گېنرال پاتتون (تەرجىمە ئەسەر)

دەرۋىش

گېنرال  پاتتون

(تەرجىمەقىلغۇچى: ئۈمىدجان توختى)
ئىككىنچى دۇنيا ئۇرۇشىدىكى مەشھۇر قوماندان، ئامېركا قۇرۇقلۇق ئارمىيسىنىڭ گېنرالى جورجى شىمىس پاتتون 1885-يىل 11-ئاينىڭ 11-كۈنى ئامېركىنىڭ كالىفورنىيە شىتاتىدا تۇغۇلغان. 1909-يىل6-ئايدا ۋېسىت پوئىنت ھەربى مەكتىپىنى پۇتتۇرگەن. 1917-يىل بىرىنچى دۇنيا ئۇرۇشىغا قاتنىشىپ،ئامېركىنىڭ يىراققا يۇرۇش قىلغۇچى قوشۇنىنىڭ باش قوماندانى پېنىس گېنرالنىڭ قول ئاستىدا ئىشلىگەن. بىرىنچى تارماق تانكا قىسمىنى مەشىققە سېلىپ ۋە قوماندانلىق قىلىپ ، «ئالاھىدە مۇلازىمەت كىرسىت ئوردىنى»غا ئېرىشكەن.شۇنىڭدىن كېيىن مەخسۇس تانكىنى تەتقىق قىلىش ۋە مەشىققە سېلىش خىزمىتىنى ئىشلىگەن .  1944-يىل6-ئايدا ئۈچۈنچى گۇرۇپپىۋوي ئارمىيەگە قوماندانلىق قىلىپ ، نۇرغۇن غەلبىلىك جەڭلەرنى قىلىغان،تۈرلۈك ئوردىنلارغا ئېرىشىپ ، تۆت يۇلتۇزلۇق گېنرال پولكوۋنىكلىكقا ئۆستۈرۈلگەن .
1942-يىل يىنداۋ مەشق مەركىزىدە تانكا قىسمىنى مەشىقە سالغان، 11-ئايدا قىسىمغا يېتەكچىلىك قىلىپ شىمالىي ئافىرقا ھۇجۇمىدا ماراكەشنى ئىشغال قىلغان ۋە ۋالىيلىققا تەيىنلەنگەن. 1943-يىل3-ئايدا تونىسقا يوتكىلىپ،ئىككىنچى ئارمىيەنىڭ قوماندانى بولۇپ،مەغلۇپ بولۇش ھالىتىنى ئۆزگەرتىپ ، ئومۇميۈزلۈك غەلبىگە ئېرىشكەن.7 - ئايدا يەتىنچى گۇرۇپپىۋوي ئارمىيىنىڭ قوماندانلىقىغا تەيىنلىنىپ، ئىتالىيىنىڭ سېتسىلىيە ئارىلىدىكى مەشھۇر شەھر پالېرمو بىلەن مېسىسىنانى ئىشغال قىلغان . 1945-يىل5-ئايدا باۋارىيىنىڭ ئۇرۇشتىن كېيىنكى ھەربىي مۈلكىي ئەمەلدارلىقىغا تەيىنلەنگەن، كېيىن ۋەزىپىسىدىن بوشىتىلغان. 1945-يىل11-ئايدا ئېزىنخاۋېر يوق چاغدا ياۋرۇپادىكى بارلىق ئامېركا ئارمىيسىنىڭ قوماندانلىققا تەيىنلەنگەن. 1945-يىل 12-ئاينىڭ 21-كۈنى ماشىنا ھادىسىسىگە ئۇچراپ قازا قىلغان .
پاتتون پەقەت 60 يىللا ياشىدى ، پاتتوننىڭ قىسقا ھەم تراگدىيىلىك ھاياتىدا ئىشى ئانچە ئوڭ كەلگەن ئەمەس. ئۇ ئۆستۈرۈلگەن ، زەربىگە ئۇچۇرغان ، ۋەزىپىسىدىن توختۇتۇلغان ، تەكرار  ئىشىلتىلگەن ،جازالانغان . پاتتون ئۆزىنىڭ ھەربى ھاياتى ۋە ئۆتكۈزگەن ھەربىر دەقىقىلىرىنى  ئەسلىگىنىدە ئانچە ئۆكۈنمەيتتى . چۈنكى ئۇ ئۆزى قىلالايدىغان ئىشلارنىڭ ھەممىسىنى قىلغان بولۇپ ،  ئۇنىڭ ھاياتى ئەھمىيەتلىك ۋە قىممەتكە ئىگە ھايات ئىدى . پاتتون تىنچلىق ۋاقىتلىرىدا كېسەللىك ، تۇيۇقسىز ھادىسە ....دېگەندەك سەۋەپلەر بىلەن ئۆلۈشنى ياخشى كۆرمەيتتى ، ئۇنىڭچە بولغاندا  بىر ھەربىي ھەربىيدەك ئۆلىشى كېرەك ئىدى . ئۇ كۆپ قېتىم«مەن ئاخىرقى جەڭدە ، ئەڭ ئاخىرقى بىر پاي ئوقتا ئۆلىمەن»دېگەن ئىدى. بىراق تەقدىرنىڭ ئورۇنلاشتۇرشى بۇنداق بولمىدى .
1945-يىلى 12-ئاينىڭ 9-كۈنى، گېرمانىيىنىڭ رېيىن دەرياسى ۋادىسىدىكى مانگېيىم شەھرىنىڭ شىمالىدا بىر قېتىملىق كۈتۈلمىگەن قاتناش ھادىسسى يۈز بەردى ، ھادىسىدە بىر مەشھۇر ھەربىي قوماندان بۇ يورۇق دۇنيادىن كۆز يۇمدى . بۇ دەل ئامېركا خەلقىنىڭ پەخرى،بىر ئەۋلاد مەشھۇر قوماندان جورجى. سىمىس. پاتتون گېنرال ئىدى . بۇ خەۋەر پۈتۈن دۇنيانى لەرزىگە سالدى .
كىشلەر قامەتلىك، سالاپەتلىك پاتتوننىڭ دۈشمەن ئىستىھكامىغا خۇددى ئادەمسىز يەرگە كىرگەندەك كىرشىنى ئۇنتالمىدى. ئۇ دىنغا چىن دىلىدىن ئېتىقات قىلاتتىيۇ ، يەنە ئىلاھقا ھۆرمەتسىزلىك قىلاتتى . ئۇ ئاق كۆڭۈل، باشقىلارغا ھېسداشلىق قىلىدىغان ئادەم بولسىمۇ ،يەنە ئاغزىدىن سەت، قوپال گەپلەرمۇ چىقىپ تۇراتتى . ئۇنىڭ دەرغەزەپ بولغان چاغدىكى مەشھۇر«ئەرلەر يۇقۇرى ئاۋازى»نى پۈتۈن دۇنيادىكى كىشلەر بىلەتتى ، بۇنداق زىددىيەت ۋە مۇر
ەككەپلىككە تولغان خاراكتېرى ئاجايىپ ئۇستىلىق بىلەن بىرلەشتۈرۈلگەن ئىدى . ئۇنىڭدا كەم – كۈتتىسىز ئاددى ئادەم بىلەن خاسىيەتلىك ئادەم ، مۇز بىلەن ئوت ، سۆيگۈ بىلەن نەپرەت، ئاق كۆڭۈللۈك بىلەن ۋەھشىيلىك، مۇلايىملىق بىلەن شەپقەتسىزلىك ،تالانت بىلەن پەمسىزلىك  ئارلىشىپ كەتكەن ئىدى .
