ھاياتىم مۇناسىپ قىممەت تاپسۇن دېسەك...

قۇملۇق

	ئەكرەمجان رۇسۇل ئۈمىدى ھايات − ھەممىمىزگە ئاتا قىلىنغان غەنىيمەت پۇرسەت. بىلىپ-بىلمەي ئۇنى مەنىسىز، تۇترۇقسىز ئىشلارغا سەرپ قىلىۋېتىش ياكى ئۇنى قەدىرلەپ، ئۇنىڭدىن ئۈنۈملۈك پايدىلىنىش، ئۇنى نۇرلاندۇرۇش ھەركىمنىڭ ئۆزىگە باغلىق. ھايات چەكلىك. ۋاقىت ھاياتنىڭ ئىنسانغا بېرىلگەن ئەڭ چوڭ سوۋغىسى. ھاياتلىق بىزگە ئەنە شۇنداق قىممەتلىك سوۋغىنى بەرگەن ئىكەن، ئەنە شۇ قىسقىغىنا ھاياتىمىزدا ھاياتقا تېگىشلىك جاۋاب قايتۇرۇشىمىز، مۇناسىپ سوۋغا بېرىشىمىز كېرەك. بۇنىڭ ئۈچۈن ئادىمىيلىك نۇقتىسىدا تۇرۇپ، ھەر بىر كۈنىمىزنى قەدىرلەپ، ھاياتقا سۆيگۈ، مېھىر-مۇھەببەت ئاتا قىلىشىمىز، گۈزەللىك بەخش ئېتىشىمىز، ئۆزگىچە مەنە قوشۇشىمىز كېرەك. دەرۋەقە، كىشىلىك تۇرمۇشتىكى ئويلىمىغان ئەگرى-توقايلىق، مۈشكۈلاتلار، تالاي قېتىم يىقىلىشلار ئادەمگە ئورنىدىن قانداق تۇرۇشنى ئۆگىتىدۇ. مەغلۇبىيەتنىڭ كىشىگە ئاتا قىلىدىغىنى ھەرگىزمۇ پۇشايمان بولماستىن، ئەكسىچە ئالتۇندەك تەجرىبە - ساۋاقتۇر، يىقىلغان جايىدىن دەس تۇرالماسلىقنىڭ ئۆزى ئىنسان ئۈچۈن ئەڭ چوڭ ھاماقەتلىكتۇر. شۇنى بىلىۋېلىش زۆرۈركى، ھاياتلىق مۇساپىسى دەل ئەنە شۇنداق سانسىزلىغان يىقىلىش-قوپۇش بىلەن داۋاملىشىدۇ. ھاياتنىڭ ئۆزى بىر پۇرسەت، ئۇنى ھەرگىزمۇ خاتالىق ئۆتكۈزگەن كۈنلەرنى بىھۇدە ئەسلەش، پۇشايمان قىلىش بىلەن ئۆتكۈزۈۋەتمەسلىك كېرەك. بەلكى ئەتىكى خاتالىقنىڭ يوللىرىنى ئېھتىيات بىلەن توسۇپ، ئىلگىرىكى ئوڭۇشسىزلىقلاردىن ئەقىل تېپىپ، شۇ ئاساستا ئۆزىنى كېيىنكى مەغلۇبىيەتلەرگە بەرداشلىق بېرەلەيدىغان، مۇھىمى ئۇنىڭ ئالدىنى ئالالايدىغان قىلىپ تاۋلاش كېرەك. ھايات ھەرگىزمۇ ئېغىناپ ياتىدىغان پاراغەت قەسرى ئەمەس. ئۇ ھاياتلىق كېمىمىزنى ئېلىپ ماڭغۇچى سىرلىق ئېقىن. ئۇ توختاۋسىز كۈرەش جەريانىدىن ئىبارەت. ھاياتلىق چەكسىز، ئەمما، ئىنسان ئۈچۈن تولىمۇ چەكلىك. ئۇ خۇددى بىر ئاقار يۇلتۇزغا ئوخشاش تۇرمۇشىمىزدا بىرلا قېتىم چاقنايدۇ. لېكىن ئاشۇ بىر قېتىملىق چاقناش ھاياتىمىزنى يورۇقلۇق ۋە ئىشەنچكە تولدۇرىدۇ. بىز ئۇنى قىسقا ۋاقىتتا ئۆچۈرۈپ قويۇشىمىزمۇ، ئۇزاق نۇر چاچقۇزالىشىمىزمۇ مۇمكىن. بۇ پەقەت ھاياتىمىزنى قەدىرلەشكە ۋە ھاياتقا بولغان قىزغىنلىقىمىزغا باغلىق. كىشىلىك ھاياتتا بەزىلەرنىڭ ئىرادە يوللىرى ئۇپۇققا قەدەر سوزۇلغان، بەزىلەرنىڭ يوللىرى ئۆزىنىڭ چەكلىك ئۆمرىگە قەدەر سوزۇلغان بولىدۇ. بەزىلەر ھەممە ۋاقتىنى ئۆز ئۆمرىنى پەقەت مېڭىپ تۈگىتىش ئۈچۈنلا سەرپ قىلىۋېتىدۇ. مەيلى قانداقلا بولسۇن، ئۆمۈردىن ئىبارەت بۇ غەنىيمەت پۇرسەت ھاياتلىق سادىقىدىن ئېتىلغان ئوق بولۇپ، ئۇ نىشانغا تەگسۇن، تەگمىسۇن بەرىبىر ئاخىرلىشىدۇ. شۇڭا، ھاياتنىڭ بىزگە بەرگەن ئەڭ چوڭ سوۋغىسى بولغان ۋاقىتنى چىڭ تۇتۇپ، ھاياتىمىزدا يارقىن ئىزلارنى قالدۇرۇپ، بىزمۇ ھاياتقا مۇناسىپ سوۋغا بەرسەك، ھاياتىمىز يېڭى مەزمۇنلار بىلەن تېخىمۇ رەڭدارلىشىپ، قەدىر - قىممىتىمىز ئاشىدۇ، مەۋجۇتلۇقىمىز مەنىلىك نامايان بولىدۇ.　 مەنبەسى:جۇڭگو ئۇيغۇرچە رادىيو تورى (شىنجاڭ گېزىتى )