ئەسسالامۇ ئەلەيكۇم تورداشلار. 2008 دەپ ئۆگۈنۈپ قاپتىمەنكەن. 2009 دېيىشكە تازا كۆنەلمىدىم . ۋاقىت مېنى كەينىڭگە قايت دەۋاتامدۇ ياكى مېنىڭ كەينىمگە قايتقۇم كەلدىمۇ ھېچ بىلمىدىم. ئەتراپىمغا قارىسام ھېچقانداق ئۆزگىرىش يوقتەكلا . خۇددى مەن تۈنۈگۈن تۇغۇلغاندەك ،كىچىك ۋاقىتلاردىكى ئىشلار كۆز ئالدىمدىن ھېچ كېتەي دېمەيدۇ . بولدى، جىق سۆزلىمەي تېمىغا كىلەيلى. يەنە شۇ پارچە-پارچە مەزمۇنلار بىلەن قۇملۇقتىن سۇ ئىزدەي....
ھېيت -بايراملاردا خۇيزۇلار بېشىدىن ئاق دوپپىسىنى ئايرىمايدىكەن . خەنزۇلار گۈل چۈشۈرۈلگەن كىيىملەر بىلەن كىيىنىدىكەن ، ئەمما مەن بېشىمغا دوپپا كەيمىدىم ، ئۇچامغا بوۋام كىيگەن چەكمەنلەرنىمۇ كەيمىدىم ، بازاردىن تاللاپ تۇرۇپ غەرپنىڭ يارىشىملىق كىيىملىردىن كەيدىم . ھىچكىم ماڭا سەن ئۇيغۇر بولساڭ مۇشۇ قۇتلۇق كۈنلەردە بولسىمۇ مىللىتىمىزنىڭ كىيمىنى كەي دىمىدى . چۈنكى ئۇلارمۇ ماڭا ئوخشاش ياسانغان ئىدى...
بۈگۈن جۈمەگە تەييارلىق قىلىۋاتسام بىر ياشانغان ئانا ئىشىكىمىزنى چەكتى . ھەم مەندىن ھاجەتخاناڭلارغا كىرىۋالاي دىدى . ئەلۋەتتە بولىدۇ دەپ ھاجەتخانىنى كۆرسىتىپ قويدۇم . ئۇ ئانا چىقىپ مەندىن:'' يەنە يىقىن ئەتراپتا مەسچىد بارمۇ؟''دەپ سورىدى. مەن تەپسىلىي قىلىپ مەھەللىمىزدىكى مەسچىدنىڭ ئورنىنى دەپ بەردىم . ھەم ئۇنىڭدىن نىمە ئۈچۈن مەسچىتكە بارىدىغىننى سورىدىم . ئەسلى ئۇ ئانىنىڭ بالىسى يېقىن ئەتراپتىكى دوختۇرخانىدا ئىكەن . بۇ ئايال مەسچىت ئالدىدا ئازراق بولسىمۇ پۇل يىغاي دەپ ئويلاپتۇ . ئۇ يەنە : ''ئوغلۇم ياتقان دوختۇرخانىنىڭ يېنىدا بىر مەسچىد باركەن.ئۇ يەردە ئولتۇراي دېسەم ئوغلۇم كۆرۈپ قالمىسۇن'' دېدىم دەپلا كۆزىگە ياش ئالدى . ھەي! بۇ ئانا ئەنە شۇ ئوغلىنىڭ يۈزىنى دەپ ناتونۇش كوچىلاردا مەسچىد ئىزدەپ يۈرۈپتۇ ، مۇشۇ قىشنىڭ سوغۇقلىرىدا مەسچىد ئالدىدا ئولتۇرۇپ بالىسىنىڭ كېسىلىنى داۋالىتاي دەپتۇ.....
ئوقۇرمەن ، يەنە قايسىڭىز ئانىڭىزدىن يامانلايسىز؟
تېلىۋىزۇردا بۇ يىل دېھقانلارغا قوش خوشاللىق بولدى ، دېھقانچىلىق ماشىنىسى سېتىۋالسا 30پىرسەنتىنى دۆلەت چىقىرىدۇ ، ئاشلىققا دۆلەت يىغىۋېلىش ھەققى قېتىپ بېرىدۇ دەيدۇ، ئاشۇ بىر نەچچە مو يېرىنى كەتمەن بىلەن ئاغدۇرىۋاتقان دېھقانلار قايسى پۇلىغا دېھقانچىلىق ماشىنىسى سېتىۋالار ، كۈزدە يىغىپ ئاران نەچچە تاغار چىقىدىغان ئاشلىقىغا قانچىلىك پۇل قېتىلپ كېتەر . قەرزگە بوغۇلۇپ قالمىساڭلا بولاتتىغۇ دېھقان ئاكا.