پاتتونغا ئەڭ يۇقۇرى باھانى ئۇرۇش ۋاقتىدا ئۇنىڭ بىلەن جەڭ قىلغان، مەغلۇپ بولغاندىن كېيىن قول ئاستىدا تۇرۋاتقان گېرمانىيە ئارمىيسى بەردى . ئۇلار پاتتوننىڭ 3- گۇرۇپپىۋوي ئارمىيسىنىڭ ئۇرۇشتىكى چەبدەسلىكلىنى ئۆز كۆزى بىلەن كۆرگەن بولۇپ ، ئۇنى«بىرلەشمە ئارمىيدىكى ئەڭ سەرخىل،ئەڭ جاسارەتلىك قوماندان، كىشىنىڭ ئىشىنىشى تەس بولغان ئىجاتچانلىق ۋە چاقماق تېزلىكىدىكى ھەركەت ئىقتىدارىغا ئىگە ئادەم » دېسە، پاتتون بىلەن جەڭ قىلالىغان چاغلىرىنى ئۆزلىرىنىڭ «غايەت زور شەرىپى ۋە ئۇنتۇلماس سەرگۈزەشتىسى» دەپ ئاتىدى.
پاتتون نۇرغۇن ئىشلارنى قىلاتتى : دالا ئاپتومبىلى ھەيدەيتتى، بەيگە مۇسابىقسىگە قاتنىشاتتى . سۇ ئۈزەتتى، سەتكە توپ ،قول توپ،خوككېي توپى ئوينايتتى ، ئوۋ ئوۋلايتتى،ئۇچىۋاتقان جىسىمنى ئاتالايتتى، ئايرۇپىلان ھەيدەيتتى، قىلىچۋازلىق قىلالايتتى، ئۇ ھەتتا ھەربىي فورما ، قورال-ياراق لاھيىلىگەن.ئۇ لاھيىلىگەن بىر خىل قىلىچ دەرھاللا ئاتلىق ئەسكەرلەر قىسمىدا ئىشىلتىلگەن .
پاتتون 27 ياشقا كىرگەن يىلى خەلئارا ئولىمپىك مۇسابىقسىگە قاتنىشىپ ، بەش تۈردە مۇسابىقلەشكەن. پاتتون ئويۇنلا ئەمەس،ھەرقانداق ئىشنى پۈتۈن ۋۇجۇدى بىلەن ئەستايدىل قىلاتتى  ، ئۈگىنىش ،تەنھەركەت ، خىزمەتنىڭ ھەممىسىدىلا تالانتلىق ئىدى . ۋېسىت پوئىنت ھەربى مەكتىپىدىكى چاغدا ئۈگىنشتىن سىرت ،ئەلاچى ئوفېتسىرلار قاتارىدا يۇقۇرى دەرىجىلىك ھەربىي مەكتەپتە تەربىيلەنگەن .شۇڭا ئۇنىڭ ھەربىي ئىشلار بىلىمى بىر قەدەر مول بولۇپ،ئادەتتىكى ياش ئوفېتسىرلارغا سېلىشتۇرۇش زادىلا مۇمكىن ئەمەس ئىدى. ئۇنىڭ خاراكتېرىدىكى ئەڭ زور ئاجىزلىقى قىزىققانلىقى بولۇپ،بەزىدە ئىنتايىن قوپال ئىدى. «ئىتنىڭ بالىسى» ،«ئاناڭنى»،«خومپەر»دىگەن قوپال سۆزلەرگە ئادەتلىنىپ قالغان ئىدى.شۇڭا ئۇ دائىم ئاخبارات ۋاستىلىرىنىڭ چىشىغا تېگەتتى ۋە جامائەتنىڭ  كۆڭلىنى غەش قىلىپ نارازلىقىنى قوزغاپ قوياتتى .بەزىدە تۈز كۆڭۈللۈك بىلەن قىلغان سۆزى ۋە تەنقىدى باشلىقلىرىنىڭ ئۆچلىگىنى قوزغايتتى .
ئۇ قول ئاستىدىكى ئەسكەرلەرنىڭ مەشىق قىلىپ «قۇرۇقلۇق ئارمىيسىدىكى ، ئاناڭنى، تەڭداشسىز تانكا ماھىرى»لىرىدىن بولىشى ئۈچۈن ،ئۆز پۇلىنى خەجلەپ تانكا رىمونت قىلدۇرغان ئىدى . ئۇنىڭ «جىگەرلىك،تاش يۈرەك قوماندان » دېگەن لەقىمى بۇرۇنلا پۈتۈن مەمىلكەتكە تارالغان.جەڭچىلەر ئۇنىڭدىن ئەيمىنەتتى،پاتتون ئۇلارنىڭ نەزىرىدە يۇنان ئەپسانىلىدىكى قەھرىمان ئىدى. ئەمما پاتتون  يۇقۇردىكىلەرنىڭ نەزىرىدە ئۆزى بىلگەنچە ئىش قىلىدىغان، ئەڭ گەپ ئاڭلىمايدىغان ،باشقۇرۇش تەس «بەڭۋاش بالا» ئىدى. ئۇ : « ئەگەر مەن ئۇرۇشقا قاتنىشالىسام ،كەنجى لېيتېنانت بولۇشقا رازى ئىدىم » دەيتتى . شۇ چاغدا ئۇ گېنرال ئىدى. جەڭ قىلىش پۇرسىتى بولسا ئۇ نەچچە ھەسسە روھلىنىپ كېتەتتى ، ئەگەر دەم ئېلىپ بۇيرۇق كۈتۈشكە توغرا كەلسە ئىچى تىتىلداپ بىئارام بولاتتى . ئۇ كەم ئۇچرايدىغان باتۇر جەڭچى،تالانتلىق قوماندان ئىدى .
پاتتون گەرچە كاج،قىزىققان ۋە قارام بولسىمۇ ،ئەمما ھەرگىزمۇ بىلىمى چولتا باتۇر ئەمەس ئىدى. ئۇ نۇرغۇن كىتاپلارنى ئوقۇغان ،بىر ئۆيدە لىق كىتاپ بولۇپ، ئاساسلىقى تارىخ ۋە ھەربىي ئىشلارغا ئائىت مەشھۇر ئەسەرلەر ئىدى ، ئۇ ھەمىشە بۇ كىتاپلارنى پۈتۈن ئىشتىياقى بىلەن ئۇزۇندىن-ئۇزۇن ئوقۇيتتى. شۇنداقلا ئۆزىگە خاس قاراشلىرى ۋە پىكىرىنى ئوتتۇرغا قوياتتى. ئەزەلدىن دورامچىلىق قىلمايتتى ،باشقىلارغا قارسىغا ئەگەشمەيتتى. ئۇنىڭ نەزىريە ۋە ھەربىي ئىشلار سەۋيىسى ئىنتايىن يۇقۇرى ئىدى .
پاتتون __ خاراكتېرى ئىنتايىن مۇرەككەپ شەخس . ئۇ قىزىققان ، غەۋغاچى، ئۆزگۈرۈشچان ، ئۆزىنى باسالمايدىغان ئادەم بولسىمۇ ، بىراق ، ئۇ كۈچلۈك ھەققانىيەت تۇيغۇسىغا ، قايناق ھىسىياتقا تولغان .ئۇ راسچىل، ئوچۇق- ئاشكارە ، قەيسەرلىك بىلەن ئۇرۇش قىلاتتى .
