ئەپەندىمنىڭ باشقىلار تەرىپىدىن گېزىت - ژۇرناللاردا ئېلان قىلىنىپ بولغان ۋە ياكى ئېلان قىلىنىش ئالدىدا تۇرغان ئەسەرلىرىنى ئوغرىلاپ ئېلان قىلدۇرۇپ ئاتالمىش «شائىر» دەپ ئاتىلىپ كەلگەن بىر ئاغىنىسى بىر سورۇندا ئەپەندىمنى گەپكە سېلىپ:
- ئەپەندىم، بەزىلەر «كالا ئوغرىسى» ئەڭ قەبىھ ئوغرى دېسە، يەنە بەزىلەر «ئالتۇن ئوغرىسى» ئەڭ قەبىھ ئوغرى دەيدىكەن، ئەمما مېنىڭچە «بالا ئوغرىسى» ئەڭ قەبىھ ئوغرىمىكىن دەيمەن، شۇنداقمۇ؟ - دەپتۇ.
ئۇزۇندىن بۇيا ئاتالمىش «شائىر» ئاغىنىسىنىڭ ئەدىپىنى بېرىپ قويۇشنى دىلىغا پۈكۈپ كەلگەن ئەپەندىم قىلچە يۈز - خاتىر قىلماستىن:
- مېنىڭچە، بىلىم ئوغرىسىدەك ئەڭ قەبىھ، ئەڭ ۋەھشىي ئوغرى يوق، كالا ئوغرىسى، ئالتۇن ئوغرىسى دېگەنلەر ئۇنىڭ قولىغا سۇمۇ قويۇپ بېرەلمەيدۇ، - دەپتۇ.
ئەپەندىمنىڭ بۇ جاۋابىنى ئاڭلىغان ھېلىقى ئاتالمىش «شائىر» ئاغىنىسى ئىزا تارتقىنىدىن ئۆزىنىڭ گۆشىنى ئۆزى يېگۈدەك بولۇپ كېتىپتۇ. سورۇندىكىلەر بولسا ئەپەندىمگە بارىكاللا ئېيتىپتۇ.