سۆيگۈ كۈيلىرى-مەھمۇدجان خوجا ئۈمىدۋار

ئەرچىن

سۆيگۈ كۈيلىرى
(ناخشا تېكىستلىرى)

مەھمۇدجان خوجا ئۈمىدۋار

سېنى كۈتۈپ

ئايسىز قالدى مېنىڭ تۈنلىرىم،
مۇڭغا تولدى ئېيتقان كۈيلىرىم،
بىر ئۈمىدتە ياشايمەن ھامان،
سېنى كۈتۈپ ئۆتەر كۈنلىرىم.

ئىزدەپ كەلدى تالاي جانانە،
كۈيلىرىمگە بولۇپ مەستانە،
مەن ئۇلارغا ئەمەس پەرۋانە،
سېنى كۈتۈپ ئۆتەر كۈنلىرىم.

بىلەلمەسمەن، نەدۇر خىيالىڭ،
ئارزۇيۇمدۇر شېرىن ۋىسالىڭ،
دىل بېرىشكە يوقمۇ ئامالىڭ؟!
سېنى كۈتۈپ ئۆتەر كۈنلىرىم.

سېنى كۆرگۈم كېلەر، بەرىبىر

ئىشىك چېكىپ پەرىلەر ئۆتەر،
سېنى كۆرگۈم كېلەر بەرىبىر.
گۈللەر توزۇپ، قۇشلارمۇ كېتەر،
سېنى كۆرگۈم كېلەر بەرىبىر.

دۇنيادا سەن يىگانە سەنەم،
ھۆسنۈڭ كۈيلەپ تالمايدۇ قەلەم،
ھەر كۈن ماڭا قىلساڭمۇ ئەلەم،
سېنى كۆرگۈم كېلەر بەرىبىر.

چىرايىمنى سارغايتىدۇ غەم،
قار ياغىدۇ يۈرەكىمگە ھەم،
مەن قەلبىڭگە سىغمىغان ئادەم،
سېنى كۆرگۈم كېلەر بەرىبىر.

يىراقلارغا جىمجىت كېتەرسەن،
ئورنى ئاسمان، بىپەرۋا لېۋەن،
قالساممۇ دەرد-ئازابلار بىلەن،
سېنى كۆرگۈم كېلەر بەرىبىر.

مەشۇققا سۇئال

ناخشام بىلەن يوللىدىم سالام،
سىزگە مېھرىم قىلغاچقا داۋام،
سۆزۈم بولماس شۇندىمۇ تامام،
مەندىن يىراق كېتەمسىز جانان؟!

سۆيگۈ تولغان يورۇق دۇنيادا،
ئۆتسە كۈنلەر غەمكىن، بىناۋا؛
بۇ ئەلەمگە قىلماستىن داۋا،
سۈكۈتلەرگە پاتامسىز جانان؟!

ھىجرانىڭىز قىينايدۇ ھامان،
چىن ئاشىقمەن، غەمدىن باغرى قان،
شەھىرىڭىزدە ياشايمەن پىنھان،
سۆيگۈڭىزدىن تانامسىز جانان؟!

يۈرەكىمدىن ئالغان مەڭگۈ جاي،
سىز بەرىبىر خىرەلەشمەس ئاي،
نۇرىڭىزنى مەن ئۈچۈن چاچماي،
ئۆزگىگە يار بولامسىز جانان؟!

يېنىمغا قايتىڭ

يۈرەكىمگە شولا تاشلاپ ئۆتۈپ كەتتىڭىز،
سىزنى ئىزدەپ يۈرگەنىمدە يۈتۈپ كەتتىڭىز.
سىزگە مېھىر بېرىشىمگە كەتمەيدۇ سەۋەب،
دىل سۆزۈمنى ئېيتسام، ئەجەب چۆچۈپ كەتتىڭىز؟!

