ئوتتۇرا –باشلانغۇچ ئوقۇغۇچىلىرىنىڭ تەتىل مەزگىلى ئەڭ ئۇزۇن دۆلەت

قۇملۇق

	دۇنيا بويىچە ئوتتۇرا–باشلانغۇچ مەكتەپ ئوقۇغۇچىلىرىنىڭ تەتىل قېتىم سانى ئەڭ كۆپ دۆلەت ئەنگلىيە بولۇپ، ئوقۇغۇچىلار يىلدا ئالتە قېتىم تەتىل قىلىدۇ. 2005-يىلى ئەنگلىيە ھۆكۈمىتى 130 نەچچە يىللىق تارىخقا ئىگە ھۆكۈمەت ئىگىدارلىقىدىكى مەكتەپلەرنىڭ ئوقۇش مەۋسۈمى تۈزۈمىنى ئىسلاھ قىلىپ، ھەر يىللىق ئوقۇش مەۋسۈمىنى ئىلگىرىكى ئۈچ ئوقۇش مەۋسۈمىدىن ھازىرقى ئالتە ئوقۇش مەۋسۈمگە ئۆزگەرتكەن، ھەر ئوقۇش مەۋسۈمى ئارىلىقىغا تەتىل مەزگىلىنى ئورۇنلاشتۇرغان. ئۇلار مۇشۇنداق دائىملىق دەم ئېلىش ۋاقتىنى ئورۇنلاشتۇرۇش ئارقىلىق ئوقۇتقۇچىلارنىڭ بېسىمىنى يېنىكلىتىشنى مەقسەت قىلغان. دۇنيا بويىچە ئوتتۇرا–باشلانغۇچ مەكتەپ ئوقۇغۇچىلىرىنىڭ تەتىل مەزگىلى ئەڭ ئۇزاق دۆلەت گېرمانىيە بولۇپ، مەكتەپلەرنىڭ بىر يىلدىكى تەتىل ۋاقتى 12 ھەپتىگە يېتىدۇ. مىلاد بايرىمىلىق تەتىل ئالدىنقى يىلىنىڭ 22-ياكى 23-دېكابىرىدىن باشلىنىپ، يېڭى يىل كىرىپ 4-يانۋار ئاخىرلىشىدۇ. ئارقىدىن يەنە ئىككى ھەپتىلىك قىشلىق تەتىلگە قويۇپ بېرىلىدۇ. بىراق، ئۇنىڭدىن كېيىن كېلىدىغان 4-ئايدىكى پاسخا بايرىمىلىق تەتىل ۋاقتى ئۈچ ھەپتە بولسا، قىشلىق تەتىلگە ئاران بىر ھەپتىلا قويۇپ بېرىلىدۇ. يازلىق تەتىل ۋاقتى تەخمىنەن ئالتە ھەپتىگە يېقىنلىشىدۇ. چۈنكى ياز پەسلى گېرمانىيەلىكلەرنىڭ مۇھىم ساياھەت پەسلى بولغاچقا، بۇ مەزگىلدە ئوقۇتقۇچىلارنىڭ ساياھەتكە چىقىشىغا قولايلىق يارىتىش ئۈچۈن، مەكتەپلەرنىڭ تەتىل قويۇپ بېرىش ۋاقتى مۇقىم بولىدۇ. بۇنىڭدىن سىرت، يازلىق تەتىل بىلەن مىلاد بايرىمىلىق تەتىل ئارىلىقىدا يەنە بىر ھەپتىلىك كۈزلۈك تەتىل ۋاقتىمۇ بار. دۇنيا بويىچە ئوتتۇرا–باشلانغۇچ مەكتەپ ئوقۇغۇچىلىرىنىڭ يازلىق تەتىل مەزگىلى ئەڭ ئۇزاق دۆلەت ئامېرىكا بولۇپ، كۆپ ساندىكى ئوقۇتقۇچى-ئوقۇغۇچىلار ئۈچ ئايلىق تەتىل ۋاقتىدىن بەھرىمان بولىدۇ. 19-ئەسىردىن بۇيان، شتاتلاردىكى ئوتتۇرا باشلانغۇچ مەكتەپلەرنىڭ يازلىق تەتىل ۋاقتى ئالاھىدە ئۇزاق ئورۇنلاشتۇرۇلغان بولۇپ، تەتىل ۋاقتى 6-ئاينىڭ ئاخىرىدىن 9-ئاينىڭ باشلىرىغىچە داۋاملىشىدۇ. بۇ ئەنئەنە دۆلەت قۇرۇلۇپ ئۇزۇن ئۆتمەي مۇقىملىشىپ قالغان، ئەينى چاغدا نۇرغۇن ئامېرىكىلىق ئاساسەن دېھقانچىلىق، چارۋىچىلىق بىلەن شۇغۇللىناتتى، يازلىق تەتىل ۋاقتىنىڭ بۇنداق ئۇزۇن بولۇشىدىكى يەنە بىر سەۋەب شۇكى، ئىسسىق ياز كۈنلىرى دەرس ئاڭلاش بەك جاپالىق، ئۇنىڭ ئۈستىگە 7-8-ئاي ساياھەت قىلىشنىڭ ئەڭ ياخشى مەزگىلى. شۋېيتسارىيە دۇنيادا ئوتتۇرا–باشلانغۇچ مەكتەپ ئوقۇغۇچىلىرى بىرلا ۋاقىتتا تەتىلگە قويۇپ بېرىلمەيدىغان دۆلەت، شۋېيتسارىيە مەسئۇل دائىرىلىرى مۇنداق دەپ قارايدۇ: مەملىكەت بويىچە بىرلا ۋاقىتتا دەرس توختىتىلىپ تەتىلگە قويۇپ بېرىلسە، قاتناش قىستاڭچىلىقى، مېھمانساراي ياتاقلىرى توشۇپ كېتىشتەك ئەھۋاللار كۆرۈلىدۇ. شۇنىڭ بىلەن بىللە، ئاتا-ئانىلارنىڭ رۇخسەت سورىشى نۇرغۇن تارماقلارنىڭ نورمال خىزمىتىگە تەسىر كۆرسىتىدۇ. شتاتلارنىڭ تەتىلگە قويۇپ بېرىش ۋاقتى ئوخشاش ئورۇنلاشتۇرۇلمىسا، بىر قاتار ئىجتىمائىي مەسىلىلەر ھەل بولۇپلا قالماستىن، بەلكى يەنە ئىستىمالنىمۇ ئاشۇرۇپ، ساياھەتچىلىكنىڭ تەرەققىياتىنى ئىلگىرى سۈرگىلىك بولىدۇ، شىۋىتسارىيەدە ئوقۇغۇچىلار بىر يىلدا بەش قېتىم تەتىل قىلىدۇ، يەنى كۈزلۈك تەتىل، قىشلىق تەتىل، مىلاد بايرىمىلىق تەتىل،قېۋراللىق تەتىل، پاسخا بايرىمىلىق تەتىل. مەنبەسى:جۇڭگو ئۇيغۇرچە رادىيو تورى