پاتتون1916-يىلدىن1918-يىلغىچە دەرىجىمۇ – دەرىجە ئۆستى، لېيتېنانتلىقتىن  كاپىتانلىققا ، يەنە مايۇرلۇققا ، پودپولكوۋنىكلىققا ھەم فرانسىيىدە تۇرۇشلۇق ئارمىيىنىڭ  بېرگادا كوماندېرلىقىغا ئۆستۈرۈلدۇ . تىنچلىق يىللىرىدا ئۆسۈش بەك ئاستا بولۇپ،سەۋرىچانلىق بىلەن ساقلاشقا توغرا كېلىدۇ .كۆپىنچە ئومۇميۈزلۈك بىر دەرىجە ئۆسۈشكە 15 يىل ۋاقىت كېتەتتى . پاتتوننىڭ تەلىيى ئوڭدىن كېلىپ بىرىنچى دۇنيا ئۇرۇشىغا ئۈلگۈرۈپ قالدۇ .
پاتتوننىڭ مەشىق جەريانىدا تەلىپى يۇقۇرى،  ئىنتىزامى قاتتىق بولۇپ، قىلچىمۇ بىخەستەلىك قىلمايتتى. ئۇ يىراققا يۈرۈش قىلغۇچى قسىم ئىچىدە «ئەڭ رەھىمسىز، ئىنتىزامى چىڭ مەشقاۋۇل»دەپ ئاتىلىپ نامى پۇر كەتتى . پاتتون شەپقەتسىز ۋە باغرى تاش ، بىراق ئۇنىڭ مەشىقى ۋە تەلىم تەربىيسىگە قاتناشقان جەڭچىلەرنىڭ تېخنىكىسى ياخشى ،ئۇرۇش قىلالايدۇ، ھەم شۇنداقلا قىياپىتى رەتلىك،ھەركىتى چەبدەس ،ئاددىيسى سالام بېرىش ھەركىتىگە قارىغاندىمۇ  ئىنتايىن چىرايلىق ۋە كۆركم بولۇپ ، باشقىلار كىشنى زوقلاندۇردىغان بۇنداق جەڭچىلەرنى « جورجى  پاتتون » دەيتتى.
1918-يىل يازدابىرىنچى دۇنيا ئۇرۇشى ئاخىرقى باسقۇچقا بېرىپ قالدى. ئامېركىنىڭ ئۇرۇشقا قاتنىشىشى گېرمانىيە ئارمىيسىنىڭ مەغلۇبىيىتىنى تېزلەشتۈردى. ئانتانتا دۆلەتلىرىنىڭ گېرمانىيىگە قارشى ئۇرۇشىغا رەھبەرلىك قىلىۋاتقان ئالى باش قوماندانى__ فرانسىيىلىك فېرىدنان•فېش گېنرال ئىدى . فېش گېنرال بىرىنچى دۇنيا ئۇرۇشىدىكى مۇھىم رولىنى جارى قىلدۇرۇش مەقسىتىدە ، زور كۆلەملىك ئۇرۇش پىلانىنى تۈزۈپ چىقتى. بۇ پىلاننى ئىشقا ئاشۇرۇشتا ئەڭ ئاۋال سان مىئېر شەھرىنى ئېلىش لازىم  . ئەمما گېرمانىيلىكلەر بۇ يەرنى پۈتۈن كۈچى بىلەن قوغداۋاتاتتى . بۇ ئامېركىنىڭ بىرىنچى دۇنيا ئۇرۇشىدىكى تۇنجى ھۇجۇمى بولۇپ،ئەھمىيىتى زور ئىدى . پاتتون بۇ جەڭ ئۈچۈن مىسلىسىز جاپالىق مەشىق قىلدى . تەققەزاللىق بىلەن كۈتكەن جەڭ پەيتى ئاخىرى يېتىپ كەلدى . 1918-يىل 8-ئاينىڭ ئاخىرى ،پاتتون بۇيرۇق بويىچە ھۇجۇم قىلىپ ، سان مىئېرنى ئالدى .
پاتتوننىڭ باتۇر،قەيسەرلىكىنى ھەممە ئادەم ماختايتتى . ھەرقانداق ۋاقىت، ھەرقانداق يەردە ، ھەر قانداق خەۋپ-خەتەر ئالدىدا ، ئۇ ھەمىشە ئۆزى شەخسەن ئوفېتسىر-جەڭچىلەرنى باشلاپ دۈشمەنگە ھۇجۇم قىلاتتى .ئۇنىڭ ئادەتلىنىپ قالغان سۆزى  : «مەن بىلەن مېڭىش ! »،«ئاۋۇ ئىتنىڭ باللىرىنى ئېتىۋەت!» ئىدى. قورقۇنچاق ئەسكەرلەرنى كۆرگەندە: «ئۆلگۈر ، مۆكۈۋېلىپ نېمە ئىش قىلىۋاتىسەن؟چىقىشە، مەن بىلەن مېڭىش !» دەپ ۋاقىرايتتى .
ئوق يامغۇرى ئىچىدە ، ئالدىدا ھۇجۇم قىلىپ ماڭغىنى جەزمەن پاتتون بولاتتى . .بىر قېتىم  ئۇ ئېغىر يارلىنىدۇ . دوختۇر ئۇنى ئارقا سەپكە يۆتكەيدىغان چاغدا ئۇ قوپاللىق ۋە قەتئىيلىك بىلەن ئۇنىمايدۇ، ئۇنىڭغىچە پاتتوندىن قان بەك كۆپ چىقىپ كەتكەن ، يارىسىمۇ ئېغىر بولۇپ، ھۇشىدىن كەتكەندىن كېيىنلا يۆتكەيدۇ. يارىسى سەل ياخشىلىنىشىغا ، ئۇ غىپپىدە دوختۇرخانىدىن قاچدۇ . ئۇ بىرىنچى دۇنيا ئۇرۇشىنىڭ ئەڭ ئاخىرقى جېڭىنى ئۆزى قىلماقچى ئىدى .
ئەپسۇسكى ، 1918-يل 11-ئاينىڭ 11-كۈنى ،پاتتوننىڭ 33 ياشقا كىرگەن ئۇ كۈنى گېرمانىيە ئارمىيسى سۈلھى تەلەپ قىلدى. ئۇرۇش توختىدى.ئامېركا دۆلەت مۇداپئە مىنىستىرلىكى باتۇرلۇق بىلەن جەڭ قىلىپ ، دۆلەت ئالدىدىكى مەسئۇليىتىنى ئادا قىلغان ئوفېتسىر-جەڭچىلەرگە «ئەلا مۇلازىمەت كىرسىت ئوردېنى» تارقاتىدۇ . پاتتون كېچە – كۈندۈز ئارزۇ قىلىپ كەلگەن بۇ ئوردېنغا ئېرىشىدۇ ،سان مىئېر جېڭى ئانچە مۇھىم ۋە كەسكىن جەڭ بولمىسىمۇ ، ئەمما پاتتون ئۈچۈن ھەقىقى ئەھمىيەتكە ئىگە بىرىنچى جەڭ ئىدى ،شۇنداقلا ئۇنىڭ بارلىق غايىلىرىنى ئىشقا ئاشۇرۇشنىڭ بىرىنچى قەدىمى ئىدى .
  1941-يىل12-ئاينىڭ 7-كۈنى ئەتىگەن سائەت 7:00دە تۇيۇقسىز 183دانە ياپۇن ئايرۇپىلانى پىئارىل_ خاربورنى  ۋەھشىلەرچە بومباردىمان قىلدى ، بۇ ، پۈتۈن دۇنيانى زىل-زىلگە سالدى. ياپۇنيەنىڭ تۇيۇقسىز ھۇجۇمى ئەمەلگە ئېشىپ ئىككى سائەتتىن كېيىن ، ئاندىن ئامېركىغا رەسمىي ئۇرۇش ئېلان قىلدى .