تاغام تۈگەپ كەتكەندە،ئۇنىڭ تېخى ئالتە ياشقا تولمىغان ئىككى بالىسى نېرىقى ئۆيدە ئويناۋاتاتتى ، ئايالى تاغامنىڭ بېشىدا يىغلاپ ئولتۇراتتى . ئانىسى يىغىدا باللىرى ھېچنىمىنى بىلمەي ( كۈلكىدە) ، نەچچە يىللار ئۆتۈپ كەتتى . نەۋرە ئىنىم بىزدىن يېتىرقايدىغان بولۇپ قالدى ، ئۇنى قاچانلا كۆرسەم شۇنداق سۇلغۇن ، چۈنكى بۇ سەبىينىڭ ''دادا'' دەپ ئەركىلەيدىغان دادىسى ئاللىقاچان تۇپراققا ئايلىنىپ كەتكەن ئىدى . جېنىم ساقام ،داداڭ چۈشلىرىڭگە ئانچە-مۇنچە كىرىپ قالامدۇ ؟ دادا دەپ كېچىلەردە ئويغۇنۇپ كېتەمسەن ؟ ئىي پەرزەنتلەر! بىزگە تاغ كەبى ھەيۋەت بىلىنىدىغان دادىلارنى قەدىرلەيلى...
كۈندە ئەتتىگەن ئورنومدىن تۇرۇپ كۈلۈپ كېتىمەن ، چۈنكى مەن ھايات ئىدىم ، يەنە بىر كۈن بولسىمۇ كۈننىڭ سېرىقىنى كۆرەلەيتتىم ، ئەمما كېسەل ئازابى تارتىۋاتقانلار ، ئۆزىنىڭ كۈنلىرىنىڭ ئاز قالغانلىقىنى بىلىدىغانلار ئەتتىگەن تۇرۇپ كۈلەلەرمۇ؟ پەرزەنت ، ئاتا -ئانا ئاياللىرىنىڭ مېھرىگە چىدالارمۇ؟ ئېھ! ھايات بىزنى نىمە كويلارغا سالمىدىڭ ، پۇل ، دۇنيا ، ھەۋەس مانا مۇشۇلار ئۈچۈن قانچە رەت ياش تۆكتۇق ، قانچە رەت كاپىر بولدۇق ،، ئويلاپ قالىمەن ، مېنىمۇ بىر كۈنلەردە ۋىجدان دىگەن نەرسە سەكرەپ چىقىپ گېلىمدىن بوغارمۇ؟
غۇلجىنىڭ خەنزۇ بازىرى دەپ ئاتىلدىغان بىر يېرى بار (بۇ بازاردا سودا قىلدىغانلار ئۈرۈمچى خەلىقئارا چۇڭ بازاردىكى يايما ئاچىدىغان كىشلەرگە ئوخشاپ كىتىدۇ) ، بەزى چاغلاردا بېرىپ ئايلىنىپ كېلىمەن ، ئون تىيىنلىق نەرسىدىن تارتىپ نەچچە مىڭ سوملۇق نەرسىگىچە بولغان ماللارنى تاپقىلى بولىدىغان يەر بۇ . ئۇ يەردە كۆزۈمگە دائىم ئۇچرايدىغان بىر نەچچە ياشانغان كىشىلەر بار . بەزىلىرى بىر سوملۇق سومكا، بەزىلىرى نەچچە تىيىنلىك يىپ-يىڭنە.....دىگەنلەرنى ساتىدۇ ، ئويلاپ قالىمەن ، ئەگەر مۇشۇ ماللىرىدىن كۈنىگە نەچچە ئوننى ساتسىمۇ تاپقان پۇلىغا بىر ۋاق تاماق ئۈچۈن گۆش سېتىۋالالمايدۇ ، مانا مۇشۇ سوغۇقلاردا ئاشۇ كوچىدا كۈن - كۈنلەپ تۇرىدىغان بەندىلەر، ئەمگىكىڭلارغا رازىمۇسىلەر؟ ئېھ، خۇدا ! بەرگەن كۈنلىرىڭگە شۈكرى.....
