ئەلشىر ناۋاى

ھىچكىم كۆرۈپ باقمىغان ۋە تەسەۋۋۇر قىلىپ باقمىغان
ئەپلاتۇننىڭ جامىدا مەي ئىچكەن ئادەم
قانداقمۇ قانسۇن رىياللىقتىكى شاراپقا.
پەقەتلا تەسەۋۋۇر قىلىنغان لىكىن دۇنيادا مەۋجۇت بولمىغان
جانانغا كۈيۈپ قالغان ئەر
قانداقمۇ يەتسۇن جاھاننامە ئەينىكىدە كۆرۈنگەن بۇزۇق ئايالقا.
كېمياگەرلىكنىڭ پەقەتلا ئېلىپ كېلىدىغىنى
مۇكەممەللىك ئەمەس بەلكى كامالەتتىنمۇ مۇقەددەس كەمتۈكلۈك
ھەم كۈندە يېڭىلىنىپ تۇردىغان سەرسانلىق ئۇ ھالى خاراپقا.

جاھاننامە ئەينىكىدە كۆرۈنگەن گۈزەل
جۇدا قىلغان چاغدا سېنى ئەقلى-ھوشۇڭدىن
سەنمۇ ئۇنىڭ ئەينىكىدە كۆرۈنگەن ئېزىتقۇسەن.
سەن توقۇغان قىسسەدىكى سىرلىق سارايلار
مەڭگۈ ئۆزگۈرۈشچان يوللىرى بېلەن تۇقۇماقتا سېنى
پەقەت سېنى باش-ئاخىرى يوق ئېزىقىشلار قىلىدۇ خۇرسەن.
قەدىمقى دەۋىر ئەسلىمىلىرى ئايلىنىپ ئەكس ساداغا
قايتقان چاغدا روھىڭنىڭكى ئەڭ چوڭقۇرىدىن
سەن ئەينەكتە ئەكس ئەتكەن ئاخىرقى نۇرسەن.

ھىراتنىڭ قەدىمى كوچىلىرىدىن
كېلىۋاتقان ئەزان ئاۋازى
كېسىپ ئۆتتى ھازىرنىڭ تۆمۈردەك قاتتىق مەۋجۇتلىغىدىن
يول ئالدى كەلگۈسىدىكى مەڭگۈلۈك تامان.
ئۆمرىدە نەچچە قېتىم جابدۇنۇپ
ھەجىگە ئاخىر بارالمىغان ئەلشىر ناۋاى
مەن كۆردۈم ئۆتۈپ كەتتى ھېلىلا ئىشىك ئالدىدىن
چۈنكى ھەممە ۋاقىت ئۇنىڭغا زامان، ھەممە جاي ئۇنىڭغا ماكان.
مەۋجۇتتۇر ئۇ ھەممە شەكىلدە
ئىچكەندىن بېرى شارابى ئەنتەھۇر
مەڭگۈ ئۆلمەسلىك كېسىلىگە بۇلۇپ گىرىپتار
كېزىپ يۈرەر شۇندىن بېرى ئەۋۋەل بىلەن ئاخىر ئارىسىدا سەرسان، سەرگەردان.

ت.شەيىخ