سىلى بولغان بولساڭلار ئاقارتىۋېتەتتىڭلار

ئەپەندىمنىڭ غەيۋەت - شىكايەت قىلمىسا تۇرالمايدىغان غەيۋەتخور بىر ئاغىنىسى، ئۇنى كۆرسىمۇ ئانداقچى دەپ غاجايدىكەن، بۇنى كۆرسىمۇ مۇنداقچى دەپ غاجايدىكەن. بىر كۈنى، ئەپەندىم مەھەللىدە كىشىلەر بىلەن پاراڭلىشىپ تۇرسا، بىر ئۆچكە كېلىپ بىر تۈپ دەرەخنى غاجاپ باققان بولسىمۇ، چىشنى ئۆتكۈزەلمەي كېتىپ قاپتۇ. شۇ ئەسنادا ھېلىقى ئاغىنىسى كېلىپ قاپتۇ ۋە:
- ھەي جانىۋار، مۇشۇ كىچىككىنە دەرەخكە چىشىڭنى ئۆتكۈزەلمەي غاجىلىيالمىدىڭ - ھە، - دەپتۇ.
ئاغىنىسىنىڭ جاجىسىنى بېرىشنى ئۇزۇندىن بۇيان كۆڭلىگە پۈكۈپ كەلگەن ئەپەندىم دەرھاللار:
- ئاداش، ئۆچكىنىڭ ئورنىدا سىلەر بولغان بولساڭلار غاجاپ ئاپئاق ئاقارتىۋېتەتتىڭلار - ھە، - دەپتىكەن، كىشىلەر كۈلۈشۈپ كېتىپتۇ.