تورداشلارغا تەشەككۇرنامە
ئابدۇشۈكۈر ئابدۇكېرىم
2- ئاينىڭ 28- كۈنى باشلانغان مەملىكەت بويىچە 10 مېھرىبان مۇخبىرنى باھالاش پائالىيىتىگە 4- ئاينىڭ 2- كۈنى ئاخىرقى چېكىت قويۇلدى. دەل مۇشۇ ھاياجانلىق مىنۇتلاردا يېڭىلا ئوپراتسىيىدىن چىققان ئوغلۇم بېلىگىيارنىڭ ئاسما ئوكۇل ئېسىلغان بۇدرۇق قوللىرىنى سىيلاپ، ئۇنىڭ ئۇسسۇزلۇق دەستىدىن گەز باغلىغان لەۋلىرىگە قارىغىنىمچە ھەم ئەندىشە، ھەم خۇشاللىق ئارىلاشقان بىر خىل مۇرەككەپ ھېسىيات ئىچىدە زادى قانچە ئۇزۇن ئولتۇرغانلىقمنى ئۆزۈممۇ بىلمەي قالدىم.....
مۇشۇ تاپتا نېمە قىلىشىم كېرەك؟ ئەلۋەتتە، بۇ قېتىمقى باھالاش پائالىيىتى داۋامىدا، بولۇپمۇ 18 كۈنگە سوزۇلغان توردا بىلەت تاشلاش جەريانىدا مېنى قوللىغان ، ماڭا مەدەت ۋە ئىلھام ئاتا قىلغان، ماڭا ئەڭ ساپ، ئەڭ سەمىمىي مۇھەببەت ۋە ئوتلۇق قەلبىنى تەقدىم ئەتكەن ئەشۇ مىڭلىغان، ئونمىڭلىغان پاك ھەم ھېچقانداق تەمەسىز سەبىي قەلىبلەرگە، مەن ئۈچۈن توختاۋسىز بىلەت تاشلاپ تالغان قوللارغا، چارچىغان باشلارغا، مەن ئۈچۈن سەرپ بولغان ئەڭ قىممەتلىك ۋاقىتلارغا رەھسمەت بىلدۈرۈشۈم كېرەك ئىدى. تولىمۇ ئەپسۇس! بالا ئىشقىدا پەرۋانە بولغان قەلبىم قولۇمنى قەلەم ئېلىشقا ھەر قانچە دەۋەت قىلىپمۇ، مۇراد- مەقسىدىگە يېتەلمەي، ئىلاجسىز قالدى.
ئاللاغا مىڭ مەرتىۋە رەھمەت! مانا بۈگۈن ئوغلۇمنى يېتىلەپ دوختۇرخانىدىن چىقتىم. مۇشۇ دەقىقىلەردە ئىزىغا چۈشكەن يۈرىكىم، ئەمىن تاپقان كۆڭلۈم سىلەر(تورداشلار)نى سېغىنماقتا، سىلەرگە تەلپۈنمەكتە. مۇبادا مەن ئۈچۈن يەنە بىر قېتىم قىممەتلىك ۋاقتىڭلارنى ئاجرىتىشنى لايىق كۆرسەڭلار، كەمىنە سىلەرگە بىر- ئىككى كەلىمە يۈرەك سۆزۈمنى، قەلبىمنىڭ چوڭقۇر قايناملىرىدىن ئۇخچۇپ چىققان يۈرەك سۆزلىرىمنى ئېيتىۋالسام!