مەن تونۇيدىغان بىر كىشىنىڭ ( مەلۇم ناھىيىنىڭ باشلىقى) ئىنىسىنى يېقىندا ماشىنا سوقۇۋەتتى ، نەچچە كۈنگە قالمايلا ئۇ كىشى تۆلەم پۇلى ئۈچۇن نۇرغۇن پۇلغا ئېرىشتى . يەنە مەن تونۇيدىغان بىر بالىنىڭ دادىسىنى ئۆتكەن يىلى ماشىنا سوقۇۋەتكەن ،مانا مۇشۇ كەمگىچە بىر تىيىنمۇ تۆلەم پۇلىغا ئېرىشەلمىدى ، ئەرز قىلىپ بارمىغان يىرى قالمىدى ، ئاڭلىسام ھازىر ئۇ بالا ئەرز قىلمايدىغان بوپتۇ . چارچاپ قاپتۇ ، سۇ سايغا ئاقىدۇ ، پۇل بايغا .. راسىتلا شۇنداقمۇ ؟ پۇقرا بولغان گۇناھمۇ؟
قايسى كۈنى توربەتتىن مۇنداق بىر پارچە رەسىمنى ئۇچرىتىپ قالدىم . بىر خەنزۇ ئانا دۈمبىسىگە بالىسىنى تېڭىۋىلىپ ئاياق مايلاۋاتىدۇ ، ئاياق مايلىتىۋاتقىنى بولسا 4ياشلاردىكى بىر كىچىك بالا. ئۇنىڭ يېنىدا ئانسى ئۆرە تۇرىدۇ . ئويلاپ قالدىم، كېيىن مۇشۇ ئىككى بالا چوڭ بولغاندا تەغدىرى يەنە شۇنداق بولارمۇ؟ ياقىلار ئىتەك بولۇپ، ئىتەكلار ياقا بولوپتۇ دىگەندەك بولۇپ قالسىچۇ ؟
مۇنبەرگە قانداق تېما يازسام نادىرلىنار؟ چوقۇم ئۇزۇن بىرەر ئەسەرنى ياكى بىرەر مەشھۇر شەخسنىڭ تەرجىمھالىنى يېزىش كېرەكمۇ؟ ئەگەر ئۇنداق بولسا بۇ ئاسان. پەقەت كومپيۇتېر ئالدىدا بىر نەچچە سائەت ئۇزۇن ئولتۇرۇپ بىرەر كىتابتىن كۆچۈرسەملا بولىدۇ ، ياق بۇ ئويلىغىنىم خاتامۇ قانداق؟ شۇ ئۇزۇن تېمىلارنى يېزىشقىمۇ ئەجىر كېتىدۇ ئەمەسمۇ ؟ ئەمدى گەپنى تېمىدىن ئىنكاسقا يۆتكەي: ئوقۇپ بولۇش ئۈچۈن نەچچە ئون مىنۇت كېتىدىغان ئەسەر توربەت يۈزىگە چىقىپ بىر مىنۇت بولمايلا ئىنكاس چۈشۈپ بولۇپتۇ . توۋا! مۇنبەر دىگەن بۇ يەردە كاللىسى شەمەردەك ئىشلەيدىغان ، مىنۇتىغا نەچچە مىڭ خەت ئوقۇيدىغان دانىشلارنىڭ بارلىقىنى ئۇنتۇپ قاپتىمەن ئەمەسمۇ؟
قىزىمنى ئالىي مەكتەپتە ئوقۇتمايمەن . ئوقۇيمەن دەپ تۇرىۋالسىمۇ ئۆز شەھىرىمدىن چىقارمايمەن ، بالامغا چوقۇم ئۇلۇغلارنى تونۇشتۇرىمەن ، ئايالىمغا نازاكەتلىك بولۇشنى تەكىتلەيمەن . خام خىيال ؟ ئىنسانلار بىر -بىرى بىلەن قېرىشماقتا ، ئامال بار ئۆز رەقىبىنى يەر بىلەن يەكسەن قىلۋەتكۈسى بار ، قويۇپ بەرسەك تۇغۇلمىغان ئەۋلادلارنىمۇ ساق قويمايدۇ . ( داداڭمۇ بازار، ئاناڭمۇ بازار) راستلا مۇشۇ كۈنلەر كېلىپ، بالىلىرىم مېنى سېتىۋىتەرمۇ؟ مىللىتىم تەرەققى قىلىپ مېنى تۇپراققا كۆممەي كۆيدۈرۋېتەرمۇ؟ ئالىي مەكتەپنى ئوقۇپ كەلدىم ، كەتمەن تۇتۇپ كۆكتات تېرىپ جان باقايمىكىن ....
