نىيەت ( ھېكايە )

نەزەر

                                                                   نىيەت
                                                                    ( ھېكايە )

        قۇربان ھېيتنىڭ ئىككىنچى كۈنى ، ھاۋا سوغۇق . تاكسى شوپۇرى تۇرسۇن بۈگۈن بۆلەكچىلا خوشال ئىدى . چۈنكى چۈشكىچە كىرا قىلىپ تاپقان پۇلى 300 سومدىن ئاشقان ئىدى . ماشىنىنى رېمۇنتخانىدىن ئېلىپ چىقىپ ، ئىككىنچى كۈنىلا شۇنچە پۇل تېپىپتۇ ، خۇدايىم بۇيرىسا ، كەچكىچە ئوبدان ماڭالىسا 700 سومدىن ئاشىدىغانلىقى ئېنىق . بۇنداق ئامەت دائىملا كېلىۋەرمەيدۇ . گاھىدا تاپقان پۇل ماي پۇلىغىمۇ چىقىش قىلمايدىغان ئىشلار بولۇپمۇ قالىدۇ . بۈگۈن پۇرسەتنى چىڭ تۇتۇپ ، كۆپرەك پۇل تېپىۋېلىش كېرەك .
       خۇددى تۇرسۇن بىلەن قېرىشقاندەك ، نېمىشقىدۇر چۈشتىن كېيىن ماشىنا توسقانلار دېيىشىۋالغاندەك ، قۇچىقىدا بالىسى بارلار ياكى بالا ئەگەشتۈرىۋالغانلار ۋە ياكى ھازىرلا يىقىلىپ چۈشىدىغاندەك تۇرىدىغان ياشانغان كىشىلەر ئىدى . ئادەتتىكى ۋاقىتلار بولسىمىغۇ ،  ئۇلار ماشىنا توسىغىلى قولىنى كۆتىرىپ بولغۇچە ، ماشىنىنى ئۇلارنىڭ ئالدىغا ئەكىلىپ توختىتىپ بولغان بولاتتى . ئەمما بۈگۈن ھېيت ، ئۇنىڭ ئۈستىگە ھاۋامۇ پەۋقۇلئاددە سوغۇق . توختىماي كىرا چىقىدىغان بۇنداق كۈن ھەمىشە بولىۋەرمەيدۇ . قېرىلار ۋە بالىلىرى بارلارنىڭ مىس – مىسلىقى . ئۇلارغا ماشىنا توختىتىپ ، ئۇلار ماشىنىغا چىقىپ – چۈشۈپ بولغۇچە بىرمۇنچە ۋاقىت كېتىدۇ . ئۇششاق بالىلارغا كىرا ئالماي دېسە ، ئۇلارمۇ بىر كىشىلىك يەرنى ئىگىلەپ ئولتۇرۇشىدۇ . ئالاي دېسە تېخى بەزىلەرنىڭ : « ئىنساب قىلىڭ ئۇستام ، كىچىككىنە بالىغۇ ؟ » دېيىشلىرى بار . خۇدا ساقلاپ تېنچ ماڭسىغۇ تەلەي ، ئالىمادىس بىرەر كېلىشمەسلىك بولۇپ قالسا « كىرا ئالمىغانتى ، پىشانىسىكەن »  دېمەي ، « كىچىك بالىمۇ ئادەم » دەپ ئۇششۇقلۇق قىلىشقا ئارانلا تۇرىدۇ ، كىرا تۆلىمىگەندە خۇددى ئادەم ئەمەستەك . ئەتىگەندىن كەچكىچە مۇشۇنداق مېڭىشىمنى پۇل ئۈچۈنغۇ دېگەن بىلەن ، ھەممە خەق ھېيت ئويناۋاتقاندا ، باشقىلارنى بارىدىغان يېرىگە سالامەت ئاپىرىپ قويغانلىقىمغا رەھمەت ئېيتىشى كېرەك تېخى .
تۇرسۇن مۇشۇنداق خىياللار بىلەن بىرنەچچە يەردە ماشىنىسىنى توسقان ياشانغانلارنى ،  بالىلىرى بىلەن تۇرغانلارنى ، يۈك – تاقى كۆپرەك كىشىلەرنى كۆرمەسكە سېلىپ ، يولنىڭ تېيىلغاقلىقىغا قارىماي ، ماشىنىسىنى غۇيۇلدىتىپ ھەيدىگىنىچە ، ئىككى ياققا نەزەر سېلىپ ئىتتىك كېتىۋاتاتتى . ناھىيە مەركىزىگە جايلاشقان تۆت كوچا دوقمۇشىغا كەلگەندە ، بىر جۈپ قىز – يىگىت ماشىنىنى توستى . ئۇ ئالدىراپ رولنى بۇراپ تورمۇزنى دەسسىدى  .  كېچىدىن ياغقان قار بىلەن ماشىنا مېڭىۋېرىپ سىلىقلىشىپ كەتكەن يولدا ماشىنا توختىماي ،  سېيرىلىپ  بارغىنىچە بىر چەتكە توختىتىپ قويۇلغان تاكسىغا « جاققىدە » سوقۇلدى . شۇئان ماشىنىنىڭ ئالدى چىراغلىرى جاراڭشىپ يەرگە چۈشۈپ ، سۇنۇقلىرى ماشىنىنىڭ ئالدىنى بىر ئالدى . تۇرسۇن ئالدىراپ ماشىنىدىن چۈشتى . 2000 سوم بىلەن تېخى تۈنۈگۈن ئەتىگەنلا رېمۇنتخانىدىن ئېلىپ چىققان ماشىنىنىڭ بىر تەرىپى گويا تۇرسۇنغا : « نەپسىنىڭ جاجىسى مانا شۇ ، پۇلغا توي ، ئىنسابنى ئۇنتۇغىنىڭغا توي ! » دېگەندەك ماكچىيىپ تۇراتتى . . .

                          _____مۇختار مۇھەممەتئىمىن نەزەر
           مەنبە : « كۈسەن مەدەنىيىتى » ژۇرنىلى 2011 - يىل 2 - سان

ئەتىرگۈل

ۋاي ئىسىت!