ﻗﻪﻳﺴﻪر ﺗﯘرﺳﯘن ﺗﻪرﺟﯩﻤﯩﺴﻰ

ﻗﺎﻟﻐﺎﭼﻼرﻣﯘ ﻛﻪﺗﻤﻪﻛﺘﻪ ﺋﯘﭼﯘپ،
    ﻳﺎﭘﺮاﻗﻼرﻣﯘ ﭼﯜﺷﻤﻪﻛﺘﻪ ﻳﻪرﮔﻪ،
    ﺗﻪﻛﻠﻪرﻧﻰ ﮬﻪم ﺑﺎﺳﻤﺎﻗﺘﺎ ﻗﯩﺮو،
    ﺳﻪن ﻧﯧﻤﯩﺸﻘﺎ ﻛﻪﻟﻤﻪﻳﺴﻪن ﻳﻪﻧﻪ.
   
    ﻛﻪل ﺑﺎﻏﺮﯨﻤﻐﺎ ﻗﺎﻳﺘﯩﺪﯨﻦ دﯨﻠﺪار،
    ﻣﯧﮭﺮﯨﻢ ﺑﯩﻠﻪن ﻗﯘﭼﺎﻗﻼپ ﺑﺎﻗﺎي.
    ﻛﯚﻛﺮﯨﻜﯩﯖﮕﻪ ﻗﻮﻳﻐﯩﻦ ﺑﯧﺸﯩﻤﻨﻰ،
    ﺋﯩﻠﻠﯩﻘﻘﯩﻨﻪ ﺑﯩﺮ ﻧﻪﭘﻪس ﺋﺎﻻي.
   
    ﺟﯩﻠﻐﯩﻼر ﮬﻪم ﺑﻮﺳﺘﺎﻧﻼر ﺋﺎرا،
    ﻳﯜرﮔﻪن ﭼﺎﻏﻼر ﺋﯧﺴﯩﯖﺪﯨﻤﯘ ﻳﺎر،
    ﺳﯧﻨﻰ ﺋﯩﮕﯩﺰ ﻛﯚﺗﻪرﮔﻪﻧﻠﯩﺮﯨﻢ
    ﻧﯘرﻏﯘن ﻗﯧﺘﯩﻢ، ﻧﯘرﻏﯘن ﻗﯧﺘﯩﻤﻼر.
   
    ﺑﯘ دۇﻧﻴﺎدا ﻗﯩﺰﻻر ﺋﺎز ﺋﻪﻣﻪس،
    ﻧﯘرﻟﯘق ﻛﯚزﻟﻪر ﻳﯘﻟﺘﯘزدۇر ﮔﻮﻳﺎ...
    ﭼﻪﻛﺴﯩﺰ ﮔﯜزەل ﺑﻮﻟﺴﯩﻤﯘ ﺋﯘﻻر،
    ﺑﯩﺮﻻ ﺳﺎﯕﺎ ﻳﻪﺗﻤﻪﻳﺪۇ ﺋﻪﻣﻤﺎ.
   
    ﭼﯜﻧﻜﻰ ﺳﻪﻧﻼ ﺋﯜزﻟﯜﻛﺴﯩﺰ ﮬﺎﻣﺎن
    ﺗﻮﻟﺪۇرﯨﺴﻪن ﻗﻪﻟﺒﯩﻤﻨﻰ ﻧﯘرﻏﺎ.
    ﺋﻪڭ ﻧﯘراﻧﻪ ﻳﯘﻟﺘﯘزﻣﯘ ﺟﯧﻨﯩﻢ،
    ﮔﯜزەﻟﻠﯩﻜﺘﻪ ﻳﻪﺗﻤﻪﻳﺪۇ ﺳﺎﯕﺎ.
   
    ﻛﯜزﻣﯘ ﻛﻪﻟﺪى ﺑﯩﺮدەﻣﺪە ﻳﯧﺘﯩﭗ،
    ﺧﺎزان ﺑﻮﻟﺪى ﻳﺎﭘﺮاﻗﻼر ﻳﻪﻧﻪ.
    ﺋﯧﺘﯩﺰﻻرﻣﯘ ﻗﺎﻟﺪى ﭼﯚﻟﺪەرەپ،
    ﺳﻪن ﻧﯧﻤﯩﺸﻘﺎ ﻛﻪﻟﻤﻪﻳﺴﻪن ﻳﻪﻧﻪ.
   
    ﺋﻮﺧﺸﺎﺷﻼ ﺑﯩﺮ ﻛﯩﭽﯩﻚ ﻛﻮﭼﯩﺪا...
   
    ﺋﻮﺧﺸﺎﺷﻼ ﺑﯩﺮ ﻛﯩﭽﯩﻚ ﻛﻮﭼﯩﺪا ﻳﻪﻧﻪ،
    ﺋﺎي ﻧﯘرى دﯦﺮﯨﺰە ﺋﺎرا ﻳﺎﻟﺘﯩﺮار،
    ﺑﯩﺮاق ﺳﻪن ﭘﻪردﯨﻨﯩﯔ ﻳﯧﻨﯩﺪا ﺋﻪﺑﻪد
    ﻛﯚزۈﻣﮕﻪ ﭼﯧﻠﯩﻘﯩﭗ ﻗﺎﻟﻤﺎﻳﺴﻪن ﻧﯩﮕﺎر.
   