شۇ چاغدا ، پاتتون بەش ئاي ئىچىدىلا ئىككى قېتىم ئۆستى ، پولكوۋنىكلىقىتىن گېنرال مايورلۇققا ئۆستۈرۈلدى . بۇ مارشالىلنىڭ يۈرەكلىك ئىشىلتىشى ۋە قوللىشىدىن بولغان ئىدى . مارشاللىلنىڭ قەلبىدىكى پاتتون بولسا بىر ھەقىقى باتۇر گېنرال ئىدى ، بولۇپمۇ  ئۇنىڭغا ئەڭ يارايدىغىنى پاتتوننىڭ بىرىنچى دۇنيا ئۇرۇشىدىكى ئادەتتىن تاشقىرى باتۇرلىقى ئىدى . ئۇنىڭچە بۇنداق ئىقتىساس ئىگىسى ئامېركا ھەربىيلىرى ئىچىدە ، ھەتتا دۇنيادىمۇ كەمدىن – كەم ئۇچىرايتتى .
مارشاللىل پاتتوننى ئىككىنچى برونېۋىكلاشقان دېۋىزىيىنىڭ قوماندانلىقىغا تەيىنلىدى، پاتتوننىڭ قوماندانلىقىغا ئۆتكەن بۇ دېۋىزىيىنىڭ قىياپىتى پۈتۈنلەي يېڭى تۈسكە كىردى . پاتتون ئادەتتكى ئادەم بىلەن خاسىيەتلىك ئادەمنىڭ بىركمىسى سۈپىتىدە جەڭچىلەرنىڭ قەلبىدە يۈكسەك ئابرويغا  ئىگە ئىدى . جەڭچىلەر ئۇنىڭ تەلىپى بويىچە مەشق قىلىشقا تىرىشىپ،ئاخىرى ھەربىرى پاتتوننىڭ سۆزى بويىچە ئېيتقاندا «قۇرۇقلۇق ئارمىيسىدىكى، ئاناڭنى ، ئەڭ ماھىر تانكىسىت»بولۇپ يېتىشىپ چىقىتى .
پىئارىل – خاربور ۋەقىسى يۈز بېرىپ ئۈچ ئاي ئاي ئۆتكەندە، مارشالىلنىڭ ئۆزىنى قوبۇل قىلىش توغرىسىدىكى بۇيرۇقىنى تاپشۇرۋالدى . مارشاللىل پاتتونغا  ئىككى – ئۈچ ئايدىن كېيىن ، ئامېركا ئارمىيسىنىڭ دېڭىز بوغزىنى كېسىپ ئۆتۈپ جەڭ قىلىدىغانلىقىنى ، بۇ جەڭ پىلانىنىڭ «مەشئەل » دەپ ئاتىلدىغانلىقى  ، باش قوماندانى ئامېركا زۇڭتۇڭى بىلەن ئەنگىلىيە باش ۋەزىرى ئىكەنلىگىنى تەپسىلى ئېيتىپ بەردى . گېنرال پاتتون    « مەغلۇپ بولسا ،ھەققانىيەت ئۈچۈن قۇربان بولۇش»قا ئىرادە باغلاپ ،ئايالىغا « ۋەسىيەتنامە »  قالدۇردى ، ھەمدە ئۇنىڭغا مەڭگۈ قايتىپ كېلەلمىگەندە ئېچىشنى ئېيتتى . ئۇرۇش جەمئى 74 سائەت داۋاملاشتى . دەل پاتتوننىڭ ھاياتىدىكى ئەڭ قىيىن پەيىتتە ، فرانسىيە ئارمىيسىنىڭ تەسلىم بولغانلىق توغرىسىدىكى خەۋرى يېتىپ كەلدى .
1943-يىل 7-ئاينىڭ 28-كۈنى پاتتون سۇ ۋە قۇرۇقلۇقتىن ھۇجۇم قىلىش ھەركىتىنى مۇۋاپىقيەتلىك ئاخىرلاشتۇردى ،7-ئاينىڭ 24-كۈنى پالېرمونى ئىشغال قىلىپ ، ئىتالىيىدە سىياسىي ئۆزگۈرۈش پەيدا قىلىپ ، مۇسىلىننى تەختتىن چۈشۈردى .  8 - ئاينىڭ 17-كۈنى مېسىسىنانى ئىشغال قىلىپ ، مونتىگومېر بىلەن بولغان مۇسابىقىدە يەڭدى . شۇنىڭدىن ئېتىبارەن پاتتون گېرمانىيىلىكلەرنىڭ كۆزىگە سانجىلغان مىق بوپقالدى. ئامېركا دۆلەت مۇداپىئە مىنىستىرلىكى پاتتوننىڭ گېرمانىيىلىكلەرنى قورقىتالايدىغان غايەت زور رولىنى چوڭقۇر تونۇپ يەتتى ، گېرمانىيىلىكلەر پاتتوندىن  قورقاتتى، ئۇنىڭغا قايىل بولاتتى  ، ئۇنى ئەڭ خەتەرلىك ۋە ئەڭ قورقۇنۇچلۇق رەقىپ دەپ ھىساپلايتتى . پاتتون نەگىلا بارسا گېرمانىيىلىكلەر شۇ يەردە ئەسەبىيلەرچە ئۇرۇشقا تەييارلىق قىلاتتى .گېرمانىيە قوماندانلىق شىتابىدىكى خەرىتىدە پاتتوننىڭ يۈرۈش ئەھۋالىنى كۆرسىتىدىغان بەلگە ھەردائىم ئۆزگۈرۈپ تۇراتتى . پاتتون گېرمانىيىنىڭ «ئۇرۇش خاتېرسى»ژورنىلىدا  ئىسمى چىقىپ تۇرىدىغان بىرىدىن بىر ئامېركا گېنرالى ئىدى .
پاتتون كىچىكىدىن باشلاپ قەھرىمانلارغا ۋە ئۇلارنىڭ ئۆلسىمۇ باش ئەگمەيدىغان روھىغا چوقۇناتتى ، قورقۇنچاق ۋە توخۇ يۈرەكلەرنى كۆزگە ئىلمايتتى ، ئۇ قول ئاستىدىكى ئوفېتېسىر ۋە جەڭچىلەرگىمۇ مۇشۇ ئىككى خىل ئوخشىمىغان مىجەز ئارقىلىق مۇئامىلە قىلاتتى . پاتتون مېسىسىناغا ھۇجۇم قىلىۋاتقان جىددى پەيتتە ، يۈز بېرىشكە تېگىشلىك بولمىغان بىر ئىش يۈز بەردى،بۇ ئىش ئۇنىڭ كەلگۈسىگە تەسىر كۆرسەتتى.بۇ كىچىك ئىش ھەر ۋاقىت  سايىدەك ئۇنىڭ كەينىدىن ئەگىشىپ ، ئۇنى ئېغىر ۋەزىپىنى ئۈستىگە ئېلىش ،ئۆسۈش پۇرسىتىدىن مەھرۇم قىلدى، ئۇنى ھۇجۇم ۋە ھاقارەتكە دۇچار قىلدى. ئۇرۇش مەزگىلىدە پاتتون دائىم جەڭگاھ دوختۇرخانىسىنى كۆزدىن كەچۈرۈپ تۇراتتى . ئۇ ھەر قېتىم دوختۇرخانىنى كۆزدىن كەچۈرۈپ قايتقاندا، جەڭچىلەر روھلىنىپ ئازابى يېنىكلەپ قالغاندەك بولۇپ،جەڭ مەيدانىغا بالدۇر قايتىشنى ئويلاتتى ، پاتتون بۇنىڭ ئۈچۈن ناھايتى خوش بولاتتى . بىر كۈنى ئۇ جەڭگاھ دوختۇرخانىسىنى كۆزدىن كەچۈردى . ئۇ يەنىلا بۇرۇنقىدەك دوختۇر-سېستىرا ۋە يارىدار جەڭچىلەرنىڭ قارشى ئېلىشىغا ئېرىشتى .ئۇ بۇرۇنقىدەكلا يارىدار جەڭچىلەر بىلەن پاراڭلاشتى ، ئۇلارنى رىغبەتلەندۈردى ، ماختىدى ۋە ئۇلارغا ئىشەنچ ئاتا قىلدى . پاتتون تۇيۇقسىز بىر ياش يىگىتنى كۆرۈپ قالدى ، ئۇنىڭ ھىچقانداق يېرى تېڭىلمىغان ئىدى ، دىمەك ئۇ يارىلانمىغان ، روھسىز ھالدا بىر ساندۇقنىڭ ئۈستىدە ئولتۇراتتى . پاتتون ئۇنىڭ ئالدىغا بېرىپ :
