ،
ھايات باشقا گەپتۇر ، ياشاش باشقا .

ھايات باشقا گەپتۇر ، قىممەت باشقا ،
ئەخلاق باشقا گەپتۇر ، ئادەت باشقا .
ھەر كىم ئۆزىچە چۈشىنەر بىراق ،
سۆز بۇ باشقا گەپتۇر ، ھېكمەت باشقا .

ھەۋەس باشقا گەپتۇر ، ئىزدىنىش باشقا ،
سۆيگۈ باشقا گەپتۇر ، سۆيۈش باشقا .
بۇ ئالەم گۈزەللىك ئالىمى بىراق ،
كۆز بۇ باشقا گەپتۇر ، كۆرۈش باشقا .

يول

يىراق – يىراق ئۇپۇقلارغا تۇتاشقان ،
ھەرنە قىسمەت ، كەچمىشلەرگە تويۇق يول .
ئەجداد ئىزى ، ئارمانلىرى قېپقالغان ،
گاھى داغدام ، گاھى ئەگرى ، تۇيۇق يول .

مەنزىللەرنى مەنزىللەرگە ئۇلاتقان ،
نامىڭ ئاددى ، ئەمما ئۆزۈڭ ئۇلۇغ يول .
ئەجداد ئىزىن ئەۋلادلارغا يەتكۈزگەن ،
قەرنىلەردىن قەرنىلەرگە ئوچۇق يول .

سەنسىز كۆپلەر مەنزىلىدىن ئاداشقان ،
ئاداشقاننىڭ ماياكىسەن نۇرلۇق يول .
بىلگەنلەرگە دائىم داغدام ئوچۇق يول ،
بىلمىگەنگە ئەگرى – بۈگرى تۇيۇق يول .
( ئاپتور – باي ناھىيەلىك مائارىپ ئىدارىسىدە)

ئەلشىر

شېرى قابىليىتىڭىزگە  قايىل مەن  ، ياخشى ئەسەرلىرڭىز  توختاپ  قالمىغاي   .