    ﭼﯧﭽﻪﻛﻠﻪپ ﺗﯘرۇﭘﺘﯘ ﻣﯩﯟﯨﻠﻪر ﻳﻪﻧﻪ،
    ﻗﺎﺷﺎﻏﺎ ﺷﯧﺨﯩﻨﻰ ﺳﻮزۇپ ﺑﯩﻤﺎﻻل،
    ﺋﺎھ، ﻟﯧﻜﯩﻦ ﺑﯜﮔﯜن ﺷﯘ دەرەخ ﺋﺎﺳﺘﯩﺪﯨﻦ،
    ﺳﯧﻨﯩﻼ ﺋﯘﭼﯘرۇپ ﻛﯧﺘﯩﭙﺘﯘ ﺷﺎﻣﺎل.
   
    ﻛﯚزﻟﯩﺮﯨﯔ ﺋﻮﺧﺸﯩﻤﺎس ﺋﯩﻠﮕﯩﺮﻛﯩﮕﻪ ﮬﻪم،
    ﺋﯚزﮔﯩﺮﯨﭗ ﻛﯧﺘﯩﭙﺘﯘ ﻗﻪﻟﺒﯩﯔ ﮬﻪﺳﺴﯩﻠﻪپ،
    ﺋﺎھ، ﺑﯩﺮاق ﻣﻪن ﭘﻪﻗﻪت ﺋﺎۋاﻟﻘﯩﺪەﻛﻼ،
    ﺗﻮﺧﺘﯩﻤﺎي ﻛﻮﭼﺎﯕﺪا ﻳﯜرﯨﻴﻤﻪن ﺗﯩﻨﻪپ.
   
    ﺋﯧﺴﯩﻤﺪە، ﺳﻪن ﻳﯧﻨﯩﻚ ﻗﻪدەﻣﻠﻪر ﺑﯩﻠﻪن،
    ﺷﯘ ﻗﻪدەر ﻣﯘﻻﻳﯩﻢ، ﻟﻪرزان ﮬﻪر ﻗﯧﺘﯩﻢ،
    ﺑﺎراﻗﺴﺎن ﺋﻮرﻣﺎﻧﻨﯩﯔ ﺳﺎﻳﯩﺴﻰ ﺋﺎرا،
    ﻳﯧﻘﯩﻨﻼپ ﻛﯧﻠﻪﺗﺘﯩﯔ ﻳﯧﻨﯩﻤﻐﺎ ﺟﯧﻨﯩﻢ.
   
    ﺑﺎﺷﻠﯩﺮﯨﯔ ﺋﺎﻻﺗﺘﻰ ﻛﯚﻛﺴﯜﻣﺪﯨﻦ ﺋﻮرۇن،
    ﻛﯧﺘﻪﺗﺘﯘق دۇﻧﻴﺎﻧﻰ ﺋﯘﻧﺘﯘﭘﻼ زﯨﻨﮭﺎر،
    ﺳﯜﻛﯜﺗﻜﻪ ﭘﺎﺗﻘﺎﻧﭽﻪ ﺋﻮﻟﺘﯘرۇپ ﻳﻪﻧﻪ،
    ﺋﯚزﺋﺎرا ﻣﯘﮬﻪﺑﺒﻪت ﻗﯩﻼﺗﺘﯘق ﺋﯩﺰﮬﺎر.
   
    ﺷﯘ ﺋﻮﺗﻠﯘق ﺳﯜﻳﯜﺷﻠﻪر ﺟﺎۋاب ﺋﻮرﻧﯩﺪا،
    دﯨﻠﺪﯨﻜﻰ ﺳﯚزﻟﻪرﻧﻰ ﻗﯩﻼﺗﺘﻰ ﺑﺎﻳﺎن،
    دۇﻧﻴﺎﻧﯩﯔ ﮬﻪرﻗﺎﻧﺪاق ﺋﯩﺸﻠﯩﺮى ﭘﻪﻗﻪت،
    ﺋﯧﺴﯩﯖﮕﻪ ﻛﻪﻟﻤﻪﻳﺘﺘﻰ ﺷﯘ ﭼﺎﻏﺪا ﺟﺎﻧﺎن.
   
    ﺋﺎزدۇردى ﺑﯘ ﮬﺎﻳﺎت، ﺑﯩﻠﻤﯩﺪﯨﻢ ﭘﻪﻗﻪت،
    ﺳﺎﻳﻪﻣﮕﻪ ﺋﻪﮔﯩﺸﯩﭗ ﻣﯧﯖﯩﺸﻨﻰ ﺗﻪﻛﺮار،
    ۋە ﻳﺎﻛﻰ ﻗﯩﺰﻻرﻧﯩﯔ ﻗﻪﺳﻪﻣﻠﯩﺮﯨﮕﻪ
    ﺋﯩﺸﯩﻨﯩﭗ ﻗﯧﻠﯩﺸﻨﻰ، ﺋﻮﺧﺸﺎﺷﺘﯘر ﺑﯘﻻر.
   
