كۇماراجىۋا ھەيكىلىگە (نەسىر) پەرھات كېرەم

ئەرچىن

كۇماراجىۋا ھەيكىلىگە

( نەسىر )
پەرھات كېرەم
كۇماراجىۋا ، مەن ھەر قېتىم سېنىڭ ھەيكىلىڭ ئالدىدىن ئۆتسەم ، نېمىشقىدۇر چوڭقۇر خىياللارغا غەرق بولىمەن ، يېڭى سوئاللارغا دۇچ كېلىمەن . نېمىشقىدۇر سېنىڭ نىلۇپەر تەختىدە خىيالچان ئولتۇرغان شۇ قىياپىتىڭ مەندە ئاجايىپ ئوي – خىياللارنىڭ پەيدا بولۇشىغا سەۋەبچى بولىدۇ . سېنىڭ مەغرىپكە قاراپ ئولتۇرغان ئاشۇ تۇرقۇڭ يۇرتنى ، بالىلىقنى سېغىنىپ ، چوڭقۇر خىياللارغا غەرق بولغان مويسىپىتنى ئەسلىتىدۇ . نېمىلەرنىدۇر تىڭشاۋاتقاندەك كۆرۈنىسەن ، لېكىن سەن ئاڭلىماقچى بولغان راھىبلارنىڭ نوم تىلاۋەت قىلغان ئاۋازى ئاللىقاچان ئۆچكەن ، مىڭ بۇددا غارلىرى سۈكۈتكە چۆككەن ، نوم تىلاۋەت قىلىدىغانلار يات دىنغا كۆچكەن ، سېنىڭ ئاڭلايدىغىنىڭ سۈكۈت ، ئۆكۈنۈش .
ئاڭلاۋاتامسەنكى ، ئەنە زىرىق جىلغىسى ، سۆگەت جىلغىسىدىكى قىيالاردىن تامچىلار ھاسىل بولغان ، ئېرىقلاردىكى سۈزۈك سۇلار شىلدىرلاپ ئاقىدۇ . ئۇلارنىڭ سۈكۈتكە پاتقان جىلغىلاردىن چىقىپ شىلدىرلار ئېقىشىمۇ ئادەمگە بىر خىل سۈرلۈك تۇيغۇ ، تىمتاسلىق ئاتا قىلىدۇ .
بىر زامانلاردا بۇ جىلغا خۇشبۇي ئىسرىق ئىسىغا تولۇپ ، تاۋاپ سەيلىچىلەرنىڭ دىماغلىرىنى غىدىقلاپ ، راھىبلارنىڭ نوم تىلاۋەت ئاۋازى بىلەن قوشۇلۇپ يىراقلارغا تارالغان بولغىيتتى ، ھەر بىر غاردىكى ھۆر – پەرىلەر تاۋاپچىلارنىڭ مەيىل – زوقىنى قوزغاپ ، باش ئۇرۇشلىرىغا سەۋەبچى بولغان بولغىيتتى ، ئەنە شۇ غارلاردا شۈەنزاڭ يول ئازابىدىن ، ئاچلىق ، ئۇسسۇزلۇق ئازابىدىن يارىلانغان كۆڭلىگە تەسەللىي ، ئۈمىد تاپقان بولغىيتتى ، ئەنە شۇ نوم قىرائەت ئاۋازى ، ئەنە شۇ خۇشبۇي ئىسرىقلار ھىدى سېنىڭ نامىڭنى يىراق – يىراقلارغا تارقاتتى ، كەلكۈندەك يوپۇرۇلۇپ كېلىۋاتقان بۇت تاۋاپچىلىرىنىڭ سانىنى ئاۋۇتتى .
يىللار ئۆتتى ، مىڭ بۇددا غارلىرىدىكى خۇشبۇي ئىسرىقلار ھىدى ئاستا – ئاستا سۇسلىدى ، نوم قىرائەت ئاۋازى ، تاك – تاك ئاۋازى ئاستا – ئاستا شالاڭلاپ ئاخىرىدا ئاڭلانماس بولدى . ئاڭلىنىدىغىنى پەقەت جىلغىلاردىن تامچىپ چىققان سۇلاردىن ھاسىل بولغان ئېرىقلارنىڭ قىرغاقلىرىدىكى قىياق ، يالپۇزلارنىڭ چايقىلىشى ، سۇلارنىڭ شىلدىرلىشى ، مۇزات دەرياسىنىڭ شاۋقۇنى . \
