ھاراقنى جىق ئىچىۋېلىپ، ئېغىر مەست بولۇپ كەتكەن بىر ئادەم ساقچىخانىغا ئېلىپ كېلىندى.ئۇ ئادەم ئۆزىنىڭ جازالىنىدىغانلىقىنى كۆڭلى تۇيۇپ ساقچىدىن سورىدى:
  __ ئاۋۋال سىزدىن بىرنەچچە مەسىلىنى سوراي دېگەنىدىم.
  __ سوراڭ!__ دېدى ساقچى.
  __ ئەگەر مەن جىگدە يېسەم جىنايەت ئۆتكۈزگەن بولامدىم؟
  __ ياق.
  __ ئەگەر مەن يەنە ئازىراق سۇ ئىچسەمچۇ؟
  __ بۇمۇ جىنايەت ھېساپلانمايدۇ.
  __ ئاندىن ئاپتاپسىنىپ ياتسام قانۇنغا خىلاپمۇ؟
  __ ئەلۋەتتە ئۇنداق ئەمەس،__ دېدى ساقچى.
  __ ئۇنداقتا، جىگدىگە ئازىراق سۇ قوشۇپ ئاپتاپتا ئېچىتقان ھاراقنى ئىچسەم، نىمىشقا مېنى بۇ يەرگە ئەكىلىسىز؟ بۇ خىل ھاراقنى ئىچىش سىزنىڭچە قانۇنغا خىلاپمۇ؟__ سورىدى ھېلىقى ئادەم.
  __ ئەپەندى،__ دېدى ساقچى،__ مەنمۇ سىزدىن بىرنەچچە مەسىلىنى سوراي، ئەگەر مەن سىزگە ئازىراق سۇ چاچسام بىر يېرىڭىز ئاغرىمدۇ؟
  __ ئاغرىمايدۇ.
  __ ئەگەر مەن بېشىڭىزغا سېغىز توپا تۆكسەم بېشىڭىز يېرىلىپ كېتەمدۇ؟
  __ ئەلۋەتتە ئۇنداق بولمايمەن.
  __ئۇنداقتا مەن سېغىز توپىغا ئازىراق سۇ قوشۇپ خىش ياساپ، ئاپتاپتا قۇرۇتقاندىن كېيىن، بېشىڭىزغا كۈچەپ ئۇرسام ئاقىۋىتى قانداق بولىدۇ؟
  __ خىش بېشىمنى يارىدۇ، ھەتتا ئۆلۈپ قېلىشىممۇ مۈمكىن،__ دېدى ئۇ ئادەم.
  __ ناھايىتى ياخشى،__ دېدى ساقچى،__ سىز دەۋاتقان ھاراقمۇ مۇشۇنداق، ئەگەر سۇ بىلەن سېغىز توپىدىن ياسالغان خىش باشنى يارسا، ئۇنداقتا سۇ بىلەن جىگدىدىن ياسالغان ھاراقنى ئىچكەندىن كېيىن مەستلىكتە جىدەل تېرىپ قانۇنغا خىلاپلىق قىلىدىغان گەپ.

                            مەنبە:«شىنجاڭ ياشلىرى»ژورنىلى.
                            2008-03-20-11:25.