ئادەم تېنىدىكى كېسەللىكنىڭ ئالدىنى ئالغىلى بولغاندەك، كومپيۇتېر ۋىرۇسىدىنمۇ ساقلانغىلى بولىدۇ. كومپيۇتېرنى ۋىرۇس بىلەن يۇقۇملىنىپ قالمىسۇن دېسەك، ۋىرۇس بىلەن كومپيۇتېر ئوتتۇرىسىدىكى مۇناسىۋەتنى ئامال بار ئۈزۈۋېتىشىمىز لازىم. كومپيۇتېرنى ئىشلەتكەندە، باشقا كومپيۇتېردىكى سانلىق مەلۇماتلارنى كومپيۇتېرىمىزنىڭ قاتتىق دىسكىغا خالىغانچە كۆچۈرمەسلىكىمىز، ناتۇنۇش يۇمشاق دىسكىنى ئىجرا قىلدۇرماسلىقىمىز، ئوغرىلىقچە نەشىر قىلىنغان كومپيۇتېر يۇمشاق ماتېرىياللىرىنىمۇ ئىشلەتمەسلىكىمىز لازىم.
ناۋادا كومپيۇتېردا ۋىرۇس پەيدا بولۇپ قالسا، قانداق قىلىش كېرەك؟ ئۇ چاغدا <ۋىرۇس يوقاتقۇچى يۇمشاق ماتېرىيال> دىن پايدىلىنىش لازىم.
<ۋىرۇس يوقاتقۇچى يۇمشاق ماتېرىيال> بىر خىل مەخسۇس كومپيۇتېر ۋىرۇسىنى تەكشۈرۈش ۋە يوقىتىش ئۈچۈن ئىشلىتىلىدىغان يۇمشاق ماتېرىيالدۇر، كومپيۇتېر مۇتەخەسىسلىرى ۋىرۇس بار پروگراممىلارنى ئانالىز قىلىش، تەتقىق قىلىش ئارقىلىق، <ۋىرۇس تەكشۈرۈش پروگراممىسى> بىلەن <ۋىرۇس يوقىتىش پروگراممىسى> نى تۈزۈپ چىققان. بۇ خىل پروگرامما ئىجرا قىلىنغاندا، كومپيۇتېردىكى ھۆججەت ۋە سانلىق مەلۇماتلارنى تەكشۈرۈپ، ۋىرۇسنى بايقىغان ھامان دەرھال <مەلۇم قىلالايدۇ>، ئاندىن كېيىن <ۋىرۇس يوقىتىش پروگراممىسى> ئارقىلىق ۋىرۇسنى يوقىتالايدۇ. بەزى <ۋىرۇس يوقىتىش پروگراممىلىرى> كومپيۇتېر خىزمەت قىلىۋاتقاندا ھەر ۋاقىت نازارەت قىلىپ، ۋىرۇسنىڭ كىرمەكچى بولغانلىقىنى بايقىسىلا ئۇنى توسۇپ چىقىرىۋېتىدۇ.
يېڭى ۋىرۇسلار توختىماي پەيدا بولۇۋاتقاچقا، <ۋىرۇس يوقىتىش يۇمشاق ماتېرىياللىرى> مۇ ئۈزلۈكسىز <مۇكەممەللىشىشى> كېرەك. شۇنداق بولغاندىلا، ئۇلارنىڭ ۋىرۇس يوقىتىش ئىقتىدارى بارغانسېرى يۇقىرى كۆتۈرۈلىدۇ. >>
