چۈشۈمدە كۈتىمەن سۆيۈلۈشۈمنى
سېغىنىش ئىلكىدە ئەسلىدىم ئۇزاق ،
سىزىلگەچ قەلبىمدە يىگانە سىما.
ساماۋى ھىجراندىن تىلىندى يۈرەك ،
قالغاچقا خىلۋەتتە ئۆزۈملا تەنھا.
ئىشخاناڭ قالدۇرغان شۇ ئەسلىمىگە ،
بىر يالقۇن تۇتاشقان گۈرۈلدەپ دەھشەت.
قەلبىمنى لەرزىگە سالغانتى شۇ دەم ،
ۋۇجۇدوڭ، قېنىڭغا سىڭگەن پەزىلەت.
مىللەت دەپ تىنىمىسىز ئىشلىگەچ دائىم،
قەلبىڭدە ئەرك ئۈچۈن كۆيىدۇ گۈلخان .
سۆڭەككە يەتكەندە ھەتتاكى پىچاق،
بېرىشكە تەييارسەن جاننى قەدىردان .
ئۇسسىساڭ چاي بۇلۇپ قەلبىڭگە سىڭىپ،
سەن كۆيگەن شۇ ئوتنىڭ كۈيىدە كۆيسەم.
باغۋەننىڭ بىر ئۆمۈر گۈل باغقىنىدەك،
سۈيۈمدە سۇغارسام مىھرىمدە كۈتسەم.
ۋە لىكىن سەن ماڭا تەئەللۇق ئەمەس.
ئايان ھەم بۇ پەقەت ۋىسالسىز كۈتۈش.
پەقەتلا قەلبىمدىن تىلەيمەن ساڭا.
مەڭگۈلۈك مۇھەببەت، ئۈنسىز سۈيۈلۈش.
تەنھالىق بوغسىمۇ ھەردەم، ھەر كىچە ،
قەلبىمگە چىكىتتىن سېزىمەن سىنى .
سۆزلېرىڭ، تېنىقىڭ تەسەللى بولغاچ،
چۈشۈمدە كۈتىمەن سۆيۈلۈشۈمنى.
قايتۇرۇپ بەر سۆيۈلۈشۈمنى
باھارغا ئۇلاشماي بۇ كىچە مەجنۇن،
پىراقتا تامامەن كەتمەكتە كۆيۈپ.
ھىجراننىڭ شۇ قىلدەك تامچە لەززىتى ،
قەلبىمنى كۆز ياشتا تۇرماقتا يۇيۇپ.
يېغىغا ھەمرامەن لەززەتسىز كىچە،
نەمدەلگەچ ياستۇقتا يىگانە ئازاپ.
شۇ نازۇك رەنجىتىش، يىتىرقاشلېرىم،
قەلبىڭگە ئۈن- تىنسىز كەتكەچكە تاراپ.
بۇ ئېغىر تۈنلەرنى ئۆتكۈزۈپ يالغۇز.
يالقۇنلۇق يۈرىكىم قىلماقتا خىتاپ.
كەچكەچكە قەلبىمدىن ئېغىر ئۇيۇلۇش،
تۇرىمەن ئازاپتا ئىسمىڭنى يادلاپ..
سەن يەنە ئالدىراش خىزمەت ئۈستىدە،
ئىزدىنىپ ئىلىمگە كەتكەنسەن شۇڭغۇپ.
ۋە ياكى پەرھاتنىڭ تاغ چاپقىنىدەك،
يۈرگەنسەن تاغلاردا قەسىرلەر قۇرۇپ.
كىچىكمەن ساددىمەن ئاشىق بولساممۇ،
ھىجراندىن يۈرۈكۈم لەختە- لەختە قان.
ھەردائىم سېنىلا ئويلاپ قايغۇرۇپ،،
كەچۈر دەپ ساڭىلا سۆزلەيمەن جانان.
سۆيۈشلەر قەلبىمدە كۆيەر گۆرۈلدەپ.
ئاشىقلىق بوغماقتا مېنى ۋاقىتسىز.
ئاھ جىنىم، بەر ماڭا سۆيۈلىشىمنى،
باغرىمغا سىڭدۈرەي سېنى تىۋىشسىز.