مۇھەببەت قايغۇلىرى ناخشا ئېيتماقتا، ئىلىم - ئىرپان قايغۇلىرى سۆزلىمەكتە، ئارزۇ - ئىستەك قايغۇلىرى پىچىرلىماقتا، نامراتلىق قايغۇلىرى خورسىنماقتا. ئەمما دۇنيادا يەنە بىر خىل قايغۇ باركى، ئۇ مۇھەببەتتىن چوڭقۇر، ئىلىم - ئىرپاندىن يۈكسەك، ئارزۇ - ئىستەكتىن كۈچلۈك، نامراتچىلىقتىن ئاچچىق؛ گەرچە ئۇ جىممىدە تۇرسىمۇ، ئۇنىڭ كۆزلىرى چولپاندەك پارقىراپ تۇرىدۇ.
                                                          *
سەن قوشناڭغا دەردلىرىڭنى ئىزھار قىلغىنىڭدا، ئۇنىڭغا يۈرىكىڭنىڭ بىر پارچىسىنىمۇ بەر. ئەگەر ئۇنىڭ كۆڭۈل - كۆكسى كەڭ بولغىنىدا ساڭا تەشەككۇر بىلدۈرىدۇ؛ ئەگەر كۆڭۈل - كۆكسى تار بولسا ساڭا نەپرەتلىنىدۇ.
                                                        *
ئىلغارلىق بار نەرسىلەرنى ئۆزگەرتىش - ياخشىلاشتا ئەمەس. سادىر بولۇش مۇمكىن بولغان نەرسىلەرگە قاراپ ئىلگىرىلەشتە ئىپادىلىنىدۇ.
                                                        *
جىم بولۇۋېلىش _ چۈمپەردە، ئۇ ئۆزۈڭنىڭ تەكەببۇرلۇقنى يوشۇرىدۇ؛ شىكايەت _ نىقاب، ئۇ چىرايىڭدىكى دەرد - ئەلەمنى يوشۇرىدۇ.
                                                        *
ياۋايى ئادەم ئاچ قالسا دەل - دەرەخلەردىكى مېۋىلەرنى ئۈزۈپ يەيدۇ؛ مەدەنىيەتلىك ئادەم ئاچ قالسا مېۋە ئۈزگەن ئادەمنىڭ قولىدىكى مېۋىنى سېتىۋېلىپ يەيدۇ.
                                                        *
سەنئەت _ ئوچۇق - ئاشكارا ئالەمدىن يوشۇرۇن ئالەمگە تاشلانغان تۇنجى قەدەمدۇر.
                                                      *
بەزى كىشىلەر مېنىڭ كەڭ قورساقلىقىمنى بىلىپ بېقىش ئۈچۈن مېنى قەستەن غەزەپلەندۈرىدۇ.
                                                      *
مەن بىر ئادەمنىڭ قەلبىنى ئۇ ئۆزى ماڭا شەپقەت قىلدىم دېمىسىلا چۈشىنىشكە ئامالسىزمەن.
                                                        *
زېمىن نەپەسلەنسە بىز مەۋجۇت بولۇپ تۇرالايمىز، زېمىن نەپەسنى توختاتسا بىز ئۆلىمىز.
                                                        *
ئادەمنىڭ كۆزى مىكروسكوپ، ئۇ ئالەمنى چوڭ قىلىپ كۆرسىتىدۇ.
                                                      *
مەن قاراملىقنى باتۇرلۇق، سەۋرىنى ئاجىزلىق ھېسابلايدىغان ئادەملەر ئارىسىدا بەختسىزمەن.
                                                        *
بەلكىم بىز ئەڭ مۈشكۈل دېگەن ئىشلار ئەڭ ئاسان ئىشلار بولۇشى مۇمكىن.