    ﺋﯩﻠﮕﯩﺮﻛﻰ ﭼﺎﻏﻼرﻏﺎ ﺋﻮﺧﺸﺎش ﺷﯘ ﻗﻪدەر،
    ﭘﻪردﯨﻨﻰ ﺗﯩﺘﺮﯨﺘﻪر ﺋﯩﻠﻠﯩﻖ ﺷﺎﻣﺎﻟﻼر.
    ﺑﯩﺮاق ﺳﻪن ﭘﻪردﯨﻨﯩﯔ ﻳﯧﻨﯩﺪا ﺋﻪﺑﻪد
    ﻛﯚزۈﻣﮕﻪ ﭼﯧﻠﯩﻘﯩﭗ ﻗﺎﻟﻤﺎﻳﺴﻪن ﻧﯩﮕﺎر.
   
    ﺋﻪﮔﻪر
   
    دﯦﺮﯨﺰﯨﮕﻪ ﺗﻪﮔﺴﻪ دەرەخ ﺷﺎﺧﻠﯩﺮى ﺋﻪﮔﻪر،
    ﺋﯩﻐﺎﯕﻠﯩﺴﺎ ﺷﺎﻣﺎل ﭼﯩﻘﯩﭗ ۋە ﻳﺎﻛﻰ ﺗﯧﺮەك،
    ﺗﯘﻳﺪۇرﻣﺎﺳﺘﯩﻦ ﺋﯧﻠﯩﭗ ﻛﯧﻠﯩﭗ ﻳﯧﻨﯩﻤﻐﺎ ﺳﯧﻨﻰ،
    ﺳﯧﻐﯩﻨﯩﺸﻨﯩﯔ ﺋﻮﺗﻠﯩﺮﯨﻐﺎ ﺗﺎﺷﻼﻳﺪۇ ﻳﯜرەك.
   
    ﻛﯚل ﻳﯜزﯨﻨﻰ ﻳﺎﻟﺘﯩﺮاﺗﺴﺎ ﻳﯘﻟﺘﯘزﻻر ﺋﻪﮔﻪر،
    ﺳﯘ ﺋﺎﺳﺘﯩﻐﺎ ﻳﻪﺗﻜﻪن ﭼﺎﻏﺪا ﻧﯘرﻟﯩﺮى ﺗﺎﻣﺎم،
    ﺋﺎزاﺑﯩﻤﻨﻰ ﻳﯧﻨﯩﻜﻠﯩﺘﯩﭗ ﺑﯘﻧﺪا ﺋﺎز _ ﺗﻮﻻ،
    ﺑﯧﻐﯩﺸﻼﻳﺪۇ ۋۇﺟﯘدۇﻣﻐﺎ ﺧﯘﺷﺎﻟﻠﯩﻖ _ ﺋﺎرام.
   
    ﻗﺎت _ ﻗﺎت ﺑﯘﻟﯘت ﻛﻪﺗﺴﻪ ﺗﺎراپ ﺋﺎﺳﻤﺎﻧﺪﯨﻦ ﺋﻪﮔﻪر،
    ﭼﺎﭼﺴﺎ ﻳﻪﻧﻪ ﻧﯘرﻟﯩﺮﯨﻨﻰ ﺗﯘﻟﯘن ﺋﺎي ﻗﺎﻳﺘﺎ،
    ﺳﯧﻨﻰ ﭼﻪﻛﺴﯩﺰ ﺳﯧﻐﯩﻨﺪۇرار ﺑﯘﻧﯩﯔ ﮬﻪﻣﻤﯩﺴﻰ،
    ﺋﯚﭼﻤﻪس ﻣﻪﯕﮕﯜ ﻳﯜرەﻛﺘﯩﻜﻰ ﮬﺎرارەت _ ﻻۋا.
   
    ﻛﻪﭼﻘﯘرۇن ﺗﯚﭘﯩﻠﯩﻜﺘﻪ
   
    دۆﯕﺪە ﻳﺎﯕﺮار ﺋﻪﻟﻪﻣﻠﯩﻚ ﻧﻪي ﺋﯜﻧﻰ ﻛﻪﭼﻘﯘرۇن،
    ﻗﻮﻳﻼر ﻣﺎﯕﺎر دۆﯕﮕﻪ ﻗﺎراپ، ﻳﯘﻟﺘﯘز ﻧﯘر ﭼﺎﭼﺎر.
    ﺑﯘﻟﺪۇﻗﻼﻳﺪۇ ﺳﯜزۈك ﺑﯘﻻق ﺷﯘﻧﺪاق ﻳﯧﻘﯩﻤﻠﯩﻖ،
    ﺳﻪن ﺳﺎﻗﻼﻳﺴﻪن ﻣﯧﻨﻰ دەرەخ ﺋﺎﺳﺘﯩﺪا ﻧﯩﮕﺎر.
   
    ﺧﯩﺴﻠﻪﺗﻠﯩﻚ ﺋﺎي ﻳﯜرەر ﺳﯜزۈك ﺋﺎﺳﻤﺎﻧﺪا ﺋﯜزۈپ،
    ﺑﺎﻗﺎر ﺑﯩﺮ ﺟﯜپ ﻛﯚزۈڭ ﺷﺎﻻڭ ﻳﻮﭘﯘرﻣﺎق ﺋﺎرا.
    ﻳﯘﻟﺘﯘز ﺗﯘرار ﺗﯩﻨﯩﻖ ﺋﺎﺳﻤﺎن ﻗﻪرﯨﺪە ﻳﯧﻨﯩﭗ،
    ﺧﯩﻴﺎﻟﻼرﻏﺎ ﻏﻪرق ﻗﯩﻼر ﺳﯧﻐﯩﻨﯩﺶ ﮔﻮﻳﺎ.
   