ئانا مەكتىپىم شىنجاڭ ئۇنىۋېرسىتېتى بىلەن خوشلىشىپ، شىنجاڭ گېزىتخانىسىنىڭ بوسۇغۇسىدىن ئاتلاپ، مۇخبىرلىقنىڭ «قاتتىق نېنى»نى يەۋەتقىنىمىغا ھەش- پەش دېگۈچە 16 يىلدىن ئېشىپتۇ. ئارقامغا قايرىلىپ قاراپ باقسام، «مۇخبىرلىق»تىن ئىبارەت بۇ كەسىپكە بولغان «ئاشىق»لىق ۋەجىدىن 16 يىلدىن بويان ئاپتونوم رايونىمىزدا مەن كىرمىگەن باغ، مەن چىقمىغان تاغ، مەن كەزمىگەن دەشت - چۆل ئاز قاپتۇ. دېھقاننىمۇ، ئالىمنىمۇ، رەئىسنىمۇ زىيارەت قىلىپ ماقالە يېزىپ بېقىپتىمەن. ئىمكانىيەتنىڭ بېرىچە، ئەلنىڭ، ئاۋامنىڭ دەرت- ھالىغا ئاز- تولا بولسىمۇ يېتىشنى ئۆزۈمگە قىبلىنامە قىلىپ، مۇشۇ يولدا مۆدۈرۈپ - چوقۇرۇپ يۈرۈپ كەپتىمەن. مەن ئىزچىل تۈردە بۇ ئىشلارنى بىر مۇخبىرنىڭ بۇرچى دەپ كەلدىم. شۇنداق بولغاچقىمۇ، قىسمەن چاغلاردا يېزا- قىشلاقلارغا، دېھقان- چارۋىچىلار ئارىسىغا بارالماي ئىشخانىدا ئولتۇرۇپ قالسام، خۇددى ئۆزۈمنى بىر گۇناھكاردەك ھېس قىلسام، سومكامنى كۆتۈرۈپ، يېزا - قىشلاقلارغا، چەت، يىراق جايلارغا مۇخبىرلىققا ئاتلانغاندا ئۆزۈمنى خۇددى تويغا ماڭغاندەك خۇشال ھېس قىلىدىغان بولۇپ قالدىم. دەرۋەقە، «ئىسنىڭ ئاچچىقىنى مورا بىلىدۇ» دېگەندەك، مەن مۇخبىرلىقتىن ئېرىشكەن خۇشاللىقلارمۇ، ھەسرەت ۋە كۆز ياشلارمۇ ئاز ئەمەس. بۇلارنى بۇ يەردە بىرمۇبىر تىلغا ئېلىشنى لايىق كۆرمىدىم. بۇ تەسىراتلار توغرىسىدا تورداشلار بىلەن كەڭ- كۇشادە سۆزلىشىدىغان پۇرسەتنىڭ ھامان بىر كۈنى كېلىدىغانلىقىغا ئىشىنىمەن.
مەن 2003- يىلى مەملىكەت بويىچە «سارسقا تاقابىل تۇرۇش تەشۋىقاتىدىكى مۇنەۋۋەر مۇخبىر»، 2007- يىلى ئاپتونوم رايون بويىچە «مۇنەۋۋەر كەسپىي تېخنىكا خادىمى» دېگەن ناملارغا ئېرىشكەندە، بۇلارنى پەقەت ئۆزۈم ئۈچۈن بىر بېسىم دەپلا بىلگەن ئىدىم. چۈنكى «قالپاق»نىڭ چوڭىنى كىيىۋېلىپ، «قالپاققا تۇشلۇق قىرغىز بولمىسا» ئەپلەشمەيدۇ- دە!
سەمىمىي گەپنى ئېيتسام، بۇ قېتىم «مەملىكەت بويىچە 10 مېھرىبان مۇخبىر»نى تاللاش «بەيگە»سىگە چۈشۈپ قېلىشىم راستتىنلا مېنى تەمتىرىتىپ قويدى. مەن بۇ شەرەپنى تالىشىشقا لايىقمۇ- يوق؟! مەن بۇ سۇئال ئۈستىدە خېلى كۆپ ئويلاندىم. پاكىت شۇكى، 16 يىلدا يازغان 3000 پارچىدىن ئارتۇق خەۋەر- ماقالەم ئىچىدىكى 300 پارچىدىن ئارتۇقراقىنىڭ مېيىپلار، ئاجىزلار توغرىسىدا يېزىلغانلىقى، ماڭا ئۇچرىغان، مېنى ئىزدەپ كەلگەن ياردەمگە مۇھتاج، داۋالىنىشقا قۇربى يەتمىگەن كىشىلەر ئۈچۈن قولۇمدىكى مۇخبىرلىق قەلىمىدىن پايدىلىنىپ قىلغان ئاز- تولا، تىلغا ئېلىشقىمۇ ئەرزىمەيدىغان ياردەملىرىم مېنى بۇ «بەيگە» گە سۆرەپ كىرگەن ئىدى.