                                                      *
كىشىلەر ماڭا: «ئەگەر سەن تاتلىق ئۇخلاۋاتقان قۇلنى كۆرگىنىڭدە، ئۇنى ھەرگىز ئويغاتما، بەلكىم ئۇ ئەركىنلىكنى چۈشەۋاتقاندۇر» دەيدۇ. مەن ئۇلارغا :«ئەگەر سىلەر تاتلىق ئۇخلاۋاتقان قۇلنى كۆرگەندە ئويغىتىپ ئەركىنلىك ھەققىدە سۆزلەپ بېرىڭلار.» دەيمەن.
                                                      *
قارشى تۇرۇش _ ئەڭ تۆۋەن دەرىجىدىكى ئەقىللىق.
                                                      *
گۈزەللىك بىزنى ئەسىر قىلالايدۇ، زىيادە گۈزەللىك بولسا بىزنىمۇ، ئۆزىنىمۇ ئازاد قىلالايدۇ.
                                                      *
قىزغىنلىق _  يانار تاغ، ئۇنىڭ چوققىسىدىن ئارىسالدىلىق لاۋېلىرى چىقمايدۇ.
                                                    *
تۈگمەن تېشىنىڭ ساق ياكى كەمتۈك بولۇشىدىن قەتئىينەزەر، دەريا سۈيى دېڭىزغا قاراپ ئېقىۋېرىدۇ.
                                                      *
ئەدىب پىكىر، ھېسىياتنى سۈرەتكە تارتىپ ئۇنى پىششىقلاپ ئاندىن سۆزلەيدۇ؛ تەتقىقاتچى سۆزلەرنى توپلاپ ئۇنى تەھلىل قىلىپ، ئاندىن تەسىراتلىرىنى بايان قىلىدۇ.
                                                    *
سەن تاماقنى تېز يەيسەن، يولنى ئاستا ماڭىسەن، لېكىن ھەرگىزمۇ تاماقنى پۇتۇڭ بىلەن يېمە، يولنى ئاغزىڭ بىلەن ماڭما!
                                                  *
دۇنيا كۆزۈڭگە كىچىككىنە بولۇپ كۆرۈنگەندىلا سەن چەكسىز خۇشاللىنىسەن ياكى قايغۇرىسەن.
                                                  *
بىلىم - ساڭا چېچىلغان ئۇرۇق، ئەمما ئۇ سېنى ئۇرۇق قىلىپ چاچمايدۇ.
                                                *
يىرگىنىش ئۆزۈمنى قوغداش قورالى بولمىغان ھەر قانداق ۋاقىتتا ھەر قانداق نەرسىدىن يىرگەنگەن ئەمەسمەن؛ ئەمما مەن ئاجىز بولمىساملا ئۇنداق قورالنى ئىشلەتمەيمەن.
                                                *
كىشىلەر مېنىڭ كۆزۈمنى ئۆتكۈر دېيىشىدۇ، چۈنكى مەن ئۇلارنى غەلۋىر تۆشۈكىدىن كۆزىتەرمىشمەن.
                                                *
كىشىلەر ئارىسىدا قاننى كۆرسەتمەيلا جاننى ئالىدىغان جاللاتلار، تۇغما ئوغرىلار، راست گەپلا قىلىدىغان ئالدامچىمۇ بولىدۇ.
                                                *
ئىسپاتلاش زۆرۈر بولغان ھەقىقەت - يېرىم ھەقىقەتتۇر.
                                                *
مېنى نېمە ئۈچۈن يىغلاشنى بىلمەيدىغان ھېكمەتلىك سۆزلەر، كۈلۈشنى بىلمەيدىغان پەلسەپە، بالا ئالدىدا ئېگىلىشنى بىلمەيدىغان ھاكاۋۇرلۇقتىن نېرى بولۇشقا قويمايسىلەر!

ھەرقانچە قىلىپمۇ كۆچۈرەلمىدىم بۇ ئۈنچىلەرنى، ساقلىۋالسام بولاتتى.