    ﺳﻪرﺳﺎن ﺑﯘﻟﯘت ﻗﺎﺗﻠﯩﺮﯨﺪﯨﻦ ﺋﯚﺗﯜپ ﺋﺎي ﻧﯘرى،
    ﻛﻮﻧﺎ _ ﺋﻪﺑﺠﻪق ﭘﯩﺸﺎﻳﯟاﻧﻐﺎ ﺗﯘرار ﻧﯘر ﺑﯧﺮﯨﭗ،
    ﺷﯩﺮ _ ﺷﯩﺮ ﺋﺎۋاز ﭼﯩﻘﯩﺮﯨﺪۇ ﺷﺎﻣﺎﻟﺪا ﻗﯘدۇق،
    ﻧﻪي ﺳﺎداﺳﻰ ﻗﻮﺗﺎﻧﻼرﻏﺎ ﻛﯧﺘﯩﺪۇ ﻛﯩﺮﯨﭗ.
   
    ﭼﯧﻠﯩﻨﻐﺎﻧﺪا ﻗﻮﯕﻐﯘراﻗﻼر، ﮬﺎرﻏﯩﻦ ﻛﯩﺸﯩﻠﻪر
    ﺋﻮرﻏﺎﻗﻼرﻧﻰ ﻛﯚﺗﯜرۈﺷﯜپ ﺋﯧﺘﯩﺰدﯨﻦ ﻳﺎﻧﺎر،
    ﺗﯜﻧﻨﻰ ﻳﯧﺮﯨﭗ ﺋﯚﺗﻜﻪﻧﺪە ﻣﯩﺲ ﻗﻮﯕﻐﯘراق ﺋﯜﻧﻰ،
    ﺳﯚﻳﮕﯜ ﺋﻮﺗﻰ ﻳﯜرﯨﻜﯩﻤﮕﻪ ﺗﯘﺗﯩﺸﯩﭗ ﺋﺎﻻر.
   
    ﺋﺎھ، ﺳﯜﻛﯜﺗﻜﻪ ﭘﺎﺗﺎر ﺟﯩﻤﺠﯩﺖ ﺟﯩﻠﻐﯩﺪا ﻳﯧﺰا،
    ﺋﺎﻟﺪﯨﺮاﻳﻤﻪن ﻣﻪن ﻳﯧﻨﯩﯖﻐﺎ ﺑﯧﺮﯨﺸﻘﺎ ﺷﯘﺋﺎن.
    ﭘﯜﺗﻜﯜل ﻛﯧﭽﻪ ﺋﺎﻛﺎﺗﺴﯩﻴﻪ ﻳﯧﻨﯩﺪا ﺳﺎﯕﺎ،
    ﺗﻮﺧﺘﯩﻤﺎﺳﺘﯩﻦ ﺳﯚﻳﮕﯜ ﺋﯩﺰﮬﺎر ﻗﯩﻠﯩﻤﻪن ﺟﺎﻧﺎن.
   
    ﺗﯘرﻏﺎن ﭼﺎﻏﺪا ﺑﺎﺷﻠﯩﺮﯨﻤﯩﺰ ﺗﯧﮕﯩﭗ ﺋﯚزﺋﺎرا،
    ﭼﯜﺷﻜﻪ ﻏﻪرق ﺑﻮﻟﯘپ ﻛﻮﻧﺎ دەرەخ ﺋﺎﺳﺘﯩﺪا.
    ﺑﯘﻧﺪاق ﮔﯜزەل ﻛﯧﭽﻪ ﭼﯩﻘﺴﯘن ﻛﯩﻤﻨﯩﯔ ﺋﯧﺴﯩﺪﯨﻦ،
    ﺟﺎن ﺗﻪﺳﻪددۇق ﺋﻪﻳﻠﯩﻤﯩﺴﯘن ﻳﻪﻧﻪ ﻛﯩﻢ ﺋﺎﯕﺎ.
   
    ﻳﯘﻟﺘﯘزﻻر
   
    ﻳﻪﺗﻤﻪﻛﻜﻪ ﮬﯧﻠﯩﻼ ﻳﺎﻧﻐﺎن ﻳﯘﻟﺘﯘزﻏﺎ،
    ﺑﯩﺮ ﺋﯘزۇن ﻣﯘﺳﺎﭘﻪ ﺑﯧﺴﯩﻼر ﮬﺎﻣﺎن،
    ﺗﯜﻣﻪن ﻣﯩﯔ ﻳﯩﻠﻼردﯨﻦ ﺑﯘﻳﺎﻧﻘﻰ ﻧﯘرى
    ﺋﻪﻣﺪﯨﻼ ﭘﺎرﻻﺷﻘﺎ ﺑﺎﺷﻠﯩﺪى ﺋﺎران.
   
    ﻳﯘﻟﺘﯘزﻻر ﺑﺎﻟﺪۇرﻻ ﺳﻪﭘﻪرﮔﻪ ﻣﯧﯖﯩﭗ،
    ﻛﯚك ﺋﺎﺳﻤﺎن ﺑﺎﻏﺮﯨﺪا ﺗﯘرﻏﺎن ﻣﯚﻛﯜﻧﯜپ،
    ۋە ﻟﯧﻜﯩﻦ ﻛﯚزﯨﻤﯩﺰ ﻳﻪﺗﻜﻪن ﻳﻪرﮔﯩﭽﻪ
    ﺋﺎھ، ﺋﯘﻧﯩﯔ ﻧﯘرﻟﯩﺮى ﺗﯘرار ﺗﯚﻛﯜﻟﯜپ.
   
