رۇبائىيلار
قۇياشنى ئېتەكتە ياپقىلى بولماس، يېپىشقا ھىچنەرسە تاپقىلى بولماس. رېئاللىق سايەڭگە ئوخشايدۇ ئەينى، ئۇنىڭدىن يىراققا قاچقىلى بولماس. ************ گەپ-سۆزۈڭ دىلىڭنى قىلىدۇ بايان، تىلىڭدىن ساپايىڭ بولىدۇ ئايان، بەزىدە ئويلىماي قىلغان شۇ سۆزۈڭ، ئېپكېلەر ئاقىۋەت ئۆمۈرلۈك زىيان! ************** پەم قىلساڭ قىيىن ئىش بىردەمدە پۈتەر، پەمسىز شۇ ئىشنى بىر ئۆمۈر قىپ ئۆتەر. «ھەر ئىشقا پەم كېرەك،ئۆتۈك ئۈچۈن چەم» ھەركىمگە ئاقىلنىڭ شۇ سۆزى يېتەر ! ************** كۆرىدۇ ھاياتتا ھەركىم ھەر نېمە، شۇڭا سەن ئالدىراپ كۆرمىدىم دېمە. بۇ دۇنيا پايانسىز دېڭىزدۇر بىلسەڭ، تەشۋىشسىز قىرغاققا يېتىمەن دېمە! ************** ئىككى ئىت بەزىدە سۆڭەك تالىشار، سۆڭەك يوق ۋاقىتتا تىنماي يالىشار، بەزىلەر قىلچىلىك مەنپەئەت ئۈچۈن، ھەممىدىن ۋاز كېچىپ ئىتتەك ئادىشار. ************* ئېرىشمەس ھىچكىممۇ قېلىپسىز خىشقا، ئىشلەتكىن ئەقلىڭنى ھەر قانداق ئىشقا. ئاددىيسى،بايقىماي چاينىساڭ لوقما- دەز كېتەر بىردەمدە ئەشۇ ساق چىشقا! ************** چېلىشقان ھەممىسى پەھلىۋان بولماس، ئۇتقانمۇ ئۆمۈرلۈك قەھرىمان بولماس. يېڭىش ۋە يېڭىلىش ھايات قانۇنى، ھىچبىر ئىش ئۇنىڭدىن ھالقىغان بولماس! ************** ئەي ئادەم قىل سۈكۈت،سۆزلىمە يالغان، شۇ يالغان ئوخشار، قار زېمىننى ياپقان. دەم ئۆتمەي كۈن چىقىپ پارلىسا قۇياش، غۇبارسىز شۇ زېمىن بولغۇسى ئايان. ************** بىراۋنى ئۆزۈڭدىن چوڭ بىلىپ كەتمە، ئۆزۈڭنى ئۇنچىلىك خار-زەبۇن ئەتمە. ئىشەنچتىن ئايرىلىپ ياشاش ئۆلۈمدۇر، ئۆزۈڭنى بىۋاقىت قىلمىغىن دەپنە. ************** بايقىساق بۇ دۇنيا مەۋھۇم بىر يېزىق، ئوقۇيمىز ھەر تىلدا، تىزغاندەك تىزىق. ئادەملەر سۆزلەيدۇ،دۇنيا سۆزلىمەس، بىكېرەك ئىدىغۇ پاسىل ۋە سىزىق. ************** مەنبە: ئىجادىيىتىم. | 
يوللىغان ۋاقتى 