گاداي: پۇل تاپساڭ

گاداي

	پۇل تاپساڭ (ئابلىز ئوبۇل فونتاننىڭ شۇ ناملىق غەزىلىگە تەقلىد) (1) خەققە ئەمەس، ئۆزۈڭگە پايدىسى بار پۇل تاپساڭ، بوران ئۇچماس ئۆيۈڭدىن، كۈندە باھار پۇل تاپساڭ. «قۇلدەك ئىشلەپ، بەگدە يە» دېگەن ئىكەن كونىلار، پۇلى بارلار ھەرقاچان بولمايدۇ خار، پۇل تاپساڭ. ئېشىكىڭمۇ تۆت چىشلىق بولۇپ ھاڭرار كۈن بويى، قاقاسلىقمۇ كۆزۈڭگە كۈلۈپ باقار، پۇل تاپساڭ. زەنجىرىنى ئۆز قولى بىلەن ئۈزەر مۈشكۈلۈڭ، خوتۇنۇڭغا گېپىڭمۇ ياغدەك ياقار پۇل تاپساڭ. بىكار چىققان گەپ ئەمەس: «باينىڭ ئوغلى سۆزلىسۇن...»، بولامتى ئەل گاچچىنىڭ گېپىگە زار؟ پۇل تاپساڭ. پۇلى بارلار سالىدۇ توكۇرنىمۇ ئۇسۇلغا، پۇلى يوققا بۇ ئالەم شۇنچىلىك تار، پۇل تاپساڭ. ئەركەكنى باش ئەگدۈرگەن يوقسىزلىقنىڭ دەردىدۇر، پەرۋازدا زور لاچىنمۇ ئالدىڭدا سار، پۇل تاپساڭ. دىيەلەيدۇ قېنى كىم، مەيدە مۇشتلاپ ھۆددە قىپ، دۇنيادا ئاھ پۇلغا ئۆچ ئادەمنى بار، پۇل تاپساڭ. شۇڭا گاداي ئايانماي تۆككىن ھالال تەرىڭنى، قىلغىن ھەر چاغ  ئىماننى ئۆزۈڭگە يار، پۇل تاپساڭ. 2015-يىل 25-ئىيۇل، باي (2) ياخشى ئىشقۇ، تەر تۆكۈپ ئەجرىڭ بىلەن پۇل تاپساڭ، بىخ سۈرىدۇ تاشلارمۇ چۆللەر چىمەن، پۇل تاپساڭ. لايغەزەللىك ئەزەلدىن زاتىڭغا خاس خۇي ئەمەس، تىرىشقانغا ئامەتمۇ سالىدۇ زەن، پۇل تاپساڭ. يالاڭ ئاياق يۈرسەڭمۇ يوللار سەندىن ئەيمىنەر، سانچىلالماس پۇتۇڭغا خوخا - تىكەن، پۇل تاپساڭ. «خوش-خوش» دەيدۇ كۆز يەتمەس مۇنارلارمۇ مۇلايىم، ئاشالايسەن تاغلاردىن مەغرۇر-تېمەن، پۇل تاپساڭ. پۇتلاشمايدۇ پايتىماڭ ساما سالساڭ تويلاردا، ئالقىنىڭدا كۈلەر ئاي نازلىق، لېۋەن، پۇل تاپساڭ. بىر چاغلاردا ئۆيۈڭدىن يامانلىغان چاچقانمۇ، ئەمدى دەيدۇ ئۇيالماي، سېنى بەلەن،  پۇل تاپساڭ. كېكەچلىمەي سۆزلەيسەن يانچۇقۇڭدا پۇل بولسا، سۆزلىرىڭمۇ ناۋاتتەك، يوقتۇر ئېۋەن، پۇل تاپساڭ. پۇلۇڭ بولسا ھەرقاچان جاڭگالمۇ ئۇ ئۆز ئۆيۈڭ، نازۇ-نېممەت توشقىچە ئالتۇن لېگەن، پۇل تاپساڭ. شۇڭا گاداي پۇل تاپقىن مېھنەت بىلەن ۋە لېكىن، ئانا يۇرتۇڭ، ئەسلىڭنى ئۇنۇتما سەن، پۇل تاپساڭ!... 2015-يىل 30-ئىيۇل، باي