    ﻳﯘﻟﺘﯘزﻧﯩﯔ ﻳﻮﻗﺎﻟﻐﺎن ﺳﺎﻳﯩﺴﻰ ﺋﺎﺳﺘﺎ
    ﺑﻮﻟﻤﺎﻗﺘﺎ ﺑﯩﭙﺎﻳﺎن ﻛﯚﻛﺘﻪ ﻧﺎﻣﺎﻳﺎن،
    ﻳﺎﻧﺎﺗﺘﻰ ﺑﯘرۇن ﺋﯘ ﻛﯚرۈﻧﻤﯩﺴﯩﻤﯘ،
    ﻳﻮق ﻟﯧﻜﯩﻦ ﺑﯩﺰ ﮬﺎزﯨﺮ ﻛﯚرﺳﻪﻛﻤﯘ ﺋﺎﺳﺎن.
   
    ﺷﯘﯕﻼﺷﻘﺎ ﺳﯧﻐﯩﻨﯩﺶ ﺋﻮﺗﻠﯩﺮى ﺋﯚﭼﯜپ،
    ﺗﯜﻧﺪﯨﻜﻰ ﺋﺎزاﺑﺘﯩﻦ ﻗﯘﺗﯘﻟﺴﺎﻗﻤﯘ ﻳﺎر،
    ﺷﯘﻧﺪاﻗﻼ ﻣﯘﮬﻪﺑﺒﻪت ﺗﺎﭘﺴﯩﻤﯘ زاۋال،
    ﻳﻪﻧﯩﻼ ﻛﯚﯕﯜﻟﻨﻰ ﻳﻮرۇﺗﯘپ ﺗﯘرار.
   
  ﺳﯘرﻛﻮف (ﺳﺎﺑﯩﻖ ﺳﻮۋﯨﺖ ﺋﯩﺘﺘﯩﭙﺎﻗﻰ)
    ﺧﻪت
    ﻳﺎز ﻛﯜﻧﻠﯩﺮى ﮬﺎۋا ﺑﻪك ﺋﻮﭼﯘق،
    ﻻﭼﯩﻦ ﺗﯘرار ﻳﯧﻨﯩﻚ ﭘﻪر ﻗﯧﻘﯩﭗ.
    ﻣﯧﻨﻰ ﺋﯘﻧﺘﯘپ ﻗﺎﻟﺪﯨﯖﻤﯘ ﺟﯧﻨﯩﻢ،
    ﺋﻪۋەﺗﻤﯩﺪﯨﯔ ﻣﺎﯕﺎ ﺧﻪت ﻳﯧﺰﯨﭗ.
   
    ﺑﯩﺮ ﮬﻪﻳﯟەﺗﻠﯩﻚ ﻧﺎﺧﺸﺎ ﺗﺎڭ ﺳﻪﮬﻪر،
    ﺑﯩﺰﻧﻰ ﺟﻪﯕﮕﻪ ﺑﺎﺷﻼﻳﺪۇ ﮬﺎﻣﺎن.
    ﮬﻪﺳﺮﯨﺘﯩﻨﻰ ﮔﺎرﻣﯘن ﻳﯧﺰﯨﻨﯩﯔ
    ﮔﯘﮔﯘﻣﺪﯨﻼ ﺋﻪﻳﻠﻪﻳﺪۇ ﺑﺎﻳﺎن.
   
    ﻳﺎدﯨﻤﺪا ﺑﺎر ﺗﯧﺮەك ﺷﺎﺧﻠﯩﺮى
    ﻳﯧﻴﯩﻼﺗﺘﻰ ﻛﻪﭘﻪﻣﮕﻪ راﺳﺎ،
    ﺋﻮﻟﺘﯘرۇﺷﻨﻰ ﻗﯩﻼﺗﺘﯩﻢ ﺧﯩﻴﺎل،
    ﮬﻪﻣﺮاھ ﺑﻮﻟﯘپ ﻛﯜن ﺑﻮﻳﻰ ﺳﺎﯕﺎ.
   
    ﮔﺎزارﻣﯩﻨﯩﯔ ﻳﻮﻟﻰ ﺗﯜﭘﻤﯘﺗﯜز،
    ﻳﻮل ﺑﻮﻳﯩﺪا رەت _ رەت ﻗﺎرﯨﻐﺎي.
    ﺳﯧﻨﯩﯔ ﺧﯧﺘﯩﯔ ﺑﺎرﻣﯩﺪۇ ﺟﯧﻨﯩﻢ،
    ﻣﻪن ﺋﺎﻟﺪﯨﺮاپ ﭼﯧﺪﯨﺮﻏﺎ ﺑﺎراي.
         
    ﺋﺎﻳﺮﯨﻠﯩﺶ

    ﺳﯘ ﭼﯩﻘﯩﺪۇ ﻗﯘدۇﻗﺘﯩﻦ ﺋﯧﻘﯩﭗ،
    ﺋﺎزاب ﻗﺎﻻر دﯨﻠﯩﻤﺪا ﺑﯩﺮاق.
    دﯦﯖﯩﺰﭼﯩﻨﻰ ﺋﯘزۇﺗﯘپ ﻗﻮﻳﯘپ،
    ﺋﺎزاﺑﻼﻧﺪﯨﻢ ﺋﯘزاق ﺑﻪك ﺋﯘزاق.
   
