چاقچاقنامە (ئېلى نىياز دەرمانى)

ئەرچىن

چاقچاقنامە

(ئاقسۇ ۋىلايەتلىك  يازغۇچىلار جەمئىيتى تۈزگەن ‹‹تارىم ناۋاسى›› ناملىق توپلامدىكى قەلەمكەشلەرگە چاقچاق )

تۇنىياز مەمەتنىيازغا
قۇغۇنلۇقتا قويدۇق كىيدۈرۈپ ،
‹‹مۇنەۋۋەر››لىك تونىنى سىزگە .
‹‹جۇدالىقنىڭ تۇيغۇلىرى››مۇ ،
ھوزۇر ئىلھام بەرمەكتە بىزگە .

                               بېغىمىزنىڭ پەرۋىشكارى سىز ،

                                 ئەجىرىڭىزدىن رەڭلىنەر چېچەك .

                                    ساغلام ئۇزۇن ئۆمۈر بار بولسۇن ،

                                     بۇ مەندىكى بىر ئوتلۇق تىلەك !…

روزى ھاپىزغا
مۇزاتتىكى پىشقەدەم سالچى ،
دولقۇن ئارا ئۈزۈپ كەلدىڭىز .
يېرىم ئەسىر مۇزات بويىدىن ،
دۇر – ئۈنچىلەر سۈزۈپ كەلدىڭىز .

                                        ‹‹مۇۋەششەئى مۇخەممەس››يەنە ،

                                   ئەۋلادلارغا بولغۇسى ئۆرنەك .

                                     دەم ئېلىشقا چىقتىڭىز ئەمدى ،

                                            ئاسان ئەمەس ئەلنى خوش ئەتمەك .

ئابلىز قۇربانغا
بىر تىرىشچان شائىر ئىدىڭىز ،
تىل ئۇستىسى ماھىر ئىدىڭىز .
‹‹ھاتا ۋە مەن›› دىدىڭىز ئاران ،
تالاي ئىشقا قادىر ئىدىڭىز .

                                       سىزنى ئىلىپ كەتتى شۇم ئەجەل ،

                                    تېڭىرقاپلا قالدۇق بىر مەھەل .

                                       قايغۇ بەرسۇن قەلەمگە قۇۋۋەت ،

                                          كۆكتە پارلاپ چىقسۇن بىر زوھەل .

سالى ئىبىراھىمغا
‹‹شۇنداق خەق بىز›› قەلىپ غۇرۇرى ،
تەشنا دىلغا شەربەت يەتكۈزدى .
بىراق سىزگە ھاردۇق يەتتىمۇ ؟
‹‹تاغ بۇلىقى›› ماغدۇر كەتكۈزدى ؟

                                                  ئەھەت ئامانغا
                                                ئوقۇتقۇچى ھەمدە غەزەلخان ،
                                                خوپ ياراشقان تونىڭىز سىزگە .
                                                ئۇلار ياستۇق بولۇپ قالمىسۇن ،
                                                يېڭى مېۋە سۇنمامسىز بىزگە ؟
ئىبراھىم قۇربانغا
‹‹يەتتە قىز››نى قاتارغا قوشۇپ ،
قىلمىغانسىز ئەسلا ‹‹پۇشايمان››.
توققۇز بۇلاق بەرگەچكە ئىلھام ،
‹‹ئۇچقۇن›› لىرىڭىز ياندۇردى ئارمان .

                                             تۆھپىكار سىز ئەلگە خەلقىمگە ،
                                             تون كىيدىڭىز خوپ ياراشتۇرۇپ .
                                             يوللار يىراق مەنزىللەر يىراق ،
                                             تۇرماڭ دەيمەن قولنى قوشتۇرۇپ .

ھۈسەيىن ئىمنھاجىغا
كەسپداشمىز ھۈسەينھاجىكا ،
بىمار تەنگە بولىمىز دەرمان .
بىر دەستە گل تۇتتۇم ھۆرمەتتە ،
ئەشئار بىلەن قايتسۇن دەپ ھامان .