__ نېمە بولدۇڭ؟__ دەپ سورىدى .
__ مەن بەرداشلىق بېرەلمىدىم،__ دەپ جاۋاپ بەردى يىگىت يىغلامسىراپ.
پاتتون بۇنى ئاڭلاپ دەرغەزەپ بولدى،ئۇ ئاچىقلانغان ھالدا «بەرداشلىق بېرەلمىدىم دەيسەنغۇ، ۋۇ توخۇ يۈرەك ئەبلەخ!»دەپ تىللىدى ھەمدە ئۇ ئەسكەرنىڭ يۈزىگە بىر شاپىلاق سالغان ئىدى ، ئەسكەر يىقىلىپ چۈشتى ، پاتتون ئۇنىڭ قوڭىغا بىرنى تېپىپ«دەرھال ئالدىنقى سەپكە قايت ، ۋۇ يارىماس !»دەپ ۋاقىردى. دوختۇرلار بۇ ئىشنى يۇقۇرغا ئېيتمىدى، بۇ ئىش ۋاقتىنچە بېسىقتى .
بىر ھەپتىدىن كېيىن ، پاتتون يەنە بىر دوختۇرخانىنى كۆزدىن كەچۈردى .ئۇ بۇرۇنقىدەكلا يارىدارلاردىن ئەھۋال سورىدى ، ئاندىن ئۇلارنىڭ جەڭدە ناھايتى باتۇرلۇق كۆرسەتكەنلىكىگە ئاپرىن ئېيىتتى ، ئاندىن ئۇلارنىڭ بالدۇرراق ساقىيىشىغا تىلەكداشلىق بىلدۈردى، كەيپىياتى ناھايتى ياخشى ئىدى . تۇيۇقسىز ئۇ بىر ئەسكەرنىڭ قىمىرلاپ ئولتۇرالمىغىنىنى كۆرۈپ نېمە بولغانلىقىنى سورىدى .
ئۇ ئەسكەر يىغلاپ تۇرۇپ:
__ مېنىڭ نېرۋا كېسىلىم بار ، مەن ئەمدى زەمبىرەك ئاۋازىغا چىدىيالمايمەن، _ دېدى .
پاتتوننىڭ شۇ ھامان سەپرايى ئۆرلەپ دەرغەزەپ بولۇپ:
__ ۋۇ قورقۇنچاق ئىتنىڭ كۈچۈكى، نېمە نېرۋا كېسىلىكەن ئۇ !__ دىگىنىچە قولىدىكى پەلەي بىلەن ئۇنى بىرنى سېلىپ ،قالپىقىنى چۈشۈرۋەتتى . پاتتون دوختۇرلارغا قاراپ :
__ ئۇنى ئالدىنقى سەپكە ئەۋەتىڭلار ، بۇنداق ئىتنىڭ كۈچۈكىنى بۇ يەردە قالدۇرۇشقا بولمايدۇ! __ دەپ ۋاقىرىدى . دوختۇرلار پاتتون كەتكەندىن كېيىن ئۇنى يەنە ئېپقالدى، ئۇنىڭ ھەقىقەتەن كېسىلى بار ئىدى .
پاتتوننىڭ ئىككىنچى قېتىم ئەسكەرنى ئۇرغىنى غۇلغۇلا قوزغىدى ، گېنرال ئېزىنخاۋېر بىر تەرەپتىن پاتتوننىڭ سېتسىلىيىدىكى زور غەلبىسى توغرىسىدىكى دوكلاتنى تاپشۇرۋالدى ، بىراق يەنە بىر تەرەپتىن پاتتوننىڭ ئەسكەرلەرنى ئۇرغانلىقى توغرىسىدىكى دوكلاتنى تاپشۇرۋالغاچقا ، ئادەم ئەۋەتىپ تەكشۈرمەكچى بولدى ھەمدە بۇ ئىشنى ئامال بار كىچىكلىتىشنى تاپىلىدى ، بولمىسا پاتتون كۈچلۈك تەنقىتكە ئۇچرايتتى ھەمدە ئۇرۇشقا قاتنىشىش پۇرسىتىدىن مەھرۇم قالاتتى . ئېزىنخاۋېر «پاتتون __ بۇ ئۇرۇشتا كەم بولسا بولمايدىغان شەخس ، ھەمدە بىزنىڭ جەڭدە غەلبە قىلىشىمىزدىكى ئاساسلىق تۆھپىكارلارنىڭ بىرى » دېدى.
تەكەببۇر ۋە مەغرۇر گېنرال پاتتون بىر قېتىملىق ئېغىر سىناقتىن ئۆتۈش ئالدىدا تۇرۋاتاتتى .ئېزىنخاۋېر ھەر خىل ئاماللارنى قىلىپ پاتتوننىڭ ئەمىلىنى ساقلاپ قېلىشقا تىرىشتى . ئۇ باشقىلارغا «ئۇنىڭ مىجەزى چېچىلاڭغۇ بولغىنى بىلەن كەم تېپىلىدىغان بىر مۇنەۋۋەر ھەربىي قوماندان ، ئۇ ئوفېتسىر-ئەسكەرلەرگە تەلەپچان ۋە قاتتىق قول،  ياۋرۇپا جەڭ مەيدانىدىكى كەلگۈسىى ئۇرۇشلار ئۈچۈن پاتتوننى ساقلاپ قېلىش كېرەك » دەپ چۈشەندۈردى . پاتتوننى چۈشۈنىدىغان كىشلەر پاتتون ئۈچۈن گەپ قىلدى ، ئېزىنخاۋېر مۇخبىرلاردىن بۇ ئىشنى ئاشكارلىماسلىقنى تەلەپ قىلدى . شۇ چاغدا يۈزدىن ئارتۇق مۇخبىرلار بار ئىدى ، ھەممىسى دۆلەتنىڭ مەنپەتىنى ئەلا بىلىپ بۇ ئىشنى سىرتقا يايمىدى . بىراق ، ئىش ئۆتۈپ ئىككى ئايدىن كېيىن ھەقىقى ئەھۋالنى ئۇقمايدىغان بىر مۇخبىر ۋەدىسىدە تۇرماي ، دۆلەتنىڭ مەنپەتى بىلەنمۇ كارى بولماي ، پاتتوننىڭ ئەسكەرلەرنى ئۇرغان ئىشىنى ئاشكارلاپ قويدى .
