شىنجاڭ تولۇق ئوتتۇرا سىنىپلىرىغا ئوقۇغۇچى قوبۇل قىلىش تەشۋىقات كۈ

قۇملۇق

	جۇڭگو ئۇيغۇرچە رادىيو تورى 2-مارت بېيجىڭ خەۋىرى: يېقىندا شىنجاڭ ئۇيغۇر ئاپتونوم رايونلۇق ئىچكىرى ئۆلكىلەردىكى شىنجاڭ تولۇق ئوتتۇرا سىنىپى خىزمىتى ئىشخانىسى تۇنجى قېتىم ئاپتونوم رايون بويىچە «رايون ئىچى تولۇقسىز ئوتتۇرا سىنىپى، ئىچكىرى ئۆلكىلەردىكى شىنجاڭ تولۇق ئوتتۇرا سىنىپى، ئىچكىرى ئۆلكىلەردىكى شىنجاڭ ئوتتۇرا تېخنىكوم سىنىپى، ئىچكىرى ئۆلكىلەردىكى ئالىي مەكتەپلەرنىڭ شىنجاڭغا ياردەم بېرىش پىلانى بويىچە ھەمكارلىشىپ ئاز سانلىق مىللەت ئىختىساس ئىگىلىرىنى تەربىيەلەش سىنىپلىرىنىڭ ئوقۇغۇچى قوبۇل قىلىش تەشۋىقات كۈنى» پائالىيىتى ئۆتكۈزۈپ، ھەر مىللەت ئاممىسىنى بۇ ھەقتىكى ئېتىبار سىياسەتلەردىن خەۋەردار قىلدى. شىنجاڭ ئۇيغۇر ئاپتونوم رايونلۇق ئىچكىرى ئۆلكىلەردىكى شىنجاڭ تولۇق ئوتتۇرا سىنىپى ئىشخانىسىنىڭ مۇئاۋىن مۇدىرى دىلشاد ئابدۇراھماننىڭ تونۇشتۇرۇشىچە، 26-فېۋرالدىن باشلاپ، ھەرقايسى ۋىلايەت، ئوبلاست، ناھىيە(شەھەر)، يېزا - بازار، كوچا، مەھەللە، مەكتەپ، كىشىلەر توپلىشىدىغان ئورۇنلاردا ئوقۇغۇچى قوبۇل قىلىش بويىچە تەشۋىقات، مەسلىھەت سوراش نۇقتىسى تەسىس قىلىنىپ، تەشۋىقات ۋەرەقىلىرى تارقىتىلىدىكەن، ئوقۇغۇچى قوبۇل قىلىشقا دائىر قىسقا فىلىملەر كۆرسىتىلىدىكەن. بولۇپمۇ چەت -ياقا، نامرات رايونلار، يېزا - قىشلاقلاردا بۇ ھەقتىكى تەشۋىقات تېخىمۇ ياخشى ئىشلىنىدىكەن. 2012-يىلى رايون ئىچى تولۇقسىز ئوتتۇرا، ئىچكىرى ئۆلكىلەردىكى شىنجاڭ تولۇق ئوتتۇرا سىنىپلىرىغا ئوقۇغۇچى قوبۇل قىلىش كۆلىمى داۋاملىق كېڭەيتىلىدىكەن، رايون ئىچى تولۇقسىز ئوتتۇرا سىنىپىغا قوبۇل قىلىنىدىغان ئوقۇغۇچى 7400 گە يەتكۈزۈلىدىكەن. «12-بەش يىل»نىڭ ئاخىرىغىچە، رايون ئىچى تولۇقسىز ئوتتۇرا، ئىچكىرى ئۆلكىلەردىكى شىنجاڭ تولۇق ئوتتۇرا سىنىپلىرىغا قوبۇل قىلىنىدىغان ئوقۇغۇچى 10 مىڭغا، شىنجاڭغا نىشانلىق ياردەم بېرىۋاتقان ئۆلكە، شەھەرلەر بىلەن ھەمكارلىشىپ قوبۇل قىلىنىدىغان ئوقۇغۇچى 6800گە، ئىچكىرى ئۆلكىلەردىكى ئوتتۇرا تېخنىكوملارغا قوبۇل قىلىنىدىغان ئوقۇغۇچى 10 مىڭغا يەتكۈزۈلىدىكەن.