                                              ھېلىم ئەبەيدۇللاغا
                                         چاخچاق بىلەن گۈزەلدۇر ھايات ،
                                         چاخچاق بىلەن ئۇزارغاي ئۆمۈر .
                                         ھايات دېمەك ئاق بەتلىك كىتاب ،
                                         ئىجاد بىلەن باسقايسىز مۆھۈر .
قەييۇم مەمتىمىنگە
‹‹موللامۇسا ھەققىدە›› يېزىپ ،
‹‹مىڭ ئۆي›› ئارا سەيلە ئەتتىڭىز .
يوقمۇ سىزنىڭ باشقا سۆزىڭىز ،
ئۇزۇن بولدى يوقاپ كەتتىڭىز ؟
                              
                                                ياسىن قاسىمغا
                                           ‹‹باشلىق بولغان دوستۇمغا›› دەيسىز ،
                                           خانتەڭرىنىڭ مۇكاپاتى بار .
                                           پۇقرانىمۇ يېزىپ باقمامسىز ؟
                                           قانداق كۆڭۈل قىلىدۇ ئىزھار ؟
شەيدائىغا
‹‹ساقىنامە›،يازسىز تېخى ،
مەيخۇمارلار مەيلىنى ئېلىپ .
تېما كۆپتۇر تۇرمۇشتا دېگەن ،
يېڭى جەڭڭە كېلىڭ ئات سېلىپ .

                                                 تۇرسۇن مامۇتقا
                                          ئوغلىڭىزغا نەسھەت قىلىپ ،
                                         ياخشى يولغا سېلىپ قويدىڭىز .
                                        شەخسىيەتچى ئىكەن تۇرسۇنكام ،
                                       دىگەن مۇددا خىيال ئويدا بىز .
ئابدىقادىر ھەسەنگە
‹‹مۇئەللىمگە سالام ››بېرىسىز ،
ناخشا ئېيتىپ شىكەر سىتاندا .
بىزگە قاچان بېرىسىز سالام ؟
قالمايلى بىز داغدا – ئارماندا .

                                                  زوردۇن ئىمىرغا
                                            ‹‹مەھەللەمدە›› يوقتى ئېلىكتىر ،
                                                ‹‹مەين سابا›› سىيپاپ ئۆتكەندە .
                                                سىزكەلدىڭىز – توكلارمۇ راۋان ،
                                                بىزمۇ خۇشال – زۇلمەت كەتكەندە .

‹‹خاڭچىلارغا ناخشا›› ئېيتتىڭىز ،
شۇنچە تەمكىن ياڭراق ئاۋازدا .
يېڭى – يېڭى سوغات سۇنسىڭىز ،
تۈن پەسلىدە باھاردا – يازدا .

كېرەم قاسىم ئەۋجىگە
كۈمۈش پاختا ئوغلانى ئەۋجى ،
‹‹ئىز›› باسارى مەرھۇم ئۆتكۈرنىڭ .
قەلەمكەشلەر جەم بولغان بىر رەت ،
باغىقى يوق ئەمما پىقىرنىڭ .

                                             ئەشئارىگە بولۇپ پەرۋانە ،
                                             خانتەڭرىدىن ئالدىڭىز تارتۇق .
                                             كۈمۈلمىسۇن ‹‹ئىز››لار بىۋاقىت ،
                                             دېسەم سىزگە كەتتىمۇ ئارتۇق .

ئوسمان ھۇشۇرغا :
‹‹خۇدالىق››نىڭ ھەسىرىتى يامان ،
مۇئەللەقتە ئوينساق ئۇيۇن .
‹‹ئەرۋاھلارنىڭ ماجىراسى›› چىقار ،
‹‹تارىم›› ،‹‹تەڭرىتاغ›› چىقارسا قۇيۇن .

                                                 قىسمەتكە باي تۇرمۇش يەنىلا ،
                                                 ‹‹جۇدالىق››مۇ ۋاقىتىلىق پەقەت .
                                                  خانتەڭرىدىن ئامەت تىلەيمەن ،
                                                  ئوسمان ھۇشۇر سىزگە نەچچە رەت .