ئۇھ، دۇنيا مېنى چارچىتىپ قويدۇڭ ، كۈندە كاللامدا پىقىرايدىغىنى نەچچە مىڭ خىل خىيال ،تۇنجى مۇھەببىتىمنى ئۇنتۇپ قالغىلى خېلى بولدى،لېكىن تۇنجى ئىشلەپ تاپقان پۇلۇمنى ئۇنتۇپ قالمىدىم . باشقىلاردىن يىگەن تۇنجى تاياقنى ئۇنتۇپ قالدىم، ئەمما مەن تازا ئۇرغان ھېلىقى گۇينى ئۇنتۇپ قالمىدىم . مانا مۇشۇ نەتىجىلىرىم بىلەن يۈزۈمگە كۈلكە يۈگۈرتۈپ كەلمەكتىمەن . كوچىلارنى مۇز تۇتۇپ كېتىپتۇ ، بىر نەچچە ئىشلەمچى سوغۇقتا ( تەرلەپ) تۇرۇپ قار تازىلاۋاتىدۇ ، شۇنچە ئالدىراش ماڭساممۇ مۇزلاپ تۇرىمەن ، مەنمۇ شۇلاردەك تەرلەپ كەتكەن بولسام ھە! ... ئاشلىق تېرىشتىن قورقمىغان دېھقانلار دۆلەتكە ئاشلىق تاپشۇرسا ، ئاشلىق مەھكىمىسىدىكى باشلىقلار بۇ ئاشلىقلارنى قانداق ساقلاشتىن ئەنسىرەيدىكەن ، قىززىق ئىشتە بۇ ....
تۈنۈگۈن تېلىۋىزوردا يەنە بىر قەدىمىي قەبرىنى تاپقانلىقىنى كۆرسەتتى ، ھەي! بىچارە ئىنسانلار ئۆلۆپ سۆڭىكى توپىغا ئايلىنالمىغانلىقتىن يەر تېگىدىمۇ جىمجىت ياتالمىدى ، مانا ئۇنىڭ سۆڭەكلىرىنى ئارخېلوگلار چوتكىلاپ پاك-پاكىزە قىلىپ تەكشۈرۈۋاتىدۇ ، يەنە قانداق تاتقۇلۇقلارنى تارتار، ئەي بىچارە ئىنسان! ئەي بىچارە جەسەت!.
مانا ئالدىراش كېتىپ باراتتىم ، تۇيۇقسىز كۆزۈم يول بويىدا ساڭزا سېتىپ ئولتۇرغان خەنزۇ مومايغا چۇشتى ، توۋا! نەلەردە يۈرۈپ بىزنىڭ نېمەتلىرىمىزنى پىشۇرۇشنى ئۆگىنىۋالغاندۇ ، ھەي جاھاندارچىلىق ، ھەي جاھاندارچىلىق......
«تۇنجى قار» بۇ ئىتوتنى قانچە قېتىم كۆرگىنىمنى ساناپ بېرەلمەيمەن ، ھەر قېتىم كۆرگىنىمدە ئابدۇللانىڭ ''ئىي ئانا'' دېگەن گېپى بىلەن تەڭ كۆزۈمگە ياش تولىدۇ ، بەك ئاجىزلاپ كەتتىممۇ قانداق ؟ يەنە نەچچە كۈن ئىلگىرى ھېلىقى ئانىسىنى ئۇرغان نائەھلىنى كۆردۈم . ئەتە -ئۆگۈن يەنە قانداق ئىشلارنى كۆرەرمەن . ئاتا بولماي تۇرۇپ كەلگۈسى باللىرىمدىن ئەنسىرەپ قالدىم.