كۆزنى يۇمۇپ ئاچقىچە بىر چوڭ بومبا ئامېركىغا چۈشكەندەك  پۈتۈن ئامېركا زىل-زىلگە كەلدى .
پاتتوننىڭ مىجەزىنى،ئارتۇقچىلىقى ۋە كەمچىلىكىنى ھەمدە كەلگۈسىدىكى ئۇرۇشلاردا رول ئوينىيالايدىغانلىقىنى چۈشىنىدىغان گېنرال ئېزىنخاۋېر ،مارشالىل ، قۇرۇقلۇق ئارمىيە مىنىستىرى شېدسۇن قاتارلىقلارنىڭ  ئويلىغىنى بىردەك ئىدى ، ئۇلار پاتتوننىڭ ئادەم ئۇرغان ئىشى ئۇنىڭ شۆھرىتىگە تەسىر قىلالمايدۇ، ئەگەر قۇرۇقلۇق ئارمىيسى ئامېركىنىڭ بۇنداق ئەڭ بۈيۈك،يېڭىلمەس گېنرالىدىن ئايرىلىپ قالسا ، پەقەت دۈشمەنلەرلا خوش بولىدۇ ، پاتتوندىن ئايرىلىپ قېلىشقا ھەرگىز بولمايدۇ  دەپ قارايتتى . پاتتون ئەڭ ئەنسىرەيغان ئىش ئۆزىنىڭ  كېيىنكى ئۇرۇشلارغا قاتناشالماسلىقى ئىدى . ئۇ ئېغىر غەم _ ئەندىشە ئىچىدە قالدى .
سېتسىلىيىدىكى مۇشەقەتلىك قۇرۇقلۇققا چىقىش جېڭىنىڭ شانلىق غەلبىسىنىڭمۇ ئۇنىڭغا ياردىمى بولمىدى، ئۇنىڭ يەتتىنچى گۇرۇپپىۋوي ئارمىيەگە قوماندانلىق قىلىش ۋەزىپىسى ئېلىۋېتىلدى. كېيىن نۇرغۇن كىشلەر ، ئەگەر ئىتالىيە جېڭىگە پاتتون قوماندانلىق قىلغان بولسا ، رىمنى ئىشغال قىلىش 1944-يىل 6-ئاينىڭ 4-كۈنىگىچە سوزۇلۇپ كەتمىگەن بولاتتى دەپ قارىدى .
ئەسكەرلەرنى ئۇرۇش ئىشىدىن كېيىن ، پاتتون برادلى بىلەن ئىككىسىنىڭ مەنسىپنىڭ ئالمىشىپ قېلىشىدىن ئىبارەت رىئاللىقنى چىن كۆڭلىدىن قوبۇل قىلدى، ئەكسىچە ، برادلى سەل ئىچى تارلىق قىلدى ، ئۇ پاتتونغا تاپشۇرغان ۋەزىپە بولسا ، پەقەت ئۇرۇش قىلىش ، نام چىقارماسلىق ، تۆھپىنى ئۆزىگە قالدۇرۇش ئىدى  . ئۇ ھەقىقەتەن ئۇستاتلىق قىلغان بولسىمۇ ، بىراق ، پاتتون بۇ ئىشلار بىلەن ھىساپلىشىپ ئولتۇرمىدى .
1944-يىلى 7-ئاينىڭ 28-كۈنى ، برادلى پاتتوننى چاقىرىپ ، ئۇنى جەڭگە قوماندانلىق قىلىپ ، پۈتۈن كۈچى بىلەن ئەڭ ئاخىرقى ھۇجۇمنى ياخشى قىلىشنى تاپىلىدى . پاتتون دەرھال ئۇرۇش تەييارلىقىغا كىرىشتى .ئەگەر ئۇرۇشنىڭ دەسلىپىدىلا پاتتون جەڭگە قاتنىشالىغان ۋە قوماندانلىق قىلالىغان بولسا ، بەلكىم « زوراۋان » ئوپراتسىيىسىدە نۇرغۇن بىھۇدە چىقىمدىن ساقلانغىلى بولىشى مۇمكىن ئىدى . ئىلگىرلەش ناھايتى تېز بولۇپ ، پۈتكۈل ھۇجۇم مۇددەتتىن زور دەرىجىدە بۇرۇن ئېلىپ بېرىلىپ، ئۇرۇشمۇ بالدۇر ئاخىرلاشقان بولار ئىدى ......ئەپسۇس ئۇنداق بولمىدى !
پاتتون ئاخىر ئۇرۇشقا قاتناشتى . پاتتون كۆزگە كۆرۈنگەن تاكتىكا ماھىرى بولۇپ ، ئالى باش قوماندانلىق شىتابىنىڭ بۇيرۇق ۋە پىلانلىرىنى ئاجايىپ ماھىرلىق ۋە ئىجاتچانلىق بىلەن  ئورۇنلايتتى ..
1944-يىل يازدا ،ئەنگىلىيە-ئامېركا ئارمىيسى نورماندىيە دېڭىز ساھىلىدا  «زوراۋان» ئوپراتسىيىسنى باشلاپ ، تارىخى ئەھمىيەتكە ئىگە ياۋرۇپا ئىككىنچى جەڭ مەيدانىنى ئاچتى . .ئۈچۈنچى گۇرۇپپىۋوي ئارمىيە ئۇرۇشقا قاتنىشىپ ، ھەممە تەرەپلەردىن ئەسلى پىلان بويىچە ئىلگىرلىدى .تانكا قىسمى گېرمانىيە قوشۇنىنىڭ غەربىي لېنيىدىكى مۇداپىئە سېپىنى بۆسۈپ ئۆتۈپ، ھەيۋەت   بىلەن بېرتون يېرىم ئارىلىغا كىردى. پاتتون گېرمانىيە ئارمىيەسىنىڭ سول قانىتىنى بىتچىت قىلىپ  ، ئۇلارنى بىرنەچچە بۆلەككە بۆلىۋەتتى . ئېزىنخاۋېر كونكىرىت جەڭ ئەھۋالىدىن خەۋەرسىز بولغاچقا ، پاتتوننىڭ ئۇرۇشتىكى قالتىس تۆھپىلىرىنى بىلمەي قالدى . برادلى پاتتوننى «جىمجىتلا ئىش قىلىش» قا بۇيرۇغان ئىدى . ئېزىنخاۋېر بارلىق تۆھپىنى برادلىغا مەنسۇپ قىلىۋەتتى . ئۇ مارشالىلغا يوللىغان تېلگىراممىسىدا برادلىغا ئۆمۈرلۈك گېنرال مايورلۇق ئۇنىۋانى بېرىش تەكلىپىنى ئوتتۇرغا قويدى . 8-ئاينىڭ 4-كۈنى پاتتون توسالغۇسىز ھالدا گېرمانىيە ئارمىيسىگە قوغلاپ زەربە بېرىپ، گېرمانىيىلىكلەرنى ئېغىر مەغلۇپ بولۇپ چېكىنىشكە مەجبۇر قىلدى . پاتتوننىڭ پىلانىنىڭ تەرتىپلىكلىگى ۋە قوماندانلىق قىلىش قابىليىتىنىڭ يۇقۇرى بولغانلىقىدىن زور غەلبىگە ئېرىشتى ، بۇ نۇقتىغا قارىتا ئېزىنخاۋېر ھىچنىمە بىلمەيتتى ، ئۇ پاتتوننى ناھايتى ئاسانلا دۈشمەننى مەغلۇپ قىلدى دەپ قارايتتى . ئېزىنخاۋېر شۇنىڭدىن باشلاپ بىر تەرەپنىڭ گېپىنى ئاڭلاپ ئىشىنىپ كېتىشىتىن ئىبارەت تۇيۇق يولغا كىرىپ قالدى .