زاھىر ئابدۇراخمانغا
‹‹كۈمۈش قەتىرە›› چاچىرىتىپ بىر چاغ ،
‹‹روھقا سەپەر›› قىلغان ئىدىڭىز .
كىرىۋېلىپ قامۇسقا ئەمدى ،
ھاردۇق يەتتى ئارام ئالدىڭىز ؟
                                    
                                                 بىدارىغا
                                             ‹‹سايە بېرىپ ئۆتەر گاھ جانان›› ،
                                             خانتەڭرىدە كۆرگەندە سىزنى .
                                             بۇ ئەمەستۇر ئاداققى پەللە ،
                                             نا ئۈمىددە قويماسسز بىزنى .
بۇۋىھەجەرگە
نىمشېھىدنىڭ قىزى بۇۋھەجەر ،
سىز تەقدىرگە سوئال قويدىڭىز .
پەخىرىمىزنىڭ روھى شادلانسۇن ،
بىزگە دەستە گۈللەر سۇنسىڭىز .
                                              مۇقارىپ يەھياغا
                                       سزىىۋېرىپ ‹‹باھارغا سىزما››،
                                      ‹‹گۈل توزۇتتى باھار سەلكىنى››.
                                       ياز ، كۈز ، قىشنى سىزمايسىز ئەجەپ ،
                                       قاچتىمۇ يا ئىلھام كەلكۈنى .

تۇراخان توختىغا
‹‹يېڭى يۇلتۇز لوڭقىسى›› ئېلىپ ،
خۇشال بولدى ‹. شېئر ئىلاھى››.
‹‹ئۆتكەن ئىشلار›› بولغۇسى تارىخ ،
باردۇر يېڭى لوڭقىلار تېخى .
                                                جېلىل خېلىلغا
                                           ئونسۇ دېگەن گۈرۈچ ماكانى ،
                                           پەپىلەيدۇ سىزدەك ئوغلاننى .
                                          ‹‹ئالۋون››،‹‹ئونسۇ ئەدەبىياتى››،
                                          تارتۇقلايدۇ ئەجىر قىلغاننى .

ئابلىز ئوسمانغا
‹‹پىلسىراتقا كۆۋرۈك›› سالدىڭىز ،
مۇكاپاتنى قوشلاپ ئالدىڭىز .
‹‹ئوت ناخشىسى››،‹‹ كېلەچەك›› بىلەن ،
‹‹ئالتۇن چاغ›› قا ياراپ قالدىڭىز .

                                             ‹‹تارىم›› غا سىز ‹‹مۇنەۋۋەر ئاپتۇر››،
                                              خانتەڭرىمۇ سىزگە قۇت تىلەر .
                                              بولار تېخى تۇنجى قەدەمدۇر ،
                                              شەرەپ قان – تەر تۆككەننى بىلەر .

ياسىن ئەمەتكە
‹‹سەھرادىكى بالىلىق›› دېگەن ،
سىزنىڭ مېنىڭ غەمسىز چاغلىرىم .
تەھىرىر مۇخبىر بەكمۇ ئالدىراش ،
بوش قالمىسۇن شېئر باغلىرىم .
                                            
   
                                                    قۇربان ئېلىغا
                                                 ‹‹دومچەكلەرنىڭ بۇرنىغا ››كىرىپ ،
                                                 ئاق توشقاننى قويماڭ قاچۇرۇپ .
                                                 ‹‹كەنت مۇدىر››نىڭ ئاچچىقى يامان،
                                                  قوغلاپ كېتەر ‹‹موزاي››نى سۈرۈپ .

‹‹تەخەي گۆشى››،‹‹گۇناھتىن قېچىش››،
‹‹تەنھا›› لىققا بارمسۇن باشلاپ .
بازار ئارلاپ يۈرۈپسىز پا- پات ،
ئەسەر يازماي بېشىڭىزنى قاشلاپ .





قەھرىمان روزى ئەرچىنىغا
سۆيگۈ دېگەن ‹‹ۋىسال تىلسىمى››،
ئاز – ئاز يىتەر ‹‹بەخىت قەدىمى››.
ئۆسمۈرلەرنى قىلسىز خۇشال ،
كىتابىڭىز بېسلىغان كۈنى .

                                            تىنىم تاپماس ھارماس شائىرسىز ،
                                            قامۇسقىمۇ چىقتى نامىڭىز .
                                           كۆز تەگمىسۇن قەلەم – قەدەمگە ،
                                          يىراق تېخى مەنزىل – جايىڭىز .

مۇختار داۋۇتقا
بىز ئەمەسقۇ ‹‹قىل ئۈستىدىكى دوست››،
ئون تۆتىنچى باھار ئالماشتى .
‹‹گىرىمسەن شولىلار – تۇتاش دولقۇنلار››،
دىللارغا ئوت ياقتى – كۆزلەر قاماشتى .