ئوتتۇرا شەرقتە ئۇرۇش بولىۋاتىدۇ ، نۇرغۇن بىگۇناھ بالىلار ئۆلۈپ كېتىپ بارىدۇ ، ئەسكەرلەر ئۆلسە قەھرىمان بولىدۇ ، دانالار ئۆلسە ئۇلار ئۈچۈن ئابىدىلەر قاتۇرۇلدۇ ، ئەمما بۇ سەبىلەرگىچۇ؟ يىغا - پىغان ، تېنىغا لايىق كېپەنلىك ...... يەنە ئويلاپ قالىمەن ، بۇ جاھاندا قېرىغىچە ياشاپ، ھارغۇچە گۇناھ بىلەن كەتكەندىن كۆرە مۇشۇنداق ئۆلگەن ياخشىمۇ ؟ تەغدىر -قىسمەت دىگەن شۇ ...
تېلىۋىزوردا بىر ئەما كىشىنى تونۇشتۇردى ، ئۇ مېيىپلار ئولىمپىك مۇسابىقىسىنىڭ ئېچىلىش مۇراسىمىدا ناخشا ئېيتقانىكەن . يەنە ئۇ نەق مەيداندا ئىسپان ، ئىتالىيە، كورىيە تىللىرىدا ناخشا ئېيتىپ بەردى . رىياسەتچى ئۇنىڭدىن:«ئەگەر سىزنىڭ كۆزىڭىز بىر كۈن كۆرگەن بولسا، قانداق ئارزۇلىرىڭىز بار؟» دېسە، ئۇ : «مېنى باققان ئاتا-ئانامنى قانغۇچە كۆرىۋالاتتىم» دەپ جاۋاب بەردى . ئۇھ،،، ئاتا-ئانا دىگەن ھە ، مانا مۇشۇ پەيتتە ئۆزۈمنىڭ ساق-سالامەت تۇرۇپ ئاشۇ ئەما كىشىدەك نەتىجە قازانمىغىنىمدىن خىجىل بولدۇم . ھەم يۈگرەپ چىقىپ ئاتا-ئانامغا زەڭ سېلىپ قارىۋالدىم . چۇنكى بالا-قازا دىگەن ھەش-پەش دېگۈچە كېلىدۇ ،
قۇربان ھېيتمۇ ئۆتۈپ كەتكىلى خېلى بولدى . ئەنە ئاشۇ ھېيتتا ئىچىۋالغان دادىلارنى كۆردۈم ، بەزىلىرى يول بويىدا ياتاتتى ،بەزىلىرى قاۋاقلاردا. شۇنىڭ بىلەن بىرگە خۇداغا مىڭ شۇكرى دېدىم ، چۈنكى مېنىڭ دادام مېنى ئېلىپ ئايەم كۈنىلا قەبرىلەرنى يوقلىغان ، شۇ كېچىسى چوڭلارنى يوقلىغان، ئەتىسى قۇربانلىق سويۇپ ھېيتنى چىرايلىق ئۆتكۈزگەن .
مۇنبەردە ھەر قىسىم ئىشلار بولۇپ تۇرىدىكەن ، قايسى كۈنى بىر تورداش «ئۇيغۇرلۇقۇمدىن تاندىم» دېدى. بوپتۇ ، تانسا تانسۇن، ئۆزىنىڭ ئىشى، دېدىم . يەنە، بەلكىم بۇ بىر قامچا، بىزگە بىرىلگەن سىگنال، دەپ ئويلىدىم ، شۇنىڭ بىلەن بىرگە ئىنكاسلاردىكى ئەخلاق بېتىدىن تاپقىلى بولمايدىغان سۆزلەرنىمۇ كۆردۈم.ھەممە ئادەمنىڭ قىممەت قارىشى،ساپاسى ئوخشىمايدۇ . شۇنداق ،ھەممىمىز ئۆزىمىز قۇرغان رامكا ئىچىدە ياشايمىز.بۇمۇ توغرا،مېنىڭ ئويلىغىنىم سىزنىڭكىگە ئوخشاش بولسا،بۇ جاھاندا يەنە نىمە رەڭگا-رەڭلىك قىلىدۇ.
بىر بالا ئەيدىز بولۇپ ئۆلەي دەپ قالغان ۋاقىتتا ئۆزىنىڭ كۆز گۆھىرىنى ھەقسىز تەقدىم قىپتۇ.شۇنىڭ بىلەن ئىككى ياش قايتا كۆرۈش پۇرسىتىگە ئېرىشىپتۇ. خۇدا پۈتۈن ياراتقان تەننى خەق قانداقمۇ باشقىلارغا بۆلۈپ بېرىپ،ئۇ دۇنياغا گۇناھ بىلەن كېتىشنى خالايدۇ دەيسىز،نىمىلا دېگەن بىلەن باشقىلارغا ئازراق بولسىمۇ نەپ قالدۇرۇپتۇ.