مېنى ئەڭ كۈچلۈك ھاياجانغا سالغىنى ۋە چوڭقۇر خىياللار دېڭىزىغا غەرق قىلغىنى، مەملىكەت مىقىياسىدا ئېلىپ بېرىلغان بۇ بەيگە جەريانىدا تورداشلارنىڭ ئاجايىپ قىزغىنلىقى، ئويۇشقاقلىقى ۋە ھېچقانداق مەقسەت- مۇددىئا ۋە تەما ئارىلاشمىغان سەمىمىي قوللىشى بولدى. راستىنى ئېيتقاندا، مېنىڭ مەملىكەت بويىچە دەسلەپتە كۆرسىتىلگەن 595 نامزات ئىچىدىن تاللىنىپ، 30 نامزات ئىچىگە كىرگەنلىكىمنىڭ ئۆزىمۇ كەسىپداشلىرىمنىڭ ۋە تورداشلارنىڭ كاتتا نەتىجىسى ئىدى. بىراق، ئويلىمىغان يەردىن توردا بىلەت تاشلاش باشلانغاندىن كېيىن، تەڭرىتېغىنىڭ جەنۇبىي ۋە شىمالىدىكى ھەر مىللەت ئامما، ئىچكىرى ئۆلكىلەردىكى ئالىي مەكتەپ ۋە شىنجاڭ تولۇق ئوتتۇرا سىنىپىدا ئوقۇۋاتقان ئىنى - سىڭىللىرىم يۈكسەك بىر مەسئۇلىيەت ۋە سەمىمىي مېھىر- مۇھەببىتى بىلەن ماڭا قىزغىن بىلەت تاشلاپ، مېنىڭ، ياق، بارلىق كەسپداشلارنىڭ غەلبىسى ئۈچۈن نۇرغۇن زېھنى- قۇۋۋىتى ۋە قىممەتلىك ۋاقتىنى تەقدىم ئەتتى. 18 كۈن جەريانىدا ئۆزلىرىنىڭ ئەڭ قىممەتلىك دەم ئېلىش، خىزمەت ۋە ئۆگىنىش ۋاقىتلىرىنى ئاجرىتىپ، ھەر كۈنى تورغا چىقىپ ماڭا بىلەت تاشلىدى، تونۇش- بىلىشلىرىنى سەپەرۋەر قىلدى، ئىنكاس قالدۇرۇپ ماڭا مەدەت بەردى. يەنە نۇرغۇن تورداشلار «دىيارىم»، «شەبنەم»، «سەلكىن»، «شىنجاڭ لىنيىسى»، «ئىزدىنىش» قاتارلىق تور بىكەتلىرى ئارقىلىق مېنى قۇتلۇقلىدى، ماڭا مەدەت بەردى. بەزى تورداشلار يەنە ئۆز نۆۋىتىدە مېنىڭ خىزمەت، تۇرمۇش ئىشلىرىم توغرىسىدا ياخشى تەكلىپ- پىكىر ۋە تەنقىدلەرنىمۇ ئوتتۇرىغا قويدى. مەن ھەر كۈنى بۇ پىكىرلەرنى كۆرۈپ تۇردۇم. مېنىڭچە، بىر ئادەمنى ھەممە كىشىنىڭ ئوخشاشلا ياخشى دېيىشى ئانچە نورمال ئەھۋال ئەمەس، ئەكسىچە، قارشى پىكىرلەرنىڭ ئوتتۇرىغا چىقىشى ھەقىقىي نورمال ئەھۋال. بۇ پىكىرلەر مېنىڭ كېيىنكى ھاياتلىق قەدەملىرىم ئۈچۈن پايدىلىق.
«ئەجىرنىڭ تېگى ئالتۇن» دېگەندەك، بارلىق تورداشلارنىڭ ئورتاق كۈچ چىقىرىشى بىلەن مەن «مەملىكەت بويىچە 10 مېھرىبان مۇخبىر» قاتارىدىن ئورۇن ئالدىم. خۇددى دوستۇم ئابلىكىم ھەسەن ئېيتقاندەك، بۇ مېنىڭ شەرىپىملا ئەمەس، بارلىق كەسىپداشلارنىڭ، تورداشلارنىڭ شەرىپى. شۇنداق، بۇ شەرەپ ھەممەيلەنگە مەنسۇپ!
مەن بۇ يەردە يۈرىكىمنىڭ ئەڭ چوڭقۇر قاتلىمىدىن چىقىرىپ شۇنداق خىتاب قىلىمەنكى: «بارلىق تورداشلار سىلەرگە كۆپتىن- كۆپ رەھمەت، سىلەر ماڭا نېمىنىڭ مېھىر- مۇھەببەت، سەمىمي تىلەك ۋە قوللاش ئىكەنلىكىنى يەنە بىر قېتىم ئۆگەتتىڭلار، سىلەرنىڭ ئۈمىدىڭلارنى ئاقلاش مېنىڭ باش تارتىپ بولمايدىغان مەسئۇلىيىتىم!»
مەن بۈگۈنمۇ، ئەتىمۇ يەنىلا خەلقىمنىڭ، يۇتۇمنىڭ ئاددىي بىر ئوغلى. خەلقىمنىڭ ئوتىدا كۆيۈپ، سۈيىدە ئېقىش ماڭا ئوخشاش بىر مۇخبىرنىڭ مەڭگۈلۈك بۇرچى!! مەن مانا مۇشۇ بورچ يولىدا داۋاملىق تىرىشىمەن!
ئاخىرىدا بارلىق تورداشلارنىڭ تېنىگە سالامەتلىك، تۇرمۇشىغا بەخت، ئىشلىرىغا ئۇتۇق تىلەش بىلەن بىللە، مەن بىلەن دوست بولۇشنى، پىكىرلىشىشنى خالايدىغان دوستلار سەمىگە تېلفون نومۇرۇم ۋە ئېلخەت ئادرىسىمنى قالدۇردۇم.
ئېلخەت:
xukur330@yahoo.com.cn[ بۇ يازما Diyarim تەرپىدىن 2008-04-09 13:56 دە قايت ]