شۇنداقلا بىرلەشمە ئارمىينىڭ ئاساسىي كۈچىنى شەرقتىكى دۈشمەننى يوقۇتۇشقا ئەۋەتمىدى ، پاتتوننىڭ شەرقىي شىمالدىكى جەڭ نەتىنجىلىرىنى كېڭەيتىشىگىمۇ يول قويمىدى. ئەكسىچە ، پاتتون قەيسەرلىك بىلەن جەڭ قىلغان بولسىمۇ ، چەكلەشكە ئۇچراپ ، پۇت-قولى چۈشۈلۈپ قالدى، دۈشمەنلەر «سىرتماق»تىن قېچىپ قۇتۇلغاچقا، جەڭنىڭ غەلبە قىلىش ۋاقتى خېلى كۆپ ئارقىغا سۈرۈلۈپ كەتتى . كېيىنكىلەر پاتتوننىڭ ئەينى چاغدىكى ئۇرۇش ۋەزيىتىنى تەھلىل قىلىپ بەلگە سېلىپ قويغان خەرىتىسىنى بۈگۈنگىچە ساقلاپ كەلدى، بۇ خەرىتىدىن پاتتوننىڭ جەڭ ۋەزىيىتىنى ئالدىن پەرەز قىلالايدىغانلىقى ۋە قانچىلىك تالانتلىق ئىكەنلىكىنى بىلگىلى بولىدۇ. بۇنىڭغا ئوخشاش پاتتوننىڭ جەڭ ۋەزىيىتىنى ئالدىن مۆلچەرلىگەن ، بىراق ئۆز پىلانىنى ئىشقا ئاشۇرالمىغانلىقى توغرىسىدىكى خاتېرلەر ئاز ئەمەس . بۇ ماتېرياللاردىن پاتتوننىڭ دۇنيادا كەم ئۇچرايدىغان بىر ھەربىي ئالىم ۋە قوماندان ئىكەنلىكىنى بىلمەك تەس ئەمەس. پاتتون پەقەت جەڭگە قاتنىشالىسىلا رازى بولاتتى ، نام چىقىرىش بىلەن ھىساپلىشىپ كەتمەيتتى .
پاتتون كېچە-كېچىلەپ خىزمەت قىلدى ، ئۇنىڭ ئىش ئۈنىمى باشقا بەش نەپەر گېنرالنىڭكىدىن ئېشىپ چۈشەتتى .پاتتون چاقماق تېزلىكىدە شىددەتلىك ھەمدە ئۆزگۈرۈشچان ھۇجۇم قىلىش ئۇسۇلى بىلەن گېرمانىيىلىكلەرنىڭ كاللىسىنى پىقىرتىۋەتتى . پاتتون ئۆزىنىڭ ئادەتتىن تاشقىرى خىزمەت قىزغىنلىقى ۋە تۈگىمەس زېھنى قۇۋۋىتى ، چاقماقتەك تېزلىكى بىلەن پۈتكۈل ئوفېتسېر _ جەڭچى،  ھەتتا ئۆزىنىڭ باشلىقىغىمۇ تەسىر كۆرسەتكەن ئىدى . نۇرغۇنلىغان كىشلەر پاتتوندەك قابىليەتلىك ئادەم ئىككىنچى دۇنيا ئۇرۇشىدىكى ئەڭ ئالى باش قوماندان بولالايدۇ دەپ قاراتتى ، بۇنداق بولغاندا ئۇرۇش خېلى بالدۇر ئاخىرلىشاتتى . بىراق پاتتوننىڭ كەمچىلىگى ھەمدە ئادەتتىكى يېتەرسىزلىكى تۈپەيلىدىن تارىختىكى  بۇ مىسلىسىز ئۇلۇغ ۋەزىپىدىن قۇرۇق قالدى.ئۇ ئۆزىنىڭ قابىليىتىنى تولۇق جارى قىلدۇرالمىدى ، بۇ تارىختىكى بىر چوڭ مەڭگۈلۈك ئەپسۇسلىنارلىق ئىش بولۇپ قالدى .
پاتتون قوماندانلىق قىلغان ئۈچۈنچى گۇرۇپپىۋوي ئارمىيەئافرانشىنى ئالغاندىن كېيىن ، تېزلىكتە گېرمانىيە ئارمىيسىگە قارىتا قورشاپ يوقۇتۇش ئېلىپ باردى .گېرمانىيە قوماندانلىق شىتابى ئىنتايىن چۆچۈپ كەتتى . پاتتون قوماندانلىق قىلغان ئۈچۈنچى گۇرۇپپىۋوي ئارمىيىنىڭ تېزلىكى گېرمانىيىلىكلەرنى قورقۇتۇپ ئالاقزادە قىلىۋەتتى . ئۇ خۇددى قەپەزدىن ئېتىلىپ چىققان شىردەك ، شىددەت بىلەن يوپۇرلۇپ كەلگەن كەلكۈندەك ئون نەچچە كۈن ئىچىدە بېرتون يېرىم ئارىلىنى تولۇق ئېلىپلا قالماي ، «زوراۋان» ئوپراتسىيىدە بەلگىلەنگەن چېگرادىن ئۆتۈپ كەتتى. ئۇ بەلگىلەنگەن يۆنىلىش بويىچە باتۇرانە ئالغا ئىلگىرلىدى، بارغانلا يېرىدە  گېرمانىيىلىكلەرنى يوقۇتۇپ ھىچنىمىسىنى قويمىدى .
ئەمەلىيەت شۇنى ئىسپاتلىدىكى ، پاتتوننىڭ ئۈچۈنچى گۇرۇپپىۋوي ئارمىيسى تارىختىكى سۈرئىتى ئەڭ تېز ، ئەڭ باتۇر ئارمىيە ، بىراق پاتتون ئۆزىنىڭ قىلغانلىرىنىڭ بەك چەكتىن ئېشىپ كېتىپ ، برادلىنىڭ ئاچچىقىنى كەلتۈرۈپ قويۇپ ، يەنە ئىشسىز قېلىشتىن قورقۇپ ، برادلىنىڭ ئالدىدا ئۇنىڭ گېپىنى ئاڭلاپ ، تاپشۇرغان ۋەزىپىسىنى ئورۇنداپ ، كۆزگە چېلىقماي يۈردى . ئالى باش قوماندانلىق شىتابىدىن كەلگەن بۇيرۇقتا پاتتوننىڭ ھەركىتىنى «سىر تۇتۇش»تەلەپ قىلغان بولۇپ ، ئەمەلىيەتتە پاتتونغا قويۇلغان«چەكلىمە» ئىدى . ئاخبارات ۋاستىلىرىغىمۇ چەك قويۇلغان بولۇپ، پاتتوننىڭ ئىسمىنى بېسىشىغا يول قويۇلمايتتى . بىرلەشمەئارمىينىڭ جەڭ ئەھۋالى دوكىلاتى پاتتون ئىشغال قىلغان جايلارنىڭ ئىسمى بىلەن توشۇپ كەتتى ، گېزىتلەر دۈشمەنلەرنىڭ قولىدىن تارتىۋالغان شەھەر - بازارلارنىڭ  نامى بىلەن توشۇپ كەتتى  ، غەلبە خەۋىرى توغرىسىدىكى تېلگىراممىلار ئارقا-ئارقىدىن يېتىپ كەلدى، بىراق پاتتوننىڭ ئىسمى ھىچيەردە يوق ئىدى . بىراق ، بۇ «مەخپىيەتلىك»نى ساقلاش ئاسان ئەمەس ئىدى ، گەرچە ئامېركىلىقلار بۇنى مەخپىي ساقلىغان بولسىمۇ ، گېرمانىيىلىكلەرنىڭ گېزىتى پاتتوننىڭ ئىسمى بىلەن توشۇپ كەتكەن ئىدى ، ئامېركا خەلقى دۈشمەن تەرەپتىن گېنرال پاتتون توغرىسىدا ئازدۇر-كۆپتۇر ئەھۋال ئىگىلەپ تۇرالايتتى .