                                                ئىشخانا مائاشقا ئامراقسەن ئەجەپ ،
                                                كانسپسەن چارچىماس كۆزۈڭ ۋە قولۇڭ .
                                                شاكىرى مايسىگۈل بولسۇن بىر ماياك ،
                                                قۇياشتەك پارلىسۇن ئىقبالىڭ – يولۇڭ .

توختى تۇرسۇنغا
‹‹تىتىرىگەن قوللاردا سۇنۇلغان شاراپ ››،
قىزلارغا يازسىز تىنماي خاتىرە .
يىگىتلەر ھەققىدە يېزىپ قويمايسىز ،
كىم سىزنى رەنجىتىتى سورىماي ئۆزرە ؟
                                                     پاشاگۈل ئىسمايىلغا
                                         ‹‹پەخىرىمدۇر قىز بولۇپ تۈرەلگەنلىكىم›› ،
                                         قىلىدىڭىز پاشاگۈل بىزلەرگە جاكا .
                                        كۆڭۈللەر غەش بولدى ‹‹پارچىلىنىش›››تىن ،
                                        ئىجادلا تەسەللى بەرگي سىزگىلا .
مۇتەللىپ خۇرسەندىگە
‹‹سىز مىسالى غىلاپسىز خەنجەر››،
ئۆتكۈر ئىدى ئەسلى بىسىڭىز .
ئۈششۈك تەگدى ‹‹سرىن›› گەنچۈن ؟
ياكى غىلاپ ئىزدەپ يۈرەمسىز ؟
                                                       خاتىمە
                                                  ۋاراقلاندى ‹‹تارىم ناۋاسى››،
                                                غورا سۇندۇم سىلەرگە ئەمما .
                                                ئاچچىق – چۈچۈك ئاچار ئۇيقۇنى ،
                                               يېڭى ئەسىر كەلمەكتە مانا !…
ئىزاھات:تىرناق ئىچىگە ئېلىنغانلىرى قەلەمكەشلەرنىڭ ئەسەرلىرىنىڭ نامى ياكى مۇكاپات ناملىرى .

1999 – يىل 19 – ئىيۇل           باي

ئەرچىن

ۋاقىت نېمە دېگەن تېز ئۆتكەن - ھە !
مۇشۇ ئەدىبلىرىمىزدىن ئابلىز قۇربان،  ھۈسەيىن ئىمىنھاجى، تۇرسۇن مامۇت، ئابدۇقادىر ھەسەن،  زاھىر ئابدۇراخمان قاتارلىق ئەزىزلىرىمىز  ئارىمىزدىن ۋاقىتسىز كەتتى.  ئۇلار بىلەن كۆرۈشكەن، سىرداشقان مىنۇتلار مەڭگۈ ئۇنتۇلماس ئەستىلىك بولۇپ قالدى.
يۇرتىمىزدىن چىققان مەرھۇم شائىرلىرىمىزدىن  ئابلىز قۇربان،  تۇرسۇن مامۇت ئاكىلىرىمىزنى ھۆرمەت بىلەن ئەسلەيمەن!
ھاياتلىق نېمە دېگەن قىسقا-ھە!  ھاياتلىقىمىزدا بىر-بىرىمىزنى قەدىرلەپ ئۆتەيلى.

نائىل

بۇ چاقچاقلارنى  شۇنداق جايىدا  چۈشۈرۈپسىز !  
توغرا دەيسىز   بارىمىزدا  بىر بىرمىزنى  قەدىرلەپ  ئۆتسەك  ، بۇ  ھاياتمۇ  مەنىلىك  بولىدۇ، ئىجادىيەتلىرڭىزگە  ئۇتۇق تىلەيمەن!

تۇرسۇن نىياز

شۇنداق ياخشى چاقچاقچاقلار بۇلۇپتۇ، چاقلىرىڭىز ئۈزۈلمىسۇن، بەرىكەتلىك قولىڭىزغا دەرت كەلمىسۇن، يېڭى يىلدا تىنىڭىز سالامەت، بارلىق ئىشلىرىڭىز ئۇتۇقلۇق بولسۇن...يېڭى-يېڭى ئەسەرلىرىڭىزدىن ھۇزۇر ئېلىش ھەممىمىزگە نىسىپ بولسۇن...