ئۇستاز بىز دۇنيادىن ئۆتىمىز سۆزلەپ

ئۇستاز بىز دۇنيادىن ئۆتىمىز سۆزلەپ
ئابدىرىھىم مۇھەممەت

بولاتتى بۇ ئىشتىن ئاچمىساقمۇ گەپ،
بولمىغاچ ئەزەلدىن شىكايەتتە نەپ.
كەلسەكمۇ كورساقنى كۆپتۈرگەننى دەپ،
يەتكەيمۇ دادىمىز بىزلەر ئۇزۇن سەپ.
ئۇستاز بىز دۇنيادىن ئۆتىمىز سۆزلەپ.

ئۇستاز بىز نامىمىز ئۇلۇغدۇر -ئۇلۇغ،
كۈل بولدۇق ساقلاشتا ئوچاقلارغا چوغ.
چاڭگا بىز،قۇش ئەمەس بەرسەكمۇ سۇمرۇغ،
بەرگەيمىز سۈزۈك ماي بولۇپ پەستە دۇغ.
ئۇستاز بىز دۇنيادىن ئۆتىمىز سۆزلەپ.

بار ئازراق قەدرىمىز مۇنبەردىلا نەق،
سۆزلەيمىز سائەتلەپ ئەمەس چايمۇ تەق.
شورايدۇ كۆزلەردىن خۇننى خەت-ۋەرەق،
ھالالدۇر رىسقىمىز -ئەمەستۇر ھەلەق.
ئۇستاز بىز دۇنيادىن ئۆتىمىز سۆزلەپ

قاسساپلار ئالدىدا رىسقىمىز سۆڭەك،
تالاشساق<بېخىل>دەپ تارقايدۇ ئۆسەك.
بارىمىز شۇ تۇرسا بولماققا بوزەك،
بوزەكلەش ھار كەلمەس-بولۇشتۇق كۆنەك.
ئۇستاز بىز دۇنيادىن ئۆتىمىز سۆزلەپ.

ئاخشىمى ئارام يوق ئەتىنىڭ غېمى،
ساقىيدۇ شۇ غەمدە كاللىنىڭ يېغى.
ئاق تۇرسا كانسىپىك غەمسىز كىم قېنى؟
يىلدا بىر چىلىنغاي<غەمچى>نىڭ دېپى،
ئۇستاز بىز دۇنيادىن ئۆتىمىز سۆزلەپ.

ئاق قالسا <قوللانماڭ>يوللىرىڭ كاتاڭ،
تىل ئەمەس كۇپايە پۇل بىلەن جاجاڭ.
خەمەكسىز ئەيلىنەر ئەجرىڭدىن باراڭ،
ھىچكىمگەبىچارە كۆرۈنمەس قاراڭ.
ئۇستاز بىز دۇنيادىن ئۆتىمىز سۆزلەپ.

بىر دەستە ھەر يىلى يازغانلىرىمىز،
مىڭ-مىڭلاپ كىتابتىن قازغانلىرىمىز.
كارۋان بىز يوق يولدىن يانغانلىرىمىز،
بار چارچاپ ئەقلىدىن ئازغانلىرىمىز.
ئۇستاز بىز دۇنيادىن ئۆتىمىز سۆزلەپ.

بولدىلا سۆزلىسەك گېپىمىز تولا ،
سىغمايدۇ بولسمۇ قېپىمىز تولا.
باش تاقىر،
ئەمەستۇر چېچىمىز تولا ،
شۇڭلاشقا يىغلىساق يېشىمىز تولا.
ئۇستاز بىز دۇنيادىن ئۆتىمىز سۆزلەپ.

مەيلىغۇ،ئەۋلاتلار بىلىدۇ بىر كۈنى،
ياد ئەيلەپ ئېغىرراق تىنىدۇ بىر كۈنى.
قەۋرىمىز بېشىغا كېلىدۇ بىر كۈنى،
قەۋرىمىز ئەشۇنداق يېتىدۇ بىر كۈنى.
ئۇستاز بىز دۇنيادىن ئۆتىمىز سۆزلەپ