بۇ دەۋرنىڭ سىزدەك گۈزەل رەنالىرى بار،
قەلبى كۆيگەن مەندەك چىۋەر بەرنالىرى بار،
ئاشىقلارنىڭ ئارىسىدا يىگانىدۇرمەن،
پاك دىلىمدا چىن سۆيگۈنىڭ دەريالىرى بار.

تۇرنا بولۇپ يىراقلارغا قىلدىڭىز پەرۋاز،
ماڭا كۈلۈپ باقمىدىڭىز، قىلمىدىڭىز ناز.
زىمىستاندا قويماڭ مېنى، يېنىمغا قايتىڭ،
ئۆمۈر بېغى گۈللىنىدۇ كەلسە باھار، ياز.

ماڭا كۆيۈپ قالغان گۈزەللەر

مېنى ئوتتا قىلىدۇ خاراب،
ماڭا كۆيۈپ قالغان گۈزەللەر.
دىلغا مىڭ رەت سالىدۇ ئازاب،
ماڭا كۆيۈپ قالغان گۈزەللەر.

باغلىرىمدا كۈلۈپ بىر ئوماق،
دىل قۇشۇمغا قۇرار مىڭ توزاق،
قىيناپ تۇرار كەتكۈزمەي يىراق،
ماڭا كۆيۈپ قالغان گۈزەللەر.

مىنىپ سۆيگۈ يولىدا ئاتقا،
مېنى باشلار گۈزەل ھاياتقا،
ياردۇر ئەمما ئاقىۋەت ياتقا،
ماڭا كۆيۈپ قالغان گۈزەللەر.

يۈرۈشۈمگە قىلىپتۇ ھەۋەس،
مەنچە بۇنى «سۆيگۈ» دېيىش تەس،
ئۆز ھالىچە قالسۇن ئەمدى بەس،
ماڭا كۆيۈپ قالغان گۈزەللەر.

قۇت تىلەيمەن

توي قىلىسىز مېنى قويۇپ پىراقتا،
بىكار كەتتى سىزگە قىلغان ئەقىدەم.
خۇشال كۈنلەر ئەمدى مەندىن يىراقتا،
تويىڭىزغا قۇت تىلەيمەن مەلىكەم.

ماڭا قايتا خەت ئەۋەتىپ يۈرمەيسىز،
باھاردىمۇ باغلىرىمغا كەلمەيسىز،
نە ھالەتتە قالغىنىمنى بىلمەيسىز،
تويىڭىزغا قۇت تىلەيمەن مەلىكەم.

دەردىڭىزدە خازان بولار گۈللىرىم،
ئەلەم بىلەن ئۆتەر مېنىڭ كۈنلىرىم،
مۇڭغا تولار ئەمدى ئېيتقان كۈيلىرىم،
تويىڭىزغا قۇت تىلەيمەن مەلىكەم.

سىز يېنىمدا توختىمىغان شامال سىز،
يات كوچىغا پېتىپ كەتكەن ھىلال سىز،
سىز مەن ئۈچۈن مەڭگۈ شېرىن خيال سىز،
تويىڭىزغا قۇت تىلەيمەن مەلىكەم.
(ئاپتور: «شىنخاڭ ياشلىرى» ژۇرنىلى تەھرىر بۆلۈمىدە)

مەنبە: «مۇزات دولقۇنلىرى»2012-يىل 4-سانىدىن

شېرىۋاز

شېئر ئاددىي،پىكىر تەبىئي ئىپادىلىنىپتۇ.مەنچە بولغاندا پىكىرنى سەل غوۋالاشتۇرسا ياخشى بولامدىكىن دەپ ئويلۇدۇم.

يارۇغ

ياخشى يېزىلىپتۇ

زۇھرە

شېئرلار بەك ياخشى يېزىلىپتۇ،مەن بەك ياقتۇردۇم،قەلەملىرىڭىز ھارمىغاي!

ئەنۋەر700

ئالامەت  ياخشى يېزلىپتۇ؟؟؟؟ھارمىغايسىز