    ﺑﻪردى ﭼﻮﯕﻘﯘر ﻳﯜرەﻛﺘﯩﻦ ﻗﻪﺳﻪم،
    ﺳﺎداﻗﻪﺗﻤﻪن ﺷﯘ ﻳﺎرﯨﻢ ﻣﺎﯕﺎ.
    ﺳﯚﻳﯜﺷﻠﻪردﯨﻦ ﻛﯚﻳﺪى ﻟﻪۋﻟﯩﺮﯨﻢ،
    ﺳﯚﻳﮕﻪﻧﺪە ﺋﯘ ﻣﯧﯖﯩﺶ ﺋﺎﻟﺪﯨﺪا.
   
    ﻛﻪﺗﺘﻰ ﻳﯧﻨﯩﻚ ﻗﻪدەﻣﻠﻪر ﺑﯩﻠﻪن،
    دوﻟﻘﯘﻧﻠﯩﻐﺎن ﺑﯘﻏﺪاﻳﻠﯩﻖ ﺋﺎرا.
    ﺑﯘﻟﯘﺗﻼرﻧﻰ ﻗﯩﻼر ﺳﯜﭘﺴﯜزۈك،
    ﺋﺎﺳﺘﺎ _ ﺋﺎﺳﺘﺎ ﭼﺎﻗﻨﯩﻐﺎن زﯨﻴﺎ.
   
    ﺋﯜﻟﭙﻪﺗﻠﯩﺮﯨﻢ ﺗﯩﺮاﻛﺘﯘر ﺑﯩﻠﻪن
    ﭼﯩﺘﻼﻗﻼردا ﺋﻮﻳﻨﺎﻳﺪۇ ﺋﯘﺳﺴﯘل.
    ﻧﺎﺧﺸﺎ ﺋﯧﻴﺘﯩﭗ ﺑﻪرﻣﻪﻛﺘﻪ ﻣﺎﯕﺎ،
    ﺋﻪﺗﺮاﭘﻼردا ﭼﺎڭ ﺳﯧﻠﯩﭗ ﺑﯘﻟﺒﯘل.
   
    ﻗﯘﺷﻼر ﻳﯧﻨﯩﻚ ﻗﺎﻗﻘﺎﻧﺪەك ﻗﺎﻧﺎت،
    ﺋﯧﻘﯩﻦ ﺳﯘدا ﺗﯘرﻏﺎﻧﺪەك ﮔﯩﻴﺎھ،
    ﻳﯜرەﻛﺘﯩﻜﻰ ﺳﯚزۈﻣﻨﻰ ﭘﻪﻗﻪت،
    ﺑﺎﻳﺎن ﺋﻪﻳﻠﻪر ﺋﺎﺷﯘ ﻧﺎﺧﺸﯩﻼ.
   
    ﮬﺎۋا ﺷﯘﻧﺪاق ﺋﻮﭼﯘق ﺑﯩﺮ ﻛﯜﻧﻰ،
    ﻳﺎرﯨﻢ ﻗﺎﻳﺘﯩﭗ ﻛﯧﻠﯩﺪۇ ﮬﺎﻣﺎن.
    ﺳﯘ ﭼﯩﻘﯩﺪۇ ﻗﯘدۇﻗﺘﯩﻦ ﺋﯧﻘﯩﭗ،
    ﮔﯜل ﺋﯧﭽﯩﻼر ﻗﻪﻟﺒﯩﻤﺪە ﺷﯘﺋﺎن.
   
    ﻳﺎز ﻧﺎﺧﺸﯩﺴﻰ
   
    ﺋﯩﮕﯩﺰ _ ﺋﯩﮕﯩﺰ ﭼﯩﺘﻼق ﻛﻪﻳﻨﯩﺪە،
    ﺑﯚﻟﺪۈرﮔﻪﻧﻠﻪر ﺋﯧﭽﯩﻠﺪى ﺋﺎۋال.
    ﻛﻪﻧﺖ ﺑﻮﻳﻠﯩﻐﺎن ﭼﯩﻐﯩﺮ ﻳﻮل ﺋﺎرا،
    ﻳﯧﻨﯩﻤﯩﺰﻏﺎ ﻛﯧﻠﯩﺪۇ ۋﯨﺴﺎل.
   
    ﺗﻪﻗﺪﯨﺮ ﻛﻪﻟﺪى ﺋﺎﻟﺘﯘن رەڭ ﺑﯩﻠﻪن،
    ﻳﻮﺷﯘرۇﻧﻐﺎن ﺋﻮرﻣﺎﻧﺪﯨﻦ ﭼﯩﻘﯩﭗ.
    ﺧﯘﺷﺎﻟﻠﯩﻘﻤﯘ ﻛﻪﻟﺪى ﮔﯜﻟﻠﻪرﻧﻰ
    ﭘﻪرﯨﻠﻪرﻧﯩﯔ ﭼﯧﻜﯩﮕﻪ ﻗﯩﺴﯩﭗ.
   
