سۆيگۈ ياپرىقى (تۇنياز ھېيت سەرئالىپ)

ئەرچىن

سۆيگۈ ياپرىقى
تۇنياز ھېيت سەرئالىپ
ئىلتىجا
چېقىن چېقىپ ئۆتكىنىڭدە يولۇمدىن ،
سىرغىپ چۈشەر كۆزلىرىمدىن مۇڭ يېشى .
تەشۋىشلىنىپ ئۈزگىنىمدە گۈلۈڭدىن ،
ئۈمىد ئاتا قىلار ماڭا قۇت تېشى .

نىچۈن سېنى سۆيەلمەيمەن يۈرەكتىن ،
كىملەر كېلىپ دەردلىرىمنى ئوۋلىغان ؟
قاناتلىنىپ مۇھەببىتىم بىلەكتىن ،
ناخشىسىغا جورا قىلىپ توۋلىغان ؟

شۇل چۈشلەردىن زاھىر بولسا كۆرگىنىم ،
يېتەلىسەم ئويغاق پېتى مەنزىلگە .
قەھ – قەھ ئۇرۇپ ھايات پەيزى سۈرگىنىم ،
جۆر بولاتتى ھايات يولۇم پەللىگە .

سەن قەلبىمدە گويا بىر چوغلۇق
تەڭلەپ سالساڭ بىر قۇچاق ئازاب ،
كۆز دېڭىزىم چاچراتماس قەترە .
بۈيۈكلىكىڭ قەلبىمدە يايراپ ،
ئايلاندۇرار مەست قىلغۇچ ئەترە .

چوقۇۋالساڭ تۇمۇچۇق بولۇپ ،
بار جىسمىمنى قىلاي سەدىقە .
دىل قەسرىڭگە سالساڭمۇ قۇلۇپ ،
يالقۇن بولۇپ كۆيەر ئەقىدە .
باھار قارلىغىچى
باش باھاردىن بىر قۇچاق يۈدۈپ ،
دەرىزەمنى چەكتىڭ جىممىدە .
قايسى شامال ئۇچۇرتۇپ سېنى ،
بىلەلمىدىم ، ئەپكەلدىكىنە ؟

مامكاپ گۈلى سېغىندۇردىمۇ ؟
ۋىچىرلىشىڭ گويا بىر ئازاب .
سىرلىرىمنى تۆكۈپ بېرەيمۇ ؟
يار ئۇزاتقان يوللارغا قاراپ .

تىلىمىز بىر ، دىلىمىزمۇ ھەم ،
ئىستىكىمىز ئىللىق بىر ئۇۋا .
ۋىسال تامان باسىمىز قەدەم ،
مەنزىلىمىز بولىدۇ لاۋا .

تىلىكىم بار ، باھار قالىغىچى ،
ئېلىپ كەتكىن قوشۇپ يۈرەكنى .
ئۈششۈك ئاسمان ئاچسا نۇر چىراي ،
يولاتمايمەن سەندىن بۆلەكنى .

كېلىۋەرگىن باھار ئەلچىسى ،
سىرداش بولۇپ ئۆتەيلى ئىجىل .
ئۆسسۇن تېمەن سۆيگۈ ياپرىقى ،
ئاشىقلارنى قىلايلى خىجىل .
(ئاپتور: باي ناھىيەلىك خەلق سوت مەھكىمىسىدە)

زۇھرە

بەك ياخشى يېزىپسىز،تېخىمۇ كۆپلەپ مۇشۇنداق ئېسىل شېئىرلارنى يېىزىپ تۇرىشىڭىزغا تىلەكداشمەن! قەلەملىرىڭىز ھارمىغاي!