ھازىر پاتتونغا ۋەكىللىك قىلىدىغان بەلگە ئارراس شەھرىدە توختىدى، گېرمانىيىلىكلەر شۇملۇقنى كۆردى ، ئەگەر ئۇلار قىسىمنى تېزلىكتە شەرققە يۆتكىمىسە ئامېركىلىقلار فرىز شەھرىنى ئىشغال  قىلسىلا گېرمانىيىلىكلەر قورشاۋ ئىچىدە قالاتتى ، ئىككى گۇرۇپپىۋوي ئارمىيە جەڭچىلىرى ئاشلىق تەمىنات يېتىشمەسلىك سەۋەبىدىن ئۆلۈپ كېتەتتى ، فرىز  كارۋادوس رايۇنىدىكى كىچىك بازار . بۇ بازار  دېڭىز قولتۇغىدىن شەرقتىكى سىېنا دەرياسىغا تۇىشىدىغان مۇھىم يول ، گېرمانىيىلىكلەرنىڭ شەرققە يۈرش قىلىشىنى توسۇدىغان مۇھىم ئورۇن ئىدى .
ۋەزىيەت ئىنتايىن ياخشى ئىدى ، پەقەت بىرلەشمە ئارمىيە تېزلىكتە فرىزنى ئالسىلا گېرمانىيىلىكلەرنى قورشاپ ، ئۇلارنى« تاغار » غا سولىغىلى بولىدۇ . گېرمانىيىلىكلەرگە تەسلىم بولۇشتىن باشقا يول قالمايتتى ، بىراق كانادا ئارمىيسى ، مونتىگومېرنىڭ قىسمىنىڭ سۈرئىتى بەك ئاستا ، سۈرئىتى تېز بولغان پاتتوننىڭ يۈرۈش قىلىشىغا قوماندانلىق شىتابى قوشۇلمىدى ، پاتتوننىڭ پۇت-قولى چۈشەپ قويۇلغاچقا. بۇ گېرمانىيىلىكلەرگە پۇرسەت يارتىپ بەردى –دە ، ئۇلار  بۇ مۇداپىئە لېنيىسىنى  ساقلاپ قالدى.
كېيىنكى تارىخشۇناسلار بۇنىڭغا باھا بېرىپ : «پۈتكۈل غەربىي ياۋرۇپا ئۇرۇشىدا ھەل قىلغۇچ رول ئوينايدىغان ھەركەت مۇشۇ قېتىملىق بۇيرۇق بىلەن ئۈزۈلۈپ قالدى» ، «1944-يىلى گرمانىيىلىكلەرنى مەغلۇپ قىلىدىغان پۇرسەت تۇنجى قېتىم قولدىن كەتتى ، پاتتوننىڭ قوشۇنىنىڭ ئارىلانداندا توختاپ قېلىشى تاكتىكا جەھەتتىكى خاتالىق» ، «بىر قېتىملىق گېرمانىيىلىكلەرنىڭ ئاجىزلىقىدىن پايدىلنالمىغان تاكتىكىلىق خاتالىق » دېدى. بۇ ياخشى پۇرسەتنىڭ قولدىن كېتىشى تارىختىكى چوڭ بىر ئەپسۇسلىنارلىق ئىش بولۇپ قالدى .
1944-يىل يازدا پاتتون يېقىلغۇ تىمىنلەپ بېرىش شەرتى ئاستىدا سېگفىرىد مۇداپئە لېنيىسىنى بۇزۇشقا رۇخسەت قىلىشنى تەلەپ قىلغان بولسىمۇ ، ئەڭ ئالى باش قوماندانلىق شىتابى رۇخسەت قىلمىدى .بۇنىڭ بىلەن فاشىزىمغا قارشى ئۇرۇشنىڭ غەلبىسى سەككىز ئاي كېچىكىپ كەتتى .
پاتتون قوماندانلىق قىلغان ئۈچۈنچى گۇرۇپپىۋوي ئارمىيە شانلىق ئۇرۇش تۆھپىلىرىنى ياراتتى .ئۇلار فرانسىيە ، ليۇكسېمبورگ ،بىلگىيە ، گېرمانىيە ، چېخ ، ئاۋېستىرىيە قاتارلىق 815220كۋادىرات كلومېترىلىق زىمىننى،  12مىڭ يېزا ۋە بازارنى ئىشغال قىلدى ۋە ئازات قىلدى. ئۆزىنىڭ 160مىڭ ئادىمى قۇربان بولدى ، 127 ئادىمى ئەسىرگە چۈشتى ،بىراق دۈشمەننىڭ بىر مىليون 440مىڭ ئادىمىنى ئۆلتۈردى، بىر مىليون 280 مىڭ ئادىمىنى ئەسىرگە ئالدى . ئۈچۈنچى گۇرۇپپىۋوي ئارمىيە پاتتون روھىنىڭ كىچىكلىتىلگەن كۆرۈنىشى ئىدى ، ھەربىر ئوفېتسىر ئەسكەر پاتتوننى ئۈلگە قىلاتتى ، پاتتونغا ئوخشاش باتۇر ، قەيسەربولۇپ ، جاپا-مۇشەققەتتىن قورقمايتتى . پاتتون ئۆزىنىڭ 3-گۇرۇپپىۋوي ئارمىيسىدىن ئىنتايىن پەخىرلىنەتتى  ۋە شەرەپ  ھىس قىلاتتى. 3-گۇرۇپپىۋوي ئارمىينى ئۆزىنىڭ ئىىدىيىسى ،ئىستىلى، قىياپىتى بويىيچە يېتىلدۈرگەن ئىدى.
ئامېركا خەلقى پاتتوننى ئۇنتۇپ قالمايدۇ ، ئۇنىڭ ئۇرۇشتىكى ئۇلۇغ تۆھپىلىرىنى مەڭگۇ ئۇنتۇپ قالمايدۇ . ئۇنىڭ ئۇرۇش جەريانىدا ئېرىشكەن شۆھرىتى ئۇزۇنغىچە كىشلەرنىڭ ئېسىدىن چىقمايدۇ.

تىلماچ : ئۈمىدجان توختى(باي ناھىيلىك 3-ئوتتۇرامەكتەپ9-يىللىق1-سىنىپ ئوقۇغۇچىسى)
(خەيتيەن نەشىرياتى 1997-يىل 12-ئايدا نەشىر قىلغان«پاتتون»ناملىق كىتاپنىڭ  2006-يىل4-ئايدىكى 2-باسمىسىغا ئاساسەن  تەرجىمە قىلدى .)
بۇ ئەسەر «مۇزات دولقۇنلىرى» ژورنىلىنىڭ2012-يىللىق 1-سانىدىن ئېلىندى.

ئەرتۇغ

تېمىغا ماسلاشتۇرۇپ مەزكۇر فىلىمنىمۇ كۆچۈرۈپ قويىدىغان گەپكەنتۇق. تېمىنىڭ ئوقۇشچانلىقىنى ئاشۇرغىلى بولاتتى...