    ﺋﯚرﻟﻪپ ﻛﯚﻛﻜﻪ ﻳﺎﯕﺮاق ﻧﺎﺧﺸﯩﻤﯩﺰ
    ﻳﯘﻟﺘﯘزﻻرﻏﺎ ﺳﯩﯖﯩﺸﯩﭗ ﻛﯧﺘﻪر.
    ﺑﯘﻟﺒﯘﻟﻼرﻧﯩﯔ ﻛﯜﻳﯩﮕﻪ ﻗﯧﻨﯩﭗ،
    ﮬﻪﻣﺪەم ﺑﻮﻟﯘپ ﻛﻪﺗﺘﻰ ﻳﯜرەﻛﻠﻪر.
         
    ﻳﺎﻣﻐﯘر ﻛﻪﺑﻰ ﭼﯧﭽﯩﻠﻐﺎن ﻳﯘﻟﺘﯘز،
    ﻛﯧﺘﻪر ﻣﯘﯕﻠﯘق ﻧﺎﺧﺸﯩﻐﺎ ﻛﯩﺮﯨﭗ.
    ﺋﯧﺮەﻧﺰاردﯨﻦ ﺋﯚﺗﯜپ ﺋﯩﻜﻜﯩﻤﯩﺰ،
    ﻛﻮﭼﯩﻼردا ﻳﯜرۈﻳﻤﯩﺰ ﻣﯧﯖﯩﭗ.
   
    ﻛﯚﻛﯜش ﻛﻪﻟﮕﻪن ﻗﻮﯕﻐﯘراق ﮔﯜﻟﻰ
    ﺟﯩﻠﻐﯩﻼردا ﺗﯘرار ﺋﯧﭽﯩﻠﯩﭗ.
    ﺑﻪﺧﺖ ﺋﯩﻠﻠﯩﻖ ﻗﻪدەﻣﻠﻪر ﺑﯩﻠﻪن،
    ﺋﺎرﻗﯩﻤﯩﺰدﯨﻦ ﻛﯧﻠﻪر ﺋﻪﮔﯩﺸﯩﭗ.
   
    ﻗﯩﺰ ﻧﺎﺧﺸﯩﺴﻰ
   
    ﺋﺎﻟﻤﺎ ﺑﺎﻏﺪا ﻛﯚرﺳﯩﻤﯘ ﺋﺎﭘﺘﺎپ،
    ﻗﯩﺶ ﭘﻪﺳﻠﯩﺪە ﻗﯩﺰارﻣﺎس ﭘﻪﻗﻪت.
    ﻗﯩﻼر داﺋﯩﻢ ﻗﯩﺰﻻرﻧﻰ ۋەﻳﺮان،
    ۋاﻗﯩﺘﺴﯩﺰﻻ ﻛﻪﻟﮕﻪن ﻣﯘﮬﻪﺑﺒﻪت.
   
    ۋاﻗﯩﺘﺴﯩﺰﻻ ﻛﻪﻟﮕﻪن ﻣﯘﮬﻪﺑﺒﻪت،
    ﺗﻮﻣﯘزدﯨﻜﻰ ﻳﺎﻣﻐﯘردۇر ﮔﻮﻳﺎ.
    ﻳﯜرﯨﻜﯩﻤﻨﻰ ﻗﯩﻼﻟﻤﺎﻳﺪۇ رام،
    ﺋﺎﺷﯘ ﻛﯚﭘﻜﯜك ﻛﯚزﻟﻪر زادﯨﻼ.
   
    ﻛﯚﻳﮕﯩﻦ ﻣﯧﻨﯩﯔ دەرﺗﻠﯩﻚ ﻳﯘﻟﺘﯘزۇم،
    ﻧﺎﺧﺸﯩﻼرﻏﺎ ﺳﺎﻻي ﻣﻪن ﻗﯘﻻق.
    ﺗﻮﻧﯘش ﻗﻪدەم ﺗﯩﯟﯨﺸﻠﯩﺮﯨﻨﻰ
    ﺋﺎﯕﻠﯩﺘﯩﭗ ﻗﻮي ﻣﺎﯕﺎ ﺑﻪك ﺋﯘزاق.
   
    ﺗﺎﻟﻠﯩﺮﯨﻨﻰ ﺗﺎﺷﻼپ ﺋﺎق ﻗﯩﻴﯩﻦ،
    ﺋﯩﮕﯩﻠﻤﻪﻛﺘﻪ دەرﻳﺎﻏﺎ ﺋﺎﺳﺘﺎ.
    ﻳﯜرﯨﻜﯩﻤﮕﻪ ﺑﻪرﮔﯩﻦ ﺗﻪﺳﻪﻟﻠﻰ،
    ﺑﯩﺰ ﻣﺎﯕﻐﺎن ﺷﯘ ﺋﯘزۇن ﻳﻮل ﺋﺎرا.
   
      ﻻۋرﯦﻨﺲ دۇﻧﺒﺎر (ﺋﺎﻣﯧﺮﯨﻜﺎ)
      ﺗﻮﻟﯘﻗﻠﯩﻤﺎ
    ﻣﻪن ﺳﯧﻨﻰ ﺳﯚﻳﮕﻪﭼﻜﻪ ﺋﯘزاق، ﺑﻪك ﺋﯘزاق،
    ﻣﻪن ﺳﯧﻨﻰ ﺳﯚﻳﮕﻪﭼﻜﻪ ﭼﻮﯕﻘﯘر ﺷﯘ ﻗﻪدەر،
    ﭼﯩﻘﯩﭙﺘﯘ ﻣﯧﻨﻰ ﺑﯩﺮ ﻧﺎﺧﺸﯩﭽﻰ ﻗﯩﻠﯩﭗ،
    ﺗﻪﯕﺮﯨﻤﯘ ﮬﺎﻟﯩﻤﻐﺎ ﺋﯧﭽﯩﻨﯩﭗ دﯨﻠﺒﻪر.
   