مۇزات دەرياسىنىڭ شاۋقۇنى مىڭ بۇددا غارلىرى جىلغىسىدىن ئېقىپ چىققان تۇزلۇق سۇ كېيىنكى زامانلاردا يەنە بىر تۈركۈم ئادەملەرنى ئۆزىگە جەلپ قىلدى . مىڭ ئەپسۇس ، ئۇلار خۇشبۇي ئىسرىق ھىدىدىن ھىدلانغىلى ، نوم قىرائەت ئاۋازلىرىدىن مىسكىن كۆڭۈللىرى ئۈچۈن تەسەللىي تاپقىلى كەلگەنلەرگە ئوخشىمايتتى . سېنىڭ ۋە ئەجدادلىرىڭنىڭ قەدەم ئىزى تەگكەن ھەر بىر غار ، يۈكسەك ئەقىدە ، ئېتىقادىنى ئۆزىگە مۇجەسسەملىگەن قوللاردىكى مېتىنلارنىڭ ئىزىدىن پۈتكەن غارلار ۋە بۇرھان تەختىگە يەتمەكنى مەقسەت قىلغان پەرھاد ۋە شاپۇر كەبى تەقۋادار ئوغلانلارنىڭ ئەجرىدە مۆجىزە كەبى ھاسىل بولغان ئاجايىپ سۈرەتلەر ئۇلارنى جەلپ قىلدى . ئۇلار ھەيرانلىق دەشتىدە ئاغزىنى چاكىلدىتىپ ، تويماس كۆكۈش كۆزلىرىدە سىنچىلاپ بېقىپ ئەقلى لال بولۇشتى . بىرىنىڭ كەينىدىن بىرى تاپ باستۇرۇپ كېلىشىپ ، مىڭ بۇددا غارلىرىدىكى توپا باسقان ، ئۆمۈچۈك تور تارتقان بۇت تەكچىلىرىنى قۇرۇقداپ قويۇشتى . باقىي ئالەمنىڭ ئېرەم باغلىرىدىكى ھۆر – پەرىلەرگە تەققاس سىزىلغان گۈزەل سىزمىلارنى قومۇرۇپ ئېلىشتى . ئاخىرىدا قىزغىنىش ۋە ئۆچمەنلىكتىن خىرەلەشكەن كۆزلىرىگە قان تولۇپ غارلارنى ، بۇت تەكچىلىرىنى ، بۇتلارنى ئۇرۇپ چېقىشتى ، ئوت قويۇپ ئىسلاپ كېتىشتى ، ئاجايىپ گۈزەل رەسىملەرنى چوقۇپ كۆزلىرىنى ئويۇپ ئېلىشتى .
كۇماراجىۋا ، مۇڭلىنىشقا ھەقلىقسەن . سېنىڭ سۈكۈتكە چۆمگەن ئاشۇ قىياپىتىڭ ئەنە شۇ تارىخنىڭ ئىزناسىغا شاھىد . يىللارسېرى ئازلاپ كېتىۋاتقان مىڭ بۇددا غارلىرى سېنىڭ سۈكۈتكە چۆمگەن مىسكىنلىكىڭنىڭ سەۋەبىدۇر . بەلكىم ئاڭلاۋاتىدىغانسەن ، مىڭ بۇددا غارلىرى جىلغىسىدىن يىلسېرى ئۇلغىيىپ ئېقىپ چىقىۋاتقان تۇزلۇق سۇلارنىڭ شىلدىرلىشىدىمۇ يىراقتا شارقىراپ ئېقىۋاتقان مۇزات دەرياسىنىڭ شاۋقۇنىدىمۇ بىر نالە ، ئىڭراش بار . غارلارنىڭ گۈمۈرۈلۈپ چۈشكەندىكى ئاۋازى ئەنە شۇ شاۋقۇنلارغىمۇ سىڭىپ كەتكەن .
( ئاپتور – باي ناھىيە ياتۇر يېزىلىق ئوتتۇرا مەكتەپتە )