نەچچە يىللار ئىلگىرى< قىزلارنىڭ يېشى مەيدە يانچۇقىدا، ئوغۇللارنىڭ قەسىمى كەينى يانچۇقىدا > دەپ يازغىنىم ئېسىمدە،مانا بۈگۈنكى كۈنگە كەلگەندە بۇ ئىشلار بولۇۋاتىدۇ. نەچچە يىل مۇھەببەتلىشىپ توي قىلغانلار بىر نەچچە يىل ئۆتمەيلا ئاجرىشىپ كېتىۋاتىدۇ. ھەي،بىچارە بالىلار،ئەمدى كىمنى دادا،كىمنى ئاپا دەرسىلەر ، تىرىك ئايرىلىش ئازاب ، بوپتۇ بۇنىڭغىمۇ مەيلى ، نۇرتاي ھاجىم بار ، ساخاۋەتلىك ئاتىلار ، مىھرىبان ئانىلار بار ، شۇلار بېشىڭلارنى سىلار، كۆزۈڭلاردىن ياش ئاقمايدۇ ، بەلكى قان ئاقىدۇ ، شۇ قېنىڭلار بىلەن ئىنساپسىز ئاتا-ئانىلارنىڭ قەلبىنى يۇيۇڭلار.
بىر ئۇخلاپ قوپسام 2009-يىلى بولۇپ كېتىپتۇ،كەينىمگە قاراپ باقتىم،نۇرغۇن ئارمانلار بىچارە قوللىرىنى سۇنۇپ يىغلاپ ياتىدۇ.كۆزۈمدە ھەم بىر قانچە تامچە ياش ،،،،، بەلكىم مەن كۆرمىگەن نۇرغۇن گۈللەر باغچىلاردا ، تاغ باغرىلىرىدا قار ئاستىدا قالغاندۇ،«ھايات قىممەت،30يۈەنگە بىر».....تۇغۇلۇپ قانچە قېتىم ئاھ ئۇردۇم،بۇنى ساناپ باقمىدىم.ھەر يىلى شۇنداق تىرىشىمەن،باشقىلار نىمە دېسە مەيلى،ئۆز يولۇمدا ياشايمەن دەپ تۇرىمەن.يىگىتلىكىم پايخان بولغاندا،قېرىنداشلىرىم قۇربان بولغاندا بېشىمنى تۆۋەن قىلىمەن،نومۇس ئىچىدە< كۈلىمەن >، ھەر قىسىم چېچىلاڭغۇ خىياللار مېنى قوينىغا تارتىدۇ. خۇددى نەشىكەش قاپاق تارتقاندەك،يالىڭاچ قىز ئەركەكلەرنى ئۆزىگە تارتقاندەك، كەمىرىمنى بېلىمگە چىڭ باغلاپ قورساقلىرىمغا ئىز چىقىپ كېتىدۇ. چارچاپ قالدىم. مانا يەنە قار يېغىۋاتىدۇ، ئۈن-تىنسىز ئاسماندىن چۈشىۋاتقان بۇ پەرىگە شۇنداق دېگۈم كېلىدۇ ، تېخىمۇ كۆپرەك ياغقىن،ئۇلار سوغۇقتىن قورقۇپ بولسىمۇ،بەدەنلىرىنى ياپقۇدەك كىيىم كىيسۇن. مۇز تۇتقان كوچىلاردا يۈرگەندە يىقىلىپ كىتىپ بىرەر يېرىم ئاغرىپ كەتمىسۇن دەپ بولسىمۇ بىسسمىللاھ دەپ قەدەم باسسۇن ، ئاتا-ئانىلار بالىلىرنىڭ قوللىرىنى چىڭ تۇتىۋالسۇن.مەڭگۈگە قويۇپ بەرمىگۈدەك تۇتسۇن . سىرتلاردا < ئاشنا > تۇتقانلار ئىسسىق ئۆيىگە كىرگەندە تالانىڭ سوغۇقلىقىنى ھىس قىلسۇن
. - ئاشكار
[ بۇ يازما axkar تەرپىدىن2009-01-10 06:11 AMدە قايتا ]
يېڭى يازمىلىق سەھىپە 
ئادەتتىكى سەھىپە 
مەخپىي سەھىپە 