    ﺷﯘ ﻗﻪدەر ﺋﻪﺳﻪﺑﯩﻲ ﺑﻮﻟﻐﺎﭼﻘﺎ ﺳﯚﻳﮕﯜم،
    ﺷﯘ ﻗﻪدەر ﭘﻪرﯨﺸﺎن ﺋﯧﻴﺘﻘﺎﭼﻘﺎ ﻧﺎﺧﺸﺎ،
    ﺧﯘداﻧﯩﯔ ﺷﻪﭘﻘﯩﺘﻰ ﻣﺎﯕﺎ ﺑﯘ ﻗﯧﺘﯩﻢ،
    ﻣﯘﻗﻪددەس ﺋﯚﻟﯜﻣﻨﻰ ﻗﯩﻠﯩﭙﺘﯘ ﺋﺎﺗﺎ.

    ﺑﯧﻦ ﺟﻮﻧﺴﻮن (ﺋﺎﻣﯧﺮﯨﻜﺎ)

    ﺳﻪن ﻣﯧﻨﻰ ﺳﯚﻳﮕﻪﻧﺪە ﻛﯧﺘﯩﻤﻪن ﺋﯚﻟﯜپ

  ﺳﻪن ﻣﯧﻨﻰ ﺳﯚﻳﮕﻪﻧﺪە ﻛﯧﺘﯩﻤﻪن ﺋﯚﻟﯜپ،
  ﮔﯜزەل دەپ ﺋﻮﻳﻼﻳﺴﻪن ﻣﯧﻨﻰ ﻳﻪﻧﯩﻼ.
  ﻛﯜﻟﻜﯩﻠﻪر ﻟﯧﯟﯨﻤﺪە ﺗﯘرﺳﺎ ﺟﺎراﯕﻼپ،
    ﭼﯧﭽﯩﻤﺪا ﭼﺎﻗﻨﺎﻳﺪۇ ﮔﯜزەل ﻧﯘر _ زﯨﻴﺎ.
 
  ﺳﻪن ﻣﯧﻨﻰ ﺳﯚﻳﮕﻪﻧﺪە ﻛﯧﺘﯩﻤﻪن ﺋﯚﻟﯜپ،
  ﺳﺎﻗﻠﯩﻨﺎر ﺗﯩﭙﺘﯩﻨﯩﭻ ﻛﺎرۋاﺗﺘﺎ ﺑﯩﺮاق
  ﻣﯘردﯨﻐﺎ ﺋﺎﻳﻠﯩﻨﯩﭗ ﺑﻮﻟﺴﺎﻣﻤﯘ ﮬﻪﺗﺘﺎ،
  ﺋﯧﺴﯩﻤﺪﯨﻦ ﭼﯩﻘﻤﺎﻳﺪۇ ﺳﯚﻳﮕﯩﻨﯩﯔ ﺋﯘزاق.
 
  ﺳﻪن ﻣﯧﻨﻰ ﺳﯚﻳﮕﻪﻧﺪە ﻛﯧﺘﯩﻤﻪن ﺋﯚﻟﯜپ،
  ﻳﻪﻧﻪ ﻛﯩﻢ ﻳﺎﺷﺎﺷﻘﺎ ﺋﯩﻨﺘﯩﻠﯩﭗ ﻳﯜرەر،
  ﺳﯚﻳﮕﯜدﯨﻦ ﺋﺎﻟﻐﯘدەك ۋە ﻳﺎﻛﻰ ﺋﺎﯕﺎ
  ﺑﻪرﮔﯜدەك ﮬﯧﭻ ﻧﻪرﺳﻪ ﻗﺎﻟﻤﯩﻐﺎن ﻗﻪدەر.
   
    ﺳﻪن ﻣﯧﻨﻰ ﺳﯚﻳﮕﻪﻧﺪە ﻛﯧﺘﯩﻤﻪن ﺋﯚﻟﯜپ،
    ﺋﺎھ، ﻣﻪﯕﮕﯜ ﻛﯚرﮔﯜم ﻳﻮق، ﻛﯚرﮔﯜم ﻳﻮق ﺑﯩﺮاق
  ﺷﯩﺮﯨﻦ ﮬﻪم ﺳﯚﻳﮕﯜﮔﻪ ﺗﻮﻟﻐﺎن ﻣﯩﻨﯘﺗﻨﯩﯔ
    ﺋﯜن _ ﺗﯩﻨﺴﯩﺰ ﻛﯧﺘﯩﺸﯩﻨﻰ ﻗﻪﻟﺒﯩﻤﺪﯨﻦ ﻳﯩﺮاق.
      بۇ شېئىرلار « دۇنيا ئەدەبىياتى » ژۇرنىلىنىڭ 2007  - يىللىق - 6 سانىدا ئېلان قىلىنغان

[ بۇ يازما manggutax تەرپىدىن 2007-12-10 16:45 دە قا ]