ئادىلجان ئابدۇرېھىم: كۆڭۈل يۇلتۇزلىرى

ئادىلجان

	كۆڭۈل يۇلتۇزلىرى (مۇۋەششەھلەر) ئادىلجان ئابدۇرېھىم ئاق چېچەك بالقىتىپ دىلدا قۇياش تۈنگە نۇرىستان بەردىڭىز ، شۇڭغۇتۇپ كاچكۇلغا چوغ ھالقىشقا ئىمكان بەردىڭىز . ئەيلىدى «ئۆزلۈك ئاۋازى» كۇللى قەلبنى مەھلىيا ، جىلۋىسى ئاققان سۈزۈك تاڭلارغا ئارمان بەردىڭىز . گۈل ئۈنۈپ چىقتى غورۇرنىڭ بىپايان سەيناسىدا ، يايرىماق بولغان يېتىم قۇشلارغا بوستان بەردىڭىز . تەگدى ئوقتەك«مەڭگۈلۈك ناخشا»يۈرەكنىڭ تەكتىگە ، ياڭرىتىپ گۈلگۈن سادا نىمجانغا دەرمان بەردىڭىز . ئۈركۈتۈپ شەيتان چۈشىنى چاقنىغان شەمشەر ئىلە ، ئاق چېچەك پەرۋازىغا نۇرانە ئاسمان بەردىڭىز . روھ چۆلىنى كەزلىبان مەشرەپ ئىزىنى ئاختۇرۇپ ، كەچمىشى ئاچقان پورەك مەنزىلگە كارۋان بەردىڭىز . كۆڭلۈمە ئاقتى ئېرىپ «كىرپىكتىكى قار» تامچىسى ، مېھرىڭىزدە چاڭقىغان روھىمغا ئوكيان بەردىڭىز . ئاسمىنىڭ كۈندىن چىقىپ ئاسمىنىڭ كۈندىن چىقىپ نۇرلارغا چۆمدۈرگەي سېنى، جىلۋىگەر تۈنلەر ئارا يۇلتۇزغا مۆكتۈرگەي سېنى. لالىلەرنىڭ ئۆركىشى دەۋرەر ئىزىڭدا ھىد چېچىپ، تۇپرىقىڭ رەيھان كەبى باغلاردا ئۈندۈرگەي سېنى. ئاقتىلەر چۆللەر ساڭا ئەشئارلىرىڭغا زارىقىپ، شۇ ئەزىم دەريالىرىڭ قاينامغا چۆكتۈرگەي سېنى. ھۇۋلىبان ئاتەش پىراق ئەتسە دىلىڭنى ئاشىيان، تەلۋە ئىشقنىڭ ئوتلىرى گۈلخاندا كۆيدۈرگەي سېنى. ئىزتىراپ چەككەن شامال قەلبىڭنى ناخۇل ئەتكۈسى، پەر قېقىپ ئۇچقان كۆڭۈل پەرۋازغا كۆندۈرگەي سېنى. دىلفىكار بۇلبۇل شېخىڭدا ئەيلىگەي ياڭراق ناۋا، سۈپسۈزۈك ھىجرانلىرىڭ ئارمانغا كۆمدۈرگەي سېنى. ئىزدىبان مەلھەم جېنىڭ كەزدى ئۇپۇقنىڭ باغرىنى، تاڭ جۇلاسى چايقىلىپ سۈبھىدە كۈلدۈرگەي سېنى. نەي قىلىپ چالغان سۆڭەكلەر كۈيلىرى پەريادىدا، چۈشلىرىڭنىڭ ياپيېشىل بەرگىگە سۆيدۈرگەي سېنى! سۈزۈك تاڭدەك ياشاپ كەلدىڭ شېخىڭغا قوندۇرۇپ ئاينى سۈزۈك تاڭدەك ياشاپ كەلدىڭ ، ئۆزۈڭنى ئەيلىبان قۇربان كۆڭۈللەرنى ياماپ كەلدىڭ . ئەجەم تامغان باياۋانغا شېرىلداپ ھېكمىتىڭ ئاقتى ، قۇياشنىڭ مەڭزىگە قونماق ئۈچۈن جاننى ئاتاپ كەلدىڭ . ۋۇجۇدۇڭ كۈي پىراقىدا يېنىپ ئاتەشكە ئايلاندى ، گۇگۇمنىڭ باغرىغا ھەردەم گويا نۇردەك تاراپ كەلدىڭ . كېچە «زەڭگەر خىيال» بىرلە «كۈمۈش ئاخشامنى ۋاراقلاپ»، «ئىشىق سەۋدالىرى» ئىچرە زۇھەل يۇلتۇز ساناپ كەلدىڭ . ئەجەپ خەندان ئۇرار بۇلبۇل «ئىچىڭنىڭ بوشلۇقى» ئۆزرە ، باھار باشلاپ زېمىستانغا قاباھەتنى قاماپ كەلدىڭ . تېنىڭنىڭ دەشتىدە ئاھۇ سېنىڭدىن يول سوراپ يۈرمىش ، ئۇلاپ روھلارنى ئەجداتقا بۈيۈك كارۋان ياساپ كەلدىڭ . جەسۇر توغراققا ئوخشايسىز خىياللار بەھرىدە ئۈزسەم يېتۈك قولۋاققا ئوخشايسىز، مۇڭى دولقۇننى تېترەتكەن چىمەن قىرغاققا ئوخشايسىز. ئۇرۇپ خەنجەر شەبىستانغا، قۇياشنى سۇندىڭىز جانغا، قارا تۈن باغرىدىن يانغان لاۋا،چاقماققا ئوخشايسىز . شېكەستە يۇلتۇزۇم قونغاي ناۋاكەش شاخىڭىز ئۆزرە بوران-چاپقۇننى تەۋرەتكەن جەسۇر توغراققا ئوخشايسىز. خۇمار كۆزلۈك قىزىلگۈلگە زىيالار تۆكتىڭىز تاڭدا ، كۆڭۈللەر ئوتلىغان چەكسىز گۈزەل يايلاققا ئوخشايسىز. ئۇتۇپ دوئىلدا شەيتاننى،داۋام چاقناتتىڭىز روھنى، غورۇرنىڭ يىلتىزى ئۆسكەن ئەزىز تۇپراققا ئوخشايسىز. يۈرەكىگە زېمىستاننىڭ قوقاسنى كۆمدىڭىز مەغرۇر، ئۇلۇغ مەنزىلگە تىكلەنگەن بۈيۈك بايراققا ئوخشايسىز. ( قومۇل ئەدەبىياتى ژۇرنىلىنىڭ 2014-يىللىق 2-سانىدىن ئېلىندى)

جانبەر

	ئادىلجاننىڭ سۈزۈك مۇۋەششەھلىرىگە مۇبارەك! ئۇستازلار سالامەت بولغاي!

مىرزائايدىڭ

	غەزەللەرنىڭ تىلىىى ئاممىباپ ،چۇشۇنىشلىك ،راۋان چىقىپتۇ . ئەزىزلەرنىڭ تىنى سالامەت بولغاي .